Hebreos 9:1-28
9 Joʼkan ajwiʼ, saʼ li xbʼeen sumwank wank ebʼ li chaqʼrabʼ li tento xbʼaanunkil re xloqʼoninkil li Yos ut wank xchaqʼrabʼil li chʼina ochoch re xloqʼoninkil li Yos arin saʼ ruuchichʼochʼ.
2 Li chʼina ochoch aʼin kikabʼlamank saʼ wiibʼ jachal, saʼ li xbʼeen jachal wank jun xnaʼaj kandeel,* li meex ut li kaxlanwa li yeechiʼinbʼil chiru li Yos;* li naʼaj aʼin kikʼabʼaʼiik Santil Naʼaj.
3 Abʼan chirix li xkabʼ kortiin* wank chaq li xkabʼ jachal li chʼina ochoch li nakʼabʼaʼiik Qʼaxal Saant.
4 Aran wank jun li sekʼ re oor li nakʼanjelak re xkʼatbʼal li insiʼeens ut li xkaaxil li sumwank li yiibʼanbʼil rikʼin oor. Ut chisaʼ wank li xaar re oor li kʼulanbʼil wiʼ li maná, li xxuqʼ laj Aarón li kiʼatzʼumak ut ebʼ li perpokil pek li tzʼiibʼanbʼil wiʼ li xchaqʼrabʼ li Yos.
5 Ut saʼ xbʼeen wank wiibʼ li kerubín* li wankebʼ xloqʼal ut rikʼinebʼ li xmu nekeʼxtzʼap li naʼaj li natawmank wiʼ rusilal li Yos. Abʼan, anaqwan moko xhoonalil ta re xchʼolobʼankil li junjunq chi naʼlebʼ aʼin.
6 Naq ak kawresinbʼil chik aʼin, ebʼ laj tij nekeʼok chi rajlal saʼ li xbʼeen jachal li chʼina ochoch re xbʼaanunkil li xkʼanjel li Yos.
7 Abʼan kaʼajwiʼ li xyuwaʼil aj tij naʼok saʼ li xkabʼ jachal li chʼina ochoch ut jun sut ajwiʼ chiru li chihabʼ naʼok aran. Ut junelik naxkʼam li kikʼ re xmayejankil re naq aʼan tkuyeʼq xmaak ut tkuyeʼq xmaak li tenamit li namaakobʼk xbʼaan xmaakʼaʼil xnaʼlebʼ.
8 Joʼkan bʼiʼ, li santil musiqʼej naxkʼut chi tzʼaqal re ru naq maaʼani naru naʼok saʼ li santil naʼaj wi toj wank li chʼina ochoch li kikabʼlamank xbʼeenwa.
9 Li chʼina ochoch aʼin yal jun li eetalil* choʼq re li qakutan ut naxkʼutbʼesi naq li mayej ut li mayejanbʼil xul li nayeechiʼimank moko naru ta xbʼaanunkil naq li winq li nakʼanjelak chiru li Yos saqaq ru li xchʼool chi tzʼaqal re ru.
10 Ut arin kaʼajwiʼ yook chi aatinak chirix li tzekemq, li ukʼaʼ ut li jalan jalanq chi kubʼihaʼ. Aʼin li naxye li Xchaqʼrabʼ laj Moisés li tento xbʼaanunkil rikʼin li tibʼelej ut tento xbʼaanunkil toj reetal twulaq li hoonal li xaqabʼanbʼil re xtuqubʼankil ru chixjunil.
11 Abʼanan li Kriist kichalk joʼ xyuwaʼil aj tij re xkʼambʼal chaq li us li ak wank qikʼin ut kiʼok saʼ li chʼina ochoch li qʼaxal nim ut qʼaxal chaabʼil, li chʼina ochoch aʼin moko yiibʼanbʼil ta rikʼin ruqʼ winq chi moko chalenaq ta saʼ li ruuchichʼochʼ aʼin.
12 Aʼan jun sut ajwiʼ kiʼok saʼ li santil naʼaj rikʼin li xkikʼel abʼan inkʼaʼ rikʼin xkikʼel chibʼaat chi moko xkikʼel saajil wakax ut xoorisi chi junajwa rubʼel xwankil li maak.
13 Ebʼ laj tij nekeʼroksi xkikʼel chibʼaat ut xkikʼel teelom wakax ut nekeʼxrachrachi li xchahil ebʼ li saajil wakax saʼ xbʼeenebʼ li tzʼajebʼ ru ut aʼin naxbʼaanu naq saqaqebʼ ru chiru li Yos.
14 Abʼan li xkikʼel li Kriist qʼaxal nim chiru aʼin. Saʼ xkʼabʼaʼ li santil musiqʼej* li wank chi junelik, li Kriist kixmayeja ribʼ chiru li Yos joʼ jun li mayej li tzʼaqal re ru. Li xkikʼel naxbʼaanu naq saqaq ru li qachʼool ut tqakanabʼ xbʼaanunkil li maakʼaʼ naʼok wiʼ. Joʼkan bʼiʼ, tooruuq chi kʼanjelak chiru li yoʼyokil Yos.
