Efesios 4:1-32
4 Joʼkan naq laaʼin li wankin saʼ tzʼalam saʼ xkʼabʼaʼ li Qaawaʼ nintzʼaama cheeru naq bʼeresimaq chiʼus leeyuʼam joʼ chanru eekʼulubʼ naq xexbʼoqeʼk:
2 junelik teekubʼsi eeribʼ, tuulanaqex ut chiwanq eekuyum; kuyumaq eeribʼ cheeribʼil eeribʼ rikʼin rahok;
3 chexwanq saʼ tuqtuukilal cheeribʼil eeribʼ. Kʼehomaq eechʼool re naq wanq saʼ eeyanq li junajil li naxkʼam chaq li santil musiqʼej.
4 Jun ajwiʼ li tibʼelej ut jun ajwiʼ li musiqʼej, joʼ chanru naq jun ajwiʼ li oybʼenihom li xexbʼoqeʼk wiʼ.
5 Jun ajwiʼ li Qaawaʼ, jun ajwiʼ li paabʼal ut jun ajwiʼ li kubʼihaʼ.
6 Jun ajwiʼ li Yos ut Xyuwaʼ chixjunilebʼ, li wank saʼ xbʼeen chixjunilebʼ ut nanaʼlebʼak saʼ xkʼabʼaʼ chixjunilebʼ ut li xwankil nakʼanjelak saʼ chixjunil.
7 Joʼkan bʼiʼ, chiqajunqal xqakʼul li xnimal rusilal joʼ chanru kixjekʼi li Kriist li maatan aʼin.
8 Joʼ naxye li Raatin li Yos: «Naq aʼan xkoho taqeʼq kirisihebʼ li wankebʼ saʼ tzʼalam joʼ aj preex ut kixkʼehebʼ li winq aʼin joʼ maatan».
9 Abʼan, kʼaru naraj xyeebʼal li aatin «aʼan xkoho taqeʼq»? Aʼin naraj xyeebʼal naq rubʼelaj kikubʼeek saʼ ruuchichʼochʼ.
10 Li kikubʼeek aʼan ajwiʼ li xkoho taqeʼq. Kixqʼax li xteram li choxa re naq ttzʼaqloq ru chixjunil.
11 Ut wankebʼ kixkʼehebʼ joʼ apóstol, wankebʼ kixkʼehebʼ joʼ propeet, wankebʼ kixkʼehebʼ joʼ aj kʼehol resil li chaabʼil esil, wankebʼ kixkʼehebʼ joʼ aj ilol karneer ut joʼ aj kʼutunel.
12 Kixkʼehebʼ re naq teʼxqʼus* ebʼ li santil paabʼanel, re naq teʼkʼanjelaq chiru li Yos ut re naq teʼxkabʼla li xtibʼel li Kriist.
13 Ebʼ aʼan tooʼeʼxtenqʼa re naq junajaqo saʼ li qapaabʼal ut tqanaw ru li Ralal li Yos chi tzʼaqal re ru ut chi joʼkan tookʼoxlaq joʼebʼ li ak ninqebʼ ut tqataw chi tzʼaqal re ru xteram li Kriist.
14 Joʼkan naq qakanabʼaq wank joʼebʼ li kokʼal xbʼaan naq li naxtaqe li bʼalaqʼil kʼutum li nekeʼxkʼut ebʼ li qas qiitzʼin re xbʼalaqʼinkilebʼ li junchʼol, chanchanaqebʼ li jukubʼ li wank saʼ li palaw, li ekʼasinbʼilebʼ xbʼaan li kawil iqʼ ut roq li palaw.
15 Abʼan laaʼo tqaye li yaal, tookʼiiq saʼ li rahok saʼ chixjunil toj reetal toowulaq joʼ li wank choʼq xjolomil aʼ li Kriist.
16 Laaʼo chanchano li xtibʼel jun li qas qiitzʼin ut saʼ xkʼabʼaʼ aʼan chixjunil li xchaʼal li tibʼelej aʼin wank saʼ junajil ut natenqʼank re naq tkʼanjelaq chiʼus. Wi li junjunq chi chaʼalej naxbʼaanu li xkʼanjel, li tibʼelej aʼin tkʼiiq chiʼus ut tqara qibʼ chiqibʼil qibʼ.
