Hebreos 8:1-13
8 Joʼkan bʼiʼ, li xnimal ru naʼlebʼ li yooko xyeebʼal aʼan aʼin: qikʼin wank jun xyuwaʼil aj tij joʼ aʼan ut kichunlaak saʼ li kʼojaribʼaal saʼ li xnim ruqʼ li Nimajwal Yos li wank saʼ choxa
2 ut aʼan nakʼanjelak choʼq re li tenamit saʼ li santil naʼaj ut saʼ li chʼina ochoch li tzʼaqal re ru li kixwaklesi li Jehobʼa* ut inkʼaʼ li winq.
3 Xbʼaan naq chixjunilebʼ li xyuwaʼil aj tij xaqabʼanbʼilebʼ chi xyeechiʼinkil li mayej joʼ ajwiʼ li mayejanbʼil xul. Joʼkan naq kiʼajmank naq li xyuwaʼil aj tij aʼin tento ajwiʼ tixyeechiʼi jun li mayej.
4 Wi aʼan wank raj saʼ ruuchichʼochʼ, maawaʼ raj aj tij xbʼaan naq ak wankebʼ li winq li nekeʼxyeechiʼi li mayej joʼ naxye li Chaqʼrabʼ.
5 Li kʼanjel li nekeʼxbʼaanu ebʼ li winq aʼin yal jun eetalil ut naxkʼut li wank saʼ choxa. Ut kikʼutbʼesimank aʼin naq li Yos kixye re laj Moisés chanru tento tixbʼaanu li chʼina ochoch. Aʼan kixye: «Abʼi li tinye aawe re naq tatruuq xbʼaanunkil chixjunil joʼ li eetalil li xinkʼut chaawu naq wankat chaq saʼ li tzuul».
6 Abʼanan anaqwan li Jesús kixkʼul jun li kʼanjel li qʼaxal chaabʼil xbʼaan naq aʼan ajwiʼ natenqʼank saʼ li sumwank* li qʼaxal chaabʼil li xaqabʼanbʼil xbʼaan li chaqʼrabʼ ut xeʼinbʼil chiʼus xbʼaan li yeechiʼom li qʼaxal chaabʼil.
7 Wi li xbʼeen sumwank maakʼaʼ raj xpaltil, moko aajel ta raj chik ru li xkabʼ sumwank.
8 Xbʼaan naq chʼolchʼo tzʼaqal naq aʼan naril li xpaltil li tenamit naq naxye: «“Kʼe reetal, ak xnachʼok chaq ebʼ li kutan naq tinbʼaanu jun li akʼ sumwank rikʼinebʼ li ralal xkʼajol ebʼ laj Israel ut rikʼinebʼ li ralal xkʼajol laj Judá, chan li Jehobʼa.*
9 Moko joʼ ta li sumwank li xinbʼaanu rikʼinebʼ leexeʼtoon saʼebʼ li kutan naq xinchapebʼ chi ruqʼ re risinkilebʼ chaq Ejiipt. Aʼanebʼ xeʼxtzʼeqtaana linsumwank joʼkan naq inkʼaʼ chik xinkʼe inchʼool chirixebʼ”, chan li Jehobʼa.*
10 »“Xbʼaan naq aʼan aʼin li sumwank li tinbʼaanu rikʼinebʼ li ralal xkʼajol laj Israel naq ak xeʼnumeʼk ebʼ li kutan aʼin, chan li Jehobʼa.* Tinkʼe linchaqʼrabʼ saʼ xkʼaʼuxebʼ ut tintzʼiibʼa saʼ xchʼoolebʼ. Laaʼin tinwanq choʼq Xyosebʼ ut aʼanebʼ teʼwanq choʼq intenamit.
11 »”Ut maaʼani chik ttzoloq re leerechtenamitul chi moko leeras ut leeriitzʼin rikʼin xyeebʼal: «Cheenaw ru li Jehobʼa!».* Xbʼaan naq chixjunilebʼ teʼxnaw wu joʼ kokʼ joʼ ninq.
12 Ut inkʼaʼ chik tinjultika li maaʼusilal li xeʼxbʼaanu ut tinkuy eemaak”».
13 Naq kiʼaatinak chirix «jun akʼ sumwank» aʼan kixbʼaanu naq tqʼeeloʼq li kiwank chaq junxil. Ut wi qʼeel chik ut yook chi osoʼk, chi seebʼ tkutmanq.
Xtzʼaqobʼ ebʼ li naʼlebʼ
^ Taawil xchʼolobʼankil li aatin, Jehobʼa.
^ Li naʼlebʼ saʼ griego naʼaatinak chirix jun li qas qiitzʼin li naʼokenk chirix wiibʼ li qas qiitzʼin re naq teʼxkʼe ribʼ saʼ aatin.
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
