Juan 13:1-38
13 Joʼkan bʼiʼ, naq toj maajiʼ nawulak li ninqʼe chirix li Paswa, li Jesús ak naxnaw naq xwulak xhoonalil re xkanabʼankil li ruuchichʼochʼ aʼin re naq tsutqʼiiq rikʼin li Yuwaʼbʼej. Joʼkan naq kixrahebʼ li nekeʼtaqenk re, inkʼaʼ kixkanabʼ xraabʼalebʼ toj reetal naq kiwulak li xkamik.
2 Laj Tza* ak xchʼik saʼ xchʼool laj Judas xqʼaxtesinkil li Jesús, naq ebʼ aʼan yookebʼ chi waʼak ewu. Laj Judas Iscariote aʼan ralal laj Simón.
3 Li Jesús naxnaw naq kʼebʼil chixjunil saʼ ruqʼ xbʼaan li Yuwaʼbʼej, naq kichalk rikʼin li Yos ut tsutqʼiiq rikʼin li Yos,
4 kiwakliik saʼ meex, kirisi li xtʼikr li lanlo wiʼ, kixchap jun li tʼikr ut kixbʼak chi xsaʼ.
5 Chirix chik aʼan kixkʼe haʼ saʼ jun li palangaan ut kiʼok xchʼajbʼal roqebʼ li xtzolom ut kixmes rikʼin li tʼikr li bʼakʼbʼo chi xsaʼ.
6 Naq kiwulak bʼarwiʼ wank laj Simón Pedro, aʼan kixye re: «Qaawaʼ, ma laaʼat tatchʼajoq re li woq?».
7 Li Jesús kixye re: «Anaqwan inkʼaʼ nakaataw ru li yookin xbʼaanunkil, abʼan moqon taataw ru».
8 Laj Pedro kixye re: «Maajoqʼe taachʼaj li woq». Ut li Jesús kixye re: «Wi inkʼaʼ tinchʼaj laawoq, maawaʼat jun rehebʼ li nekeʼtaqenk we».
9 Laj Simón Pedro kixye re: «Qaawaʼ, wi joʼkan, moko kaʼaj tawiʼ taachʼaj li woq, taachʼaj ajwiʼ li wuqʼ ut linjolom».
10 Li Jesús kixye re: «Li ak xʼatink inkʼaʼ chik naraj chʼajeʼk xbʼaan naq ak saq chik ru, kaʼaj chik naʼajmank naq tchʼajeʼq li roq. Ut laaʼex saq chik eeru abʼan moko cheejunilex ta».
11 Xbʼaan naq naxnaw ani tqʼaxtesinq re. Joʼkan naq kixye «Moko cheejunilex ta saq eeru».
12 Naq ak kixchʼajebʼ li roq, kixkʼe li xtʼikr li lanlo wiʼ, ut kichunlaak wiʼ chik saʼ meex ut kixye rehebʼ: «Ma nekeetaw ru li xinbʼaanu eere?
13 Laaʼex nekeeye we Kʼutunel ut Qaawaʼ, ut yaal nekeeye xbʼaan naq laaʼin.
14 Joʼkan naq, wi laaʼin xinchʼaj leeroq usta laaʼin li Qaawaʼ ut aj Kʼutunel, laaʼex ajwiʼ tento teechʼaj* leeroq cheeribʼil eeribʼ.
15 Laaʼin xinkʼam eebʼe* re naq teebʼaanu ajwiʼ laaʼex li xinbʼaanu eere.
16 Relik chi yaal ninye eere naq li moos moko qʼaxal nim ta chiru laj echal re chi moko li taqlanbʼil qʼaxal nim chiru li kitaqlank chaq re.
17 Anaqwan naq nekeenaw aʼin sahaq leechʼool wi nekeeyuʼami.
18 Inkʼaʼ yookin chi aatinak cheerix xbʼaan naq laaʼin ninnawebʼ ru li xinsikʼebʼ ru. Abʼan kikʼulmank aʼin re naq ttzʼaqloq ru li xraqal li Raatin li Yos li naxye: “Li nawaʼoʼk chaq re linkaxlanwa kixtaqsi li ruqʼ saʼ inbʼeen”.
19 Ninye eere aʼin, anaqwan naq toj maajiʼ nakʼulmank, ut naq tkʼulmanq, teepaabʼ naq laaʼin aʼan.
20 Relik chi yaal ninye eere li nakʼuluk re li nintaqla nikinxkʼul ajwiʼ laaʼin, ut li nakʼuluk we laaʼin naxkʼul ajwiʼ li kitaqlank chaq we».
