Juan 9:1-41
9 Naq yook chi numeʼk, kiril jun li winq mutzʼ chalen saʼ xyoʼlajik.
2 Ut ebʼ li xtzolom xeʼxpatzʼ re: «At Kʼutunel,* ani kimaakobʼk re naq li winq aʼin mutzʼ tyoʼlaaq: ma aʼan malaj li xnaʼ ut li xyuwaʼ?».
3 Li Jesús kixye rehebʼ: «Inkʼaʼ kimaakobʼk aʼan chi moko li xnaʼ ut li xyuwaʼ, abʼan kixkʼul aʼin re naq tkʼutunq chi kutankil li naru xbʼaanunkil li Yos.
4 Naq toj kutan, tento tqabʼaanu li xkʼanjel li kitaqlank chaq we. Naq nachalk li qʼoqyink, maaʼani chik naru chi kʼanjelak.
5 Naq toj wanqin saʼ ruuchichʼochʼ, laaʼin xsaqenk li ruuchichʼochʼ».
6 Naq ak kixye aʼin, kichuubʼak saʼ chʼochʼ ut rikʼin li xyaʼal re kixyiibʼ li sebʼ. Chirix chik aʼan kixyul saʼ ru li winq
7 ut kixye re: «Ayu ut chʼaj chaq saʼ laawu saʼ li tzʼakanbʼil haʼ re Siloam» (chi jalbʼil ru naraj xyeebʼal «taqlanbʼil»). Joʼkan naq xkoho, kixchʼaj li ru ut naq kisutqʼiik naru chik chi ilok.
8 Tojaʼ naq ebʼ li rechkabʼal ut li nekeʼilok re chi rajlal chi leemooxik xeʼok xyeebʼal: «Peʼyaal naq aʼin li winq li nachunlaak chi leemooxik?».
9 Wankebʼ nekeʼxye: «Aʼan li winq». Jalanebʼ chik nekeʼxye: «Chanchan abʼan moko aʼan ta». Ut li winq kiʼok xyeebʼal: «Laaʼin li winq aʼin».
10 Tojaʼ naq xeʼxpatzʼ re: «Ut chanru xteehonk saʼ laawu?».
11 Aʼan kixye rehebʼ: «Li winq aʼin li naxkʼabʼaʼi Jesús kixyiibʼ li sebʼ, kixyul saʼ wu ut kixye we: “Ayu Siloam ut chʼaj chaq saʼ laawu”. Xkohin, xinchʼajok ut xinruuk chik chi ilok».
12 Tojaʼ naq xeʼxpatzʼ re: «Bʼar wank li winq aʼan?». «Inkʼaʼ ninnaw», chan li winq.
13 Ebʼ aʼan xeʼxkʼam li winq li moko mutzʼ ta chik rikʼinebʼ laj pariseey.
14 Joʼkan bʼiʼ, li Jesús kixyiibʼ li sebʼ ut kixte saʼ ru li winq. Aʼin kixbʼaanu saʼ jun li sábado.*
15 Joʼkan naq ebʼ laj pariseey xeʼok ajwiʼ xpatzʼbʼal re chanru kiteehonk saʼ li ru. Li winq kixye rehebʼ: «Kixyul sebʼ saʼ li wu, xinchʼajok ut anaqwan ninruuk chi ilok».
16 Tojaʼ naq wiibʼ oxibʼ rehebʼ laj pariseey xeʼok xyeebʼal: «Li winq aʼin moko chalenaq ta rikʼin li Yos xbʼaan naq inkʼaʼ naroxloqʼi li sábado».* Wankebʼ nekeʼxye: «Abʼan, chanru naru jun laj maak xbʼaanunkil jun li sachbʼachʼoolej joʼ aʼin?». Inkʼaʼ nekeʼxkʼe ribʼ saʼ aatin.
17 Ut xeʼxye wiʼ chik re li mutzʼ: «Saʼ xkʼabʼaʼ naq saʼ laawu kixte, kʼaru nakaaye chirix?». Li winq kixye rehebʼ: «Aʼan propeet».
18 Abʼanan ebʼ laj judiiy inkʼaʼ xeʼxpaabʼ naq mutzʼ kiyoʼlaak li winq aʼin ut anaqwan naʼilok chik. Naq xeʼxbʼoq li xnaʼ xyuwaʼ toj aran xeʼxpaabʼ.
19 Xeʼpatzʼeʼk re: «Ma aʼin leeralal li nekeeye naq mutzʼ kiyoʼlaak? Wi joʼkan, chanru naq anaqwan naʼilok chik?».
20 Xeʼchaqʼok li xnaʼ xyuwaʼ: «Naqanaw naq aʼin li qalal ut mutzʼ naq kiyoʼlaak.
21 Abʼan chanru naq naʼilok anaqwan, inkʼaʼ naqanaw; ut ani kiteehok re saʼ ru, inkʼaʼ ajwiʼ naqanaw. Patzʼomaq re xbʼaan naq ak wank chik xchihabʼ ut aʼan tixchʼolobʼ cheeru».
