Lucas 22:1-71
-
Ebʼ laj tij nekeʼxkʼubʼ chanru xkamsinkil li Jesús (1-6)
-
Jun aj chik li Paswa nekeʼxkawresi (7-13)
-
Naxaqabʼaak li Xtzekemq li Qaawaʼ (14-20)
-
«Li ruqʼ li winq li tqʼaxtesinq we wank wikʼin saʼ meex» (21-23)
-
Ebʼ li xtzolom nekeʼxchoqi ribʼ chirix ani li nim (24-27)
-
Li Jesús naxbʼaanu jun li sumwank rikʼinebʼ li xtzolom re naq teʼjolominq (28-30)
-
Li Jesús naxye chi rubʼelaj naq laj Pedro tixye naq inkʼaʼ naxnaw ru (31-34)
-
Tento naq kawresinbʼilaqo; wiibʼ li chʼiichʼ (35-38)
-
Li Jesús natijok saʼ li tzuul Olivo (39-46)
-
Nekeʼxchap ut nekeʼxkʼam li Jesús (47-53)
-
Laj Pedro naxye naq inkʼaʼ naxnaw ru (54-62)
-
Nekeʼxseʼe li Jesús (63-65)
-
Li Nimla Raqlebʼaal Aatin rehebʼ laj judiiy naraqok aatin saʼ xbʼeen (66-71)
22 Joʼkan bʼiʼ, yook chaq chi nachʼok li Ninqʼe chirix li Kaxlanwa li Maakʼaʼ Xchʼamal,* li naxkʼabʼaʼi Paswa.
2 Ut ebʼ li xbʼeenil aj tij ut ebʼ laj tzʼiibʼ nekeʼxxuwa ru li tenamit joʼkan naq yookebʼ xsikʼbʼal chanru teʼxkamsi.
3 Tojaʼ naq laj Tza kiʼok rikʼin jun rehebʼ li Kabʼlaju aʼ laj Judas li naxkʼabʼaʼi Iscariote,
4 ut laj Judas xkoho chi aatinak rikʼinebʼ li xbʼeenil aj tij ut li nekeʼilok re li rochoch li Yos re xyeebʼal chanru tixqʼaxtesi li Jesús rehebʼ.
5 Ebʼ aʼan kʼajoʼ xeʼwulak chiru li kixye ut xeʼxkʼubʼ xkʼebʼal xtumin.*
6 Laj Judas kixkʼulubʼa, ut kiʼok xsikʼbʼal joqʼe tixkʼe ribʼ chiru re xqʼaxtesinkil saʼ ruqʼebʼ, abʼan tixbʼaanu naq maakʼaʼaq li kʼiila tenamit.
7 Tojaʼ naq kiwulak xkutankil li Ninqʼe chirix li Kaxlanwa li Maakʼaʼ Xchʼamal,* bʼarwiʼ tyeechiʼimanq li mayejanbʼil xul choʼq re li Paswa.
8 Joʼkan naq li Jesús kixtaqla laj Pedro ut laj Juan ut kixye rehebʼ: «Ayuqex ut kawresihomaq li Paswa re naq tqawaʼ».
9 Ebʼ aʼan xeʼxpatzʼ re: «Bʼar nakaawaj naq tqakawresi?».
10 Li Jesús kixye rehebʼ: «Kʼehomaq reetal, naq texʼoq saʼ li tenamit, teetaw jun li winq li yook xkʼambʼal xhaʼ saʼ jun chʼochʼil kuk. Teetaqe ut texʼoq saʼ li ochoch bʼarwiʼ t-oq aʼan.
11 Ut yeehomaq re laj echal ochoch: “Laj Kʼutunel naxye aawe: «Bʼar wank li naʼaj rehebʼ li ulaʼ re naq tinwaʼ li Paswa rochbʼeenebʼ lintzolom?»”.
12 Ut li winq aʼan tixkʼut cheeru jun li nimla naʼaj li wank taqeʼq ut chisaʼ wank chixjunil. Aran teekawresi li Paswa».
13 Ebʼ aʼan xkohebʼ ut xeʼxtaw chixjunil joʼ kixye chaq li Jesús; tojaʼ naq xeʼok xkawresinkil li Paswa.
14 Joʼkan bʼiʼ, naq kiwulak xhoonalil, li Jesús kichunlaak saʼ meex rochbʼeenebʼ li xʼapóstol.
15 Ut kixye rehebʼ: «Kʼajoʼ ninrahi ru xwaʼbʼal li Paswa eerochbʼeen anaqwan naq toj maajiʼ natiklaak li rahilal saʼ inbʼeen...;
16 xbʼaan naq ninye eere naq inkʼaʼ chik tinwaʼ aʼin toj naq ttzʼaqloq ru saʼ li Xʼawabʼejilal li Yos».
