Lucas 10:1-42
-
Li Jesús naxtaqla li 70 chi tzolom (1-12)
-
Naxye rehebʼ li tenamit li inkʼaʼ xeʼxyotʼ xchʼool ut inkʼaʼ xeʼxjal xnaʼlebʼ naq ra teʼxkʼul (13-16)
-
Li 70 chi tzolom nekeʼsutqʼiik (17-20)
-
Li Jesús naxkʼe xloqʼal li Xyuwaʼ xbʼaan naq narusila li kubʼenaqebʼ xwankil (21-24)
-
Li eetalil chirix li chaabʼil winq aj Samaria (25-37)
-
Li Jesús narulaʼani li xMarta ut li xMaría (38-42)
10 Chirix chik aʼan, li Qaawaʼ kixsikʼ 70 chik li xtzolom, kixkʼehebʼ saʼ kaʼkabʼ ut kixtaqlahebʼ chiʼubʼej saʼebʼ li tenamit ut saʼebʼ li naʼaj bʼarwiʼ txik aʼan.
2 Tojaʼ naq kixye rehebʼ: «Numtajenaq ru li awimq li xqʼanoʼk, abʼan moko kʼihebʼ ta laj kʼanjel. Joʼkan naq cheetzʼaamaq re laj Echal awimq naq tixtaqlahebʼ laj kʼanjel re naq teʼxsikʼ ru li rawimq.
3 Ayuqex! Ut cheenawaq naq yookin eetaqlankil joʼ karneer saʼ xyanqebʼ li josqʼ aj xul.
4 Meekʼam xbʼoolsil leetumin chi moko leechampa chi moko leexaabʼ* ut maaʼani teekʼe xsahil xchʼool* saʼ bʼe.
5 Naq texʼoq saʼ junaq li ochoch, xbʼeenwa teekʼehebʼ xsahil xchʼool ut teeye: “Chiwanq li tuqtuukilal saʼ li ochoch aʼin”.
6 Ut wi wank aran jun li qas qiitzʼin li naxra li tuqtuukilal, li sahil chʼoolej chirix li tuqtuukilal tkanaaq rikʼin. Abʼan wi maakʼaʼ jun li qas qiitzʼin li naxra li tuqtuukilal, li sahil chʼoolej chirix li tuqtuukilal tsutqʼiiq eerikʼin.
7 Joʼkan naq, kanaqex* saʼ li ochoch aʼan, waʼomaq ut ukʼumaq li teʼxkʼe eere xbʼaan naq laj kʼanjel xkʼulubʼ naq tkʼeheʼq xtojbʼal. Kanaqex aran ut mexxik saʼ jalan chik ochoch.
8 »Joʼkan ajwiʼ, naq texʼoq saʼ junaq li tenamit ut texkʼuleʼq, waʼomaq li teʼxyeechiʼi eere,
9 ut kʼirtasihomaq ebʼ li yaj li wankebʼ aran ut yeehomaq rehebʼ: “Li Xʼawabʼejilal li Yos ak xnachʼok chaq eerikʼin”.
10 Abʼan naq texʼoq saʼ junaq li tenamit ut inkʼaʼ texkʼuleʼq, elenqex saʼebʼ li xnimal ru bʼe ut teeye:
11 “Naqachiqʼ ajwiʼ xpoqsil leetenamit li kikanaak chi qoq. Abʼan cheenawaq aʼin: li Xʼawabʼejilal li Yos ak xnachʼok chaq”.
12 Relik chi yaal ninye eere naq saʼ Xkutankil li Raqok Aatin qʼaxal ra wiʼ chik tixkʼul li tenamit aʼin chiru li kixkʼul chaq Sodoom.
13 »Ra tchalq saʼ aabʼeen, at Corazín! Ra tchalq saʼ aabʼeen, at Betsaida! Laaʼex xeeril ebʼ li sachbʼachʼoolej saʼ leetenamit, abʼan wi li tenamit Tiro ut Sidón xeʼril raj aʼin, junxil raj chik xeʼxyotʼ xchʼool ut xeʼxjal xnaʼlebʼ. Ut xeʼxtiqibʼ raj ribʼ rikʼin qʼesnal tʼikr ut xeʼchunlaak raj saʼ cha.
