Efesios 2:1-22
2 Saʼ xkʼabʼaʼ leemaak chanchan tawiʼ kamenaqex, abʼan li Yos kixkʼe eeyuʼam
2 laaʼex xexnaʼlebʼak chaq joʼ nanaʼlebʼak li ruuchichʼochʼ* ut xeebʼaanu chaq li naraj li najolomink re li musiqʼej* li naʼekʼasink rehebʼ li qas qiitzʼin chi xqʼetbʼal ribʼebʼ. Li musiqʼej* aʼin chanchan li iqʼ, wank yalaq bʼar.
3 Joʼkan tzʼaqal, junxil chiqajunilo xoonaʼlebʼak joʼebʼ aʼan. Naqabʼaanu li naxrahi ru li qatibʼel, naqabʼaanu li naraj li qatibʼel ut li qakʼaʼuxl, ut chalen naq xooyoʼlaak qakʼulubʼ xkʼulbʼal li xjosqʼil li Yos joʼebʼ li junchʼol.
4 Abʼan li Yos li qʼaxal naʼuxtaanank u,* saʼ xkʼabʼaʼ li xnimal ru xrahom li kixkʼutbʼesi chiqix
5 kixkʼe qayuʼam rochbʼeen li Kriist usta kamenaqo chaq saʼ xkʼabʼaʼ li qamaak (laaʼex xexkoleʼk saʼ xkʼabʼaʼ li xnimal rusilal).
6 Saʼ xkʼabʼaʼ naq wanko saʼ junajil rikʼin li Kristo Jesús, li Yos kixkʼe qayuʼam rochbʼeen li Kriist re naq toochunlaaq chixkʼatq saʼ choxa.
7 Li Yos naxbʼaanu aʼin re naq saʼebʼ li kutan* li yook chi chalk tixkʼutbʼesi li xnimal rusilal chiqu, laaʼo li wanko saʼ junajil rikʼin li Kristo Jesús.
8 Saʼ xkʼabʼaʼ li xnimal rusilal li Yos xexkoleʼk xbʼaan leepaabʼal. Abʼan moko laaʼex ta xextawok re, li Yos bʼan kixkʼe eere li maatan aʼin.
9 Joʼkan bʼiʼ, moko saʼ xkʼabʼaʼ ta li xbʼaanuhom junaq li qas qiitzʼin naq kitawmank aʼin re naq maaʼani tixnima ribʼ.
10 Li Yos xooxyiibʼ rikʼin ruqʼ ut saʼ xkʼabʼaʼ naq wanko saʼ junajil rikʼin li Kristo Jesús, xooxyobʼtesi re xbʼaanunkil li chaabʼil kʼanjel. Li Yos kixaqabʼank re chi rubʼelaj li kʼanjel aʼin re naq tqabʼaanu.
11 Joʼkan bʼiʼ, jultikoʼk eere naq laaʼex maawaʼex aj judiiy ut ebʼ li qas qiitzʼin li setbʼilebʼ xtzʼuumal xtzʼejwal xbʼaanebʼ li winq nekeʼxye eere naq laaʼex moko setbʼil ta xtzʼuumal leetzʼejwal.
12 Chiruhebʼ li kutan aʼan, inkʼaʼ nekeenaw chaq ru li Kriist, jachjokex rikʼinebʼ laj Israel ut moko laaʼex ta jun saʼebʼ li sumwank chirix li yeechiʼom. Maakʼaʼ chaq leeroybʼenihom ut maakʼaʼ li Yos eerikʼin naq wankex saʼ ruuchichʼochʼ.
13 Abʼan anaqwan wankex saʼ junajil rikʼin li Kristo Jesús. Junxil najt wankex chaq rikʼin li Yos, anaqwan nachʼ chik wankex rikʼin saʼ xkʼabʼaʼ li xkikʼel li Kristo Jesús.
