Juan 16:1-33
16 »Xinye eere aʼin re naq inkʼaʼ teekanabʼ xpaabʼankil li Yos.
2 Texʼisiiq saʼ li naʼaj re loqʼonink. Relik chi yaal naq twulaq xhoonalil naq li tkamsinq eere tixkʼoxla naq yook xloqʼoninkil li Yos rikʼin aʼin.
3 Abʼan teʼxbʼaanu chixjunil aʼin xbʼaan naq toj maajiʼ nekeʼxnaw ru li Yuwaʼbʼej chi moko nekeʼxnaw wu laaʼin.
4 Xinye eere aʼin re naq saʼ li hoonal li tkʼulmanq wiʼ aʼin, teejultika li xinye eere.
»Inkʼaʼ xinye eere saʼ xtiklajik xbʼaan naq toj wankin eerikʼin.
5 Abʼan anaqwan xik we rikʼin li kitaqlank chaq we, ut maaʼani eere naxpatzʼ we: “Bʼar xik aawe?”.
6 Kirahoʼk bʼan leechʼool xbʼaan naq xinye eere aʼin.
7 Abʼan relik chi yaal ninye eere: us choʼq eere naq tinxik. Xbʼaan naq wi inkʼaʼ tinxik, li santil musiqʼej li ttenqʼanq eere inkʼaʼ tchalq eerikʼin; abʼan wi tinxik, tintaqla chaq eere.
8 Ut naq tchalq, tixkʼutbʼesi chi tzʼaqal re ru li xmaak li ruuchichʼochʼ. Aʼan tixkʼutbʼesi chi tzʼaqal re ru naq tiik li ninbʼaanu ut aʼan tixkʼutbʼesi chiru li ruuchichʼochʼ saʼ xbʼeen ani naraqok aatin li Yos.
9 Aʼan tixkʼutbʼesi chi tzʼaqal re ru li xmaak li ruuchichʼochʼ xbʼaan naq li ruuchichʼochʼ moko nikinxpaabʼ ta.
10 Aʼan tixkʼutbʼesi chiru li ruuchichʼochʼ naq tiik li ninbʼaanu xbʼaan naq xik we rikʼin li Yuwaʼbʼej ut laaʼex inkʼaʼ chik teeril wu.
11 Aʼan ajwiʼ tixkʼutbʼesi chi tzʼaqal re ru saʼ xbʼeen ani naraqok aatin li Yos xbʼaan naq li Yos ak xraqok aatin saʼ xbʼeen li najolomink re li ruuchichʼochʼ aʼin.
12 »Toj naabʼal tento tinye eere, abʼan anaqwan inkʼaʼ teetaw ru.
13 Abʼan naq aʼan* tchalq aʼ li musiqʼej re li yaal, aʼan tixkʼut cheeru li yaal chi tzʼaqal re ru. Xbʼaan naq inkʼaʼ tixtaqla ribʼ chi aatinak, tixye bʼan li trabʼi ut tixkʼe resil li chalk re.
14 Aʼan tixkʼe inloqʼal xbʼaan naq tixkʼe chi naweʼk cheeru li naxkʼul wikʼin.
15 Chixjunil li wank rikʼin li Yuwaʼbʼej we ajwiʼ. Joʼkan naq xinye eere naq aʼan tixkʼe chi naweʼk cheeru li naxkʼul wikʼin.
16 Chi seebʼ, inkʼaʼ chik teeril wu, abʼan chi seebʼ ajwiʼ, teeril wu».
17 Naq xeʼrabʼi aʼin, wankebʼ li xtzolom xeʼok xyeebʼal chiribʼilebʼ ribʼ: «Kʼaru kiraj xyeebʼal naq kixye qe “Chi seebʼ, inkʼaʼ chik teeril wu, abʼan chi seebʼ ajwiʼ, teeril wu”? Ut naq kixye “Xbʼaan naq xik we rikʼin li Yuwaʼbʼej”?».
18 Xeʼok xyeebʼal: «Kʼaru kiraj xyeebʼal naq naxye “Chi seebʼ”? Inkʼaʼ naqanaw chirix kʼaru yook chi aatinak».
19 Li Jesús naxnaw naq nekeʼraj xbʼaanunkil re ebʼ li patzʼom joʼkan naq kixye rehebʼ: «Ma yookex xpatzʼinkil chiribʼil eeribʼ kʼaʼut xinye “Chi seebʼ inkʼaʼ chik teeril wu, abʼan chi seebʼ teeril ajwiʼ wu”?