15 Naq li Jesús kikamk, li Yos kixkuy xmaakebʼ li qas qiitzʼin li xeʼwank chaq rubʼel xwankil li sumwank li wank chaq junxil. Ut chi joʼkan aʼan kitenqʼank saʼ li akʼ sumwank* ut li xeʼbʼoqeʼk xbʼaan li Yos teʼruuq xtawbʼal li junelik yuʼam joʼ kiyeechiʼimank rehebʼ.
16 Naq nabʼaanumank jun li sumwank, aajel ru naq tkamq li qas qiitzʼin li naxbʼaanu li sumwank
17 xbʼaan naq li kamk naxbʼaanu naq wanq xwankil li sumwank. Wi toj yoʼyo li qas qiitzʼin, li sumwank moko wank ta xwankil.
18 Joʼkan bʼiʼ, li sumwank li xwank chaq junxil, maakʼaʼ ajwiʼ xwankil xbʼaan naq maaʼani kikamk.
19 Naq laj Moisés ak kixye re li tenamit chixjunil li taql li wank saʼ li Chaqʼrabʼ, kixchap li xkikʼel ebʼ li saajil wakax ut li xkikʼel ebʼ li chibʼaat li yukʼinbʼil rikʼin haʼ, li kaqi aqʼej li nalemtzʼunk ru, wiibʼ oxibʼ li ruqʼcheʼ ut kixrachrachi saʼ xbʼeen li bʼotbʼilhu ut saʼ xbʼeen li tenamit.
20 Ut kixye: «Aʼin li xkikʼel li sumwank li kixye eere li Yos naq teepaabʼ».
21 Ut kixrachrachi ajwiʼ li kikʼ chiru li chʼina ochoch ut chiru chixjunil li naʼoksimank re xbʼaanunkil li xkʼanjel li Yos.*
22 Joʼkan tzʼaqal, joʼ naxye li Chaqʼrabʼ, kachʼin chik ma chixjunil nachʼajobʼresiik rikʼin kikʼ ut wi inkʼaʼ nahoymank li kikʼ, maaʼani kuybʼil xmaak.
23 Joʼkan naq kiʼajmank xchʼajobʼresinkil li reetalil li kʼaʼaq re ru li wank saʼ choxa rikʼin xkikʼel xul, abʼan qʼaxal chaabʼil li mayej naʼajmank choʼq re li wank saʼ choxa.
24 Xbʼaan naq li Kriist kiʼok saʼ choxa ut inkʼaʼ saʼ jun li santil naʼaj li yiibʼanbʼil rikʼin ruqʼ winq, aʼin reetalil li santil naʼaj li tzʼaqal re ru. Ut anaqwan wank chiru li Yos re qatenqʼankil.
25 Inkʼaʼ kibʼaanumank aʼin re naq naabʼal sut tixmayeja ribʼ joʼ naq li xyuwaʼil aj tij naʼok rajlal chihabʼ saʼ li santil naʼaj rikʼin li kikʼ li maawaʼ re.
26 Wi joʼkan, tento raj kirahobʼtesiik naabʼal sut chalen chaq saʼ xtiklajik* li ruuchichʼochʼ. Abʼan kixkʼut ribʼ saʼ xraqik ebʼ li kutan aʼin* re risinkil li maak saʼ xkʼabʼaʼ naq kixkʼe ribʼ chi mayejaak ut jun sut ajwiʼ kixbʼaanu aʼin.
27 Joʼ chanru naq maakʼaʼ naruhank xbʼaanunkil re naq li winq jun sut ajwiʼ tkamq ut chirix chik aʼan traqmanq aatin saʼ xbʼeen,
28 joʼkan ajwiʼ nakʼulmank rikʼin li Kriist, aʼan jun sut ajwiʼ kixmayeja ribʼ re riiqaninkil li xmaak naabʼalebʼ li qas qiitzʼin ut naq tkʼulunq xkabʼ sutil inkʼaʼ tchalq re risinkil li maak. Aʼan tchalq re xkolbʼalebʼ li yookebʼ chi oybʼenink re.
Xtzʼaqobʼ ebʼ li naʼlebʼ
^ Li xnaʼaj kandeel aʼin wank wuqubʼ xxamlel.
^ Taawil xchʼolobʼankil li aatin, kaxlanwa li yeechiʼinbʼil chiru li Yos.
^ Aʼin jun li pimil tʼikr li naxjach li Santil Naʼaj rikʼin li Qʼaxal Saant li wank saʼ rochoch li Yos.
^ Taawil xchʼolobʼankil li aatin, kerubín.
^ Malaj «jaljokil ru aatin».
^ Li aatin saʼ griego, pnéuma. Taawil xchʼolobʼankil li aatin, musiqʼ.
^ Li naʼlebʼ saʼ griego naʼaatinak chirix jun li qas qiitzʼin li naʼokenk chirix wiibʼ li qas qiitzʼin re naq teʼxkʼe ribʼ saʼ aatin.
^ Malaj «li kʼanjel li nabʼaanumank re xtenqʼankilebʼ li junchʼol».
^ Aʼin naraj xyeebʼal, ebʼ li ralal xkʼajol laj Adán ut xʼEva.
^ Malaj «li ruuchichʼochʼ». Taawil xchʼolobʼankil li aatin, ruuchichʼochʼ.