14 Joʼkan bʼiʼ, saʼ Xkutankil li Raqok Aatin qʼaxal ra wiʼ chik teekʼul laaʼex chiru li kixkʼul chaq Tiro ut Sidón.
15 Ut laaʼat Capernaúm, ma nakaakʼoxla naq li Yos tatxtaqsi saʼ xbʼeen chixjunil? Maajoqʼe bʼiʼanan, tatxkubʼsi bʼan saʼ li Muqlebʼaal Kamenaq.*
16 »Li naʼabʼink eere, nikinrabʼi ajwiʼ laaʼin, ut li inkʼaʼ naʼabʼink cheeru, inkʼaʼ ajwiʼ naʼabʼink chiwu. Joʼkan ajwiʼ, li inkʼaʼ naʼabʼink chiwu inkʼaʼ ajwiʼ naʼabʼink chiru li kitaqlank chaq we».
17 Tojaʼ naq li 70 chi tzolom xeʼsutqʼiik chi sahebʼ saʼ xchʼool ut xeʼxye re: «Qaawaʼ, ebʼ li maaʼus aj musiqʼej nekeʼabʼink ajwiʼ chiqu naq naqoksi laakʼabʼaʼ».
18 Naq kirabʼi aʼin, kixye rehebʼ: «Nawil naq laj Tza ak xtʼaneʼk chik, joʼ naq natʼaneʼk chaq li raqʼ kaaq saʼ choxa.
19 Kʼehomaq reetal, xinkʼe eewankil re naq teeyeqʼi ebʼ li kʼantiʼ ut ebʼ li xookʼ ut re xqʼaxbʼal xwankil li xikʼ naʼilok. Ut maakʼaʼ trahobʼtesinq eere.
20 Abʼan misahoʼk saʼ leechʼool saʼ xkʼabʼaʼ naq ebʼ li maaʼus aj musiqʼej nekeʼabʼink cheeru, chisahoʼq bʼan leechʼool xbʼaan naq leekʼabʼaʼ tzʼiibʼanbʼil saʼ choxa».
21 Saʼ li hoonal aʼan kʼajoʼ naq kisahoʼk saʼ xchʼool saʼ xkʼabʼaʼ li santil musiqʼej ut kixye: «At Inyuwaʼ, laaʼat li Qaawaʼ re li choxa ut re li ruuchichʼochʼ, ninkʼe aaloqʼal chiruhebʼ li junchʼol xbʼaan naq xaamuq chiʼus ebʼ li naʼlebʼ aʼin chiruhebʼ li wankebʼ xnaʼlebʼ ut chiruhebʼ li seebʼebʼ xchʼool ut xaakʼe chixnaw chiruhebʼ li kubʼenaqebʼ xwankil li chanchanebʼ kokʼal. At Inyuwaʼ xaabʼaanu aʼin xbʼaan naq xaawil naq us».
22 Ut kixye ajwiʼ: «Linyuwaʼ kixkʼe saʼ wuqʼ chixjunil. Maaʼani naxnaw ani li Alalbʼej, kaʼajwiʼ li Yuwaʼbʼej. Ut maaʼani naxnaw ani li Yuwaʼbʼej, kaʼajwiʼ li Alalbʼej, ut li Alalbʼej naxnaw chiru ani tixkʼe chi naweʼk chirix li Yuwaʼbʼej».
23 Chirix chik aʼin kirilebʼ li xtzolom ut kixye rehebʼ naq wankebʼ xjunes: «Sahebʼ saʼ xchʼool ebʼ li qas qiitzʼin li nekeʼril li yookex rilbʼal laaʼex.
24 Xbʼaan naq ninye eere naq naabʼalebʼ li propeet ut ebʼ li awabʼej xeʼraj rilbʼal li yookex rilbʼal, abʼan inkʼaʼ xeʼril, ut xeʼraj rabʼinkil li yookex rabʼinkil, abʼan inkʼaʼ xeʼrabʼi».
25 Tojaʼ naq jun li winq li naxnaw chiʼus chirix li Chaqʼrabʼ kiwakliik re xyalbʼal rix ut kixye re: «At Kʼutunel, kʼaru tento tinbʼaanu re naq twechani li junelik yuʼam?».
26 Aʼan kixye re: «Kʼaru tzʼiibʼanbʼil saʼ li Chaqʼrabʼ? Kʼaru nakaataw chirix li nakaawil aran?».
27 Li winq kixye re: «“Taara li Jehobʼa* Laayos chi anchal laachʼool, chi anchal laayuʼam, chi anchal laametzʼew ut chi anchal aakʼaʼuxl” ut “taara laawas aawiitzʼin joʼ naq nakaara aawibʼ”».