20 Relik chi yaal ninye eere naq laaʼex texyaabʼaq ut tyotʼeʼq leechʼool, abʼan li ruuchichʼochʼ tsahoʼq saʼ xchʼool; laaʼex trahoʼq leechʼool, abʼan li xrahil eechʼool tsutqʼiiq choʼq sahil chʼoolejil.
21 Naq jun li ixq yook chi usaak, kʼajoʼ li rahilal narekʼa xbʼaan naq xwulak xhoonalil naq t-usaaq. Abʼan nasahoʼk saʼ xchʼool naq naril ru li xkʼuulaʼal ut nasach saʼ xchʼool chixjunil li rahilal li kixkʼul chirix.
22 Joʼkan ajwiʼ nekeerekʼa laaʼex. Anaqwan kʼajoʼ xrahil eechʼool; abʼan naq twil wiʼ chik eeru tsahoʼq saʼ leechʼool ut maaʼani truuq xmaqʼbʼal cheeru li xsahil eechʼool.
23 Ut saʼ li kutan aʼan maakʼaʼ chik teepatzʼ we. Relik chi yaal ninye eere naq yalaq kʼaru li teetzʼaama re li Yuwaʼbʼej saʼ linkʼabʼaʼ, aʼan tixkʼe eere.
24 Laaʼex toj maakʼaʼ nekeetzʼaama saʼ linkʼabʼaʼ. Tzʼaamanqex ut tkʼemanq eere re naq kʼajoʼaq xsahil leechʼool.
25 »Xwoksi ebʼ li eetalil* re xyeebʼal eere aʼin. Twulaq xqʼehil naq inkʼaʼ chik tinʼaatinaq eerikʼin rikʼin eetalil,* tinʼaatinaq bʼan chi tzʼaqal re ru chirix li Yuwaʼbʼej.
26 Saʼ li kutan aʼan textzʼaamanq chiru li Yuwaʼbʼej saʼ linkʼabʼaʼ. Rikʼin aʼin inkʼaʼ yookin xyeebʼal naq laaʼin tintzʼaamanq cheerix.
27 Ut li Yuwaʼbʼej nekexra xbʼaan naq laaʼex xineera ut xeepaabʼ naq xinchalk choʼq ruuchil li Yos.
28 Xinchalk saʼ ruuchichʼochʼ choʼq ruuchil li Yuwaʼbʼej. Anaqwan tinkanabʼ li ruuchichʼochʼ ut tinxik rikʼin li Yuwaʼbʼej».
29 Ebʼ li xtzolom xeʼxye re: «Anaqwan nakat-aatinak chi tzʼaqal re ru, inkʼaʼ chik nakaawoksi ebʼ li eetalil.*
30 Anaqwan chʼolchʼo chiqu naq nakaanaw chixjunil ut moko aajel ta chaawu naq teʼxpatzʼ aawe. Saʼ xkʼabʼaʼ aʼin naqapaabʼ naq xatchalk rikʼin li Yos».
31 Li Jesús kixye rehebʼ: «Nekeepaabʼ chik anaqwan?
32 Abʼihomaq aʼin. Twulaq xqʼehil (ak xwulak bʼan chik) naq texchaʼchaʼiiq. Li junjunq txik saʼ rochoch ut tineekanabʼ injunes. Abʼan moko wankin ta injunes xbʼaan naq li Yuwaʼbʼej wank wikʼin.
33 Xinye eere aʼin re naq saʼ inkʼabʼaʼ texwanq saʼ tuqtuukilal. Saʼ ruuchichʼochʼ teetaw li rahilal. Abʼan, kawaq eechʼool! xbʼaan naq laaʼin xinqʼax ru li ruuchichʼochʼ».
Xtzʼaqobʼ ebʼ li naʼlebʼ
^ Saʼ li raqal oxlaju ut kaalaju, li aatin aʼan yook chi aatinak chirix li «tenqʼ» li naxye saʼ li raqal wuqubʼ.
^ Malaj «ebʼ li jaljokil ru aatin».
^ Malaj «jaljokil ru aatin».
^ Malaj «ebʼ li jaljokil ru aatin».
