Lucas 24:1-53
24 Saʼ li xbʼeen kutan re li xamaan, toj eqʼla naq ebʼ li ixq xkohebʼ saʼ li muqlebʼaal kamenaq. Ut xeʼxkʼam li sununkil bʼan li ak kawresinbʼil xbʼaanebʼ.
2 Abʼan xeʼxkʼe reetal naq ak tolkʼosinbʼil chik li pek li wank chire li muqlebʼaal kamenaq,
3 ut naq xeʼok chisaʼ inkʼaʼ xeʼxtaw li xtibʼel li Qaawaʼ Jesús.
4 Naq ebʼ li ixq qʼaxal yookebʼ xkʼaʼuxl chirix aʼin, kutamil chixkʼatqebʼ wiibʼ li winq li nalemtzʼunk li xtʼikrebʼ.
5 Ebʼ aʼan xeʼxuwak ut xeʼok chi ilok chiru chʼochʼ. Joʼkan naq ebʼ li winq xeʼxye rehebʼ: «Kʼaʼut yookex xsikʼbʼal saʼ xyanqebʼ li kamenaq li ak xwaklesiik chi yoʼyo?».
6 Maaʼani chik arin: ak xwaklesiik chi yoʼyo. Jultikoʼq eere li kixye naq toj wank chaq Galilea.
7 Kixye eere naq li Ralal li Winq tento tqʼaxtesiiq saʼ ruqʼebʼ laj maak ut ttʼuyubʼaaq chiru cheʼ, abʼan saʼ rox kutan tento twaklesiiq chi yoʼyo.
8 Aran xeʼjultikoʼk rehebʼ li raatin li Jesús.
9 Tojaʼ naq xeʼelk saʼ li muqlebʼaal kamenaq ut xkohebʼ xyeebʼal chixjunil li kikʼulmank rehebʼ li Junlaju ut rehebʼ li junchʼol.
10 Ebʼ li ixq aʼin aʼan li xMaría Magdalena, li xJuana ut li xMaría, xnaʼ laj Santiago. Ut jalanebʼ chik li ixq li wankebʼ rochbʼeen xeʼxseeraqʼi rehebʼ li apóstol li kikʼulmank.
11 Abʼanan, chiruhebʼ li winq maakʼaʼ xyaalal ebʼ li raatin li ixq ut inkʼaʼ xeʼxpaabʼ rehebʼ.
12 Abʼan laj Pedro kiwakliik ut xkoho saʼ aanil saʼ li muqlebʼaal kamenaq ut naq kixkʼutzubʼ ribʼ chi ilok, kiril li tʼikr re liin li xeʼxbʼat wiʼ li Jesús. Ut naq xkoho yook xkʼoxlankil kʼaru tawiʼ xkʼulmank.
13 Saʼ li kutan ajwiʼ aʼan, wiibʼ rehebʼ li tzolom yookebʼ chi xik saʼ jun li kʼalebʼaal li naxkʼabʼaʼi Emaús, li wank tana junlaju kilómetro* xnajtil rikʼin Jerusalén.
14 Yookebʼ chi aatinak chiribʼilebʼ ribʼ chirix chixjunil li kikʼulmank.
15 Naq yookebʼ chiru bʼe ut yookebʼ chi aatinak chirix aʼin, li Jesús kinachʼok rikʼinebʼ ut kiʼok chi bʼeek rochbʼeenebʼ
16 abʼan inkʼaʼ xeʼxkʼe reetal naq aʼan.
17 Li Jesús kixpatzʼ rehebʼ: «Chirix kʼaru yookex chaq xchoqinkil eeribʼ saʼ bʼe?». Ebʼ li xtzolom xeʼxaqliik ut nakʼutunk chiruhebʼ naq rahebʼ saʼ xchʼool.
18 Ut li nakʼabʼaʼiik Cleopas kixye re: «Ma jalan laatenamit ut aajunes aran Jerusalén joʼkan naq inkʼaʼ xaawabʼi li kikʼulmank aran saʼebʼ li kutan aʼin?».
