Lucas 21:1-38
21 Naq kixtaqsi li rilobʼaal, kiril ebʼ li bʼihom xkʼebʼal li kubʼsiil saʼ xkaaxil li tumin.
2 Tojaʼ naq kiril jun li malkaʼan nebʼaʼ yook xkʼebʼal wiibʼ sentaaw* saʼ li kaax
3 ut kixye: «Relik chi yaal ninye eere naq li malkaʼan aʼin qʼaxal naabʼal wiʼ chik kixkʼe chiru chixjunilebʼ.
4 Xbʼaan naq aʼanebʼ xeʼxkʼe li kubʼsiil li naʼelaʼank* chiruhebʼ, abʼan li malkaʼan qʼaxal nebʼaʼ, kixkʼe chixjunil li wank rikʼin».
5 Moqon chik, naq wiibʼ oxibʼ li qas qiitzʼin yookebʼ xyeebʼal chanru uutzʼuʼujinbʼil li rochoch li Yos rikʼin chʼinaʼusil pek ut rikʼin li maatan li yeechiʼinbʼil re li Yos,
6 aʼan kixye: «Twulaq xkutankil naq inkʼaʼ tkanaaq pek saʼ xbʼeen pek joʼ yookex rilbʼal anaqwan. Chixjunil tjukʼmanq».
7 Tojaʼ naq xeʼxpatzʼ re: «At Kʼutunel joqʼe tzʼaqal tkʼulmanq aʼin ut kʼaru li eetalil tkʼutbʼesinq re, naq ok re chi kʼulmank aʼin?».
8 Kixye rehebʼ: «Weent teebʼaanu. Meekʼe eeribʼ chi bʼalaqʼiik* xbʼaan naq naabʼalebʼ teʼkʼulunq ut teʼroksi linkʼabʼaʼ ut yooqebʼ xyeebʼal: “Laaʼin li Kriist”, malaj “Nachʼ wank li xraqik”. Mexxik chirixebʼ.
9 Joʼkan ajwiʼ, naq teerabʼi resil li yalok u ut li poqoqink ibʼ,* mexxuwak. Xbʼaan naq xbʼeenwa tkʼulmanq chixjunil aʼin, abʼan moko ak saʼ junpaat ta tchalq li xraqik».
10 Tojaʼ naq kixye rehebʼ: «Teʼyaloq tenamit rikʼin jalan chik tenamit ut awabʼejilal rikʼin jalan chik awabʼejilal.
11 Twanq ninqi hiik ut saʼ jalan jalanq chi naʼajej, twanq weʼej ut jalan jalanq chik chi yajel. Ut xuwajel tzʼaqal li teʼril ebʼ li qas qiitzʼin ut saʼ choxa tkʼutunq xninqal ru eetalil.
12 »Abʼan, naq toj maajiʼ nakʼulmank chixjunil aʼin, texchapeʼq ut texrahobʼtesiiq. Texkʼameʼq saʼ li naʼaj re loqʼonink re naq traqmanq aatin saʼ eebʼeen ut texkʼeheʼq saʼ tzʼalam. Ut xbʼaan linkʼabʼaʼ, texkʼameʼq chiruhebʼ li awabʼej ut chiruhebʼ li ruuchil awabʼej.
13 Aʼin tkʼanjelaq re naq laaʼex teekʼe chi naweʼk chiwix chiruhebʼ li junchʼol.
14 Joʼkan bʼiʼ, chi wank saʼ leechʼool naq inkʼaʼ teekawresi eeribʼ chi rubʼelaj re naq teenaw chanru texsumenq
15 xbʼaan naq laaʼin tinkʼe eenaʼlebʼ ut tinye eere kʼaru teeye. Ut ebʼ li xikʼ nekeʼilok eere inkʼaʼ teʼruuq eesumenkil.
16 Joʼkan ajwiʼ, texqʼaxtesiiq xbʼaan leenaʼ ut leeyuwaʼ, leeras ut leeriitzʼin, leerech-alal ut leeramiiw. Wiibʼ oxibʼ eere texkamsiiq.
17 Ut xbʼaan linkʼabʼa xikʼ texʼileʼq xbʼaanebʼ li qas qiitzʼin.
18 Usta joʼkan, maajun rismal eejolom t-osoʼq.
19 Rikʼin leekuyum, teekol eeyuʼam.
20 »Joʼkan bʼiʼ, naq teeril naq li tenamit Jerusalén sutsuuq xbʼaanebʼ laj puubʼ cheenawaq naq ak xnachʼok chaq li xsachik.
21 Tojaʼ naq, li wanqebʼ Judea tento teʼelq aran ut teʼxik saʼebʼ li tzuul; li wanqebʼ saʼ xyi li tenamit Jerusalén elenqebʼ aran, ut li wanqebʼ saʼebʼ li naʼaj chi xsutam li tenamit meʼok chisaʼ.
