Juan 10:1-42
10 «Relik chi yaal ninye eere naq li nataqeʼk saʼ xbʼeen li korral ut inkʼaʼ naʼok saʼ rokebʼaal li xkorralebʼ li karneer aj elqʼ ut aj kʼamol kʼaʼaq re ru.
2 Abʼan li naʼok saʼ li okebʼaal aʼan laj ilol karneer.
3 Chiru aʼan naxte li okebʼaal laj ilol okebʼaal ut ebʼ li karneer nekeʼrabʼi li xyaabʼ xkux. Laj ilol karneer naroksi li xkʼabʼaʼebʼ li xkarneer naq naxbʼoqebʼ ut naxkʼamebʼ chirix kabʼl.
4 Naq ak kirisi chixjunilebʼ li karneer naxkʼe ribʼ chiruhebʼ. Ebʼ li karneer nekeʼxtaqe laj ilol karneer xbʼaan naq nekeʼxnaw li xyaabʼ xkux.
5 Maajunwa teʼxtaqe li inkʼaʼ nekeʼxnaw ru, teʼeleliq bʼan chiru xbʼaan naq inkʼaʼ nekeʼxnaw li xyaabʼ xkux».
6 Li Jesús kiraatinahebʼ rikʼin li eetalil* aʼin, abʼan ebʼ aʼan inkʼaʼ xeʼxtaw ru li yook xyeebʼal rehebʼ.
7 Joʼkan naq li Jesús kixye wiʼ chik rehebʼ: «Relik chi yaal ninye eere naq laaʼin rokebʼaal ebʼ li karneer.
8 Chixjunilebʼ li xeʼkʼulunk nekeʼxye ribʼ naq aʼanebʼ laj ilol karneer li qʼaxal chaabʼil abʼan ebʼ aj elqʼ ut nekeʼxkʼam li kʼaʼaq re ru ut inkʼaʼ xeʼabʼiik xbʼaanebʼ li karneer.
9 Laaʼin li okebʼaal ut li t-oq saʼ li okebʼaal aʼin tkoleʼq, truuq chi ok ut chi elk ut tixtaw richaj.
10 Laj elqʼ kaʼajwiʼ nachalk chi elqʼak, chi kamsink ut chi sachok. Laaʼin xinchalk re naq wanq eeyuʼam ut najtaq roq leeyuʼam.
11 Laaʼin laj ilol karneer li qʼaxal chaabʼil, ut laj ilol karneer aʼin naxqʼaxtesi li xyuʼam chirixebʼ li karneer.
12 Laj kʼanjel li maawaʼ aj ilol karneer chi moko aj echal karneer, naq naril chi chalk li josqʼ aj xul naxkanabʼebʼ li karneer ut naʼelelik. Tojaʼ naq li josqʼ aj xul naxchapebʼ ut naxchaʼchaʼihebʼ.
13 Laj kʼanjel naʼelelik xbʼaan naq maakʼaʼ naraj re ebʼ li karneer. Nakʼanjelak xbʼaan naq naxnaw naq ttojeʼq.
14 Laaʼin laj ilol karneer li qʼaxal chaabʼil. Ninnaw ruhebʼ linkarneer ut ebʼ aʼan nekeʼxnaw wu,
15 joʼ chanru naq li Yuwaʼbʼej naxnaw wu, laaʼin ninnaw ru li Yuwaʼbʼej, ut ninqʼaxtesi linyuʼam chirixebʼ li karneer.
16 »Ut wank jalan chik linkarneer li maawaʼebʼ re li korral aʼin; ebʼ aʼin ajwiʼ tento tinkʼamebʼ chaq ut teʼrabʼi ajwiʼ xyaabʼ inkux. Jun chʼuutaqebʼ aj chik ut jun ajwiʼ laj ilol rehebʼ.
17 Li Yuwaʼbʼej nikinxra saʼ xkʼabʼaʼ aʼin xbʼaan naq ninqʼaxtesi linyuʼam re naq moqon tinkʼul wiʼ chik.
18 Maaʼani namaqʼok re chiwu, naʼalaak bʼan saʼ inchʼool xqʼaxtesinkil. Wank inwankil re xqʼaxtesinkil ut wank inwankil re xkʼulbʼal wiʼ chik. Aʼin li taql li xinkʼul rikʼin Linyuwaʼ».
19 Saʼ xkʼabʼaʼ ebʼ li aatin aʼin, ebʼ laj judiiy inkʼaʼ xeʼxkʼe wiʼ chik ribʼ saʼ aatin.
20 Naabʼal rehebʼ xeʼok xyeebʼal: «Wank maaʼus aj musiqʼej rikʼin ut xkanoʼk ru. Kʼaʼut nekeerabʼi?».
21 Jalanebʼ chik xeʼok xyeebʼal: «Aʼin maawaʼ raatin junaq winq li echaninbʼil xbʼaan maaʼus aj musiqʼej. Peʼyaal naq li maaʼus aj musiqʼej inkʼaʼ naru naxte saʼ ruhebʼ li mutzʼ?».
