Lucas 2:1-52
-
Xyoʼlajik li Jesús (1-7)
-
Xaqamil wiibʼ oxibʼ li ánjel chiruhebʼ laj ilol karneer (8-20)
-
Li setok tzʼuumal tzʼejwal ut li chʼajobʼresink ibʼ (21-24)
-
Laj Simeón naril li Kriist (25-35)
-
Li xʼAna naʼaatinak chirix li chʼinaʼal (36-38)
-
Laj José ut li xMaría nekeʼsutqʼiik saʼ li tenamit Nazaret (39, 40)
-
Li Jesús wank saʼ rochoch li Yos naq wank kabʼlaju chihabʼ re (41-52)
2 Chiruhebʼ li kutan aʼan, laj Augusto li awabʼej re Roma* kixxaqabʼ jun li chaqʼrabʼ re naq chixjunilebʼ li qas qiitzʼin teʼxtzʼiibʼa chaq ribʼ.
2 (Chiruhebʼ li chihabʼ naq kiwank chaq laj Quirinio choʼq ruuchil awabʼej aran Siria, aʼin li xbʼeen sut naq ebʼ li qas qiitzʼin xeʼxtzʼiibʼa ribʼ).
3 Ut chixjunilebʼ xkohebʼ saʼebʼ li xtenamit chi xtzʼiibʼankilebʼ ribʼ.
4 Joʼkan ajwiʼ kixbʼaanu laj José. Ut saʼ xkʼabʼaʼ naq chalenaq saʼ rochoch ut saʼ xjunkabʼal laj David, kiʼelk Nazaret li wank Galilea, ut kitaqeʼk Belén li xtenamit laj David li wank Judea.
5 Xkoho xtzʼiibʼankil ribʼ rochbʼeen li xMaría, li ak sumsu rikʼin joʼ kiyeemank chaq, ut chi seebʼ t-usaaq.
6 Naq wankebʼ chaq aran, kiwulak xkutankil naq li xMaría t-usaaq.
7 Ut kiwank li xbʼeen xyum. Kixbʼat rikʼin peraasinbʼil tʼikr ut kixyokobʼ saʼ xwaʼlebʼalebʼ li ketomq xbʼaan naq inkʼaʼ xeʼxtaw xnaʼaj bʼarwiʼ nekeʼkanaak li ulaʼ.
8 Saʼ li naʼaj ajwiʼ aʼan, wankebʼ chaq laj ilol karneer chirix kabʼl, yookebʼ chaq xkʼaakʼalenkil li xketomq chiru qʼoqyink.
9 Ut maakʼaʼ saʼ xchʼoolebʼ naq li xʼánjel li Jehobʼa* xaqamil chiruhebʼ, ut li xloqʼal li Jehobʼa* kixkutanobʼresi li xsutamebʼ, ut kʼajoʼ naq xeʼxuwak.
10 Abʼan li ánjel kixye rehebʼ: «Mexxuwak xbʼaan naq tinye eere li chaabʼil esil li tixsahobʼresi xchʼool chixjunil li tenamit.
11 Xbʼaan naq xyoʼlaak anaqwan saʼ li xtenamit laj David jun laj kolonel aʼ li Kriist, li Qaawaʼ.
12 Aʼinaq li eetalil choʼq eere: teetaw jun li kʼuulaʼal li bʼatbʼo rikʼin peraasinbʼil tʼikr ut yokyo saʼ xwaʼlebʼalebʼ li ketomq».
13 Tojaʼ naq xaqamil li kʼiila ánjel chixkʼatq li ánjel li yook xnimankil li Yos ut xyeebʼal:
14 «Laaʼo naqakʼe xloqʼal li Yos saʼ choxa, ut arin saʼ ruuchichʼochʼ chiwanq li tuqtuukilal rikʼinebʼ li qas qiitzʼin li naxkʼulubʼaʼebʼ li Yos».
15 Naq ebʼ li ánjel xeʼelk chiruhebʼ ut xkohebʼ saʼ choxa, ebʼ laj ilol karneer xeʼok xyeebʼal chiribʼilebʼ ribʼ: «Maakʼaʼ naxye chanru, tento tooxik Belén, ut tooxik rilbʼal li xkʼulmank, li kixkʼe chiqanaw li Jehobʼa».*
16 Tojaʼ naq xkohebʼ saʼ junpaat ut xeʼxtaw li xMaría ut laj José rochbʼeen li kʼuulaʼal yokyo saʼ xwaʼlebʼalebʼ li ketomq.
