Hechos 21:1-40
21 Naq ak xqachaqʼrabʼi qibʼ chi kʼajoʼ xrahil qachʼool, xqachap li jukubʼ ut tiik xookoho toj Cos. Saʼ li jun chik kutan xookoho Rodas ut chirix chik aʼan Pátara.
2 Naq xqataw jun li jukubʼ li yook chi xik Fenicia, xootaqeʼk chisaʼ ut xookoho.
3 Saʼ li qatzʼe xqil Chipre, li naʼaj li sutsu chi haʼ, abʼan tiik xoonumeʼk ut xookoho Siria. Xooxaqliik Tiro bʼarwiʼ naxkanabʼ li riiq li jukubʼ.
4 Aran xqasikʼebʼ ut xqatawebʼ li nekeʼtaqenk re li Jesús ut wuqubʼ kutan xookanaak saʼ li naʼaj aʼan. Abʼan saʼ xkʼabʼaʼ li santil musiqʼej ebʼ li winq aʼin inkʼaʼ nekeʼxkanabʼ xyeebʼal re laj Pablo naq inkʼaʼ tixkʼe junaq roq aran Jerusalén.
5 Naq xeʼnumeʼk ebʼ li kutan aʼin, xqachap wiʼ chik qabʼe. Chixjunilebʼ joʼ ixq ut kokʼal xooʼeʼrochbʼeeni toj reetal xqakanabʼ li tenamit. Tojaʼ naq xqawiqʼibʼ qibʼ chire haʼ, xootijok
6 ut xqachaqʼrabʼi qibʼ. Laaʼo xootaqeʼk saʼ li jukubʼ ut aʼanebʼ xeʼsutqʼiik saʼebʼ li rochoch.
7 Aran Tiro xqachap qajukubʼ toj reetal xoowulak Tolemaida. Aran xqakʼe xsahilebʼ xchʼool ebʼ li qechpaabʼanel ut xookanaak jun kutan rikʼinebʼ.
8 Xooʼelk aran saʼ li jun chik kutan ut xoowulak Cesarea. Xoowulak saʼ rochoch laj Felipe li naxkʼe chi naweʼk li chaabʼil esil, aʼan jun rehebʼ li wuqubʼ chi winq, ut xookanaak rikʼin.
9 Li winq aʼin wank kaahibʼ xrabʼin li wankebʼ xjunes* ut nekeʼaatinak joʼ propeet.
10 Ak naabʼal kutan qokik arin naq xkubʼeek chaq aran Judea jun li winq propeet, aj Ágabo xkʼabʼaʼ.
11 Kichalk bʼarwiʼ wanko, kixchap li xkʼaamal xsaʼ laj Pablo, ut rikʼin aʼin kixbʼakʼ xkabʼichal li roq ut li ruqʼ ut kixye: «Li Yos naxye saʼ xkʼabʼaʼ li xsantil musiqʼej: “Chi joʼkaʼin tbʼakʼeʼq xbʼaanebʼ laj judiiy laj echal re li kʼaamalsaʼ aʼin aran Jerusalén ut tqʼaxtesiiq saʼ ruqʼebʼ li qas qiitzʼin li maawaʼebʼ aj judiiy”».
12 Naq xqabʼi aʼin, laaʼo ut ebʼ li junchʼol li wanko aran, xooʼok xtzʼaamankil re, naq inkʼaʼ ttaqeʼq Jerusalén.
13 Tojaʼ naq laj Pablo kixye: «Kʼaʼut yookex chi yaabʼak ut xbʼaanunkil naq tchʼinaaq linchʼool? Nawaj naq teenaw naq moko kaʼaj tawiʼ kawresinbʼilin re naq tinbʼakʼeʼq, kawresinbʼilin ajwiʼ re naq tinkamsiiq aran Jerusalén saʼ xkʼabʼaʼ li Qaawaʼ Jesús».
14 Saʼ xkʼabʼaʼ naq inkʼaʼ xooruuk xqʼunbʼesinkil, inkʼaʼ chik xqaram chiru* ut xqaye: «Chibʼaanumanq li rajom li Jehobʼa».*
15 Naq ak xnumeʼk ebʼ li kutan aʼin, xqakawresi qibʼ ut xqachap qabʼe re xik aran Jerusalén.
16 Wiibʼ oxibʼ li winq aj Cesarea li nekeʼtaqenk re li Jesús xooʼeʼxkʼam saʼ rochoch jun rehebʼ li xbʼeen aj paabʼanel aj Chipre, Mnasón xkʼabʼaʼ xbʼaan naq aran tookanaaq.
