Lucas 5:1-39
5 Saʼ jun kutan, li Jesús xaqxo chaq chire li palaw Genesaret* ut li kʼiila tenamit xeʼxpoqoqi ribʼ chi xsutam re rabʼinkil li raatin li Yos.
2 Aʼan kiril wiibʼ li jukubʼ* chire li palaw. Ebʼ laj kar moko wankebʼ ta chik chisaʼ ut yookebʼ xchʼajbʼal ebʼ li xʼataraay.*
3 Li Jesús kitaqeʼk saʼ jun rehebʼ li jukubʼ* ut kixye re laj Simón, laj echal re li jukubʼ,* naq tixnajtobʼresi bʼayaq chire li palaw. Tojaʼ naq kichunlaak ut kiʼok xtzolbʼal li kʼiila tenamit.
4 Naq kiraqeʼk chi aatinak, kixye re laj Simón: «Jilosi laajukubʼ* saʼ xchamal li palaw ut kutumaq aran leeʼataraay* re naq texkarabʼq».
5 Abʼan laj Simón kixye re: «At Kʼutunel, xookarabʼk chiru jun qʼoqyink ut maakʼaʼ xqataw; abʼan, tinkut li ataraay* xbʼaan naq laaʼat yookat xyeebʼal».
6 Ut naq xeʼxbʼaanu, naabʼal li kar xeʼxchap, numtajenaq wiʼ chik joʼkan naq kiʼok chi pejeʼk ebʼ li ataraay.*
7 Joʼkan naq xeʼxkʼut li ruqʼ chiruhebʼ li rechkarinel li wankebʼ saʼ li jun chik jukubʼ* re naq teʼxik chi xtenqʼankilebʼ. Naq xeʼwulak, xeʼxnujtesi li wiibʼ chi jukubʼ.* Ut saʼ xkʼabʼaʼ naq xeʼnujak, xeʼok chi subʼeʼk!
8 Naq kiril aʼin, laj Simón Pedro kixkut ribʼ chi roq li Jesús ut kixye re: «Moko inkʼulubʼ ta wank chaakʼatq, at Qaawaʼ xbʼaan naq laaʼin aj maak».
9 Sachso tzʼaqal xchʼool kikanaak laj Pedro joʼ ajwiʼ ebʼ li rochbʼeen xbʼaan chixjunil li kar li xeʼxchap,
10 joʼkan ajwiʼ kixkʼul laj Santiago ut laj Juan, ebʼ li ralal laj Zebedeo, li nekeʼkʼanjelak rochbʼeen laj Simón. Abʼan li Jesús kixye re laj Simón: «Matxuwak chik. Chalen anaqwan taasikʼebʼ li kristiʼaan joʼ naq nakaasikʼebʼ li kar».
11 Joʼkan bʼiʼ, naq ak xeʼxsutqʼisi li jukubʼ* chire li palaw, xeʼxkanabʼ chixjunil ut xeʼxtaqe.
12 Saʼ jun chik kutan, naq li Jesús wank chaq saʼ jun rehebʼ li tenamit, kiwulak jun li winq li nujenaq chi saqlep. Ut naq kiril ru li Jesús, kixkʼutzʼubʼ ribʼ chiru chʼochʼ ut kiʼok xtzʼaamankil re: «At Qaawaʼ, laaʼin ninnaw naq wi nakaawaj tatruuq inkʼirtasinkil».
13 Joʼkan naq li Jesús kixyeʼ li ruqʼ, kixchʼeʼ ut kixye re: «Nawaj naq tatkʼiraaq». Ut saʼ junpaat kiʼelk li saqlep chirix.
14 Tojaʼ naq chi chʼolchʼo ru kixye re li winq naq maaʼani ajʼe tixseeraqʼi. Ut kixye ajwiʼ re: «Abʼan, tento tatxik rikʼin laj tij ut taakʼam li mayej li kixye laj Moisés joʼ reetalil chiruhebʼ naq xatkʼiraak».
15 Usta joʼkan, yalaq bʼar kinawmank li yook xbʼaanunkil li Jesús ut kʼajoʼ xkʼihal li qas qiitzʼin nekeʼxchʼutubʼ ribʼ re rabʼinkil ut re naq teʼkʼirtasiiq.
16 Abʼan li Jesús rajlal naxik chi tijok saʼebʼ li naʼaj li najt wankebʼ.
17 Saʼ jun rehebʼ li kutan aʼan, naq yook chaq chi kʼutuk saʼ jun li ochoch, chunchukebʼ chaq aran wiibʼ oxibʼ aj pariseey ut aj nawonel Chaqʼrabʼ. Chalenaqebʼ saʼ chixjunil li kʼalebʼaal re Galilea ut Judea, joʼ ajwiʼ re Jerusalén. Ut li xwankil li Jehobʼa* wank saʼ xbʼeen re naq truuq chi kʼirtasink.
18 Tojaʼ naq xeʼwulak wiibʼ oxibʼ li winq xeʼxpaqo chaq chiru chʼaat jun li sik, ut yookebʼ chaq xkʼebʼal xqʼe re roksinkil saʼ ochoch ut xkʼebʼal chiru li Jesús.