22 Chi joʼkaʼin xeʼsumenk li xnaʼ xyuwaʼ xbʼaan naq nekeʼxxuwa ebʼ laj judiiy. Ut ebʼ laj judiiy ak xeʼxkʼe ribʼ saʼ aatin naq teʼrisi chi junajwa saʼ li chʼutlebʼaal li tyeehoq re, naq li Jesús aʼan li Kriist.
23 Joʼkan naq li xnaʼ xyuwaʼ xeʼxye: «Ak wank chik xchihabʼ, patzʼomaq re».
24 Joʼkan bʼiʼ, xeʼxbʼoq wiʼ chik li winq li moko mutzʼ ta chik ut xeʼxye re: «Kʼe xloqʼal li Yos. Laaʼo naqanaw naq li winq aʼin aj maak».
25 Li winq kixye rehebʼ: «Wi aj maak, moko ninnaw ta. Li ninnaw laaʼin aʼan naq mutzʼin chaq ut anaqwan ninʼilok chik».
26 Tojaʼ naq xeʼxpatzʼ re: «Kʼaru xbʼaanu aawe? Chanru kixte saʼ laawu?».
27 Li winq kixye rehebʼ: «Ak xinye, abʼan inkʼaʼ nekeeraj xpaabʼankil. Kʼaʼut nekeeraj naq tinye wiʼ chik? Ma nekeeraj ajwiʼ ok choʼq xtzolom?».
28 Naq xeʼrabʼi aʼin, xeʼxye re saʼ maaʼusilal: «Laaʼat xtzolom li winq aʼin abʼan laaʼo xtzolom laj Moisés.
29 Laaʼo naqanaw naq li Yos kiraatina laj Moisés, abʼan li winq aʼin inkʼaʼ naqanaw bʼar nachalk».
30 Aʼan kixye rehebʼ: «Nasach inchʼool eebʼaan, li winq xte saʼ wu ut laaʼex nekeeye naq inkʼaʼ nekeenaw bʼar nachalk.
31 Laaʼo naqanaw naq li Yos inkʼaʼ narabʼihebʼ laj maak; abʼan li qʼaxal naroxloqʼi li Yos ut naxbʼaanu li rajom, naʼabʼiik xbʼaan li Yos.
32 Maajunwa qabʼihom resil naq junaq li winq tixte saʼ ru junaq li qas qiitzʼin mutzʼ chalen saʼ xyoʼlajik.
33 Wi li winq aʼin moko chalenaq ta rikʼin li Yos maakʼaʼ raj truuq xbʼaanunkil».
34 Tojaʼ naq xeʼxye re: «Laaʼat xatyoʼlaak saʼ maak ut nakaawaj xkʼebʼal qanaʼlebʼ». Ut xeʼrisi chi junajwa.
35 Li Jesús kirabʼi naq kiʼisiik chi junajwa ut naq kixtaw li winq kixye re: «Ma nakaapaabʼ li Ralal li Winq?».
36 Li winq kixye re: «Ani aʼan Qaawaʼ? Ye we re naq tinruuq xpaabʼankil».
37 Li Jesús kixye re: «Laaʼat ak aawilom ru ut yookat chi aatinak rikʼin».
38 Tojaʼ naq li winq kixye re: «Ninpaabʼ Qaawaʼ». Ut kixwiqʼibʼ ribʼ chiru.
39 Ut li Jesús kixye: «Xinchal saʼ ruuchichʼochʼ re naq li Yos truuq chi raqok aatin saʼ xbʼeenebʼ li qas qiitzʼin ut chi joʼkan li inkʼaʼ nekeʼilok teʼruuq chi ilok ut li nekeʼilok teʼmutzʼoʼq».
40 Naq ebʼ laj pariseey li wankebʼ rochbʼeen xeʼrabʼi aʼin, xeʼxye re: «Moko mutzʼo ta ajwiʼ laaʼo, peʼyaal?».
41 Li Jesús kixye rehebʼ: «Wi mutzʼex raj, moko wank ta raj eemaak. Abʼan saʼ xkʼabʼaʼ naq nekeeye “Nokooʼilok”, leemaak nakanaak junelik saʼ eebʼeen».
Xtzʼaqobʼ ebʼ li naʼlebʼ
^ Saʼ griego «Rabí».
^ Taawil xchʼolobʼankil li aatin, sábado.
^ Taawil xchʼolobʼankil li aatin, sábado.
