Hechos 3:1-26
3 Joʼkan bʼiʼ, laj Pedro ut laj Juan yookebʼ chi taqeʼq saʼ rochoch li Yos saʼ xhoonalil li tijok naq kachʼin chik ma oxibʼ hoor re ewu,
2 ut aran wank chaq jun li winq yeq roq chalen saʼ xyoʼlajik, yookebʼ xpaqonkil saʼ rokebʼaal li rochoch li Yos, li nakʼabʼaʼiik Chʼinaʼus. Wulaj wulaj nekeʼxkʼe aran re naq tixpatzʼ xtumin rehebʼ li nekeʼok saʼ rochoch li Yos.
3 Naq laj Pedro ut laj Juan yookebʼ chi ok saʼ rochoch li Yos, li winq saʼ junpaat kiʼok xpatzʼbʼal xtumin rehebʼ.
4 Abʼan laj Pedro li yook chi ochbʼeeniik xbʼaan laj Juan, kikanaak rilbʼal li winq ut kixye re: «Kaʼyaho».
5 Joʼkan naq li winq kikanaak rilbʼalebʼ ut yook roybʼeninkil li teʼxkʼe re.
6 Abʼanan laj Pedro kixye re: «Maakʼaʼ inplaat chi moko inʼoor, abʼan tinkʼe aawe li wank wikʼin. Saʼ xkʼabʼaʼ li Jesukriist aj Nazaret, bʼeen!».
7 Naq kixye aʼin, kixchap li xnim ruqʼ ut kixwaklesi. Saʼ junpaat xkawuuk li roq ut li xkux roq,
8 kixaqli ut kiʼok chi bʼeek. Naq kiʼok rochbʼeenebʼ saʼ rochoch li Yos yook chi bʼeek, yook chi piskʼok ut yook xnimankil li Yos.
9 Ut chixjunilebʼ xeʼril chi bʼeek ut chi xnimankil li Yos.
10 Tojaʼ naq xeʼxkʼe reetal naq aʼan li winq li rajlal naxchunubʼ ribʼ chi lemooxik saʼ rokebʼaal li rochoch li Yos li nakʼabʼaʼiik Chʼinaʼus. Teeto saʼ rehebʼ xeʼkanaak xbʼaan li kikʼulmank ut sachsokebʼ xchʼool.
11 Toj yook ajwiʼ li winq xchapbʼal laj Pedro ut laj Juan naq ebʼ li qas qiitzʼin xkohebʼ saʼ aanil saʼ li naʼaj li naxkʼabʼaʼi li Xbʼe laj Salomón li Wank Xmu* bʼarwiʼ wankebʼ aʼan. Sachsokebʼ tzʼaqal xchʼool ebʼ li qas qiitzʼin.
12 Naq laj Pedro kiril aʼin, kixye rehebʼ: «Ex aj Israel kʼaʼut qʼaxal nasach eechʼool? Kʼaʼut nokooʼeeril chanchan tawiʼ naq xqakʼe chi bʼeek li winq aʼin rikʼin qawankil? Malaj xqakʼe chi bʼeek saʼ xkʼabʼaʼ naq naqaloqʼoni li Yos chi anchal qachʼool?
13 Li Xyos laj Abrahán, laj Isaac ut laj Jacob ut li Xyos li qaxeʼtoon, kixkʼe xloqʼal li Jesús li wank choʼq Xmoos. Li Jesús aʼan li xeʼqʼaxtesi ut xeetzʼeqtaana chiru laj Pilaat, usta laj Pilaat kiraj xkanabʼankil chi xik.
14 Joʼkan, laaʼex xeetzʼeqtaana li winq aʼin li saant ut tiik xchʼool, xeepatzʼ naq tkanabʼaaq chi xik jun laj kamsinel,
15 ut xeekamsi li Xnimal Ru aj Kʼamolbʼe re li yuʼam. Abʼan li Yos kixwaklesi chi yoʼyo saʼ xyanqebʼ li kamenaq ut laaʼo xqil aʼin.
16 Saʼ xkʼabʼaʼ li Jesús ut xbʼaan naq naqapaabʼ li xkʼabʼaʼ, xkawuuk li winq aʼin li yookex rilbʼal anaqwan. Li qapaabʼal chirix li Jesús kixbʼaanu naq tkʼiraaq li raʼ li winq li wank cheeru.
17 Ex wechpaabʼanel ninnaw naq xexnaʼlebʼak chi joʼkaʼin xbʼaan naq maakʼaʼ eenaʼlebʼ, joʼ xeʼnaʼlebʼak chaq li nekeʼjolomink eere.
18 Abʼan chi joʼkaʼin kitzʼaqlok ru li kixye chaq li Yos chi rubʼelaj chi xtzʼuumal re chixjunilebʼ li propeet: naq li Kriist trahobʼtesiiq.
19 Joʼkan naq yotʼomaq eechʼool ut jalomaq eenaʼlebʼ ut sutqʼinqex re naq tkuymanq tsachmanq eemaak, ut chi joʼkan li Jehobʼa* tixkʼe eekawilal ut xsahilal eechʼool
20 ut tixtaqla li Kriist aʼ li Jesús li kixxaqabʼ choʼq eere.
21 Aʼan tkanaaq saʼ choxa toj reetal twulaq xqʼehil naq t-akʼobʼresiiq chixjunil joʼ kixye chaq li Yos chi xtzʼuumal rehebʼ li xsantil propeet li xeʼwank chaq junxil.
22 Joʼkan bʼiʼ, laj Moisés kixye: “Li Jehobʼa* Leeyos tixxaqabʼ saʼ xyanq li xtenamit jun li propeet joʼ laaʼin. Tento teerabʼi ut teebʼaanu chixjunil li tixye eere.
23 Joʼkan ajwiʼ, li inkʼaʼ t-abʼinq re li Propeet aʼin t-isiiq saʼ xyanq li xtenamit li Yos”.
24 Chixjunilebʼ li propeet li xeʼaatinak, chalen chaq laj Samuel joʼ ajwiʼ li xeʼwank chirix, xeʼxkʼe resil ebʼ li kutan aʼin.
25 Laaʼex ralal xkʼajol ebʼ li propeet ut li sumwank li kixbʼaanu li Yos rikʼin leexeʼtoon naq kixye re laj Abrahán: “Ut chixjunilebʼ li junkabʼal re li ruuchichʼochʼ teʼosobʼtesiiq saʼ xkʼabʼaʼ laawalal aakʼajol”.
26 Naq ak xxaqabʼ li Xmoos, li Yos kixtaqla xbʼeenwa eerikʼin re eerosobʼtesinkil re naq teeyotʼ eechʼool ut teejal eenaʼlebʼ xbʼaan leemaaʼusilal».
Xtzʼaqobʼ ebʼ li naʼlebʼ
^ Li bʼe aʼin wank naabʼal roqechal li naxchap li xbʼeen.
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