19 Aʼan kixpatzʼ rehebʼ: «Kʼaru kikʼulmank?». Ebʼ aʼan xeʼxye re: «Li kikʼulmank rikʼin li Jesús laj Nazaret. Li winq aʼin kixkʼutbʼesi rikʼin raatin ut xbʼaanuhom chiru li Yos ut chiruhebʼ li qas qiitzʼin naq aʼan jun li propeet li nim xwankil.
20 Ebʼ li xbʼeenil aj tij ut ebʼ laj jolominel xeʼxqʼaxtesi re naq tkamsiiq ut ttʼuyubʼaaq chiru cheʼ.
21 Abʼan laaʼo xqoybʼeni naq aʼan tixkolebʼ laj Israel. Ut moko kaʼaj tawiʼ aʼin, ak oxibʼ kutan chik xkʼulbʼal chixjunil aʼin.
22 Joʼkan ajwiʼ, kisach qachʼool xbʼaan wiibʼ oxibʼ li ixq li wankebʼ saʼ qayanq. Ebʼ aʼan xeʼwulak eqʼla saʼ li muqlebʼaal kamenaq
23 ut naq inkʼaʼ xeʼxtaw li xtibʼel li Jesús, xeʼchalk chi xyeebʼal qe naq xeʼril wiibʼ oxibʼ li ánjel li xeʼxye naq yoʼyo.
24 Tojaʼ naq wiibʼ oxibʼ li wankebʼ qochbʼeen xkohebʼ saʼ li muqlebʼaal kamenaq ut maakʼaʼ xeʼxtaw chisaʼ joʼ xeʼxye li ixq. Abʼan inkʼaʼ xeʼril ru li Jesús».
25 Ut aʼan kixye rehebʼ: «Tik maakʼaʼ eenaʼlebʼ ut elajik nekeepaabʼ li xeʼxye chaq ebʼ li propeet.
26 Ma inkʼaʼ tabʼiʼ tento tixkʼul chixjunil li rahilal aʼin li Kriist re naq tixtaw xloqʼal?».
27 Ut kiʼok xchʼolobʼankil chiruhebʼ chixjunil li kiyeemank chaq chirix saʼ li Raatin li Yos joʼ li kixye chaq laj Moisés ut ebʼ li Propeet.
28 Tojaʼ naq xeʼnachʼok saʼ li kʼalebʼaal bʼarwiʼ yookebʼ chi xik, ut li Jesús kixbʼaanu ribʼ naq qʼaxal najt yook chi xik.
29 Abʼan xeʼrelaji ru re naq tkanaaq ut xeʼok xyeebʼal re: «Kanaqat qikʼin, ak xʼewuuk chik ut yook chi qʼoqyinoʼk». Joʼkan naq kiʼok ut kikanaak rikʼinebʼ.
30 Ut naq yook chi waʼak* rikʼinebʼ, kixchap li kaxlanwa, kitijok, kixjachi ut kiʼok xkʼebʼal rehebʼ.
31 Toj aran xeʼxtaw ru ani aʼan ut xeʼxnaw ru, abʼan sachamil li Jesús chiruhebʼ.
32 Ut xeʼok xyeebʼal chiribʼilebʼ ribʼ: «Ma inkʼaʼ tabʼiʼ naxamnak saʼ li qachʼool naq yook chaq qaatinankil saʼ bʼe ut yook xchʼolobʼankil chiqu chi tzʼaqal re ru li Raatin li Yos?».
33 Saʼ li hoonal ajwiʼ aʼan, xeʼwakliik ut xeʼsutqʼiik Jerusalén, bʼarwiʼ xeʼril ru li Junlaju ut li chʼutchʼukebʼ rikʼinebʼ,
34 li xeʼxye: «Relik chi yaal naq li Qaawaʼ ak xwaklesiik chi yoʼyo ut kixkʼut ribʼ chiru laj Simón!».
