Filipenses 1:1-30
-
Naxtaqla xsahilebʼ xchʼool (1, 2)
-
Nabʼanyoxink chiru li Yos; li xtij laj Pablo (3-11)
-
Nakʼemank chi naweʼk li chaabʼil esil usta wank li chʼaʼajkilal (12-20)
-
Yoʼyokin choʼq re li Kriist ut wi ninkamk, qʼaxal us wiʼ chik choʼq we (21-26)
-
«Tento texwanq joʼebʼ li nekeʼxkʼe chi naweʼk li chaabʼil esil» (27-30)
1 Laaʼin laj Pablo ut laj Timoteo, li wechkʼanjel, laaʼo xmoos li Kristo Jesús. Naqataqla xsahilebʼ xchʼool chixjunilebʼ li santil paabʼanel li wankebʼ saʼ junajil rikʼin li Kristo Jesús aran Filipos. Ut naqataqla ajwiʼ xsahilebʼ xchʼool li cheekel winq ut ebʼ laj tenqʼanel:
2 Chiwanq taxaq eerikʼin li xnimal rusilal ut li xtuqtuukilal li Yos, li Qayuwaʼ, ut li Qaawaʼ Jesukriist.
3 Junelik ninbʼanyoxi re li Yos naq nekexinjultika
4 ut naq rajlal nintzʼaamank cheerix. Nintzʼaamank chi sa saʼ linchʼool,
5 saʼ xkʼabʼaʼ naq xextzʼaqonk naq xeekʼe chi naweʼk li chaabʼil esil chalen naq xeekʼulubʼa toj saʼebʼ li kutan aʼin.
6 Xbʼaan naq chʼolchʼo chiwu aʼin: li kixtikibʼ li chaabʼil kʼanjel saʼ eeyanq tixchoy toj reetal twulaq xkutankil li Kristo Jesús.
7 Qʼaxal us naq joʼkan ninkʼoxla cheerix xbʼaan naq wankex saʼ inchʼool. Laaʼex xineetenqʼa naq xinwank saʼ tzʼalam ut xineetenqʼa ajwiʼ chi xkolbʼal rix li chaabʼil esil chiruhebʼ li wankebʼ xwankil. Chi joʼkan laaʼex ut laaʼin xqataw xchaabʼilal li xnimal rusilal li Yos.
8 Kutan saqenk chiru li Yos naq kʼajoʼ nekexinkʼoxla ut naq nekexinra joʼ naq nekexra li Kristo Jesús.
9 Ut inkʼaʼ ninkanabʼ xtzʼaamankil saʼ lintij: naq wanq leenawom chi tzʼaqal re ru chirix li rajom li Yos ut teetaw ru chi tzʼaqal. Ut chi joʼkan leerahom inkʼaʼ tixkanabʼ kʼiik.
10 Ut chʼolchʼooq cheeru kʼaru qʼaxal wank xwankil re naq maakʼaʼaq eepaltil ut inkʼaʼ teekʼehebʼ chi tichkʼok ebʼ li junchʼol toj reetal twulaq xkutankil li Kriist
11 ut naq texruuq xbʼaanunkil naabʼal chik li chaabʼil kʼanjel re naq tkʼeheʼq xloqʼal ut tnimaaq ru li Yos.
12 Ex wechpaabʼanel, nawaj teenaw naq li yookin xkʼulbʼal relik chi yaal natenqʼank re xkʼebʼal chi naweʼk li chaabʼil esil
13 xbʼaan naq chixjunilebʼ li nekeʼkʼaakʼalenk re li rochoch li awabʼej ut ebʼ li junchʼol nekeʼxnaw naq wankin saʼ tzʼalam saʼ xkʼabʼaʼ li Kriist.
14 Ut li xkʼihalil ebʼ li qechpaabʼanel li nekeʼkʼanjelak chiru li Qaawaʼ qʼaxal xeʼkawuuk wiʼ chik xchʼool saʼ xkʼabʼaʼ naq wankin saʼ tzʼalam ut rajlal yookebʼ chi aatinak chirix li raatin li Yos chi maakʼaʼebʼ xxiw.
15 Yaal naq wankebʼ yookebʼ xkʼebʼal chi naweʼk chirix li Kriist xbʼaan naq nikineʼxkaqali ut nekeʼraj pleetik abʼan jalanebʼ chik yookebʼ xbʼaanunkil aʼin xbʼaan naq nekeʼalaak saʼ xchʼoolebʼ.
