Juan 14:1-31
14 «Miʼok eekʼaʼuxl. Kʼutbʼesihomaq naq nekeepaabʼ li Yos, ut kʼutbʼesihomaq naq nikineepaabʼ ajwiʼ laaʼin.
2 Saʼ rochoch Linyuwaʼ wank naabʼal li naʼaj re naq texkanaaq. Wi maawaʼ raj joʼkan, ak xinye raj eere. Xik we xkawresinkil jun leenaʼaj.
3 Joʼkan ajwiʼ, naq ak xkohin ut xinkawresi leenaʼaj, tinsutqʼiiq ut texinkʼul saʼ ochoch chinkʼatq re naq wanqex ajwiʼ bʼarwiʼ wanqin laaʼin.
4 Ut laaʼex nekeenaw li bʼe re naq texxik bʼarwiʼ xik we laaʼin».
5 Laj Tomás kixye re: «Qaawaʼ inkʼaʼ naqanaw bʼar xik aawe. Chanru tqanaw li bʼe?».
6 Li Jesús kixye re: «Laaʼin li bʼe, li yaal ut li yuʼam. Maaʼani naru nawulak rikʼin li Yuwaʼbʼej wi maawaʼ saʼ inkʼabʼaʼ.
7 Wi nekeenaw wu, teenaw ajwiʼ ru Linyuwaʼ. Chalen anaqwan nekeenaw ru ut eerilom ru».
8 Laj Felipe kixye re: «Qaawaʼ, kʼut chiqu li Yuwaʼbʼej, ut tkʼojlaaq qachʼool».
9 Li Jesús kixye re: «Felipe, junxil ninʼok saʼ eeyanq, ut toj maajiʼ nakaanaw wu? Li ak rilom wu, ak rilom ajwiʼ ru li Yuwaʼbʼej. Chanru nakaaye we “Kʼut chiqu li Yuwaʼbʼej”?
10 Ma inkʼaʼ nakaapaabʼ naq wankin saʼ junajil rikʼin li Yuwaʼbʼej ut naq li Yuwaʼbʼej wank saʼ junajil wikʼin? Li ninye laaʼin moko wikʼin ta naʼelk chaq, naʼelk bʼan chaq rikʼin li Yuwaʼbʼej li wank saʼ junajil wikʼin ut yook xbʼaanunkil li xkʼanjel.
11 Paabʼomaq we naq ninye eere naq wankin saʼ junajil rikʼin li Yuwaʼbʼej ut li Yuwaʼbʼej wank saʼ junajil wikʼin. Ut wi inkʼaʼ nekeepaabʼ, paabʼomaq xbʼaan li xkʼanjel.
12 Relik chi yaal ninye eere naq li tixkʼutbʼesi naq nikinxpaabʼ tixbʼaanu ajwiʼ li kʼanjel li ninbʼaanu laaʼin. Ut qʼaxal nim wiʼ chik li kʼanjel tixbʼaanu xbʼaan naq laaʼin xik we rikʼin li Yuwaʼbʼej.
13 Joʼkan ajwiʼ, maakʼaʼ naxye kʼaru teepatzʼ saʼ linkʼabʼaʼ, laaʼin tinkʼe eere re naq li Yuwaʼbʼej tkʼeheʼq xloqʼal saʼ xkʼabʼaʼ li Alabʼej.
14 Li teepatzʼ saʼ linkʼabʼaʼ, laaʼin tinkʼe eere.
15 Wi nikineera, teepaabʼ li nekeʼxintaqla wiʼ.
16 Ut laaʼin tintzʼaama re li Yuwaʼbʼej ut aʼan tixkʼe eere jun chik li tenqʼ li twanq eerikʼin chi junelik:
17 aʼ li musiqʼej re li yaal, li inkʼaʼ naru naxkʼul li ruuchichʼochʼ xbʼaan naq inkʼaʼ naril ru chi moko naxnaw ru. Laaʼex nekeenaw ru xbʼaan naq wank eerikʼin ut nakanaak eerikʼin.
18 Inkʼaʼ texinkanabʼ. Tinsutqʼiiq eerikʼin.
19 Chi seebʼ, li ruuchichʼochʼ inkʼaʼ chik tril wu, ut laaʼex teeril wu xbʼaan naq yoʼyokin ut laaʼex yoʼyoqex.
20 Saʼ li kutan aʼan teʼxnaw naq wankin saʼ junajil rikʼin Linyuwaʼ, naq laaʼex wankex saʼ junajil wikʼin ut laaʼin wankin saʼ junajil eerikʼin.
21 Li naxkʼulubʼa* lintaqlahom ut naxpaabʼ, aʼan li narahok we. Ut li narahok we traheʼq xbʼaan Linyuwaʼ, ut laaʼin tinra ut tinkʼut wibʼ chiru aʼan».
22 Laj Judas abʼan maawaʼ laj Iscariote, kixpatzʼ re: «Qaawaʼ, kʼaru xkʼulmank? Kʼaʼut taakʼut aawibʼ chiqu ut maawaʼ chiru li ruuchichʼochʼ?».
23 Li Jesús kixye re: «Wi junaq li qas qiitzʼin nikinxra, tixpaabʼ li waatin. Ut traheʼq xbʼaan Linyuwaʼ, toochalq rikʼin saʼ kabʼichal ut tookanaaq rikʼin.
24 Li inkʼaʼ narahok we inkʼaʼ naxpaabʼ li waatin. Li aatin li nekeerabʼi moko we ta re bʼan li Yuwaʼbʼej, li kitaqlank chaq we.
25 »Ninye eere aʼin naq toj wankin eerikʼin.
26 Abʼan li santil musiqʼej aʼan li tenqʼ li tixtaqla chaq li Yuwaʼbʼej saʼ inkʼabʼaʼ ut aʼan tixkʼut cheeru chixjunil ut tixbʼaanu naq teejultika li xinye eere.
27 Ninkanabʼ eere li tuqtuukilal; ninkʼe eere lintuqtuukilal. Inkʼaʼ ninkʼe joʼ naxkʼe li ruuchichʼochʼ. Miʼok eekʼaʼuxl chi moko texxuwaq.
28 Xeerabʼi naq xinye eere: “Tinxik ut tinsutqʼiiq eerikʼin”. Wi nikineera, texsahoʼq naq tinxik rikʼin li Yuwaʼbʼej xbʼaan naq li Yuwaʼbʼej nim chiwu.
29 Ninye eere aʼin naq toj maajiʼ nakʼulmank, ut naq tkʼulmanq, teepaabʼ.
30 Moko yal yooqin ta chik chi aatinak eerikʼin, xbʼaan naq xchalk li najolomink re li ruuchichʼochʼ, abʼan aʼan maakʼaʼ xwankil saʼ inbʼeen.
31 Abʼan re naq li ruuchichʼochʼ tixnaw naq ninra li Yuwaʼbʼej, ninbʼaanu chi tzʼaqal re ru li xinxtaqla wiʼ li Yuwaʼbʼej. Waklinqex ut yoʼqebʼ.
Xtzʼaqobʼ ebʼ li naʼlebʼ
^ Saʼ griego «wank rikʼin».