28 Li Jesús kixye re: «Chaabʼil xatsumenk; maakanabʼ xbʼaanunkil aʼin ut taataw li junelik yuʼam».
29 Abʼan, li winq kiraj xkʼutbʼesinkil naq tiik xchʼool, joʼkan naq kixye re li Jesús: «Ut ani tzʼaqal li was ut li wiitzʼin?».
30 Li Jesús kixye re: «Jun li winq li wank chaq Jerusalén, kikubʼeek Jericó ut kitʼaneʼk saʼ ruqʼebʼ laj elqʼ, xeʼxmaqʼ li xtʼikr, xeʼxteni ut kachʼin chik ma xeʼxkamsi.
31 Ut saʼ ajwiʼ li bʼe aʼan yook chaq chi kubʼeek jun laj tij; naq kiril li winq, kixtoq ru li bʼe ut tiik xkoho.
32 Joʼkan ajwiʼ kixbʼaanu jun laj Leví naq kiwulak saʼ li naʼaj aʼan. Naq kiril li winq, kixtoq ru li bʼe ut tiik xkoho.
33 Abʼan naq jun li winq aj Samaria kinumeʼk saʼ li bʼe aʼan, kiril xtoqʼobʼaal ru li winq.
34 Joʼkan naq kijilok chixkʼatq, kixkʼe aseeyt ut bʼiin chiru li xrahilal tojaʼ naq kixbʼati ru. Chirix chik aʼan kixtaqsi saʼ xbʼeen li xbʼuur, kixkʼam saʼ jun li ochoch,* ut kiril.
35 Wulajaq chik, kixkʼe wiibʼ li denario* re laj echal ochoch* ut kixye re: “Taawil we, ut wi toj wank taasach chirix, tintoj aawe naq tinsutqʼiiq”.
36 Ani rehebʼ li oxibʼ chi winq nakaakʼoxla naq kinaʼlebʼak joʼ tzʼaqal ras riitzʼin li winq li kitʼaneʼk saʼ ruqʼebʼ laj elqʼ?».
37 Aʼan kixye re: «Li winq li kixtoqʼobʼa ru».* Tojaʼ naq kixye li Jesús re: «Ayu ut joʼkan ajwiʼ taabʼaanu laaʼat».
38 Naq yookebʼ chi xik, li Jesús kiʼok saʼ jun li kʼalebʼaal. Ut saʼ li kʼalebʼaal aʼin kikanaak saʼ rochoch jun li ixq, Marta xkʼabʼaʼ.
39 Li ixq aʼin wank jun li riitzʼin, María xkʼabʼaʼ. Ut li xMaría kichunlaak chi roq li Qaawaʼ ut kikanaak chi rabʼinkil li yook xyeebʼal.
40 Abʼan li xMarta laatzʼ ru chi xbʼaanunkil naabʼal li kʼanjel. Joʼkan naq, kijilok chixkʼatq li Jesús ut kixye re: «Qaawaʼ, ma maakʼaʼ nakaawaj re, naq li wiitzʼin xinxkanabʼ chi xkʼubʼankil chixjunil? Ye re, naq chalq ut tinxtenqʼa».
41 Li Qaawaʼ kixye re: «Marta, Marta, yook laakʼaʼuxl ut laatzʼ aawu xbʼaan naabʼal li kʼanjel,
42 abʼan moko naabʼal ta naʼajmank xbʼaanunkil maare jun ajwiʼ naʼajmank. Abʼanan li xMaría kixsikʼ li qʼaxal chaabʼil ut inkʼaʼ tmaqʼmanq chiru».
Xtzʼaqobʼ ebʼ li naʼlebʼ
^ Malaj «leeperxaabʼ».
^ Malaj «maaʼani teeqʼalu re xkʼebʼal xsahil xchʼool».
^ Malaj «warinqex».
^ Malaj «saʼ li Hades». Taawil xchʼolobʼankil li aatin, Hades.
^ Taawil xchʼolobʼankil li aatin, Jehobʼa.
^ Aʼin naraj xyeebʼal, jun li waribʼaal li nekeʼxtoj li nekeʼbʼihajik.
^ Jun li denario aʼan xtojbʼal jun li winq li nakʼanjelak chiru jun kutan. Li denario aʼan jun li tumin re plaat li nekeʼroksi ebʼ laj Roma.
^ Aʼin naraj xyeebʼal, jun li waribʼaal li nekeʼxtoj li nekeʼbʼihajik.
^ Malaj «kiruxtaana ru».