17 Naq xoowulak Jerusalén, ebʼ li qechpaabʼanel xooʼeʼxkʼul chi sahebʼ saʼ xchʼool.
18 Wulajaq chik, laj Pablo xkoho qochbʼeen chi rilbʼal laj Santiago. Aran wankebʼ chixjunilebʼ li cheekel winq.
19 Laj Pablo kixkʼe xsahilebʼ xchʼool ut kiʼok xseeraqʼinkil rehebʼ chi tzʼaqal re ru li kixbʼaanu li Yos choʼq rehebʼ li maawaʼebʼ aj judiiy saʼ xkʼabʼaʼ li xkʼanjel.
20 Naq ak xeʼrabʼi aʼin, xeʼok xkʼebʼal xloqʼal li Yos ut chirix chik aʼan xeʼxye re: «At wechpaabʼanel nakaanaw naq chi mil aj paabʼanel wank saʼ xyanqebʼ laj judiiy ut chixjunilebʼ nekeʼxkol rix li Chaqʼrabʼ chi anchalebʼ xchʼool.
21 Abʼan xeʼrabʼi resil naq yookat xkʼutbʼal rehebʼ laj judiiy, li wankebʼ saʼ xyanqebʼ li junchʼol chi tenamit, naq teʼxkanabʼ li Xchaqʼrabʼ laj Moisés ut xaaye rehebʼ naq inkʼaʼ chik teʼxset xtzʼuumal xtzʼejwal ebʼ li ralal xkʼajol chi moko teʼxyuʼami ebʼ li naʼlebʼ li xaqabʼanbʼil.
22 Joʼkan naq, kʼaru tqabʼaanu? Chʼolchʼo naq teʼxnaw naq xatkʼulunk.
23 Joʼkan bʼiʼ, bʼaanu li tqaye aawe. Wank kaahibʼ li winq li nekeʼraj xbʼaanunkil li xeʼxyeechiʼi re li Yos.
24 Kʼamebʼ chaawix, chʼajobʼresi aawibʼ rochbʼeenebʼ ut taatoj ebʼ li xsachomq re naq teʼruuq xjoobʼal li xjolomebʼ. Chi joʼkan chixjunilebʼ teʼxnaw naq moko yaal ta li xeʼrabʼi chaawix xbʼaan naq yookat chi naʼlebʼak chiʼus ut yookat ajwiʼ xpaabʼankil li Chaqʼrabʼ.
25 Ut chirixebʼ laj paabʼanel li maawaʼebʼ aj judiiy, xqataqla chi tzʼiibʼanbʼil rehebʼ li xqakʼubʼ naq teʼxtzʼeqtaana chixjunil li mayejanbʼil xul li nayeechiʼimank chiruhebʼ li pechʼbʼil yos joʼ li kikʼ, ebʼ li yatzʼbʼil xul* ut li muxuk ibʼ».*
26 Saʼ li jun chik kutan, laj Pablo kixkʼamebʼ li winq aʼin ut kixchʼajobʼresi ribʼ rochbʼeenebʼ. Chirix chik aʼan kiʼok saʼ li rochoch li Yos re xkʼebʼal chi naweʼk joqʼe traqeʼq xkutankil li chʼajobʼresink ibʼ ut joqʼe tyeechiʼimanq li mayej chirix li junjunq.
27 Naq kachʼin chik ma nawulak wuqubʼ kutan, ebʼ laj judiiy re Asia xeʼril ru saʼ rochoch li Yos ut xeʼxpoqoqi* li kʼiila tenamit. Joʼkan naq xeʼxchap
28 ut japjokebʼ re chi xyeebʼal: «Ex aj Israel, tenqʼahomaqo! Aʼin li winq li nakʼutuk yalaq bʼar ut naxkʼut chiru chixjunilebʼ li qas qiitzʼin naq teʼxtzʼeqtaana li qatenamit, li Qachaqʼrabʼ ut li qanaʼaj. Ut moko kaʼaj tawiʼ aʼin, kixchʼik saʼ li rochoch li Yos ebʼ laj griego ut kixtzʼajni li santil naʼaj».
