Efesios 5:1-33
5 Joʼkan bʼiʼ, kʼamomaq eere rikʼin li Yos joʼ ralal xkʼajol li raarokex xbʼaan
2 ut meekanabʼ li xbʼehil li rahok, joʼ naq li Kriist xooxra* ajwiʼ ut kixqʼaxtesi ribʼ saʼ qakʼabʼaʼ* joʼ sununkil mayej ut mayejanbʼil xul choʼq re li Yos.
3 Maajunwa taxaq t-abʼimanq saʼ eeyanq li muxuk ibʼ,* yalaq kʼaru chi tzʼaj aj naʼlebʼ malaj ebʼ li inkʼaʼ nekeʼkʼojlaak xchʼool xbʼaan naq aʼin moko xkʼulubʼebʼ ta ebʼ laj kʼanjel chiru li Yos.
4 Chi moko wanq ta saʼ eeyanq li xutaanalil naʼlebʼ chi moko li aatin li maakʼaʼ rajbʼal chi moko chʼuchʼibʼk chirix li muxuk ibʼ xbʼaan naq aʼin moko us ta. Chexbʼanyoxinq bʼan.
5 Xbʼaan naq laaʼex nekeenaw ut nekeetaw ru chiʼus naq maaʼani naru narechani li Xʼawabʼejilal li Kriist ut li Yos wi naxmux ribʼ,* wi naxyuʼami li tzʼaj aj naʼlebʼ ut wi narataw xtzʼaqobʼ li xjunkabʼlal, aʼin juntaqʼeet rikʼin xloqʼoninkil li pechʼbʼil yos.*
6 Maaʼani taxaq chibʼalaqʼinq eere rikʼin ebʼ li aatin li maakʼaʼ rajbʼal xbʼaan naq saʼ xkʼabʼaʼ aʼin nachalk li xjosqʼil li Yos saʼ xbʼeenebʼ li qas qiitzʼin li inkʼaʼ nekeʼabʼink.
7 Joʼkan bʼiʼ, mexʼokenk chirixebʼ;
8 junxil chanchanex chaq li qʼoqyink abʼan anaqwan chanchanex li saqenk xbʼaan naq wankex saʼ junajil rikʼin li Qaawaʼ. Meekanabʼ wank joʼ ralal xkʼajol li saqenk
9 xbʼaan naq li naruuchi li saqenk nakʼutunk saʼ chixjunil li usilal, li tiikilal ut li yaal.
10 Meekanabʼ xkʼebʼal reetal li nawulak chiru li Qaawaʼ
11 ut kanabʼomaq tzʼaqonk saʼ li naʼlebʼ li maakʼaʼ naʼok wiʼ li nachalk saʼ li qʼoqyink. Kʼehomaq bʼan chi kutankil li naʼlebʼ aʼin.
12 Xbʼaan naq xutaanal xyeebʼal li nekeʼxbʼaanu saʼ muqmu.
13 Anaqwan li saqenk nalemtzʼunk saʼ xbʼeen li yibʼru aj naʼlebʼ ut chi joʼkaʼin, nakutanobʼresiik li yibʼru aj naʼlebʼ.
14 Joʼkan naq nayeemank: «Ajsi aawu laaʼat li warenaqat ut waklin saʼ xyanqebʼ li kamenaq ut li Kriist tlemtzʼunq saʼ aabʼeen».
15 Joʼkan naq weent teebʼaanu, inkʼaʼ texnaʼlebʼaq joʼ li maakʼaʼebʼ xnaʼlebʼ, texnaʼlebʼaq bʼan joʼ li wankebʼ xnaʼlebʼ.
