Efesios 3:1-21
3 Laaʼin laj Pablo, wankin saʼ tzʼalam xbʼaan naq rehin li Kristo Jesús ut yookin eetenqʼankil laaʼex li maawaʼex aj judiiy...
2 Ak xeerabʼi tana resil naq xineʼxxaqabʼ chi xjolominkil li xnimal rusilal li Yos re naq laaʼex teetaw rusilal.
3 Joʼkan tzʼaqal, li Yos kixkʼe chinnaw li xmuqmukil naʼlebʼ joʼ ak xintzʼiibʼa bʼayaq eere chi rubʼelaj.
4 Joʼkan bʼiʼ, naq teeyaabʼasi aʼin teekʼe reetal naq wank innawom chirix li muqmukil naʼlebʼ chirix li Kriist.
5 Li Yos inkʼaʼ kixkʼut chi kutankil li muqmukil naʼlebʼ rehebʼ li qas qiitzʼin li xeʼwank chaq junxil, joʼ naxkʼut chi kutankil anaqwan chiruhebʼ li propeet ut ebʼ li apóstol li sikʼbʼilebʼ ru xbʼaan saʼ xkʼabʼaʼ li santil musiqʼej.
6 Li muqmukil naʼlebʼ aʼan aʼin: li maawaʼebʼ aj judiiy ut wankebʼ saʼ junajil rikʼin li Kristo Jesús, teʼxkʼul li ereens li tixkʼul li Kriist ut teʼkanaaq joʼ jun chi chʼuut. Aʼanebʼ teʼxkʼul ajwiʼ li kixyeechiʼi qe li Yos saʼ xkʼabʼaʼ li chaabʼil esil.
7 Xinkʼe wibʼ choʼq xmoos li muqmukil naʼlebʼ aʼin saʼ xkʼabʼaʼ li rusilal li Yos li qʼaxal nim. Aʼan kixkʼe we li maatan aʼin naq xinkʼul li xwankilal.
8 Laaʼin, li kubʼenaq inwankil chiru li kachʼin saʼ xyanqebʼ li santil paabʼanel, xinkʼul li xnimal rusilal li Yos re xkʼebʼal chi naweʼk rehebʼ li tenamit li chaabʼil esil chirix li bʼihomal li nachalk rikʼin li Kriist li chʼaʼaj xtawbʼal ru
9 ut re naq teenaw cheejunilex chanru nabʼeresimank chixjunil li naxchap ribʼ rikʼin li muqmukil naʼlebʼ li kiwank chi muqmu chiru naabʼal siʼeent chihabʼ xbʼaan li Yos li kiyobʼtesink re chixjunil.
10 Aʼin kikʼulmank re naq anaqwan ebʼ li awabʼejilal ut li wankebʼ xwankil saʼ choxa teʼxnaw li xnaʼlebʼ li Yos saʼ li jalan jalanq chi bʼaanuhom. Ut teʼxnaw aʼin saʼ xkʼabʼaʼ li chʼuut.
11 Aʼin junaj ru rikʼin li rajom li wank chi junelik li kixxaqabʼ ut naxchap ribʼ rikʼin li Kriist, li Jesús li Qaawaʼ.
12 Saʼ xkʼabʼaʼ aʼan nokooʼaatinak chi maakʼaʼ qaxiw ut nokoojilok chixkʼatq li Yos chi maakʼaʼ ttʼiloq qe xbʼaan naq naqapaabʼ li Kriist.
13 Joʼkan naq nintzʼaama cheeru naq michʼinaak leechʼool saʼ xkʼabʼaʼ li chʼaʼajkilal li ninkʼul cheerix xbʼaan naq aʼin tixkʼam chaq eeloqʼal.
14 Saʼ xkʼabʼaʼ aʼin ninwiqʼibʼ wibʼ chiru li Yuwaʼbʼej
15 li kixbʼaanu naq wanqebʼ li junkabʼal saʼ choxa ut saʼ ruuchichʼochʼ.
16 Nintijok re naq li Yos li numtajenaq xloqʼal troksi li wankil li naxkʼe li xsantil musiqʼej re xkawresinkil leechʼool ut leekʼaʼuxl.
17 Ut nintijok chiru li Yos re naq wanq saʼ leechʼool li Kriist ut li rahok li nekeerekʼa chirixebʼ li junchʼol saʼ xkʼabʼaʼ leepaabʼal. Nintijok ajwiʼ re naq kaw xaqxoqex ut xeʼinbʼilaqex chiʼus saʼ xbʼeen rubʼelankil li paabʼal
18 re naq laaʼex ut ebʼ li santil paabʼanel texruuq xtawbʼal ru chiʼus li xnimal ru, li xnajtil roq, li xteram ut li xchamal li yaal
19 ut teenaw li xrahom li Kriist li naxqʼax ru li nawom re naq teekʼul rikʼin li Yos li jalan jalanq chi naʼlebʼ li wank rikʼin.
20 Saʼ xkʼabʼaʼ naq li xwankil li Yos wank qikʼin, naabʼal wiʼ chik naru naxbʼaanu chiqix chiru li naqatzʼaama malaj li naqakʼoxla.
21 Aʼ taxaq li Yos tixkʼul chi junelik li loqʼal saʼ xkʼabʼaʼ li chʼuut ut li Kristo Jesús. Joʼkan taxaq.