17 Ut naq ak kixkʼul li ukʼlebʼ sekʼ, kibʼanyoxink chiru li Yos ut kixye rehebʼ: «Kʼulumaq ut numsihomaq saʼ eeyanq,
18 xbʼaan naq ninye eere naq chalen anaqwan inkʼaʼ chik twukʼ li bʼiin toj naq tkʼulunq li Xʼawabʼejilal li Yos».
19 Tojaʼ naq kixchap jun li kaxlanwa, kixbʼanyoxi re li Yos, kixjach, kixkʼe rehebʼ ut kixye rehebʼ: «Aʼin reetalil lintibʼel li tkʼemanq saʼ eekʼabʼaʼ. Meekanabʼ xbʼaanunkil aʼin re injultikankil».
20 Joʼkan ajwiʼ kixbʼaanu rikʼin li ukʼlebʼ sekʼ naq ak xwaʼak. Kixye rehebʼ: «Li ukʼlebʼ sekʼ aʼin reetalil li akʼ sumwank, li ttiklaaq naq tinhoy linkikʼel saʼ eekʼabʼaʼ.
21 »Abʼan, kʼehomaq reetal, li ruqʼ li winq li tqʼaxtesinq we wank wikʼin saʼ meex.
22 Xbʼaan naq li Ralal li Winq tixkʼul chixjunil li tzʼiibʼanbʼil chirix. Abʼan, ra tchalq saʼ xbʼeen li tqʼaxtesinq re!».
23 Joʼkan naq xeʼok xpatzʼinkil chiribʼilebʼ ribʼ chirix ani tawiʼ tbʼaanunq re aʼin.
24 Tojaʼ naq ebʼ li xtzolom xeʼxchoqi ribʼ chiribʼilebʼ ribʼ chirix ani rehebʼ li qʼaxal nim.
25 Abʼan li Jesús kixye rehebʼ: «Ebʼ li awabʼej rehebʼ li tenamit nekeʼnumtaak saʼ xbʼeenebʼ li qas qiitzʼin. Ut li wankebʼ xwankil saʼ xbʼeenebʼ li qas qiitzʼin, nawbʼilebʼ ru joʼebʼ li nekeʼxbʼaanu li us rehebʼ li junchʼol.
26 Abʼanan moko joʼkanaqex ta laaʼex. Li nim saʼ eeyanq chiwanq joʼ li qʼaxal saaj, ut li nataqlank chiwanq joʼ li moos.
27 Xbʼaan naq, ani li nim? Ma li nawaʼak,* malaj li moos? Ma inkʼaʼ tabʼiʼ li nawaʼak? Abʼan, laaʼin wankin saʼ eeyanq joʼ moos.
28 »Joʼkan bʼiʼ, laaʼex xeekuy wank wikʼin naq xinkʼul li aaleek.
29 Ut laaʼin ninbʼaanu jun li sumwank eerikʼin re naq texjolominq saʼ jun li awabʼejilal joʼ naq Linyuwaʼ kixbʼaanu jun li sumwank wikʼin,
30 ut chi joʼkan texwaʼaq ut texʼukʼaq saʼ linmeex saʼ Linʼawabʼejilal ut texchunlaaq saʼebʼ li kʼojaribʼaal re naq texraqoq aatin saʼ xbʼeen li kabʼlaju chi teep re Israel.
31 »Simón, Simón, kʼe reetal laj Tza yook eepatzʼbʼal re naq texchiqʼchiqʼi joʼ naq nachiqʼchiqʼiik li triiw.
32 Abʼan nintzʼaamank chaawix re naq inkʼaʼ tchʼinanq laapaabʼal chirix li Yos. Ut laaʼat naq tatsutqʼiiq chaq, taakawresihebʼ laawechpaabʼanel».
33 Tojaʼ naq laj Pedro kixye re: «Qaawaʼ, kawresinbʼilin re naq tinxik saʼ tzʼalam aawochbʼeen ut re naq tinkamq ajwiʼ aawochbʼeen».
34 Abʼan li Jesús kixye re: «Pedro, ninye aawe naq hoon ajwiʼ naq toj maajiʼ nayaabʼak li tzoʼ kaxlan, ak xaaye oxibʼ sut naq inkʼaʼ nakaanaw wu».