16 Oksimaq chiʼus li hoonal xbʼaan naq moko usebʼ ta li kutan.
17 Saʼ xkʼabʼaʼ aʼin, kanabʼomaq wank joʼ li maakʼaʼebʼ xnaʼlebʼ ut tawomaq ru bʼar wank li rajom li Jehobʼa.*
18 Joʼkan ajwiʼ, mexkalaak xbʼaan naq aʼin tkʼamoq eere chi xbʼaanunkil li inkʼaʼ us; nujobʼresihomaq bʼan eeribʼ rikʼin li santil musiqʼej.
19 Aatinomaq eeribʼ rikʼin saalm, cheenimaq ru li Yos, bʼichomaq ebʼ li bʼich re loqʼonink, texbʼichanq chiru li Jehobʼa* chanchan tawiʼ yookex xchʼeʼbʼal li son saʼ leechʼool.
20 Junelik tqabʼanyoxi chixjunil re li Yos, li Qayuwaʼ, saʼ xkʼabʼaʼ li Qaawaʼ Jesukriist.
21 Kʼehomaq eeribʼ rubʼel xwankil ebʼ li junchʼol ut ebʼ li junchʼol teʼxkʼe ribʼ rubʼel eewankil rikʼin roxloqʼinkil li Kriist.
22 Ebʼ li ixaqilbʼej tento teʼxkʼe ribʼ rubʼel xwankil ebʼ li xbʼeelom joʼ nekeʼxkʼe ribʼ rubʼel xwankil li Qaawaʼ
23 xbʼaan naq li bʼeelomej aʼan xjolomil li ixaqilbʼej, joʼ naq li Kriist aʼan xjolomil li chʼuut, li nakolok re li tibʼelej aʼin.
24 Joʼkan ajwiʼ, joʼ naq li chʼuut wank rubʼel xwankil li Kriist, ebʼ li ixaqilbʼej ajwiʼ tento teʼwanq rubʼel xwankil ebʼ li xbʼeelom saʼ chixjunil.
25 Ex bʼeelomej, meekanabʼ xraabʼal leerixaqil joʼ naq li Kriist kixra li chʼuut ut kixqʼaxtesi ribʼ chirix
26 re xsantobʼresinkil ut xchʼajbʼal rikʼin li haʼ li nachalk rikʼin li raatin li Yos
27 re naq chʼinaʼusaq li chʼuut chiru aʼan, maakʼaʼaq xtzʼajnil chi moko xyocholal chi moko junaq rehebʼ aʼin, santaq bʼan ut maakʼaʼaq xpaltil.
28 Joʼkan ajwiʼ, ebʼ li bʼeelomej tento teʼxra ebʼ li rixaqil joʼ naq nekeʼxra li xtibʼel. Li winq li naxra li rixaqil naxra ajwiʼ ribʼ
29 xbʼaan naq maaʼani xikʼ naril li xtibʼel, naxchʼolani bʼan, naril ut naxra, joʼ naxbʼaanu li Kriist rikʼin li chʼuut
30 xbʼaan naq laaʼo xchaʼal li xtibʼel.
31 «Saʼ xkʼabʼaʼ aʼin, li winq tixkanabʼ li xnaʼ ut li xyuwaʼ, twanq saʼ junajil rikʼin li rixaqil ut saʼ kabʼichal junajaqebʼ chik chi tibʼelej».
32 Nim li muqmukil naʼlebʼ aʼin. Anaqwan yookin chi aatinak chirix li Kriist ut chirix li chʼuut.
33 Abʼanan, cheejunqal tento teera leerixaqil joʼ naq nekeera eeribʼ. Joʼkan ajwiʼ li ixaqilbʼej qʼaxal troxloqʼi li xbʼeelom.
Xtzʼaqobʼ ebʼ li naʼlebʼ
^ Maare «xexra».
^ Maare «eekʼabʼaʼ».
^ Li aatin saʼ griego, pornéia. Taawil xchʼolobʼankil li aatin, muxuk ibʼ.
^ Li aatin saʼ griego, pornéia. Taawil xchʼolobʼankil li aatin, muxuk ibʼ.
^ Malaj «yalaq kʼaru chik».
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
