Colosenses 2:1-23
2 Xbʼaan naq nawaj naq teekʼe reetal naq qʼaxal yookin xkʼebʼal inqʼe re naq us wanqex laaʼex li wankex aran Laodicea ut laaʼex li toj maajiʼ nekeeril wu.
2 Laaʼin nawaj xkʼojobʼankil leechʼool ut nawaj naq cheejunilex wanqex saʼ junajil rikʼin rahok ut chi joʼkan texbʼihomoʼq, li bʼihomal aʼin aʼan xnawbʼal chi tzʼaqal re ru ut xtawbʼal ru chiʼus li muqmukil naʼlebʼ li nachalk rikʼin li Yos aʼ li Kriist.
3 Rikʼin aʼan muqmu chiʼus chixjunil li xchaqʼalil ru naʼlebʼ ut nawom.
4 Ninye eere aʼin re naq maaʼani tbʼalaqʼinq eere rikʼin li naʼlebʼ li naqʼunbʼesink.
5 Usta moko wankin ta saʼ eeyanq, wankex saʼ linchʼool. Nasahoʼk inchʼool rilbʼal naq kʼubʼkʼukex chiʼus ut nekeepaabʼ li Kriist chi anchal eechʼool.
6 Joʼkan bʼiʼ, joʼ chanru naq xeekʼulubʼa li Kristo Jesús li Qaawaʼ, meekanabʼ wank saʼ junajil rikʼin.
7 Ut joʼ ak xeetzol, leepaabʼal chirix li Kriist inkʼaʼ tixkanabʼ eekawresinkil ut kaw xaqxoqex joʼ jun li cheʼ li xeʼinbʼil chiʼus saʼ chʼochʼ ut numtajenaq leepaabʼal naq texbʼanyoxinq chiru li Yos.
8 Weent teebʼaanu re naq maaʼani tbʼalaqʼinq eere rikʼin xnaʼlebʼ li ruuchichʼochʼ ut li bʼalaqʼil naʼlebʼ li maakʼaʼ naʼok wiʼ ut chalenaq saʼ li najteril naʼlebʼ ut saʼ li kʼaʼaq re ru li wank saʼ ruuchichʼochʼ ut inkʼaʼ chalenaq rikʼin li Kriist.
9 Abʼan, chixjunil li xnaʼlebʼ li Yos wank chi tzʼaqal re ru rikʼin li Kriist.
10 Joʼkan naq maakʼaʼ napaltoʼk eere saʼ xkʼabʼaʼ aʼan li wank choʼq xjolomil li awabʼejilal ut li wankilal.
11 Saʼ xkʼabʼaʼ leepaabʼal chirix li Kriist kisetmank xtzʼuumal leetzʼejwal abʼan inkʼaʼ kibʼaanumank joʼ nekeʼxbʼaanu li winq, laaʼex bʼan xeetzʼeqtaana li naraj leetibʼel. Chi joʼkaʼin nasetmank xtzʼuumal xtzʼejwal li nekeʼtaqenk re li Kriist.
12 Xbʼaan naq xexmuqeʼk rochbʼeen saʼ li xkubʼihaʼ ut saʼ xkʼabʼaʼ naq wankex chaq saʼ junajil rikʼin ut nekeepaabʼ chixjunil li kixbʼaanu li Yos rikʼin li xwankil, laaʼex xexwaklesiik chi yoʼyo rochbʼeen aʼan, li kiwaklesiik chi yoʼyo xbʼaan li Yos.
13 Joʼkan ajwiʼ, usta kamenaqex chaq saʼ xkʼabʼaʼ leemaak ut moko setbʼil ta xtzʼuumal leetzʼejwal, li Yos kixkʼe eeyuʼam rochbʼeen aʼan. Ut saʼ xkʼabʼaʼ li xchaabʼilal li Yos kixkuy li qamaak
14 ut kixbʼor li chaqʼrabʼ li tzʼiibʼanbʼil chaq li naxkʼe chi naweʼk li qamaak. Li Yos kixsach li chaqʼrabʼ aʼin naq kikamk li Kriist chiru cheʼ.*
15 Saʼ xkʼabʼaʼ aʼin,* chanchan tawiʼ kixtʼusubʼ chi junajwa ebʼ li awabʼejilal ut li wankebʼ xwankil ut kixkʼehebʼ chiru li komonil re xkʼutbʼesinkil naq xeʼqʼaxeʼk ru ut xeʼbʼeresiik joʼ nekeʼbʼeresiik ebʼ laj puubʼ li xeʼqʼaxok u saʼ li yalok.
16 Joʼkan naq maaʼani twechʼoq eere saʼ xkʼabʼaʼ li nekeewaʼ ut nekeerukʼ malaj chirix xnimankil junaq li ninqʼe, junaq li akʼ po malaj junaq li sábado.*
17 Chixjunil aʼin reetalil li tchalq moqon abʼan li Kriist naxkʼutbʼesi naq ttzʼaqloq ru aʼin.
18 Wankebʼ li qas qiitzʼin nekeʼwulak chiru xkʼutbʼesinkil naq kubʼenaqebʼ xwankil ut xloqʼoninkil* ebʼ li ánjel, abʼan meekanabʼ naq teʼxram cheeru xkʼulbʼal li maatan. Ebʼ li qas qiitzʼin aʼin «nekeʼxchap ribʼ chi kaw rikʼin li nekeʼril». Saʼ xkʼabʼaʼ naq nekeʼkʼoxlak joʼ naraj li tibʼelej qʼaxal nekeʼxqʼetqʼeti ribʼ chirix li maakʼaʼ rajbʼal.
19 Jun li qas qiitzʼin joʼ aʼin moko nawank ta saʼ junajil rikʼin li jolomej li naxkʼe re li tibʼelej chixjunil li naʼajmank chiru ut naxbʼaanu naq chixjunil li xchaʼal li tibʼelej wanq saʼ junajil ut saʼ xkʼabʼaʼ aʼan li Yos naxbʼaanu naq li tibʼelej tkʼiiq.
20 Wi laaʼex xexkamk rochbʼeen li Kriist ut xeetzʼeqtaana li kʼaʼaq re ru li wank saʼ ruuchichʼochʼ, kʼaʼut toj wankex chanchan tawiʼ rehex li ruuchichʼochʼ? Kʼaʼut toj nekeepaabʼ li chaqʼrabʼ
21 «maachap, maayal, maachʼeʼ»?
22 Ebʼ li taql aʼin yook chi aatinak chirix li naʼosoʼk naq naʼoksimank. Aʼin xtaqlahom ut xkʼutum winq.
23 Ebʼ li naʼlebʼ aʼin chanchan tawiʼ chaabʼil. Abʼan li nekeʼxbʼaanu aʼin xjunesebʼ nekeʼxsikʼ chanru teʼloqʼoninq. Ut nekeʼxrahobʼtesi li xtibʼel xbʼaan naq nekeʼraj naq ebʼ li qas qiitzʼin teʼxye naq nekeʼxkubʼsi xwankil. Abʼan maakʼaʼ ajʼe chixjunil aʼin xbʼaan naq inkʼaʼ nakʼanjelak re xtzʼeqtaanankil li naxrahi ru li tibʼelej.
Xtzʼaqobʼ ebʼ li naʼlebʼ
^ Malaj «cheʼ re rahobʼtesiik». Taawil xchʼolobʼankil li aatin, cheʼ re rahobʼtesiik.
^ Maare «aʼan».
^ Taawil xchʼolobʼankil li aatin, sábado.
^ Malaj «nekeʼloqʼonink joʼ nekeʼloqʼonink».
