Hechos 11:1-30
11 Joʼkan bʼiʼ, ebʼ li apóstol ut ebʼ laj paabʼanel li wankebʼ Judea xeʼrabʼi naq ebʼ li qas qiitzʼin li maawaʼebʼ aj judiiy xeʼxkʼulubʼa ajwiʼ li raatin li Yos.
2 Naq laj Pedro kiwulak Jerusalén, ebʼ li qas qiitzʼin li nekeʼraj naq ebʼ li junchʼol chi tenamit teʼsetmanq xtzʼuumal xtzʼejwal xeʼok xchoqinkil.
3 Xeʼok xyeebʼal re: «Xat-ok saʼ rochochebʼ li winq li inkʼaʼ setbʼilebʼ xtzʼuumal xtzʼejwal ut xatwaʼak rikʼinebʼ».
4 Tojaʼ naq laj Pedro kiʼok xchʼolobʼankil chiruhebʼ chi tzʼaqal re ru, ut kixye rehebʼ:
5 «Naq yookin chaq chi tijok saʼ li tenamit Jope sachamil linkʼaʼuxl ut xinʼok rilbʼal jun li moy u. Xwil chanchan jun li nimla tʼikr re liin li chapcho saʼ xkaaxukuutil. Li tʼikr aʼin kiʼelk chaq saʼ choxa ut kiwulak tzʼaqal bʼarwiʼ wankin.
6 Xinkanaak rilbʼal ut xwil naq saʼ xbʼeen li tʼikr aʼin wank ebʼ li xul li kaahibʼ roq, ebʼ li josqʼ aj xul, ebʼ li nekeʼxjukuki ribʼ chiru chʼochʼ ut ebʼ li nekeʼrupupik chiru choxa.
7 Xwabʼi ajwiʼ jun li yaabʼ kuxej li kixye we: “Waklin Pedro, kamsihebʼ li xul ut waʼin!”.
8 Abʼan laaʼin xinye: “Maajoqʼe Qaawaʼ. Maajun sut xʼok saʼ we li muxbʼil ut tzʼaj ru”.
9 Tojaʼ naq li yaabʼ kuxej li kiʼabʼimank saʼ choxa kixye xkabʼ sutil: “Kanabʼ xyeebʼal muxbʼil re li ak saabʼesinbʼil xbʼaan li Yos”.
10 Aʼin kikʼulmank saʼ rox sut, ut chixjunil kikʼameʼk wiʼ chik saʼ choxa.
11 Saʼ ajwiʼ li hoonal aʼan, xeʼwulak oxibʼ li winq re Cesarea li taqlanbʼilebʼ chinsikʼbʼal ut xeʼok saʼ li ochoch bʼarwiʼ yooko chi kanaak.
12 Li santil musiqʼej kixye we naq tinxik chirixebʼ ut inkʼaʼ t-oq inkʼaʼuxl. Ut li waqibʼ chi hermaan aʼin xkohebʼ ajwiʼ chiwix ut xooʼok saʼ rochoch li winq.
13 »Li winq aʼin kixseeraqʼi qe naq kiril ru jun li ánjel saʼ rochoch ut kiyeeheʼk re: “Taqla wiibʼ oxibʼ li winq aran Jope re naq teʼxkʼam chaq laj Simón li nawbʼil ru joʼ aj Pedro
14 ut aʼan tixye aawe chanru tatruuq chi koleʼk laaʼat ut li wankebʼ saʼ laawochoch”.
15 Abʼan, naq ok we chi aatinak, li santil musiqʼej kikubʼeek saʼ xbʼeenebʼ joʼ chanru kikubʼeek saʼ qabʼeen saʼ xtiklajik.
16 Saʼ li hoonal ajwiʼ aʼan kijultikoʼk we li naxye chaq qe chi rajlal li Qaawaʼ: “Laj Juan kikubʼsink haʼ rikʼin haʼ, abʼan laaʼex tkubʼsiiq eehaʼ rikʼin santil musiqʼej”.
17 Joʼkan bʼiʼ, wi li Yos yook xkʼebʼal rehebʼ li maatan li kixkʼe ajwiʼ qe laaʼo li xqapaabʼ li Qaawaʼ Jesukriist, anihin laaʼin re xrambʼal xbʼe li Yos?».
