Lucas 14:1-35
-
Li winq li nasipo xtibʼel nakʼirtasiik saʼ sábado (1-6)
-
Li nabʼoqeʼk chi waʼak tento tixkubʼsi ribʼ (7-11)
-
Taabʼoqebʼ chi waʼak li inkʼaʼ teʼruuq xkʼebʼal reqaj aawe (12-14)
-
Li eetalil chirixebʼ li nekeʼbʼoqeʼk chi waʼak abʼan nekeʼxsikʼ kʼaru teʼxye re naq inkʼaʼ teʼxik (15-24)
-
Li tento teʼxbʼaanu li nekeʼtaqenk re li Jesús (25-33)
-
Li atzʼam li nasach xmetzʼew (34, 35)
14 Saʼ jun chik li sábado,* li Jesús xkoho chi waʼak saʼ rochoch jun rehebʼ li winq li najolomink rehebʼ laj pariseey. Li wankebʼ aran inkʼaʼ nekeʼxkanabʼ xkaʼyankil li Jesús.
2 Ut chiru li Jesús wank jun li winq yaj; ut li xyajel naxbʼaanu naq tsipooq* li xtibʼel.
3 Tojaʼ naq li Jesús kixpatzʼ rehebʼ li nekeʼxnaw chiʼus chirix li Chaqʼrabʼ ut ebʼ laj pariseey: «Ma naxkʼulubʼa li chaqʼrabʼ naq tkʼirtasiiq junaq li qas qiitzʼin saʼ sábado,* malaj inkʼaʼ?».
4 Abʼan ebʼ aʼan maakʼaʼ chik xeʼxye. Joʼkan naq kixchap li winq, kixkʼirtasi ut kixchaqʼrabʼi.
5 Tojaʼ naq kixye rehebʼ: «Wi junaq eere natʼaneʼk li ralal malaj li xteelom wakax saʼ poos* saʼ sábado,* ma inkʼaʼ trisi saʼ junpaat?».
6 Ut inkʼaʼ xeʼruuk xsumenkil.
7 Naq kixkʼe reetal naq ebʼ li ulaʼ yookebʼ xsikʼbʼal ebʼ li naʼaj bʼarwiʼ nekeʼchunlaak li wankebʼ xwankil, kixkʼut chiruhebʼ li naʼlebʼ* aʼin:
8 «Naq tateʼxbʼoq chi waʼak saʼ jun li sumlaak, matchunlaak saʼ li naʼaj bʼarwiʼ nachunlaak li wank xwankil. Maare anchal kibʼoqeʼk ajwiʼ jun li qas qiitzʼin li qʼaxal nim wiʼ chik xwankil chaawu.
9 Tojaʼ naq li xbʼoqok eere, tchalq ut tixye aawe: «Kʼe laanaʼaj re li winq aʼin». Ut chi kʼajoʼ aaxutaan tatxik saʼ li naʼaj bʼarwiʼ nekeʼchunlaak li maakʼaʼebʼ xwankil.
10 Joʼkan bʼiʼ, naq tateʼxbʼoq, ayu ut chunlan saʼ li naʼaj bʼarwiʼ nekeʼchunlaak li maakʼaʼebʼ xwankil. Ut naq twulaq aawikʼin li xbʼoqok aawe tixye aawe: “Wamiiw, ayu saʼ li naʼaj bʼarwiʼ nekeʼchunlaak li wankebʼ xwankil”. Chi joʼkan tnimaaq aawu chiruhebʼ li junchʼol chi ulaʼ.
11 Xbʼaan naq li naxnima ribʼ tkubʼsiiq xwankil, abʼan li naxkubʼsi ribʼ tnimaaq ru».
12 Chirix chik aʼan kixye re li winq li kibʼoqok re: «Naq taabʼoq junaq li qas qiitzʼin chi waʼak malaj saʼ jun li nimla waʼak, maabʼoqebʼ laawamiiw chi moko ebʼ laawas ut ebʼ laawiitzʼin chi moko ebʼ laawech-alal chi moko ebʼ laawechkabʼal li wankebʼ xbʼihomal. Wi joʼkan raj taabʼaanu, aʼanebʼ tateʼxbʼoq ajwiʼ laaʼat ut aʼinaq laaqʼajkamunkil.
13 Taabʼoqebʼ bʼan saʼ li nimla waʼak ebʼ li nebʼaʼ, ebʼ li yeq roq, ebʼ li mutzʼ,
14 ut taataw xsahil aachʼool xbʼaan naq inkʼaʼ teʼruuq xkʼebʼal reqaj aawe. Ut tatqʼajkamuuq naq teʼwaklesiiq chi yoʼyo li tiikebʼ xchʼool».
15 Naq kirabʼi aʼin, jun rehebʼ li ulaʼ kixye re: «Sa saʼ xchʼool li twaʼaq* saʼ li Xʼawabʼejilal li Yos».
16 Li Jesús kixye re: «Jun li winq kixbʼoq naabʼal li qas qiitzʼin saʼ jun li nimla waʼak.
17 Naq xwulak xhoonalil li nimla waʼak, kixtaqla li xmoos chi xyeebʼal rehebʼ li ulaʼ: “Chalqex, ak xyaloʼk chixjunil”.
18 Abʼan chixjunqalebʼ xeʼok xsikʼbʼal kʼaru teʼxye re naq inkʼaʼ teʼxik. Li xbʼeen kixye: “Xinloqʼ jun linchʼochʼ ut tento tinxik rilbʼal; chaakuy inmaak, inkʼaʼ tinruuq chi xik”.