29 Xeʼxye aʼin xbʼaan naq xeʼril ru rubʼelaj saʼ li tenamit rochbʼeen laj Trófimo, aj Éfeso, ut xeʼxkʼoxla naq laj Pablo kikʼamok re saʼ rochoch li Yos.
30 Chixjunil li tenamit kixpoqoqi ribʼ.* Saʼ aanil xeʼwulak ebʼ li qas qiitzʼin, xeʼxchap laj Pablo ut xeʼxjukuki chirix li rochoch li Yos. Ut saʼ junpaat xeʼxtzʼap li okebʼaal.
31 Naq yookebʼ xrahobʼtesinkil re xkamsinkil, xeʼxye re li naxjolomi jun chʼuut aj puubʼ naq chixjunil li tenamit Jerusalén yook xpoqoqinkil ribʼ.*
32 Saʼ junpaat, kixchʼutubʼebʼ laj puubʼ ut ebʼ li nekeʼtaqlank rehebʼ laj puubʼ* ut kikubʼeek saʼ aanil bʼarwiʼ wankebʼ aʼan. Naq ebʼ li qas qiitzʼin xeʼril ru li najolomink rehebʼ laj puubʼ ut ebʼ laj puubʼ xeʼxkanabʼ xteninkil laj Pablo.
33 Li najolomink rehebʼ laj puubʼ kinachʼok, kixchap ut kixye naq tento teʼxbʼakʼ rikʼin wiibʼ chi kareen. Chirix chik aʼan kixpatzʼ ani li winq ut kʼaru xmaak.
34 Abʼan wiibʼ oxibʼ li qas qiitzʼin japjokebʼ re chi xyeebʼal jalan jalanq li naʼlebʼ. Saʼ xkʼabʼaʼ naq inkʼaʼ kiruuk xnawbʼal kʼaru tzʼaqal kikʼulmank xbʼaan li poqoqink ibʼ,* kixye naq tento teʼxkʼam laj Pablo saʼ xnaʼajebʼ laj puubʼ.
35 Abʼan naq xeʼwulak saʼ li taqlebʼaal, ebʼ laj puubʼ xeʼxpaqo laj Pablo xbʼaan naq ebʼ li qas qiitzʼin nekeʼraj xrahobʼtesinkil
36 yookebʼ xtaqenkil ut japjokebʼ re chi xyeebʼal: «Kamsi!».
37 Naq okebʼ re xchʼikbʼal saʼ xnaʼajebʼ laj puubʼ, laj Pablo kixye re li najolomink rehebʼ laj puubʼ: «Ma naru ninye junaq li waatin?». Aʼan kixye re: «Ma nakaanaw aatinak saʼ griego?
38 Ma maawaʼ tabʼiʼ laaʼat laj Ejiipt li kixqʼet ribʼ chiru li awabʼejilal wiibʼ oxibʼ chihabʼ anaqwan ut kixkʼam saʼ li chaqichʼochʼ kaahibʼ mil aj kamsinel?».
39 Laj Pablo kixye re: «Laaʼin aj judiiy, xinyoʼlaak Tarso, jun li tenamit re Cilicia li nawbʼil ru chiʼus. Joʼkan naq nintzʼaama chaawu naq tinaakanabʼ raatinankil li tenamit».
40 Naq ak xkʼeheʼk xleseens ut xaqxo saʼ li taqlebʼaal, laj Pablo kirekʼasi li ruqʼ chiru li tenamit. Naq xeʼxkanabʼ ekʼank, kixye rehebʼ saʼ hebreo:
Xtzʼaqobʼ ebʼ li naʼlebʼ
^ Saʼ griego «maajiʼ nekeʼwank rikʼin winq».
^ Saʼ griego «maakʼaʼ chik xqaye re».
^ Taawil xchʼolobʼankil li aatin, Jehobʼa.
^ Malaj «ebʼ li xul li nekeʼkamsiik ut inkʼaʼ nekeʼisiik xkikʼel».
^ Li aatin saʼ griego, pornéia. Taawil xchʼolobʼankil li aatin, muxuk ibʼ.
^ Malaj «xeʼxmululi».
^ Malaj «kixmululi ribʼ».
^ Malaj «yook xmululinkil ribʼ».
^ Li junjunq chi winq aʼin xaqabʼanbʼil re xtaqlankil jun siʼeent aj puubʼ.
^ Malaj «li mululink ibʼ».