17 Joʼkan naq ninye eere ut nintzʼaama cheeru* saʼ xkʼabʼaʼ li Qaawaʼ naq teekanabʼ wank joʼebʼ li tenamit li inkʼaʼ nekeʼxnaw kʼoxlak.*
18 Li xkʼaʼuxebʼ wank saʼ qʼoqyink ut jachjokebʼ rikʼin li yuʼam li nachalk rikʼin li Yos saʼ xkʼabʼaʼ naq inkʼaʼ nekeʼraj xnawbʼal ru li Yos ut maakʼaʼ chik naʼok saʼ xchʼoolebʼ.
19 Saʼ xkʼabʼaʼ naq inkʼaʼ chik nekeʼxnaw bʼar wank li us ut li inkʼaʼ us xeʼok chi maakobʼk chi maakʼaʼebʼ xxutaan* ut xyuʼaminkil yalaq kʼaru chi tzʼaj aj naʼlebʼ ut inkʼaʼ nekeʼkʼojlaak xchʼool.
20 Abʼan laaʼex moko xeetzol ta naq joʼkan xnaʼlebʼ li Kriist.
21 Li Jesús kixkʼut li yaal ut wi laaʼex xeerabʼi li yaal rikʼin ut tzolbʼilex xbʼaan, naraj xyeebʼal naq laaʼex nekeenaw chiʼus aʼin.
22 Joʼkan naq laaʼex xeetzol naq tento teekanabʼ xbʼaanunkil li naʼlebʼ li nekeebʼaanu chaq junxil. Xbʼaan naq li naʼlebʼ li xeebʼaanu chaq junxil wulaj wulaj yook chi maaʼusoʼk xbʼaan naq nekeerahi ru li inkʼaʼ us li yook eebʼalaqʼinkil.
23 Meekanabʼ xʼakʼobʼresinkil chanru nekexkʼoxlak*
24 joʼ naq nekeekʼe jun li akʼil tʼikr cheerix, tento raj texnaʼlebʼaq joʼ naraj li Yos. Ut chi joʼkan teebʼaanu li us ut texʼabʼinq chiru chi anchal eechʼool.
25 Joʼkan bʼiʼ, anaqwan naq xeekanabʼ li bʼalaqʼik, li junjunq tixye li yaal re li ras riitzʼin xbʼaan naq chiqajunilo qachaʼal qibʼ chiqibʼil qibʼ.
26 Naq texjosqʼoʼq, mexmaakobʼk; meekanabʼ naq toj yooq eejosqʼil naq t-oq li saqʼe.
27 Meekanabʼ naq laj Tza* t-ekʼasinq eere chi xbʼaanunkil li inkʼaʼ us.
28 Li naʼelqʼak miʼelqʼak chik, tkʼanjelaq bʼan chi kaw rikʼin ruqʼ re xbʼaanunkil li chaabʼil kʼanjel ut chi joʼkan truuq xtenqʼankil li wank saʼ rajbʼal ru.
29 Miʼelk chi xtzʼuumal eere li tzʼaj aj aatin. Chixjunil bʼan li teeye chikʼanjelaq re xkawresinkil xchʼool ebʼ li junchʼol joʼ chanru naʼajmank chiruhebʼ ut re naq li nekeʼabʼink eere teʼxtaw rusilal.
30 Joʼkan ajwiʼ, meechʼina xchʼool li xsantil musiqʼej li Yos rikʼin li xkʼemank wiʼ eereetalil toj reetal twulaq xkutankil naq texkoleʼq saʼ xkʼabʼaʼ li xkamik li Jesús.
31 Tzʼeqtaanahomaq li jalan jalanq chi kʼahink, mexjosqʼoʼk, meejap eere, meeye li aatin li ra nanaq ut meebʼaanu li jalan jalanq chi maaʼusilal.
32 Cheekʼutbʼesi bʼan li usilal cheeribʼil eeribʼ, textoqʼobʼanq u* ut teekuy eemaak chi anchal eechʼool joʼ chanru naq li Yos qʼaxal kixkuy eemaak saʼ xkʼabʼaʼ li Kriist.
Xtzʼaqobʼ ebʼ li naʼlebʼ
^ Malaj «re naq teʼxkawresi».
^ Malaj «ninkʼe chi naweʼk eere».
^ Malaj «maakʼaʼ wankebʼ saʼ li xkʼaʼuxl».
^ Li aatin saʼ griego, asélgueia. Taawil xchʼolobʼankil li aatin, maakobʼk chi maakʼaʼ li xutaan.
^ Malaj «li naʼekʼasink re leekʼaʼuxl».
^ Saʼ griego «li Diʼaabʼ». Taawil xchʼolobʼankil li aatin, Diʼaabʼ.
^ Malaj «texʼuxtaananq u».
