Hebreos 13:1-25
-
Re xraqbʼal naxkʼehebʼ xnaʼlebʼ ut naxtaqla xsahilebʼ xchʼool (1-25)
13 Meekanabʼ xkʼutbʼesinkil naq nekeera eeribʼ joʼ nekeʼxra ribʼ ebʼ li junkabʼal.
2 Misach saʼ leechʼool xkʼutbʼesinkil li rahok rehebʼ li inkʼaʼ nekeenawebʼ ru xbʼaan naq saʼ xkʼabʼaʼ aʼin wankebʼ xeʼxkʼul ebʼ li ánjel usta inkʼaʼ nekeʼxnaw.
3 Jultikaq eere li wankebʼ saʼ tzʼalam,* chanchan tawiʼ wankex saʼ tzʼalam rochbʼeenebʼ. Joʼkan ajwiʼ, jultikaq eere li yookebʼ chi rahobʼtesiik, chanchan tawiʼ yookex chi rahobʼtesiik rochbʼeenebʼ.
4 Chixjunilebʼ tento teʼroxloqʼi li kixkʼubʼ li Yos choʼq rehebʼ li sumsu; li bʼeelomej ut li ixaqilbʼej inkʼaʼ tixkʼat roq li xsumʼaatin. Xbʼaan naq li Yos traqoq aatin saʼ xbʼeenebʼ li nekeʼxmux ribʼ* aʼ yaal ma sumsukebʼ malaj inkʼaʼ.
5 Maaʼani txik xchʼool chi xrahinkil ru li tumin ut sahaq saʼ xchʼool rikʼin li kʼaru wank re. Xbʼaan naq aʼan kixye: «Maajunwa tatinkanabʼ ut maajunwa tatintzʼeqtaana».
6 Joʼkan naq inkʼaʼ tooxuwaq, qayeehaq bʼan: «Li Jehobʼa* aʼan aj tenqʼahom we. Inkʼaʼ tinxuwaq. Kʼaru truuq xbʼaanunkil we li winq?».
7 Jultikoʼq eere li nekeʼbʼeresink eere, aʼanebʼ xeʼxkʼe cheenaw li raatin li Yos ut teekʼe reetal li xchaabʼilal ru xnaʼlebʼebʼ ut chi joʼkan teetzol eere ut teekʼam eere rikʼinebʼ li xpaabʼal.
8 Li Jesukriist inkʼaʼ kijalaak junxil, inkʼaʼ najalaak anaqwan ut inkʼaʼ tjalaaq saʼ li kutan chalk re.
9 Meekanabʼ naq tixjal leebʼe li jalan jalanq chi kʼutum li moko yaal ta. Xbʼaan naq qʼaxal us naq teekawresi leechʼool rikʼin li xnimal rusilal li Yos chiru naq teekawresi leechʼool rikʼin li tzekemq.* Li nekeʼxkawresi xchʼool rikʼin aʼin inkʼaʼ nekeʼxtaw rusilal.
10 Qikʼin wank jun xnaʼaj li mayej* ut li nekeʼkʼanjelak chiru li Yos saʼ li chʼina ochoch moko wankebʼ ta xkʼulubʼ chi xwaʼbʼal li wank chiru li xnaʼaj li mayej
11 xbʼaan naq li xtibʼel ebʼ li xul li nayeechiʼimank xbʼaanebʼ li xyuwaʼil aj tij, najt nakʼatmank rikʼin li kokʼ ochoch bʼarwiʼ yookebʼ chi kanaak ebʼ laj Israel. Li xyuwaʼil aj tij naxkʼam saʼ li santil naʼaj li xkikʼel ebʼ li xul choʼq mayej re naq tkuymanq li maak.
12 Joʼkan naq li Jesús kixkʼul ajwiʼ li rahilal najt rikʼin li tenamit re xsantobʼresinkilebʼ li qas qiitzʼin rikʼin li xkikʼel.