22 Xbʼaan naq chiruhebʼ li kutan aʼin li Yos traqoq aatin re naq ttzʼaqloq ru chixjunil li tzʼiibʼanbʼil.
23 Ra tchalq saʼ xbʼeenebʼ li yaj aj ixq malaj li yooqebʼ chi tuʼresink chiruhebʼ li kutan aʼan! Xbʼaan naq kʼajoʼ li rahilal tixkʼul li naʼaj aʼin ut tkʼemanq chi xtojbʼal xmaak.
24 Ut teʼkamsiiq chi chʼiichʼ ut teʼkʼameʼq chi preexil chixjunilebʼ li qas qiitzʼin ut li tenamit Jerusalén tyeqʼimanq xbʼaanebʼ li tenamit* toj naq ttzʼaqloq ru li hoonal li xaqabʼanbʼil choʼq rehebʼ li tenamit.*
25 »Twanq ajwiʼ ebʼ li eetalil saʼ li saqʼe, saʼ li po ut saʼebʼ li chahim. Saʼ ruuchichʼochʼ, ebʼ li qas qiitzʼin re jalan jalanq chi tenamit yooqebʼ xkʼaʼuxl ut inkʼaʼ teʼxnaw kʼaru teʼxbʼaanu xbʼaan li xyaabʼ ut li xkawil roq li palaw.
26 Ebʼ li qas qiitzʼin teʼtʼaneʼq xbʼaanebʼ xxiw ut teʼoq xkʼaʼuxl saʼ xkʼabʼaʼ li tchalq saʼ xbʼeen li ruuchichʼochʼ xbʼaan naq li xwankilal li choxa tchiqʼchiqʼiiq.
27 Tojaʼ naq teʼril chi chalk li Ralal li Winq saʼ xbʼeen jun li choql rikʼin xwankilal ut xnimal xloqʼal.
28 Abʼan, naq ttiklaaq chixjunil aʼin, texxaqliiq ut teetaqsi leejolom xbʼaan naq ak xnachʼok chaq leekolbʼal».
29 Rikʼin aʼin, kixkʼe rehebʼ jun li eetalil:* «Kʼehomaq reetal xtoonal li iig ut chixjunil ebʼ li cheʼ.
30 Naq nekeeril naq naʼok chi elk li xxaq, chʼolchʼo cheeru naq xnachʼok chaq li saqʼehil.
31 Joʼkan ajwiʼ laaʼex, naq teeril naq yook chi kʼulmank aʼin, cheenawaq naq li Xʼawabʼejilal li Yos ak xnachʼok chaq.
32 Relik chi yaal ninye eere naq li tenamit li wank chiruhebʼ li kutan aʼin inkʼaʼ tkamq wi toj maajiʼ nakʼulmank chixjunil aʼin.
33 Li choxa ut li ruuchichʼochʼ teʼosoʼq, abʼan li waatin maajunwa tsachq.
34 »Abʼan teekʼaakʼale eeribʼ re naq maajunwa t-aaloʼq leechʼool xbʼaan li numwaʼak, li numʼukʼak ut xbʼaan li naʼajmank saʼ leeyuʼam, ut maare anchal wanq li kutan aʼin saʼ eebʼeen chi maakʼaʼ saʼ leechʼool
35 joʼ jun li raʼal.* Xbʼaan naq tchalq saʼ xbʼeenebʼ li qas qiitzʼin li wankebʼ saʼ xbʼeen li ruuchichʼochʼ.
36 Joʼkan bʼiʼ, ajʼajaq eeru ut junelik textzʼaamanq re naq texruuq chi koleʼk chiru chixjunil li tkʼulmanq ut texruuq chi wank chi xaqxo chiru li Ralal li Winq».
37 Joʼkan naq chi kutan nakʼutuk saʼ rochoch li Yos, aʼut chi qʼeq naʼelk chaq aran ut naxik chi kanaak saʼ li tzuul li naxkʼabʼaʼi Olivo.
38 Ut wulajaq eqʼla chixjunil li tenamit naxik saʼ rochoch li Yos chi rabʼinkil.
Xtzʼaqobʼ ebʼ li naʼlebʼ
^ Saʼ griego «wiibʼ leptón». Wiibʼ leptón aʼan xtojbʼal jun li winq li nakʼanjelak maare lajeebʼ kʼasal.
^ Malaj «li nasobʼrin».
^ Malaj «chi sacheʼk».
^ Malaj «li mululink ibʼ».
^ Malaj «li maawaʼebʼ aj judiiy».
^ Malaj «choʼq rehebʼ li maawaʼebʼ aj judiiy».
^ Malaj «li jaljokil ru aatin».
^ Malaj «li aaleek».
