Juan 21:1-25
21 Chirix chik aʼan, li Jesús kixkʼut wiʼ chik ribʼ chiruhebʼ li xtzolom chixkʼatq li palaw Tiberíades. Joʼkaʼin kixkʼut ribʼ.
2 Chʼutchʼukebʼ aran laj Simón Pedro, laj Tomás aʼ li Lut nayeemank re, laj Natanael aj Caná re Galilea, ebʼ li ralal laj Zebedeo ut wiibʼ chik rehebʼ li xtzolom.
3 Laj Simón Pedro kixye rehebʼ: «Xik we chi karabʼk». Ut ebʼ aʼan xeʼchaqʼok ut xeʼxye re: «Tooxik chaawix». Joʼkan naq xkohebʼ ut xeʼtaqeʼk saʼ li jukubʼ,* abʼan maajun li kar xeʼxchap chiru li qʼoqyink aʼan.
4 Naq kisaqewk, li Jesús wank chire haʼ, abʼan ebʼ li xtzolom inkʼaʼ xeʼxnaw naq aʼan.
5 Tojaʼ naq li Jesús kixye rehebʼ: «Ex inkokʼal, ma maakʼaʼ kʼaru teetzeka?».* «Maakʼaʼ», chankebʼ re.
6 Ut aʼan kixye rehebʼ: «Kutumaq li ataraay* saʼ xnim li jukubʼ* ut aran teetaw bʼayaq». Naq xeʼxkut, kinujak chi kar ut inkʼaʼ chik nekeʼruuk risinkil.
7 Tojaʼ naq li tzolom li naraheʼk xbʼaan li Jesús kixye re laj Pedro: «Aʼan li Qaawaʼ!». Naq laj Simón Pedro kirabʼi naq aʼan li Qaawaʼ kixkʼe li xtʼikr xbʼaan naq tʼustʼu,* ut kixkut ribʼ saʼ palaw.
8 Abʼan ebʼ li junchʼol chi tzolom xkohebʼ saʼ li chʼina jukubʼ* xeʼxkeleli li ataraay* li nujenaq chi kar xbʼaan naq moko najt ta wankebʼ chire li haʼ, 90 meetr tana xnajtil.
9 Naq xeʼwulak chire haʼ, xeʼril naq tzʼabʼtzʼo jun li xaml. Ut saʼ xbʼeen li ruxaml wank kar ut kaxlanwa.
10 Li Jesús kixye rehebʼ: «Kʼamomaq chaq wiibʼ oxibʼ rehebʼ li kar li tojaʼ teechap».
11 Joʼkan naq laj Simón Pedro kitaqeʼk saʼ li jukubʼ* ut kixkeleli chiru chʼochʼ li ataraay* li nujenaq chi ninqi kar: chisaʼ wank 153. Usta naabʼal li kar, li ataraay* inkʼaʼ kipejeʼk.
12 Li Jesús kixye rehebʼ: «Chalqex chi waʼak». Maaʼani rehebʼ li xtzolom kiraj xpatzʼbʼal re: «Anihat?» xbʼaan naq chʼolchʼo chiruhebʼ naq aʼan li Qaawaʼ.
13 Li Jesús kijilok chixkʼatqebʼ, kixchap li kaxlanwa ut kixkʼe rehebʼ, ut joʼkan ajwiʼ kixbʼaanu rikʼin li kar.
14 Aʼin li rox sutil naq li Jesús kixkʼutbʼesi ribʼ chiruhebʼ li xtzolom naq ak xwaklesiik chi yoʼyo saʼ xyanqebʼ li kamenaq.
15 Naq ak xeʼraqeʼk chi waʼak, li Jesús kixpatzʼ re laj Simón Pedro: «At Simón, ralal laj Juan, ma qʼaxal nikinaara chiruhebʼ aʼin?». Aʼan kixsume ut kixye re: «Heeheʼ Qaawaʼ, laaʼat nakaanaw naq nakatinra». Li Jesús kixye re: «Chʼolani ebʼ linkokʼ karneer».