16 Ebʼ aʼin yookebʼ chi aatinak chirix li Kriist saʼ xkʼabʼaʼebʼ li xrahom xbʼaan naq nekeʼxnaw naq xaqabʼanbʼilin chi xkolbʼal rix li chaabʼil esil,
17 abʼan ebʼ li junchʼol li nekeʼxkʼe chi naweʼk li chaabʼil esil, inkʼaʼ nekeʼxbʼaanu chi anchalebʼ xchʼool nekeʼxbʼaanu bʼan re kaqalink ut pleetik xbʼaan naq nekeʼraj inkʼebʼal saʼ chʼaʼajkilal naq wankin saʼ tzʼalam.
18 Kʼaru naxkʼam chaq aʼin? Maakʼaʼ naxye ma yookebʼ xbʼaanunkil saʼ kaʼpakʼal u malaj yookebʼ xbʼaanunkil chi anchalebʼ xchʼool, yook chi kʼemank chi naweʼk chirix li Kriist ut aʼin naxkʼe xsahil inchʼool. Joʼkan naq junelik sahaq saʼ inchʼool
19 xbʼaan naq ninnaw naq aʼin tixkʼam chaq inkolbʼal saʼ xkʼabʼaʼ naq nekextzʼaamank chiwix ut naq nikinxtenqʼa li santil musiqʼej li wank rikʼin li Jesukriist.
20 Laaʼin ninnaw ut nawoybʼeni naq maajunwa tinkanaaq saʼ xutaan. Chʼolchʼo chiwu naq tinʼaatinaq chi maakʼaʼ inxiw ut chi joʼkan tnimaaq ru li Kriist inbʼaan* joʼ ninbʼaanu rajlal aʼ yaal ma yoʼyokin malaj kamenaqin.
21 Abʼan wi yoʼyokin, yoʼyoqin choʼq re li Kriist. Ut wi ninkamk, qʼaxal us wiʼ chik choʼq we.
22 Joʼkan bʼiʼ, wi toj yoʼyokin saʼ li tibʼelej aʼin, toj tinruuq xkʼebʼal xkomon linkʼanjel chiru li Kriist. Abʼanan inkʼaʼ tinkʼe chi naweʼk li tinsikʼ raj ru.
23 Inkʼaʼ ninnaw bʼar wank re li wiibʼ chi naʼlebʼ aʼin tento tinbʼaanu xbʼaan naq inkʼaʼ chik nawaj wank rubʼel xwankil li tibʼelej aʼin ut nawaj wank rikʼin li Kriist. Chʼolchʼo naq aʼin qʼaxal us wiʼ chik.
24 Abʼan teetaw rusilal wi toj yoʼyoqin saʼ li tibʼelej aʼin.
25 Joʼkan naq chʼolchʼo chiwu naq toj yoʼyoqin ut wanqin eerikʼin re naq texkʼiiq saʼ leekʼanjel chiru li Yos ut sahaq leechʼool saʼ leepaabʼal
26 ut chi joʼkan qʼaxal sahaq saʼ leechʼool rikʼin li Kristo Jesús saʼ inkʼabʼaʼ naq wanqin wiʼ chik saʼ eeyanq.
27 Tento texwanq joʼebʼ li nekeʼxkʼe chi naweʼk li chaabʼil esil chirix li Kriist. Ut chi joʼkan maakʼaʼ naxye ma tinxik eerilbʼal malaj maaʼaniqin saʼ eeyanq, kaw xaqxoqex, junajaq ru leekʼaʼuxl,* wanqex saʼ junajil ut yooqex chi kʼanjelak chi junaj ru leechʼool re naq inkʼaʼ teekanabʼ xpaabʼankil li chaabʼil esil
28 ut meexuwa ruhebʼ li xikʼ nekeʼilok eere. Aʼin ajwiʼ naxkʼutbʼesi naq ebʼ aʼan teʼosoʼq ut laaʼex texkoleʼq ut aʼin nachalk rikʼin li Yos.
29 Xbʼaan naq moko kaʼaj tawiʼ xexkanabʼaak chi xpaabʼankil li Kriist, xexkʼeheʼk bʼan ajwiʼ chi rahobʼtesiik saʼ xkʼabʼaʼ.
30 Joʼkan naq yookex ajwiʼ xnumsinkil li chʼaʼajkilal li xineeril chi xnumsinkil ut joʼ nekeenaw, toj yookin xnumsinkil.
Xtzʼaqobʼ ebʼ li naʼlebʼ
^ Saʼ griego «rikʼin lintibʼel».
^ Li aatin saʼ griego, pnéuma. Taawil xchʼolobʼankil li aatin, musiqʼ.