17 Naq xeʼril aʼin, xeʼxseeraqʼi li kiyeeheʼk rehebʼ xbʼaan li ánjel chirix li chʼinaʼal.
18 Ut chixjunilebʼ li xeʼabʼink rehebʼ laj ilol karneer, sachsokebʼ xchʼool xeʼkanaak.
19 Li xMaría kiʼok xkʼulankil saʼ li xkʼaʼuxl chixjunil ebʼ li aatin aʼin ut kiʼok xkʼoxlankil kʼaru naraj xyeebʼal.
20 Tojaʼ naq xeʼsutqʼiik ebʼ laj ilol karneer, ut yookebʼ chaq xloqʼoninkil ut xnimankil li Yos saʼ xkʼabʼaʼ li xeʼril ut li xeʼrabʼi; ut kikʼulmank chi tzʼaqal li kiyeemank chaq rehebʼ.
21 Naq ak xnumeʼk waqxaqibʼ kutan, kiwulak xkutankil naq tsetmanq xtzʼuumal li xtzʼejwal li chʼinaʼal ut Jesús xeʼxkʼe choʼq xkʼabʼaʼ. Aʼin li kʼabʼaʼej li kixye chaq li ánjel naq toj maajiʼ nakanaak saʼ yuʼam li xMaría.
22 Joʼkan ajwiʼ, naq xwulak xqʼehil li xchʼajobʼresinkil ribʼebʼ, joʼ naxye li Xchaqʼrabʼ laj Moisés, xeʼtaqeʼk rochbʼeen li Jesús aran Jerusalén re xkʼutbʼal chaq chiru li Jehobʼa,*
23 joʼ chanru tzʼiibʼanbʼil saʼ li Xchaqʼrabʼ li Jehobʼa:* «Ebʼ li xbʼeen alalbʼej santaqebʼ chiru li Jehobʼa».*
24 Ut xeʼxyeechiʼi li mayejanbʼil xul joʼ naxye chaq li Xchaqʼrabʼ li Jehobʼa:* «Wiibʼ li mukuy malaj wiibʼ ral mukuy».
25 Aran Jerusalén wank chaq jun li winq, aj Simeón xkʼabʼaʼ. Li winq aʼin tiik xchʼool ut naxloqʼoni li Yos chi anchal xchʼool ut yook roybʼeninkil naq tkʼojobʼaaq xchʼool li tenamit Israel; ut saʼ xbʼeen wank chaq li santil musiqʼej.
26 Joʼkan ajwiʼ, li Yos kixkʼe chixnaw rikʼin li santil musiqʼej naq inkʼaʼ tkamq wi toj maajiʼ naril ru li Kriist li sikʼbʼil ru xbʼaan li Jehobʼa.*
27 Ut ekʼasinbʼil xbʼaan li santil musiqʼej naq kiʼok saʼ rochoch li Yos. Ut naq laj José ut li xMaría xeʼok rochbʼeen li chʼinaʼal re xbʼaanunkil li xaqabʼanbʼil xbʼaan li Chaqʼrabʼ,
28 kixqʼalu li chʼinaʼal, kixnima ru li Yos ut kixye:
29 «At Qaawaʼ li Nakaajolomi Chixjunil, anaqwan yookat xkanabʼankil naq laamoos tkamq saʼ tuqtuukilal joʼ xaaye chaq,
30 xbʼaan naq ak xwil rikʼin wu li tkʼamoq chaq re li kolbʼa ibʼ,
31 li ak xaakawresi chiru chixjunilebʼ li tenamit.
32 Aʼan li saqenk li tixtenqʼahebʼ li maawaʼebʼ aj judiiy re naq teʼruuq chi ilok ut tixtaqsi xwankil laatenamit Israel».
33 Li xnaʼ ut li xyuwaʼ li chʼinaʼal qʼaxal sachsokebʼ xchʼool chi rabʼinkil li nayeemank chirix.
34 Tojaʼ naq laj Simeón kixtzʼaama naq teʼosobʼtesiiq ut kixye re li xMaría, li xnaʼ li chʼinaʼal: «Kʼe reetal, li chʼinaʼal aʼin xaqabʼanbʼil re naq naabʼalebʼ laj Israel teʼtʼaneʼq ut naabʼalebʼ teʼwakliiq wiʼ chik, ut aʼanaq reetalil naq tzʼeqtaananbʼilaq
35 (ut laaʼat jun li chʼiichʼ txeqʼoq re laawaanm) re risinkil chi kutankil li wank saʼ xchʼool naabʼalebʼ li qas qiitzʼin».