18 Naq xeʼrabʼi aʼin, maakʼaʼ chik xeʼxye ut xeʼxkʼe xloqʼal li Yos. Tojaʼ naq xeʼxye: «Li Yos kixkʼehebʼ xhoonal li maawaʼebʼ aj judiiy re naq teʼxyotʼ xchʼool ut teʼxjal xnaʼlebʼ ut chi joʼkan teʼxtaw li yuʼam!».
19 Joʼkan bʼiʼ, li xeʼchaʼchaʼiik xbʼaan li rahobʼtesiik li kitiklaak saʼ xkʼabʼaʼ laj Esteban xeʼwulak toj Fenicia, Chipre ut Antioquía. Abʼan kaʼajwiʼ rehebʼ laj judiiy xeʼxye resil li chaabʼil esil.
20 Abʼanan, saʼ xyanqebʼ kiwank wiibʼ oxibʼ li winq re Chipre ut re Cirene li xkohebʼ Antioquía xeʼxkʼe chi naweʼk li chaabʼil esil chirix li Qaawaʼ Jesús rehebʼ li qas qiitzʼin li nekeʼaatinak saʼ griego.
21 Joʼkan ajwiʼ, li ruqʼ li Jehobʼa* wank rikʼinebʼ ut naabʼalebʼ li qas qiitzʼin xeʼok chi paabʼank ut xeʼxtaqe li Qaawaʼ.
22 Li esil aʼin kiwulak rikʼin li chʼuut li wank Jerusalén, ut ebʼ aʼan xeʼxtaqla laj Bernabé aran Antioquía.
23 Naq kiwulak laj Bernabé ut kiril chanru kixkʼe li Yos xnimal rusilal saʼ xbʼeenebʼ li nekeʼtaqenk re li Jesús, kʼajoʼ naq kisahoʼk saʼ xchʼool ut kixye re chixjunilebʼ naq junelik teʼabʼinq chiru li Qaawaʼ chi anchalebʼ xchʼool,
24 xbʼaan naq laj Bernabé chaabʼil winq, nujenaq chi santil musiqʼej ut kaw xpaabʼal. Ut kʼajoʼebʼ li qas qiitzʼin xeʼok xpaabʼankil li Qaawaʼ.
25 Tojaʼ naq xkoho saʼ li tenamit Tarso ut yalaq bʼar kixsikʼ laj Saulo.
26 Ut naq kixtaw, kixkʼam Antioquía. Ut chiru jun chihabʼ xeʼwank saʼ li chʼuut ut naabʼalebʼ li qas qiitzʼin xeʼxtzol. Aran Antioquía xeʼkʼabʼaʼiik xbʼeen sut ebʼ li xtzolom li Jesús joʼebʼ aj tqehom re li Kriist. Li Yos kixkʼabʼaʼihebʼ chi joʼkan.
27 Chiruhebʼ li kutan aʼan, wiibʼ oxibʼ li propeet xeʼelk chaq Jerusalén ut xkohebʼ Antioquía.
28 Jun rehebʼ aʼan, aj Ágabo xkʼabʼaʼ, kiwakliik ut kixye chaq saʼ xkʼabʼaʼ li santil musiqʼej naq chalk re jun li nimla weʼej saʼ chixjunil li ruuchichʼochʼ ut aʼin kikʼulmank saʼ xkutankil laj Claudio.
29 Joʼkan naq, ebʼ li nekeʼtaqenk re li Jesús xeʼxkʼubʼ naq teʼxtaqla li tenqʼ choʼq rehebʼ laj paabʼanel li wankebʼ Judea, joʼ chanru naxkʼe ribʼ chiru li junjunq.
30 Ut joʼkan xeʼxbʼaanu. Xeʼxtaqla li tenqʼ chirix laj Bernabé ut laj Saulo re naq teʼxkʼe rehebʼ li cheekel winq.
Xtzʼaqobʼ ebʼ li naʼlebʼ
^ Taawil xchʼolobʼankil li aatin, Jehobʼa.