21 Naq ak kixye aʼin, qʼaxal kiʼok xkʼaʼuxl li Jesús ut kixchʼolobʼ:* «Relik chi yaal ninye eere naq jun eere tqʼaxtesinq we».
22 Ebʼ li xtzolom xeʼok rilbʼal ribʼ chiribʼilebʼ ribʼ, sachsokebʼ xchʼool xeʼkanaak xbʼaan naq inkʼaʼ nekeʼxnaw chirix ani yook chi aatinak.
23 Jun rehebʼ li xtzolom li qʼaxal naraheʼk xbʼaan li Jesús wank saʼ meex rochbʼeen.
24 Joʼkan bʼiʼ, laj Simón Pedro kirekʼasi li xjolom chiru ut kixpatzʼ re: «Chirix ani yook chi aatinak?».
25 Tojaʼ naq aʼan kixtolobʼ li xjolom chire xchʼool li Jesús ut kixpatzʼ re: «Qaawaʼ, ani aʼan?».
26 Li Jesús kixye: «Aʼ li tinkʼe re li peraas chi kaxlanwa li tintzʼa». Ut naq ak kixtzʼa li kaxlanwa, kixkʼe re laj Judas ralal laj Simón Iscariote.
27 Naq ak kixchap li peraas chi kaxlanwa laj Judas, laj Tza kiʼok rikʼin. Tojaʼ naq li Jesús kixye re: «Li ak xaatikibʼ xbʼaanunkil, bʼaanu saʼ junpaat».
28 Abʼan maaʼani rehebʼ li wankebʼ saʼ meex keʼxnaw kʼaʼut kixye re aʼin.
29 Saʼ xkʼabʼaʼ naq rikʼin laj Judas wank xkaaxil li tumin, wankebʼ xeʼxkʼoxla naq li Jesús yook xyeebʼal «Loqʼ chaq li naʼajmank choʼq re li ninqʼe», malaj tixkʼe bʼayaq rehebʼ li nebʼaʼ.
30 Joʼkan bʼiʼ, naq ak kixkʼul li peraas chi kaxlanwa, saʼ junpaat kiʼelk aran. Ut ak qʼoqyink chik.
31 Ut naq ak xkoho chik laj Judas, li Jesús kixye: «Anaqwan naxkʼul xloqʼal li Ralal li Winq, ut li Yos naxkʼul xloqʼal saʼ xkʼabʼaʼ aʼan.
32 Li Yos tixkʼe xloqʼal li Ralal li Winq, ut tixbʼaanu saʼ junpaat.
33 Ex walal inkʼajol, jun kʼamok aj chik wanqin eerikʼin. Tineesikʼ abʼan li xinye rehebʼ laj judiiy, aʼan ajwiʼ li tinye eere anaqwan: “Inkʼaʼ texruuq chi xik bʼarwiʼ tinxik laaʼin”.
34 Tinkʼe eere jun li akʼil taql: naq teera eeribʼ cheeribʼil eeribʼ. Joʼ chanru xexinra laaʼin, cheerahaq eeribʼ cheeribʼil eeribʼ.
35 Chi joʼkaʼin chixjunilebʼ teʼxnaw naq laaʼex intzolom: wi nekeera eeribʼ cheeribʼil eeribʼ».
36 Laj Simón Pedro kixpatzʼ re: «Qaawaʼ bʼar xik aawe?». Li Jesús kixye re: «Bʼarwiʼ tinxik laaʼin inkʼaʼ naru nikinaataqe, abʼan moqon chik tinaataqe».
37 Laj Pedro kixye re: «Qaawaʼ, kʼaʼut inkʼaʼ naru ninxik chaawix anaqwan? Laaʼin tinkʼe linyuʼam chaawix».
38 Li Jesús kixye re: «Ma taakʼe laayuʼam saʼ inkʼabʼaʼ? Relik chi yaal ninye aawe naq maajiʼ ajwiʼ nayaabʼak li tzoʼ kaxlan ak xaaye oxibʼ sut naq inkʼaʼ nakaanaw wu».
Xtzʼaqobʼ ebʼ li naʼlebʼ
^ Saʼ griego «li Diʼaabʼ». Taawil xchʼolobʼankil li aatin, Diʼaabʼ.
^ Malaj «tenebʼanbʼil saʼ eebʼen xchʼajbʼal».
^ Malaj «xinkanabʼ jun eetalil cheeru».
^ Malaj «kixkʼe chi naweʼk ut kixye».
