Hebreos 10:1-39
-
Li mayejanbʼil xul moko nakʼanjelak ta (1-4)
-
Li Chaqʼrabʼ chanchan jun li mu (1)
-
-
Jun sut ajwiʼ kixmayeja ribʼ li Kriist ut maajunwa chik kixbʼaanu (5-18)
-
Kixte jun li akʼ bʼe li nakʼamok saʼ li yuʼam (19-25)
-
Inkʼaʼ toochʼutlaaq yal joqʼeqil (24, 25)
-
-
Weent tqabʼaanu re naq inkʼaʼ tqayuʼami li maak usta naqanaw naq inkʼaʼ us (26-31)
-
Naʼajmank xpaabʼankil li Yos re xkuybʼal (32-39)
10 Xbʼaan naq li Chaqʼrabʼ chanchan jun li mu li naxkʼut li us li tchalq moqon abʼan moko aʼan ta tzʼaqal. Ebʼ li mayejanbʼil xul li nayeechiʼimank rajlal chihabʼ inkʼaʼ naru xbʼaanunkil naq tzʼaqalaqebʼ re ru li nekeʼjilok chixkʼatq li Yos.
2 Wi joʼkan, ma inkʼaʼ raj xeʼxkanabʼ xyeechiʼinkil li mayejanbʼil xul? Xbʼaan naq ebʼ li nekeʼkʼanjelak chiru li Yos inkʼaʼ chik nekeʼchʼiʼchʼiʼiik xbʼaanebʼ li xmaak saʼ xkʼabʼaʼ naq ak xeʼsaqobʼresiik.
3 Rikʼin bʼan li mayejanbʼil xul najultikoʼk rehebʼ rajlal chihabʼ li xmaakebʼ
4 xbʼaan naq li xkikʼel li wakax ut li xkikʼel li chibʼaat inkʼaʼ naru risinkil li maak.
5 Joʼkan bʼiʼ, naq aʼan naʼok saʼ ruuchichʼochʼ naxye: «“Inkʼaʼ xaawaj li mayejanbʼil xul chi moko li mayej, abʼan xaakawresi choʼq we jun li tibʼelej.
6 Inkʼaʼ xaakʼulubʼa li kʼatbʼil mayej chi moko li mayej chirix li maak”.
7 Tojaʼ naq xinye: “Kʼe reetal, laaʼin xinchalk chi xbʼaanunkil laawajom, at Inyos (saʼ li bʼotbʼilhu tzʼiibʼanbʼil chiwix)”».
8 Xbʼeenwa naxye: «Inkʼaʼ xaawaj chi moko xaakʼulubʼa li mayejanbʼil xul ut li mayej chi moko ebʼ li kʼatbʼil mayej joʼ ajwiʼ li mayej chirix li maak». Ebʼ li mayej aʼin nayeechiʼimank joʼ naxye li Chaqʼrabʼ.
9 Ut chirix chik aʼan naxye: «Kʼe reetal, xinchalk chi xbʼaanunkil laawajom». Aʼan naxsach ru li kiwank xbʼeenwa re xxaqabʼankil li xkabʼ.
10 Saʼ xkʼabʼaʼ li rajom xoosantobʼresiik rikʼin li xtibʼel li Jesukriist li kiyeechiʼimank jun sut ajwiʼ ut maajunwa chik kibʼaanumank.
11 Joʼkan ajwiʼ, chixjunilebʼ laj tij wulaj wulaj nekeʼkʼanjelak chiru li Yos ut nekeʼxyeechiʼi naabʼal sut li mayejanbʼil xul. Abʼan li mayejanbʼil xul inkʼaʼ naru risinkil chi junajwa li maak.
12 Abʼan li winq aʼin kixyeechiʼi jun ajwiʼ li mayej li naru nokooxnajtobʼresi chi junelik rikʼin li maak ut kichunlaak saʼ xnim ruqʼ li Yos.
13 Ut chalen aran yook roybʼeninkil naq tkʼemanq rubʼel roq ebʼ li xikʼ nekeʼilok re naq tixyeqʼihebʼ.
14 Xbʼaan naq rikʼin jun ajwiʼ li mayej aʼan kixbʼaanu naq li yookebʼ chi santobʼresiik tzʼaqalaqebʼ re ru chi junelik.
15 Joʼkan ajwiʼ, li santil musiqʼej naxkʼe chiqanaw ajwiʼ aʼin xbʼaan naq xbʼeenwa naxye:
16 «Aʼan aʼin li sumwank li tinbʼaanu rikʼinebʼ naq ak xeʼnumeʼk li kutan aʼin, chan li Jehobʼa.* Tinkʼe linchaqʼrabʼ saʼ li xchʼoolebʼ ut tintzʼiibʼa saʼ li xkʼaʼuxebʼ».
17 Moqon chik naxye: «Ut maajunwa chik tinjultika li xmaakebʼ chi moko li maaʼusilal* li xeʼxbʼaanu chaq».
18 Naq ak kuybʼil chik li xmaakebʼ, moko aajel ta chik ru naq teʼmayejaq chirix li maak.
19 Joʼkan bʼiʼ ex wechpaabʼanel, saʼ xkʼabʼaʼ naq inkʼaʼ nokooxuwak chi ok saʼ li santil naʼaj saʼ xkʼabʼaʼ li xkikʼel li Jesús,
20 (kixte jun li akʼ bʼe choʼq qe li nakʼamok saʼ li yuʼam. Ut kixbʼaanu aʼin naq kinumeʼk junpakʼal li kortiin,* aʼin naraj xyeebʼal, li xtibʼel)
21 ut saʼ xkʼabʼaʼ naq wank qikʼin li xnimal ru aj tij, li xaqabʼanbʼil chi rilbʼal li rochoch li Yos
22 jiloqo chixkʼatq li Yos chi anchal qachʼool ut chi anchal qapaabʼal xbʼaan naq li qachʼool ak xsaqobʼresiik re naq moko maaʼusaq ta chik ut li qatibʼel ak xchʼajobʼresiik rikʼin li haʼ li saq ru.
