Hebreos 2:1-18
2 Joʼkan naq usta ak kʼaynaqo xkʼebʼal qachʼool chi rabʼinkil li xyeemank chaq, anaqwan qʼaxal chik tqakʼe qachʼool chi rabʼinkil re naq maajunwa toonajtobʼresiiq chiru li qapaabʼal.
2 Xbʼaan naq, wi yaal li aatin li xeʼxkʼe chi naweʼk ebʼ li ánjel ut chixjunilebʼ li xeʼxqʼet ribʼ chiru li chaqʼrabʼ ut inkʼaʼ xeʼabʼink, xeʼxtoj rix li xmaak joʼ chanru xkʼulubʼebʼ,
3 chanru tooʼeleliq chiru li tojbʼamaak wi naqakanabʼ xchʼolaninkil li kolbʼa ibʼ li qʼaxal nim? Xbʼaan naq li Qaawaʼ kixkʼe chi naweʼk xbʼeenwa aʼin ut li xeʼabʼink re, xeʼxseeraqʼi qe.
4 Ut li Yos kixkʼutbʼesi naq yaal li nekeʼxye aʼan saʼ xkʼabʼaʼ ebʼ li sachbʼachʼoolej,* ebʼ li xninqal ru naʼlebʼ ut li jalan jalanq chi bʼaanuhom li qʼaxal nim ut rikʼin xjekʼinkil ebʼ li maatan li nachalk rikʼin li santil musiqʼej joʼ chanru naraj aʼan.
5 Xbʼaan naq aʼan inkʼaʼ kixkʼe li ruuchichʼochʼ rubʼel xwankil ebʼ li ánjel. Li ruuchichʼochʼ aʼin tchalq moqon ut chirix aʼan yooko chi aatinak.
6 Jun sut, jun li winq kixye chiru li komonil: «Kʼaru xwankil li winq re naq taakʼe aachʼool chirix? Malaj kʼaru xwankil li ralal li winq re naq taawil?
7 Kubʼenaq bʼayaq xwankil chiruhebʼ li ánjel naq xaayobʼtesi, xaakʼe xloqʼal ut xaawoxloqʼi ut xaaxaqabʼ chi rilbʼal li xaakʼanjela rikʼin aawuqʼ.
8 Laaʼat xaakʼe chixjunil rubʼel roq». Naq kixkanabʼ chi jolomink, li Yos kixkʼe chixjunil li kʼaʼaq re ru rubʼel roq re naq tixjolomi. Usta toj maajiʼ naqil li Jesús chi xjolominkil chixjunil
9 naqil li kiyobʼtesiik chi kubʼenaq bʼayaq xwankil chiruhebʼ li ánjel ut saʼ xkʼabʼaʼ naq kikamk, kikʼeheʼk xloqʼal xbʼaan li Yos ut kinimaak ru. Ut xbʼaan xnimal rusilal li Yos kikamk chirix chixjunilebʼ.
10 Chixjunil li wank, naxkʼe xloqʼal li Yos ut saʼ xkʼabʼaʼ aʼan wank chixjunil. Ut re naq tkʼemanq xloqʼal naabʼal rehebʼ li ralal xkʼajol, li Yos kiril naq us naq tixkʼul li rahilal li Xnimal Ru aj Kʼamolbʼe li nakolok rehebʼ re naq ttzʼaqobʼresiiq ru.
11 Xbʼaan naq, li yook chi santobʼresink joʼ ajwiʼ li yookebʼ chi santobʼresiik, rikʼin jun ajwiʼ chalenaqebʼ chixjunilebʼ. Joʼkan naq inkʼaʼ naxutaanak chi xyeebʼal naq riitzʼinebʼ
12 naq naxye: «Tinkʼe chi naweʼk laakʼabʼaʼ rehebʼ li wiitzʼin; tinbʼichanq saʼ li chʼuut re xnimankil aawu».
13 Naxye ajwiʼ: «Tinkʼojobʼ inchʼool chirix aʼan». Ut naxye ajwiʼ: «Kʼehomaq reetal, arin wankin rikʼinebʼ li kokʼal li kixkʼe we li Jehobʼa».*
14 Joʼkan bʼiʼ, saʼ xkʼabʼaʼ naq ebʼ li «kokʼal» aʼin wankebʼ xtibʼel, aʼan ajwiʼ kiwank joʼ winq re naq li xkamik truuq xbʼaanunkil naq t-osoʼq laj Tza* li naru naxkʼam chaq li kamk.
15 Ut truuq xbʼaanunkil naq chixjunilebʼ li nekeʼxxuwa ru li kamk chalen chaq saʼ xyoʼlajikebʼ, inkʼaʼ chik teʼxuwaq.
16 Xbʼaan naq aʼan inkʼaʼ kichalk re xtenqʼankilebʼ li ánjel, kichalk bʼan re xtenqʼankilebʼ li ralal xkʼajol laj Abrahán.
17 Joʼkan naq kimineʼk ru chi wank joʼebʼ li «riitzʼin» saʼ chixjunil. Aʼan kixbʼaanu aʼin re naq truuq chi kʼanjelak chiru li Yos choʼq xyuwaʼil aj tij li naʼuxtaanank u* ut naʼabʼink. Chi joʼkan tixyeechiʼi jun li mayej li tixsach li xmaak ebʼ li qas qiitzʼin re naq teʼwanq wiʼ chik saʼ usilal rikʼin li Yos.
18 Saʼ xkʼabʼaʼ naq kixkʼul li rahilal naq kiyaleʼk rix, anaqwan kawresinbʼil chik re xtenqʼankilebʼ li nekeʼyaleʼk rix.
Xtzʼaqobʼ ebʼ li naʼlebʼ
^ Malaj «ebʼ li eetalil».
^ Taawil xchʼolobʼankil li aatin, Jehobʼa.
^ Saʼ griego «li Diʼaabʼ». Taawil xchʼolobʼankil li aatin, Diʼaabʼ.
^ Malaj «li natoqʼobʼank u».