35 Tojaʼ naq xeʼxseeraqʼi li xeʼxkʼul saʼ bʼe ut chanru xeʼxnaw ru naq kixjachi li kaxlanwa.
36 Toj yookebʼ ajwiʼ chi aatinak chirix aʼin naq kutamil li Jesús saʼ xyanqebʼ ut kixye rehebʼ: «Nawoybʼeni naq us wankex».*
37 Kʼajoʼ xeʼxuwak xbʼaan naq xeʼxkʼoxla naq yookebʼ rilbʼal jun li musiqʼej.
38 Joʼkan naq aʼan kixye rehebʼ: «Kʼaʼut yook eekʼaʼuxl? Kʼaʼut xwiibʼank ru leechʼool?
39 Laaʼin, ilomaq li wuqʼ ut li woq. Chʼeʼomaqin ut teekʼe reetal naq wank intibʼel ut inbʼaqel abʼan li musiqʼej maakʼaʼ xtibʼel ut xbʼaqel».
40 Naq kixye aʼin, kixkʼut chiruhebʼ li ruqʼ ut li roq.
41 Saʼ xkʼabʼaʼ naq sachsokebʼ xchʼool ut sahebʼ saʼ xchʼool kichʼaʼajkoʼk chiruhebʼ xpaabʼankil li yookebʼ rilbʼal. Tojaʼ naq, li Jesús kixpatzʼ rehebʼ: «Ma wank bʼayaq eewa?».
42 Ebʼ aʼan xeʼxkʼe re jun peraas li pombʼil kar.
43 Kixkʼul ut kixwaʼ chiruhebʼ.
44 Moqon chik kixye rehebʼ: «Aʼin ebʼ li aatin li xinye chaq eere naq toj wankin eerikʼin: chixjunil li tzʼiibʼanbʼil chiwix saʼ Xchaqʼrabʼ laj Moisés, saʼ xhuhebʼ li propeet ut saʼebʼ li hu Salmo tento ttzʼaqloq ru».
45 Tojaʼ naq kixte li xkʼaʼuxebʼ re naq teʼxtaw ru xyaalal li Raatin li Yos
46 ut kixye rehebʼ: «Aʼin li tzʼiibʼanbʼil chaq: naq li Kriist trahobʼtesiiq ut saʼ rox kutan twaklesiiq chi yoʼyo saʼ xyanqebʼ li kamenaq
47 ut naq saʼ xkʼabʼaʼ tyeemanq resil chalen Jerusalén toj saʼ chixjunil li tenamit naq ebʼ li qas qiitzʼin tento teʼxyotʼ xchʼool ut teʼxjal xnaʼlebʼ re naq tkuymanq xmaakebʼ.
48 Laaʼex tento teekʼe chi naweʼk chixjunil aʼin.
49 Ut cheenawaq naq tintaqla saʼ eebʼeen li kixyeechiʼi Linyuwaʼ. Abʼan kanaqex wank saʼ li tenamit toj reetal naq teekʼul li wankilal li nachalk taqeʼq».
50 Tojaʼ naq kixkʼamebʼ chirix li tenamit toj Betania, ut kixtaqsi li ruqʼ re rosobʼtesinkilebʼ.
51 Naq yook rosobʼtesinkilebʼ, kinajtoʼk rikʼinebʼ ut kikʼameʼk saʼ choxa.
52 Ebʼ aʼan xeʼxwiqʼibʼ ribʼ chiru ut xeʼsutqʼiik Jerusalén chi kʼajoʼ xsahilebʼ xchʼool.
53 Ut junelik wankebʼ chaq saʼ rochoch li Yos re xnimankil ru.
Xtzʼaqobʼ ebʼ li naʼlebʼ
^ Malaj «hiil», «leew».
^ Malaj «chʼunchu saʼ meex».
^ Saʼ griego «Chiwanq li tuqtuukilal eerikʼin». Aʼin nekeʼxye chaq ebʼ laj judiiy naq nekeʼxkʼe xsahilebʼ xchʼool chiribʼilebʼ ribʼ.
