Juan 2:1-25
2 Oxibʼ kutan chik chirix aʼin, kiwank jun li sumlaak aran Caná xteepal Galilea, ut aran wank li xnaʼ li Jesús.
2 Kibʼoqeʼk ajwiʼ li Jesús ut ebʼ li xtzolom saʼ li sumlaak.
3 Naq yook chi osoʼk li bʼiin, li xnaʼ li Jesús kixye re: «Maakʼaʼebʼ chik xbʼiin».
4 Abʼan li Jesús kixye re: «At ixq, moko qilom ta chik aʼan. Toj maajiʼ nawulak linhoonal».
5 Li xnaʼ kixye rehebʼ li moos: «Bʼaanumaq chixjunil li tixye eere».
6 Ut aran wank waqibʼ li kuk li yiibʼanbʼil rikʼin pek choʼq re li haʼ. Li kuk aʼin nekeʼroksi ebʼ laj judiiy re xchʼajobʼresinkil ribʼebʼ joʼ naxye chaq li xchaqʼrabʼebʼ. Li junjunq chi kuk naxkʼam tana 44 malaj 66 liitr* chi haʼ.
7 Li Jesús kixye rehebʼ: «Nujobʼresihomaq rikʼin haʼ ebʼ li kuk». Ut xeʼxkʼe li haʼ saʼebʼ li kuk toj reetal xeʼnujak.
8 Chirix chik aʼin, kixye rehebʼ: «Isihomaq bʼayaq ut kʼamomaq rikʼin li najolomink re li sumlaak». Ut xeʼxkʼam re.
9 Li najolomink re li sumlaak kixyal li haʼ li kisuqʼisimank joʼ bʼiin ut saʼ xkʼabʼaʼ naq inkʼaʼ naxnaw bʼar chalenaq kixbʼoq li winq li tojaʼ tsumlaaq. Abʼan ebʼ li moos li xeʼrisi li haʼ nekeʼxnaw bʼar chalenaq li bʼiin.
10 Li najolomink re li sumlaak kixye re: «Chixjunilebʼ li qas qiitzʼin nekeʼxnumsi xbʼeenwa li chaabʼil bʼiin ut naq ak xeʼkalaak ebʼ li qas qiitzʼin nekeʼxnumsi li bʼiin li moko chaabʼil ta. Abʼan laaʼat toj anaqwan taanumsi li chaabʼil bʼiin li kʼulanbʼil aabʼaan».
11 Aʼin kixbʼaanu li Jesús aran Caná xteepal Galilea ut aʼin li xbʼeen sachbʼachʼoolej li kixbʼaanu. Chi joʼkan kixkʼutbʼesi li xloqʼal, ut ebʼ li xtzolom xeʼok xpaabʼankil.
12 Chirix chik aʼan, kikubʼeek Capernaúm rochbʼeen li xnaʼ, ebʼ li riitzʼin ut ebʼ li xtzolom, abʼan yal wiibʼ oxibʼ kutan xeʼwank aran.
13 Naq jayeʼq xnimankil li Paswa rehebʼ laj judiiy, li Jesús kitaqeʼk Jerusalén.
14 Ut saʼ li rochoch li Yos kixtawebʼ li yookebʼ chi kʼayink wakax, karneer, mukuy joʼ ajwiʼ ebʼ laj jalol tumin li chunchukebʼ saʼ xnaʼaj.
15 Ut naq ak kixyiibʼ jun xtzʼuum,* kirisi chixjunilebʼ saʼ li rochoch li Yos. Kirisi ajwiʼ ebʼ li karneer, ebʼ li wakax ut kixpaji li xtuminebʼ laj jalol tumin ut kixbʼalqʼusi li xmeexebʼ.
16 Ut kixye rehebʼ laj kʼay mukuy: «Isihomaq arin chixjunil aʼin! Kanabʼomaq xkʼebʼal joʼ kʼayil li rochoch Linyuwaʼ!».
17 Ebʼ li xtzolom xeʼnaq saʼ xchʼool naq tzʼiibʼanbʼil: «Li rahom li nawekʼa chirix laawochoch, txamnaq saʼ linchʼool».
18 Naq xeʼril aʼin, ebʼ laj judiiy xeʼxye re: «Ma naru nakaakʼut chiqu junaq li eetalil li tkʼutbʼesinq re, naq wank aawankil re xbʼaanunkil aʼin?».
19 Li Jesús kixye rehebʼ: «Jukʼumaq li rochoch li Yos li wank arin ut chiru oxibʼ kutan tinwaklesi wiʼ chik».
20 Tojaʼ naq ebʼ laj judiiy xeʼxye re: «Wi xʼajmank 46 chihabʼ re xyiibʼankil li rochoch li Yos, ut laaʼat taawaklesi wiʼ chik chiru oxibʼ kutan».
21 Abʼan li rochoch li Yos li yook wiʼ chi aatinak aʼan li xtibʼel.
22 Naq ak kiwaklesiik chi yoʼyo saʼ xyanqebʼ li kamenaq, ebʼ li xtzolom xeʼjultikoʼk rehebʼ naq li Jesús rajlal kiʼaatinak chirix aʼin, ut xeʼxpaabʼ li naxye li Raatin li Yos ut li kixye chaq li Jesús.
23 Abʼanan, naq wank chaq Jerusalén chi xnimankil li Paswa, naabʼalebʼ xeʼok chi paabʼank saʼ xkʼabʼaʼ li Ralal naq xeʼril li sachbʼachʼoolej li yook xbʼaanunkil.
24 Abʼan li Jesús inkʼaʼ naxpaabʼ bʼayaq rehebʼ xbʼaan naq naxnaw chanruhebʼ
25 ut moko aajel ta ru naq tchʼolobʼaaq chiru chirixebʼ li qas qiitzʼin xbʼaan naq aʼan naxnaw li wank saʼ xchʼoolebʼ.
Xtzʼaqobʼ ebʼ li naʼlebʼ
^ Maare kabʼlaju malaj wuqlaju galón.
^ Taawil xchʼolobʼankil li aatin, kʼehok chi tzʼuum.