19 Jun chik kixye re: “Xinloqʼ oobʼ sumal linteelom wakax* ut xik we rilbʼal; chaakuy inmaak, inkʼaʼ tinruuq chi xik”.
20 Ut jun chik kixye re: “Tojaʼ tinsumlaaq, ut saʼ xkʼabʼaʼ aʼin inkʼaʼ tinruuq chi xik”.
21 Joʼkan naq li moos xkoho xseeraqʼinkil chixjunil re laj echal re. Tojaʼ naq kichalk xjosqʼil laj echal ochoch ut kixye re li xmoos: “Ayu saʼ junpaat saʼebʼ li xnimal ru bʼe ut saʼebʼ li ruqʼ bʼe re li tenamit, ut kʼamebʼ chaq arin ebʼ li nebʼaʼ, ebʼ li mutzʼ ut ebʼ li yeq roq”.
22 Moqon chik, li moos kixye: “Waʼ, xbʼaanumank chik li xaaye ut toj wank ebʼ li naʼaj li yamyo ru”.
23 Ut laj echal re li moos kixye re: “Ayu saʼebʼ li bʼe ut saʼebʼ li kokʼ bʼe, ut elaji ruhebʼ li qas qiitzʼin re naq teʼchalq ut tnujaq li wochoch.
24 Xbʼaan naq ninye eere naq maajun rehebʼ li winq li xeʼbʼoqeʼk teʼxyal lintzekemq”».
25 Ut rochbʼeen li Jesús yookebʼ chi xik li kʼiila tenamit; aʼan kirilebʼ ut kixye rehebʼ:
26 «Wi junaq li qas qiitzʼin naraj intaqenkil, tento naq qʼaxal tinxra chiru li xyuwaʼ, li xnaʼ, li rixaqil, ebʼ li ralal xkʼajol, ebʼ li ras, ebʼ li ranabʼ joʼ ajwiʼ li xyuʼam. Wi inkʼaʼ naxbʼaanu aʼin, inkʼaʼ naru nawank choʼq intzolom.
27 Li naraj intaqenkil tento tixkʼulubʼa li rahobʼtesiik* ut tinxtaqe. Abʼan wi inkʼaʼ, moko naru ta nawank choʼq intzolom.
28 Jun eetalil, wi junaq eere naraj xyiibʼankil jun li ochoch najt xteram, ma inkʼaʼ tabʼiʼ xbʼeenwa tchunlaaq, tixbʼir rix li xsachomq ut tril ma wank chixjunil li naʼajmank re xchoybʼal?
29 Maare anchal tixkʼe li rubʼelankil abʼan inkʼaʼ truuq xchoybʼal, ut chixjunilebʼ li teʼiloq re teʼoq xseʼenkil
30 ut xyeebʼal: “Li winq aʼin kiʼok chi kabʼlak abʼan moko kixchoy ta”.
31 Wi junaq li awabʼej naxik chi yalok saʼ xbʼeen jun chik li awabʼej, ma inkʼaʼ tabʼiʼ xbʼeenwa tchunlaaq ut t-oq xtzʼilbʼal rix ma truuq xqʼaxbʼal 20,000 aj puubʼ rikʼin 10,000?
32 Ut wi inkʼaʼ naru xbʼaanunkil, naxtaqla jun chʼuut li winq chi xtzʼaamankil re li jun chik awabʼej naq teʼxkʼe ribʼ saʼ usilal. Ut naxbʼaanu aʼin naq toj wank chi najt li jun chik awabʼej.
33 Joʼkan ajwiʼ, chʼolchʼooq cheeru naq maaʼani eere naru nawank choʼq intzolom wi inkʼaʼ naxkanabʼ chixjunil li xjunkabʼlal.
34 »Chʼolchʼo tzʼaqal naq qʼaxal chaabʼil li atzʼam. Abʼan, wi li atzʼam nasach xmetzʼew, rikʼin kʼaru tkʼemanq wiʼ chik xsahil?
35 Inkʼaʼ chik tkʼanjelaq chi moko choʼq re li chʼochʼ chi moko choʼq re li kʼot; joʼkan naq ebʼ li qas qiitzʼin nekeʼxtzʼeq. Li wank xxik re abʼink, chixkʼehaq xchʼool chi abʼink».
Xtzʼaqobʼ ebʼ li naʼlebʼ
^ Taawil xchʼolobʼankil li aatin, sábado.
^ Li yajel aʼin saʼ kastiiy nakʼabʼaʼiik hidropesía.
^ Taawil xchʼolobʼankil li aatin, sábado.
^ Malaj «saʼ bʼekbʼil haʼ».
^ Taawil xchʼolobʼankil li aatin, sábado.
^ Saʼ griego «kixye jun li eetalil (jaljokil ru aatin)».
^ Saʼ griego «tixwaʼ li kaxlanwa».
^ Malaj «linbʼooyx».
^ Malaj «tixpaqo li cheʼ re rahobʼtesiik». Taawil xchʼolobʼankil li aatin, cheʼ re rahobʼtesiik.