23 Qachapaq qibʼ chi kaw rikʼin xkʼebʼal chi naweʼk li qoybʼenihom ut inkʼaʼ wiibʼaq ru li qachʼool xbʼaan naq li kiyeechiʼink re aʼin naxbʼaanu li naxye.
24 Ut qakʼoxlaq qibʼ chiqibʼil qibʼ re naq tqatenqʼa qibʼ chi xkʼutbʼesinkil li rahok ut xbʼaanunkil li us,
25 ut inkʼaʼ toochʼutlaaq yal joqʼeqil joʼ kʼaynaqebʼ xbʼaanunkil wiibʼ oxibʼ. Qʼaxal qawaklesihaq bʼan qachʼool chiqibʼil qibʼ anaqwan naq yook chaq chi nachʼok xkutankil li Yos ut qʼaxal qakʼehaq qaqʼe chi xbʼaanunkil aʼin.
26 Xbʼaan naq, wi ak xqakʼul li nawom li tzʼaqal re ru chirix li yaal ut nokooʼok xyuʼaminkil li maak usta naqanaw naq inkʼaʼ us, moko wank ta chik junaq li mayej chirix li maak.
27 Ut li naqoybʼeni aʼan li raqok aatin li xuwajel ru ut naqoybʼeni li josqʼil li nakʼatok joʼ li xaml. Aʼin tzʼaqal li tsachoq rehebʼ li nekeʼxqʼet ribʼ.
28 Li naxqʼet li Xchaqʼrabʼ laj Moisés inkʼaʼ ttoqʼobʼaaq ru,* tkamsiiq bʼan saʼ xkʼabʼaʼ li raatin wiibʼ malaj oxibʼ li testiiw.
29 Ma inkʼaʼ nekeekʼoxla naq qʼaxal ra tixkʼul li kixyeqʼi li Ralal li Yos, kixkubʼsi xwankil li xkikʼel li sumwank rikʼin li kisantobʼresiik wiʼ ut kixtzʼeqtaana li xsantil musiqʼej li Yos li naxkʼe li nimla usilal?
30 Xbʼaan naq naqanaw ru li kiyeehok re: «Laaʼin tinkʼe reqaj rehebʼ, laaʼin tinkʼe rehebʼ li xkʼulubʼebʼ». Ut kixye ajwiʼ: «Li Jehobʼa* traqoq aatin saʼ xbʼeen li xtenamit».
31 Ut xuwajel tʼaneʼk saʼ ruqʼ li yoʼyokil Yos.
32 Naq ak xexkutanobʼresiik, misach saʼ leechʼool chanru xeekuy chixjunil li kichalk saʼ eebʼeen usta ra xeekʼul.
33 Wank sut xexkʼeheʼk chiru li komonil re naq texhobʼeʼq ut texrahobʼtesiiq ut wank sut xeewotz li xrahilalebʼ li yookebʼ xkʼulbʼal aʼin.
34 Saʼ xkʼabʼaʼebʼ li wankebʼ saʼ tzʼalam, xeekʼutbʼesi li toqʼobʼank u* ut xeekʼulubʼa chi sa saʼ leechʼool naq teʼxmaqʼ li kʼaru eere xbʼaan naq nekeenaw naq qʼaxal nim leemaatan li inkʼaʼ t-osoʼq.
35 Joʼkan bʼiʼ, mexxuwak chi aatinak xbʼaan naq nimaq leeqʼajkamunkil.
36 Xbʼaan naq naʼajmank naq teekuy chixjunil re naq teekʼul li kixyeechiʼi li Yos. Abʼan xbʼeenwa teebʼaanu li rajom li Yos.
37 Xbʼaan naq «chi seebʼ», «tkʼulunq li yook chaq chi chalq ut inkʼaʼ tbʼayq».
38 «Abʼan li tiik xchʼool chiwu twanq xyuʼam saʼ xkʼabʼaʼ li xpaabʼal» ut «wi naxnajtobʼresi ribʼ wikʼin moko tixsahobʼresi ta linchʼool».
39 Joʼkan bʼiʼ, laaʼo maawaʼo joʼebʼ li nekeʼxnajtobʼresi ribʼ ut teʼosoʼq, laaʼo bʼan joʼebʼ li wankebʼ xpaabʼal ut nekeʼxkol li xyuʼamebʼ.
Xtzʼaqobʼ ebʼ li naʼlebʼ
^ Taawil xchʼolobʼankil li aatin, Jehobʼa.
^ Saʼ griego «li inkʼa naxchap ribʼ rikʼin li chaqʼrabʼ».
^ Aʼin jun li pimil tʼikr li naxjach li Santil Naʼaj rikʼin li Qʼaxal Saant li wank saʼ rochoch li Yos.
^ Malaj «t-uxtaanaaq ru».
^ Taawil xchʼolobʼankil li aatin, Jehobʼa.
^ Malaj «li uxtaanank u».