22 Saʼebʼ li kutan aʼan yook chaq chi nimaak li Ninqʼe chirix li Qʼaxtesink aran Jerusalén. Yook chaq li habʼalqʼe,
23 ut li Jesús yook chaq chi bʼeek saʼ rochoch li Yos saʼ li naʼaj li naxkʼabʼaʼi Xbʼe laj Salomón li Wank Xmu.*
24 Tojaʼ naq ebʼ laj judiiy xeʼxsut li Jesús ut xeʼxye re: «Toj joqʼe taaye qe ma laaʼat li Kriist? Wi laaʼat li Kriist, ye chaq chi junajwa».
25 Li Jesús kixye rehebʼ: «Ak xinye, abʼan inkʼaʼ nekeepaabʼ. Li ninbʼaanu saʼ xkʼabʼaʼ Linyuwaʼ nikinxkʼe chi naweʼk.
26 Abʼan laaʼex inkʼaʼ nekeepaabʼ xbʼaan naq moko laaʼex ta inkarneer.
27 Ebʼ linkarneer nekeʼrabʼi xyaabʼ linkux, ninnawebʼ ru ut ebʼ aʼan nikineʼxtaqe.
28 Laaʼin ninkʼehebʼ xyuʼam chi junelik; maajunwa teʼsacheʼq ut maaʼani tmaqʼoq rehebʼ saʼ wuqʼ.
29 Li xkʼe we li Yuwaʼbʼej qʼaxal oxloqʼ chiru chixjunil li kʼaʼaq re ru, ut maaʼani naru naxmaqʼ ebʼ li karneer saʼ ruqʼ li Yuwaʼbʼej.
30 Laaʼin ut li Yuwaʼbʼej juno».*
31 Jun sut chik, ebʼ laj judiiy xeʼxchap xpek re xkʼebʼal chi pek.
32 Tojaʼ naq li Jesús kixye rehebʼ: «Xinkʼut cheeru naabʼal li naʼlebʼ li qʼaxal chaabʼil li nachalk rikʼin li Yuwaʼbʼej. Bʼar wank rehebʼ li naʼlebʼ aʼin nekeeraj wiʼ inkʼebʼal chi pek?».
33 Ebʼ laj judiiy xeʼxye re: «Inkʼaʼ tatqakʼe chi pek xbʼaan li chaabʼil naʼlebʼ, tatqakʼe bʼan chi pek xbʼaan naq nakaaye li inkʼaʼ us chirix li Yos. Laaʼat yal winqat ut nakaakʼe aawibʼ choʼq yos».
34 Li Jesús kixye rehebʼ: «Ma inkʼaʼ tzʼiibʼanbʼil saʼ Leechaqʼrabʼ “Laaʼin xinye: «Laaʼex yoosex»”?
35 Ut laaʼo naqanaw naq li Raatin li Yos inkʼaʼ naru xjalbʼal. Wi Yos kixkʼabʼaʼi choʼq yos ebʼ li qas qiitzʼin li wankebʼ xmaak xbʼaanebʼ li raatin,
36 kʼaʼut nekeeye we “xaaye li inkʼaʼ us chirix li Yos” yal saʼ xkʼabʼaʼ naq xinye “Ralalin li Yos”? Laaʼin santobʼresinbʼilin ut taqlanbʼilin saʼ ruuchichʼochʼ xbʼaan li Yuwaʼbʼej.
37 Wi inkʼaʼ ninbʼaanu li xkʼanjel Linyuwaʼ, meepaabʼ we.
38 Abʼan, wi ninbʼaanu, usta inkʼaʼ tineepaabʼ laaʼin, paabʼomaq saʼ xkʼabʼaʼ li kʼanjel li ninbʼaanu. Chi joʼkan teenaw ut maajunwa teekanabʼ xnawbʼal naq li Yuwaʼbʼej wank saʼ junajil wikʼin ut laaʼin wankin saʼ junajil rikʼin li Yuwaʼbʼej».
39 Ut jun sut chik xeʼxyal xchapbʼal, abʼan kiʼelelik chiruhebʼ.
40 Xkoho wiʼ chik junpakʼal li nimaʼ Jordán, bʼarwiʼ kikubʼsink chaq haʼ laj Juan saʼ xtiklajik ut kikanaak aran.
41 Naabʼalebʼ xkohebʼ rilbʼal ut xeʼok xyeebʼal: «Maajun li sachbʼachʼoolej kixbʼaanu laj Juan, abʼan chixjunil li kixye chirix li winq aʼin, yaal».
42 Ut aran naabʼalebʼ xeʼxpaabʼ li Jesús.
Xtzʼaqobʼ ebʼ li naʼlebʼ
^ Malaj «li jaljokil ru aatin».
^ Li bʼe aʼin wank naabʼal roqechal li naxchap li xbʼeen.
^ Malaj «wanko saʼ junajil».