36 Wank ajwiʼ aran jun li ixq propeet, xʼAna xrabʼin laj Fanuel, li yoʼlajenaq saʼ li teep Aser. Li ixq aʼin xikenaq xchihabʼ. Toj saaj naq kisumlaak ut wuqubʼ chihabʼ kiwank rikʼin li xbʼeelom
37 ut anaqwan kamenaq chik li xbʼeelom ut 84 chihabʼ wank re. Junelik wank chaq saʼ rochoch li Yos ut aran naloqʼonink. Ut chi qʼeq ut chi kutan naʼayuunik* ut natzʼaamank chiru li Yos.
38 Saʼ li hoonal ajwiʼ aʼan kijilok chixkʼatqebʼ, kixbʼanyoxi re li Yos ut kiʼok chi aatinak chirix li chʼinaʼal rikʼin chixjunilebʼ li yookebʼ roybʼeninkil xhoonalil naq li tenamit Jerusalén tixkanabʼ wank rubʼel xwankil li xikʼ nekeʼilok rehebʼ.
39 Naq ak xeʼxbʼaanu chixjunil joʼ naxye li Xchaqʼrabʼ li Jehobʼa* xeʼsutqʼiik saʼ li xtenamitebʼ aran Nazaret li wank chaq Galilea.
40 Li chʼinaʼal yook chi nimank, kaw chaq ribʼ ut yook ajwiʼ chi kʼiik li xnawom. Ut junelik natenqʼaak xbʼaan li Yos.
41 Rajlal chihabʼ, li xnaʼ ut li xyuwaʼ kʼaynaqebʼ chi xik Jerusalén saʼ li ninqʼe chirix li Paswa.
42 Naq wank chaq kabʼlaju chihabʼ re, xeʼtaqeʼk Jerusalén joʼ kʼaynaqebʼ chaq xbʼaanunkil saʼ li ninqʼe.
43 Naq xraqeʼk li ninqʼe, xeʼxchap xbʼe re sutqʼiik, abʼan li xnaʼ ut li xyuwaʼ li Jesús* inkʼaʼ xeʼxkʼe reetal naq kikanaak Jerusalén.
44 Saʼ xchʼoolebʼ aʼan naq li Jesús yook chaq chirixebʼ ut ak jun kutan rokikebʼ chi bʼeek. Tojaʼ naq xeʼok xsikʼbʼal saʼ xyanqebʼ li rech-alal ut ebʼ li qas qiitzʼin li nekeʼxnaw ru.
45 Abʼan saʼ xkʼabʼaʼ naq inkʼaʼ xeʼxtaw, xeʼsutqʼiik Jerusalén ut xeʼxsikʼ yalaq bʼar.
46 Naq ak xnumeʼk oxibʼ kutan, xeʼxtaw saʼ rochoch li Yos chunchu saʼ xyanqebʼ laj kʼutunel. Yook rabʼinkilebʼ ut yook xbʼaanunkil li patzʼom rehebʼ.
47 Ut chixjunilebʼ li nekeʼabʼink re sachsokebʼ xchʼool nekeʼkanaak chi rilbʼal naq naxtaw ru ebʼ li naʼlebʼ ut chi rilbʼal chanru nasumenk.
48 Naq li xnaʼ ut li xyuwaʼ xeʼril ru, kʼajoʼ naq xeʼsach xchʼool, ut li xnaʼ kixye re: «Waʼ, kʼaʼut xaabʼaanu qe aʼin? Yook qakʼaʼuxl aabʼaan, laayuwaʼ ut laaʼin yooko aasikʼbʼal».
49 Abʼan li Jesús kixye rehebʼ: «Kʼaʼut yookex insikʼbʼal? Ma inkʼaʼ nekeenaw naq tento tinwanq saʼ rochoch Linyuwaʼ?».
50 Abʼan inkʼaʼ xeʼxtaw ru li yook xyeebʼal rehebʼ.
51 Tojaʼ naq li Jesús kisutqʼiik rochbʼeenebʼ aran Nazaret ut inkʼaʼ kixkanabʼ abʼink chiruhebʼ. Li xMaría kiʼok xkʼulankil saʼ li xchʼool chixjunil ebʼ li aatin aʼin.
52 Li Jesús yook chi nimank, yook chi kʼiik li xnaʼlebʼ ut li Yos ut ebʼ li qas qiitzʼin sahebʼ saʼ xchʼool rikʼin.
Xtzʼaqobʼ ebʼ li naʼlebʼ
^ Saʼ griego «César». Aʼin ruuchil xkʼabʼaʼ wiibʼ oxibʼ li awabʼej re Roma.
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Malaj «naxkanabʼ waʼak chiru jarubʼaq kutan».
^ Taawil xchʼolobʼankil li aatin, Jehobʼa.
^ Saʼ griego «li Jesús li chʼinaʼal».