35 Kixye ajwiʼ rehebʼ: «Naq xexintaqla chi maakʼaʼ xbʼoolsil eetumin, chi maakʼaʼ eechampa, chi maakʼaʼ eexaabʼ,* peʼyaal naq maakʼaʼ xmajeloʼk cheeru?». «Maakʼaʼ», chankebʼ.
36 Tojaʼ naq aʼan kixye rehebʼ: «Abʼan anaqwan li wank xbʼoolsil xtumin ut xchampa, chixkʼamaq; ut li maakʼaʼ xchʼiichʼ, xkʼayihaq li tʼikr li lanlo wiʼ ut xloqʼaq junaq re.
37 Ninye eere naq tento ttzʼaqloq ru chiwix li tzʼiibʼanbʼil chaq: «Kiʼileʼk joʼ aj maak». Joʼkan naq aʼin yook chi tzʼaqlok chiwix».
38 Tojaʼ naq aʼanebʼ xeʼxye re: «Qaawaʼ, kʼe reetal arin wank wiibʼ li chʼiichʼ». Li Jesús kixye rehebʼ: «Tzʼaqal rikʼin aʼan».
39 Naq li Jesús kiʼelk aran, xkoho saʼ li tzuul Olivo joʼ kʼaynaq chaq xbʼaanunkil, ut kitaqeek xbʼaanebʼ li xtzolom.
40 Naq xeʼwulak saʼ li naʼaj aʼin, kixye rehebʼ: «Kanaqex chi tijok re naq inkʼaʼ textʼaneʼq saʼ li aaleek».
41 Ut li Jesús kinajtoʼk rikʼinebʼ li xtzolom joʼ xnajtil nanaq junaq li pek. Kixwiqʼibʼ ribʼ, kiʼok chi tijok
42 ut kiʼok xyeebʼal: «At Inyuwaʼ, wi nakaawaj, isi chiwu li ukʼlebʼ sekʼ aʼin. Abʼan mibʼaanumank li nawaj laaʼin, chibʼaanumanq bʼan li nakaawaj laaʼat».
43 Tojaʼ naq kichalk saʼ choxa jun li ánjel, kixkʼut ribʼ chiru ut kixkawresi xchʼool.
44 Abʼan qʼaxal kiyotʼeʼk xchʼool ut kaw wiʼ chik kiʼok chi tijok. Ut li xtiqobʼ kisutqʼiik joʼ kikʼ ut natzʼuqluk chiru chʼochʼ.
45 Naq kiraqeʼk chi tijok, kiwakliik ut xkoho bʼarwiʼ wankebʼ li xtzolom. Ut kixtawebʼ chi wark saʼ xkʼabʼaʼ naq lubʼlukebʼ xbʼaan xrahilebʼ xchʼool.
46 Kixye rehebʼ: «Kʼaʼut yookex chi wark? Waklinqex ut meekanabʼ tijok re naq inkʼaʼ textʼaneʼq saʼ li aaleek».
47 Toj yook ajwiʼ chi aatinak naq kichalk li kʼiila tenamit. Ut chiruhebʼ, yook chaq jun rehebʼ li Kabʼlaju, Judas xkʼabʼaʼ, ut kijilok chixkʼatq li Jesús re xtzʼuubʼal ru.
48 Abʼan li Jesús kixye re: «Judas, ma taaqʼaxtesi li Ralal li Winq rikʼin xtzʼuubʼal ru?».
49 Naq li wankebʼ chi xsutam xeʼril li ok re chi kʼulmank, xeʼxpatzʼ re: «Qaawaʼ, ma tqakʼehebʼ chi chʼiichʼ?».
50 Ut jun rehebʼ li winq kixkʼe chi chʼiichʼ li xmoos li xyuwaʼil aj tij ut kixchʼot li xxik li wank saʼ xnim.
51 Naq li Jesús kiril aʼin, kixye: «Moko aajel ta ru naq taabʼaanu aʼin». Ut kixchʼeʼ li xxik li moos ut kixkʼirtasi.
52 Tojaʼ naq, li Jesús kixye rehebʼ li xbʼeenil aj tij, li nekeʼilok re li rochoch li Yos ut ebʼ li cheekel winq li xeʼwulak aran chi xsikʼbʼal: «Ma xexchalk chinchapbʼal rikʼin chʼiichʼ ut cheʼ chanchan tawiʼ laaʼin aj elqʼ?
53 Wulaj wulaj xinwank eerikʼin saʼ rochoch li Yos ut inkʼaʼ xeetaqsi leeruqʼ saʼ inbʼeen. Abʼan aʼin leehoonal ut xhoonalil naq t-awabʼejinq li qʼoqyink».
