Hechos 28:1-31
28 Naq ak wanko chik chi chʼochʼel, xqanaw naq Malta xkʼabʼaʼ li naʼaj li sutsu chi haʼ.
2 Ebʼ li qas qiitzʼin li wankebʼ saʼ li naʼaj li sutsu chi haʼ* xooʼeʼxtenqʼa chi anchalebʼ xchʼool. Xeʼxtzʼabʼ li xaml ut xooʼeʼxkʼul chiʼus xbʼaan naq yook li habʼ ut li ke.
3 Abʼan naq laj Pablo kixchʼutubʼ jun qʼaal li cheʼ ut kixkʼe saʼ xaml xbʼaan xtiqwal li xaml kiʼelk chaq jun li kʼantiʼ li wank xmay ut kixchap ribʼ chi ruqʼ laj Pablo.
4 Naq ebʼ li qas qiitzʼin li wankebʼ saʼ li naʼaj li sutsu chi haʼ xeʼril li kʼantiʼ li wank xmay tʼuytʼu chi ruqʼ laj Pablo, xeʼok xyeebʼal chiribʼilebʼ ribʼ: «Chʼolchʼo naq li winq aʼin aj kamsinel. Usta kikoleʼk saʼ palaw, li Tiikilal* inkʼaʼ tixkanabʼ chi yoʼyo».
5 Abʼan, kixchiqʼchiqʼi li ruqʼ ut li kʼantiʼ kitʼaneʼk saʼ xaml, abʼan laj Pablo maakʼaʼ kixkʼul.
6 Ebʼ aʼan xeʼkanaak roybʼeninkil naq tsipooq malaj ttʼaneʼq saʼ xxaqam chi kamenaq. Abʼan naq xeʼril naq maakʼaʼ kixkʼul, xeʼxjal xkʼaʼuxl ut xeʼok xyeebʼal naq yos tana li winq aʼin.
7 Chixkʼatq li naʼaj bʼarwiʼ wankebʼ, wank jun li winq li qʼaxal nim xwankil saʼ li naʼaj li sutsu chi haʼ ut wank xchʼochʼ, aj Publio xkʼabʼaʼ. Li winq aʼin xooxkʼul chiʼus ut xookanaak saʼ rochoch chiru oxibʼ kutan.
8 Abʼan li xyuwaʼ laj Publio wank chiru chʼaat, yook xtiq ut xkikʼsaʼ. Joʼkan naq, laj Pablo kiʼok bʼarwiʼ wank li winq, kitijok, kixkʼe li ruqʼ saʼ xbʼeen ut kixkʼirtasi.
9 Chirix chik aʼin, ebʼ li junchʼol chi yaj li wankebʼ saʼ li naʼaj li sutsu chi haʼ, xkohebʼ rilbʼal laj Pablo ut xeʼkʼirtasiik.
10 Xeʼxkʼe ajwiʼ naabʼal qamaatan saʼ xkʼabʼaʼ naq nokooʼeʼroxloqʼi, ut naq ak xik qe saʼ li nimla jukubʼ xeʼxkʼe qe chixjunil li naʼajmank chiqu.
11 Naq ak xqaket oxibʼ po saʼ li naʼaj li sutsu chi haʼ, xookoho saʼ jun li nimla jukubʼ. Ut chiru li nimla jukubʼ wank xjalam u ebʼ li Ralal laj Zeus. Li nimla jukubʼ aʼin re Alejandría ut kixnumsi li habʼalqʼe saʼ li naʼaj li sutsu chi haʼ.
12 Xooxaqliik Siracusa chiru oxibʼ kutan.
13 Aran xqachap wiʼ chik qabʼe ut xoowulak Regio. Wulajaq chik, kiwakliik chaq jun li kawil iqʼ saʼ li naʼaj bʼarwiʼ naʼok li iqʼ ut saʼ li jun chik kutan xoowulak Puteoli.
14 Aran xqataw ebʼ li qechpaabʼanel ut xeʼxtzʼaama chiqu naq tookanaaq rikʼinebʼ wuqubʼ kutan. Ut chirix chik aʼan xookoho Roma.
15 Naq ebʼ li qechpaabʼanel xeʼrabʼi qesil, xkohebʼ qatawbʼal toj saʼ li Kʼayil re Apio ut saʼ li naʼaj re waʼak ut hilank li naxkʼabʼaʼi Oxibʼ li Ochoch. Naq laj Pablo kirilebʼ ru, kixbʼanyoxi re li Yos ut kʼajoʼ kikawuuk xchʼool.
16 Naq xoowulak Roma, xeʼxkʼulubʼa naq laj Pablo tkanaaq xjunes saʼ jun li ochoch, rochbʼeen jun laj puubʼ li tkʼaakʼalenq re.
17 Abʼanan naq ak xnumeʼk oxibʼ kutan, kixbʼoqebʼ laj judiiy li qʼaxal wankebʼ xwankil. Ut naq ak chʼutchʼukebʼ, kixye rehebʼ: «Ex was wiitzʼin, usta moko xinmaakobʼk ta chiru li tenamit chi moko xinqʼet ta wibʼ chiru li xnajteril naʼlebʼ li qaxeʼtoon, xinqʼaxtesiik choʼq aj preex saʼ ruqʼebʼ laj Roma aran Jerusalén.
