Filipenses 4:1-23
4 Joʼkan bʼiʼ, ex wechpaabʼanel, li raarokex inbʼaan, nawaj rilbʼal eeru. Laaʼex nekeekʼe xsahil inchʼool ut chanchanex jun li koroon choʼq we. Kaw xaqxoqex rikʼin li Qaawaʼ joʼ ninye chaq eere, laaʼex li raarokex inbʼaan.
2 Nintzʼaama chiru li xʼEvodia ut li xSíntique naq junajaq ru li xkʼaʼuxebʼ rikʼin li Qaawaʼ.
3 Ut laaʼat li tzʼaqal wechkʼanjel nintzʼaama chaawu naq maakanabʼ xtenqʼankil ebʼ li ixq aʼin li yookebʼ xkʼebʼal xqʼe chi xkʼebʼal chi naweʼk li chaabʼil esil wochbʼeen ut rochbʼeen laj Clemente joʼebʼ li junchʼol li wechkʼanjel li tzʼiibʼanbʼilebʼ xkʼabʼaʼ saʼ xhuhil li yuʼam.
4 Junelik sahaq leechʼool saʼ xkʼabʼaʼ li Qaawaʼ. Jun sut chik ninye eere: sahaq leechʼool!
5 Xkʼehaqebʼ reetal ebʼ li qas qiitzʼin naq inkʼaʼ nekeemin ruhebʼ li junchʼol chi xkʼulubʼankil li nekeeye. Nachʼ wank li Qaawaʼ.
6 Maakʼaʼ chi ok wiʼ eekʼaʼuxl. Junelik bʼan textijoq chiru li Yos, teetzʼaama chiru naq texbʼeresi saʼ chixjunil ut junelik texbʼanyoxinq,
7 ut li Yos tixkʼe eere li tuqtuukilal li maaʼani naxtaw ru ut chi joʼkan tixkol leechʼool ut leekʼaʼuxl saʼ xkʼabʼaʼ li Kristo Jesús.
8 Re xraqbʼal, ex wechpaabʼanel, junelik teekʼoxla rix chixjunil li yaal, chixjunil li wank xwankil, chixjunil li tiik ru, chixjunil li saq ru, chixjunil li naxbʼaanu naq twanq li rahok, chixjunil li naʼoxloqʼimank, chixjunil li chaabʼilal ut chixjunil li xkʼulubʼ naq tnimaaq ru.
9 Bʼaanumaq chixjunil li xeetzol ut xeekʼul wikʼin joʼ ajwiʼ li xineerabʼi chi xyeebʼal ut li xineeril chi xbʼaanunkil ut li Xyosil li tuqtuukilal twanq eerikʼin.
10 Qʼaxal sa inchʼool saʼ xkʼabʼaʼ li Qaawaʼ naq toj anaqwan xineekʼoxla. Usta yook eekʼaʼuxl chiwix moko wank ta chaq eehoonal re xkʼutbʼesinkil chiwu.
11 Inkʼaʼ ninye aʼin xbʼaan naq wankin saʼ rajbʼal ru, xintzol naq sahaq inchʼool maakʼaʼ naxye chanru linwanjik.
12 Naru nintaw xsahil linchʼool rikʼin kachʼin ut rikʼin naabʼal. Maakʼaʼ naxye li tinnumsi saʼ linyuʼam, xintzol jun li naʼlebʼ li moko kʼihebʼ ta nekeʼxnaw: aʼ yaal ma wank intzekemq malaj yook intzʼokajik aʼ yaal ma kachʼin malaj naabʼal wank we, xintzol xkʼojobʼankil inchʼool.
13 Wank inmetzʼew re xqʼaxbʼal ru chixjunil saʼ xkʼabʼaʼ li nakʼehok re inmetzʼew.
14 Abʼanan us xeebʼaanu naq xineetenqʼa naq wankin saʼ chʼaʼajkilal.
15 Joʼkan bʼiʼ, ex aj Filipos, nekeenaw naq xinkanabʼ Macedonia ut naq ak xeerabʼi xbʼeen sut li chaabʼil esil, kaʼajwiʼ laaʼex joʼ chʼuut xineetenqʼa.
16 Naq wankin chaq Tesalónica, laaʼex xeetaqla li naʼajmank chiwu ut moko jun sut ta ajwiʼ, wiibʼ sut bʼan.
17 Moko yookin ta xsikʼbʼal naq teekʼe inmaatan, nawaj bʼan naq teekʼul li qʼajkamunkil li nachalk rikʼin li kʼehok.
18 Abʼanan, maakʼaʼ palt we, wank bʼan chixjunil li naʼajmank chiwu. Xbʼaan naq xinkʼul li xeetaqla chaq we rikʼin laj Epafrodito. Li maatan li xeetaqla chaq we chanchan li sununkil mayej li nawulak chiru li Yos.
19 Choʼq reqaj aʼin, li Yos troksi li xbʼihomal li wank xloqʼal re naq maakʼaʼ tpaltoʼq eere saʼ xkʼabʼaʼ li Kristo Jesús.
20 Aʼ li Qayos ut li Qayuwaʼ chikʼemanq xloqʼal chi junelik. Joʼkan taxaq.
21 Teekʼe xsahil xchʼool chixjunilebʼ li santil paabʼanel li wankebʼ saʼ junajil rikʼin li Kristo Jesús. Ebʼ li wechpaabʼanel li wankebʼ wikʼin nekeʼxtaqla xsahil eechʼool.
22 Chixjunilebʼ li santil paabʼanel nekeʼxtaqla xsahil eechʼool, abʼan ebʼ li santil paabʼanel li wankebʼ saʼ rochoch li awabʼej re Roma,* qʼaxal nekeʼxtaqla wiʼ chik xsahil eechʼool.
23 Aʼ taxaq li xnimal rusilal li Qaawaʼ Jesukriist chiwanq rikʼin xchaabʼilal ru leenaʼlebʼ li nekeekʼutbʼesi.
Xtzʼaqobʼ ebʼ li naʼlebʼ
^ Saʼ griego «César». Aʼin ruuchil xkʼabʼaʼ wiibʼ oxibʼ li awabʼej re Roma.