54 Moqon chik xeʼxchap, xeʼxkʼam ut xeʼroksi saʼ rochoch li xyuwaʼil aj tij, ut laj Pedro chi najt yook chaq xtaqenkilebʼ.
55 Ebʼ aʼan xeʼxtzʼabʼ xxaml saʼ xyi li nebʼaal ut xeʼchunlaak saʼ komonil. Laj Pedro chunchu chaq saʼ xyanqebʼ.
56 Tojaʼ naq jun li moos ixq kiril naq chunchu chire xaml, kikanaak xkaʼyankil ut kixye: «Li winq aʼin yook chaq ajwiʼ chirix li Jesús».
57 Abʼan laj Pedro inkʼaʼ kixkʼulubʼa. Kixye: «At ixq, inkʼaʼ ninnaw ru».
58 Junpaataq chik, kiʼileʼk xbʼaan jun chik li qas qiitzʼin ut kixye re: «Laaʼat ajwiʼ jun rehebʼ aʼan». Abʼan laj Pedro kixye re: «At winq, moko laaʼin ta».
59 Jun hoor tana xnumik, naq jun chik li winq kixye chi chʼolchʼo ru: «Relik chi yaal naq li winq aʼin yook chaq chirix li Jesús. Chʼolchʼo naq aʼan aj Galilea».
60 Abʼan laj Pedro kixye re: «At winq, inkʼaʼ ninnaw li nakaaye». Ut saʼ junpaat kiyaabʼak li tzoʼ kaxlan naq toj yook ajwiʼ chi aatinak laj Pedro.
61 Rikʼin aʼin, li Qaawaʼ kixbʼalqʼusi ribʼ ut kixkaʼya laj Pedro ut laj Pedro kijultikoʼk re li raatin li Qaawaʼ li kixye chaq re: «Hoon ajwiʼ naq toj maajiʼ nayaabʼak li tzoʼ kaxlan, ak xaaye oxibʼ sut naq inkʼaʼ nakaanaw wu».
62 Ut kiʼelk chirix kabʼl, najiqʼjot chi yaabʼak xbʼaan xrahil xchʼool.
63 Joʼkan bʼiʼ, ebʼ li winq li yookebʼ xkʼaakʼalenkil li Jesús xeʼok xseʼenkil ut xsakʼbʼal.
64 Ut naq ak xeʼxtzʼap li xnaqʼ ru, inkʼaʼ nekeʼxkanabʼ xyeebʼal re: «Wi laaʼat propeet, ye qe ani xsakʼok aawe».
65 Ut xeʼok xyeebʼal li inkʼaʼ us chirix.
66 Naq kisaqewk, kixchʼutubʼ ribʼ li chʼuut chi cheekel winq re li tenamit, aʼin naraj xyeebʼal, ebʼ li xbʼeenil laj tij ut ebʼ laj tzʼiibʼ. Ebʼ aʼan xeʼxkʼam li Jesús saʼ li naʼaj bʼarwiʼ wank li Nimla Raqlebʼaal Aatin* rehebʼ laj judiiy ut xeʼxye re:
67 «Ye qe ma laaʼat li Kriist». Li Jesús kixye rehebʼ: «Usta tinye eere moko teepaabʼ ta».
68 Joʼkan ajwiʼ, wi tinbʼaanu eere jun li patzʼom inkʼaʼ tineesume.
69 Abʼan, chalen anaqwan, li Ralal li Winq kʼojkʼooq saʼ xnim ruqʼ li Nimajwal Yos.
70 Naq xeʼrabʼi aʼin, chixjunilebʼ xeʼxye re: «Ma laaʼat ralal li Yos chi joʼkanan?». Li Jesús kixye rehebʼ: «Heeheʼ, laaʼex yookex xyeebʼal naq laaʼin».
71 Ebʼ aʼan xeʼxye re: «Maakʼaʼ chik ajʼe naq teʼchalq jalan chik ebʼ li testiiw. Laaʼo ak xqabʼi li xʼelk chi xtzʼuumal re».
Xtzʼaqobʼ ebʼ li naʼlebʼ
^ Taawil xchʼolobʼankil li aatin, Ninqʼe chirix li Kaxlanwa li Maakʼaʼ Xchʼamal.
^ Li tumin aʼin yiibʼanbʼil rikʼin chʼiichʼ, plaat xkʼabʼaʼ.
^ Taawil xchʼolobʼankil li aatin, Ninqʼe chirix li Kaxlanwa li Maakʼaʼ Xchʼamal.
^ Malaj «li nachunlaak saʼ meex».
^ Malaj «eeperxaabʼ».
^ Malaj «saʼ li Sanedrín».