14 Xbʼaan naq aʼan li qatuqtuukilal, aʼan kixbʼaanu naq li wiibʼ chi chʼuut junajaqebʼ ut kixtʼan ajwiʼ li tzʼak li najachok re li wiibʼ chi chʼuut.
15 Saʼ xkʼabʼaʼ naq kixqʼaxtesi li xtibʼel, kixsach li Chaqʼrabʼ ut ebʼ li taql li wank saʼ Xchaqʼrabʼ laj Moisés, li naxbʼaanu naq xikʼ teʼril ribʼ li wiibʼ chi chʼuut. Chirix chik aʼin, kixbʼaanu jun li akʼ chʼuut rikʼinebʼ. Li wiibʼ chi chʼuut aʼin nekeʼxtaqe li Kriist ut li Kriist kixkʼam chaq li tuqtuukilal saʼ xyanqebʼ.
16 Aʼan truuq xbʼaanunkil naq li wiibʼ chi chʼuut aʼin teʼxkʼam wiʼ chik ribʼ saʼ usilal rikʼin li Yos saʼ xkʼabʼaʼ li cheʼ re rahobʼtesiik* re naq li wiibʼ chi chʼuut twanq saʼ jun chi tibʼelej. Ut saʼ xkʼabʼaʼ naq kixqʼaxtesi li xtibʼel kixsach li nabʼaanunk re, naq xikʼ teʼril ribʼ.
17 Ut aʼan kichalk, kixkʼe cheenaw li chaabʼil esil chirix li tuqtuukilal eere laaʼex li najt wankex chaq rikʼin li Yos ut kixkʼe chixnaw li tuqtuukilal rehebʼ li nachʼ wankebʼ rikʼin.
18 Xbʼaan naq saʼ xkʼabʼaʼ aʼan li wiibʼ chi chʼuut tooruuq chi jilok chixkʼatq li Yuwaʼbʼej chi maakʼaʼ ttʼiloq qe saʼ xkʼabʼaʼ li santil musiqʼej.*
19 Joʼkan naq moko jalanex ta chi moko jalan ta leetenamit, laaʼex bʼan rechtenamitul ebʼ li santil paabʼanel ut laaʼex xjunkabʼal li Yos.
20 Xexkabʼlaak saʼ xbʼeen li rubʼelankil ebʼ li apóstol ut ebʼ li propeet ut li Kristo Jesús aʼan li pek li naxik saʼ xxuk ut nakʼemank taqʼa.
21 Chixjunil li xtzʼakil li ochoch chapcho ribʼ chiʼus ut wank saʼ junajil rikʼin. Joʼkan ajwiʼ yook chi kabʼlaak ut yook chi kʼiik toj reetal tkanaaq choʼq rochoch li Jehobʼa.*
22 Xbʼaan naq wankex saʼ junajil rikʼin, laaʼex ut ebʼ li junchʼol yookex chi kabʼlaak re naq laaʼexaq jun li naʼaj bʼarwiʼ twanq li Yos saʼ xkʼabʼaʼ li xsantil musiqʼej.
Xtzʼaqobʼ ebʼ li naʼlebʼ
^ Taawil xchʼolobʼankil li aatin, ruuchichʼochʼ.
^ Li aatin saʼ griego, pnéuma. Taawil xchʼolobʼankil li aatin, musiqʼ.
^ Li aatin saʼ griego, pnéuma. Taawil xchʼolobʼankil li aatin, musiqʼ.
^ Malaj «natoqʼobʼank u».
^ Malaj «saʼ li ruuchichʼochʼ». Taawil xchʼolobʼankil li aatin, ruuchichʼochʼ.
^ Taawil xchʼolobʼankil li aatin, cheʼ re rahobʼtesiik.
^ Li aatin saʼ griego, pnéuma. Taawil xchʼolobʼankil li aatin, musiqʼ.
^ Taawil xchʼolobʼankil li aatin, Jehobʼa.