18 Naq ak xeʼxbʼaanu we ebʼ li patzʼom, xeʼraj inkanabʼankil chi xik xbʼaan naq inkʼaʼ xeʼxtaw inmaak re naq tineʼxkamsi.
19 Saʼ xkʼabʼaʼ naq ebʼ laj judiiy inkʼaʼ xeʼraj naq tineʼxkanabʼ chi xik, xintzʼaama naq tineʼxkʼam rikʼin li awabʼej re Roma,* abʼan maawaʼ re xjitbʼal lintenamit.
20 Joʼkan naq xintzʼaama naq nawaj rilbʼal eeru ut eeraatinankil xbʼaan naq bʼakʼbʼokin chi kareen saʼ xkʼabʼaʼ li yook roybʼeninkil li tenamit Israel».
21 Tojaʼ naq xeʼxye re: «Maajunwa xqakʼul junaq li esilhu chaawix li chalenaq Judea chi moko junaq ta laj paabʼanel li chalenaq aran kixkʼam ta chaq aawesil chi moko kixye ta li inkʼaʼ us chaawix.
22 Abʼan naqaj rabʼinkil chi xtzʼuumal aawe li nakaakʼoxla xbʼaan naq naqanaw naq li jachbʼil paabʼal aʼin moko us ta ilbʼil yalaq bʼar».
23 Joʼkan naq xeʼxxaqabʼ jun li kutan re xchʼutubʼankil ribʼebʼ rikʼin ut kʼajoʼ xkʼihalebʼ li qas qiitzʼin xkohebʼ xtawbʼal laj Pablo bʼarwiʼ yook chi kanaak. Chalen eqʼla toj ewu kixkʼe chi naweʼk chi tzʼaqal re ru li Xʼawabʼejilal li Yos. Kinaʼlebʼak rikʼinebʼ re naq teʼxkʼulubʼa li Jesús, ut naq kixbʼaanu aʼin kiroksi li Xchaqʼrabʼ laj Moisés ut li xeʼxtzʼiibʼa chaq ebʼ li Propeet.
24 Wankebʼ xeʼxpaabʼ li kixye ut wankebʼ inkʼaʼ xeʼxpaabʼ.
25 Ut saʼ xkʼabʼaʼ naq inkʼaʼ nekeʼxkʼe ribʼ saʼ aatin, xeʼok chi elk. Laj Pablo kixye aʼin:
«Joʼkan peʼ naq li santil musiqʼej kiraatina leexeʼtoon chi xtzʼuumal re li propeet Isaías
26 ut kixye: “Ayu rikʼin li tenamit aʼin ut taaye: «Texʼabʼinq abʼan maajunwa teetaw ru. Texʼiloq abʼan maakʼaʼ teeril.
27 Xbʼaan naq li xchʼool li tenamit aʼin kikawuuk joʼ li pek. Xeʼxtzʼap li xxik* ut xeʼxtzʼap li ru re naq maajunwa teʼiloq rikʼinebʼ xnaqʼru chi moko teʼabʼinq rikʼinebʼ xxik, chi moko teʼxtaw ru, chi moko teʼsutqʼiiq rikʼin li Yos chi moko tinkʼirtasihebʼ»”.
28 Joʼkan bʼiʼ, cheenawaq naq li kolbʼa ibʼ aʼin li nachalk rikʼin li Yos xtaqlamank rikʼinebʼ li maawaʼebʼ aj judiiy. Chʼolchʼo naq aʼanebʼ teʼrabʼi li esil chirix li kolbʼa ibʼ».
29 *
30 Tojaʼ naq laj Pablo kikanaak wiibʼ chihabʼ saʼ jun li toʼ ochoch. Ut naxkʼul chi sa saʼ xchʼool chixjunilebʼ li nekeʼulaʼanink re
31 ut kixkʼe chi naweʼk li Xʼawabʼejilal li Yos ut naxkʼut chiruhebʼ chirix li Qaawaʼ Jesukriist chi maakʼaʼ xxiw ut maakʼaʼ naramok chiru.
Xtzʼaqobʼ ebʼ li naʼlebʼ
^ Malaj «Ebʼ li qas qiitzʼin li jalanebʼ raatinobʼaal».
^ Li aatin saʼ griego Diké yook tana chi aatinak chirix jun li yos ixq li naxkʼe xchʼool chirix li tiikilal.
^ Saʼ griego «César». Aʼin ruuchil xkʼabʼaʼ wiibʼ oxibʼ li awabʼej re Roma.
^ Malaj «Ebʼ li xxik nekeʼabʼink abʼan inkʼaʼ nekeʼpaabʼank».
^ Li raqal aʼin natawmank saʼ wiibʼ oxibʼ li Santil Hu. Abʼan moko natawmank ta saʼ chixjunil ebʼ li najteril hu li tzʼaqal re ru li wank saʼ griego.