13 Joʼkan naq yoʼqebʼ chi xtawbʼal saʼ li naʼaj li najt wank rikʼin li kokʼ ochoch bʼarwiʼ nekeʼkanaak ebʼ laj Israel ut qakuyaq naq inkʼaʼ tooʼoxloqʼiiq joʼ naq aʼan inkʼaʼ kiʼoxloqʼiik
14 xbʼaan naq arin maakʼaʼ junaq li tenamit choʼq qe li wank chi junelik, yooko bʼan xsikʼbʼal chi anchal qachʼool li tenamit li tchalq moqon.
15 Joʼkan naq junelik qanimaq ru li Yos saʼ xkʼabʼaʼ li Jesús. Aʼin chanchan jun li mayej li naqakʼe re li Yos. Laaʼo naqoksi li xtzʼuumal qe re xkʼebʼal chi naweʼk li xkʼabʼaʼ chiruhebʼ li junchʼol.
16 Joʼkan ajwiʼ, misach saʼ leechʼool xbʼaanunkil li us ut xwotzbʼal li kʼaru eere rikʼinebʼ li junchʼol xbʼaan naq ebʼ li mayej aʼin qʼaxal nawulak chiru li Yos.
17 Texʼabʼinq ut teekʼe eeribʼ rubʼel xwankil li nekeʼbʼeresink eere xbʼaan naq ebʼ aʼan yookebʼ eerilbʼal ut traqmanq aatin saʼ xbʼeenebʼ joʼ chanru xeʼnaʼlebʼak. Chi joʼkan teʼxbʼaanu chi sahebʼ saʼ xchʼool ut inkʼaʼ lubʼluqebʼ xbʼaan naq aʼin naru nakʼehok eere saʼ rahilal.
18 Meekanabʼ tijok chiqix xbʼaan naq chʼolchʼo chiqu naq li qachʼool* inkʼaʼ nokooxqʼabʼa ut naqaj naʼlebʼak chiʼus saʼ chixjunil.
19 Abʼan qʼaxal nintzʼaama wiʼ chik cheeru naq textijoq re naq tinseebʼanq chaq chi sutqʼiik bʼarwiʼ wankex.
20 Li Xyosil li tuqtuukilal kixwaklesi chi yoʼyo li Qaawaʼ Jesús. Ut li xkikʼel li sumwank li wank chi junelik wank rikʼin li Jesús, li xnimal ru aj kʼaakʼalenel karneer. Aʼ taxaq li Xyosil li tuqtuukilal
21 tixkʼe eere chixjunil li us li naʼajmank cheeru re xbʼaanunkil li rajom. Saʼ xkʼabʼaʼ li Jesukriist nokoorekʼasi chi xbʼaanunkil li nawulak chiru aʼan. Aʼ li Yos taxaq tkʼemanq xloqʼal chi junelik. Joʼkan taxaq.
22 Anaqwan nintzʼaama cheeru ex wechpaabʼanel naq teekʼutbʼesi leekuyum naq teerabʼi ebʼ li aatin aʼin li nawaklesink chʼool xbʼaan naq xintzʼiibʼa eere jun li esilhu li moko najt ta roq.
23 Cheenawaq naq laj Timoteo, li qechpaabʼanel, xkanabʼaak chi xik. Wi tseebʼanq chi chalk, tooxik eerilbʼal.
24 Cheekʼe xsahilebʼ xchʼool chixjunilebʼ li nekeʼbʼeresink eere ut chixjunilebʼ li santil paabʼanel. Ebʼ laj paabʼanel li wankebʼ Italia nekeʼxtaqla xsahil leechʼool.
25 Aʼ taxaq li xnimal rusilal li Yos chiwanq eerikʼin.
Xtzʼaqobʼ ebʼ li naʼlebʼ
^ Saʼ griego «li bʼakʼbʼokebʼ chi kareen».
^ Li aatin saʼ griego, pornéia. Taawil xchʼolobʼankil li aatin, muxuk ibʼ.
^ Taawil xchʼolobʼankil li aatin, Jehobʼa.
^ Aʼin naraj xyeebʼal, li tento xbʼaanunkil rikʼin li tzekemq.
^ Malaj «li altar». Taawil xchʼolobʼankil li aatin, xnaʼaj li mayej.
^ Taawil xchʼolobʼankil li aatin, chʼool.