16 Kixpatzʼ wiʼ chik re xkabʼ sutil: «At Simón ralal laj Juan, ma nikinaara?». Aʼan kixsume ut kixye re: «Heeheʼ Qaawaʼ, laaʼat nakaanaw naq nakatinra». Li Jesús kixye re: «Ilebʼ linkokʼ karneer joʼ naxbʼaanu laj ilol karneer».
17 Saʼ rox sutil kixpatzʼ re: «At Simón ralal laj Juan, ma nikinaara?». Kirahoʼk saʼ xchʼool laj Pedro xbʼaan naq oxibʼ sut kixpatzʼ re, «Ma nikinaara?». Joʼkan naq kixye re: «At Qaawaʼ, laaʼat nakaanaw chixjunil, laaʼat nakaanaw naq nakatinra». Li Jesús kixye re: «Chʼolani ebʼ linkokʼ karneer.
18 Relik chi yaal ninye aawe naq toj saajat chaq, aajunes nakaatiqibʼ aawibʼ ut nakatxik bʼarwiʼ nakaawaj; abʼan naq tattixq, taayeʼ laawuqʼ ut jalan chik ttiqibʼanq aawe ut tatxkʼam bʼarwiʼ inkʼaʼ taawaj».
19 Rikʼin li aatin aʼin kixye chanru tkamq laj Pedro ut naq li xkamik laj Pedro tixkʼe xloqʼal li Yos. Ut chirix chik aʼan, kixye re: «Maakanabʼ intaqenkil».
20 Laj Pedro kixbʼalqʼusi ribʼ ut kiril naq chirixebʼ yook chaq chi chalk li tzolom li naraheʼk chaq xbʼaan li Jesús. Aʼin ajwiʼ li tzolom li kixtolobʼ li xjolom chire xchʼool li Jesús naq xeʼwaʼak saʼ komonil ut kixpatzʼ re: «Qaawaʼ, ut ani li tqʼaxtesinq aawe?».
21 Joʼkan bʼiʼ, naq kiril ru, laj Pedro kixpatzʼ re li Jesús: «Qaawaʼ, kʼaru tkʼulmanq rikʼin aʼan?».
22 Li Jesús kixye re: «Wi nawaj naq tkanaaq arin toj reetal naq tinkʼulunq, maakʼaʼ taawaj re. Laaʼat maakanabʼ intaqenkil».
23 Joʼkan naq kisutunk resil saʼ xyanqebʼ laj paabʼanel naq li tzolom aʼin inkʼaʼ tkamq. Abʼan li Jesús moko kixye ta naq inkʼaʼ tkamq. Kixye bʼan: «Wi nawaj naq tkanaaq arin toj reetal naq tinkʼulunq, maakʼaʼ taawaj re».
24 Aʼin li tzolom li naxkʼe chi naweʼk aʼin ut aʼan kitzʼiibʼank re, ut naqanaw naq yaal li naxkʼe chi naweʼk.
25 Relik chi yaal naq naabʼal chik kixbʼaanu li Jesús ut wi saʼ jun kutan ttzʼiibʼamanq raj li junjunq chi naʼlebʼ joʼ chanru xkʼulmank, ninye naq li ruuchichʼochʼ inkʼaʼ truuq xxokbʼal ebʼ li bʼotbʼilhu li ttzʼiibʼamanq.
Xtzʼaqobʼ ebʼ li naʼlebʼ
^ Malaj «li kayuuk».
^ Malaj «ma maakʼaʼ junaq eekar».
^ Malaj «li yooy».
^ Malaj «li kayuuk».
^ Malaj «moko naabʼal ta xtʼikr».
^ Malaj «kayuuk».
^ Malaj «li yooy».
^ Malaj «li kayuuk».
^ Malaj «li yooy».
^ Malaj «li yooy».