19 Abʼan, saʼ xkʼabʼaʼ naq kʼajoʼ xkʼihal li tenamit, inkʼaʼ nekeʼxtaw chanru teʼroksi li yaj. Joʼkan naq, xeʼtaqeʼk saʼ xbʼeen li kabʼl* ut xeʼrisi wiibʼ oxibʼ li teex ut aran xeʼxkubʼsi li yaj rikʼin li xchʼaat saʼ xyiihebʼ li qas qiitzʼin chiru li Jesús.
20 Naq li Jesús kiril naq wankebʼ xpaabʼal chirix li Yos, kixye re li sik: «Wamiiw, kuybʼil sachbʼil chik laamaak».
21 Tojaʼ naq ebʼ laj tzʼiibʼ ut ebʼ laj pariseey xeʼok xyeebʼal saʼebʼ li xchʼool: «Ani li winq aʼin li yook xyeebʼal li inkʼaʼ us chirix li Yos? Maaʼani naru nakuyuk maak, kaʼajwiʼ li Yos».
22 Abʼan li Jesús kixkʼe reetal li yookebʼ xkʼoxlankil joʼkan naq kixye rehebʼ: «Kʼaru yookex xkʼoxlankil?
23 Kʼaru sa xyeebʼal “kuybʼil sachbʼil laamaak” malaj xyeebʼal “waklin ut bʼeen”?
24 Abʼan, re naq teekʼe reetal naq li Ralal li Winq wank xwankil saʼ ruuchichʼochʼ re kuyuk ut sachok maak...». Ut kixkaʼya li sik ut kixye re: «Laaʼin ninye aawe: waklin, xok laachʼaat ut ayu saʼ laawochoch».
25 Joʼkan naq, chiru chixjunilebʼ li qas qiitzʼin, li winq kixaqli, kixxok li xchʼaat ut yook xkʼebʼal xloqʼal li Yos naq xkoho saʼ rochoch.
26 Ut chixjunilebʼ xeʼsach xchʼool ut xeʼok xkʼebʼal xloqʼal li Yos. Sachsokebʼ tzʼaqal xchʼool xeʼkanaak ut xeʼok xyeebʼal: «Anaqwan xqil li maajunwa qilom!».
27 Naq ak xkʼulmank aʼin, li Jesús kiʼelk aran ut kiril laj Leví jun li winq li naxchʼutubʼ li toj choʼq re li awabʼej. Li winq aʼin chunchu saʼ li ochoch bʼarwiʼ nekeʼxchʼutubʼ li toj choʼq re li awabʼej, ut kixye re: «Taaqehin».
28 Ut laj Leví kixkanabʼ chixjunil, kiwakliik ut kiʼok xtaqenkil.
29 Chirix chik aʼan laj Leví kixkʼubʼ jun li nimla waʼak re xkʼulbʼal li Jesús saʼ rochoch. Ut aran wankebʼ ajwiʼ naabʼalebʼ li winq li nekeʼxchʼutubʼ li toj choʼq re li awabʼej ut jalanebʼ chik li qas qiitzʼin li yookebʼ chi waʼak,* rochbʼeenebʼ.
30 Joʼkan naq ebʼ laj pariseey ut ebʼ laj tzʼiibʼ li nekeʼtzʼaqonk chirixebʼ xeʼok xwechʼbʼal rix ebʼ li xtzolom li Jesús: «Kʼaʼut nekexwaʼak ut nekexʼukʼaʼk rikʼinebʼ li nekeʼxchʼutubʼ li toj choʼq re li awabʼej ut ebʼ laj maak?».
31 Naq kiril aʼin, li Jesús kixye rehebʼ: «Li kawebʼ inkʼaʼ nekeʼraj aj bʼanonel abʼan ebʼ li yaj nekeʼajok re.
32 Inkʼaʼ xinchalk chi xbʼoqbʼalebʼ li tiikebʼ xchʼool, xinchalk bʼan chi xbʼoqbʼalebʼ laj maak re naq teʼxyotʼ xchʼool ut teʼxjal xnaʼlebʼ».
33 Ebʼ aʼan xeʼxye re: «Ebʼ li xtzolom laj Juan rajlal nekeʼayuunik* ut nekeʼtzʼaamank, ut joʼkan ajwiʼ nekeʼxbʼaanu ebʼ li xtzolom laj pariseey. Abʼan ebʼ laatzolom nekeʼwaʼak ut nekeʼukʼak».
34 Abʼan li Jesús kixye rehebʼ: «Peʼyaal naq laaʼex inkʼaʼ texruuq xbʼaanunkil naq ebʼ li ramiiw li winq li ok re chi sumlaak teʼayuuniq* naq toj wanq rikʼinebʼ li winq li ok re chi sumlaak?
35 Abʼan twulaq xkutankil naq teʼmaqʼeʼq chiru li winq li ok re chi sumlaak ut toj saʼ li kutan aʼan teʼayuuniq».*
36 Kixkʼe ajwiʼ rehebʼ jun chik li eetalil:* «Maaʼani naxset jun peraas li akʼil tʼikr re xbʼojbʼal chiru li qʼeel tʼikr. Wi junaq tixbʼaanu raj aʼin, li akʼil tʼikr tixjis li qʼeel tʼikr. Li akʼ tʼikr inkʼaʼ tixkʼul ribʼ rikʼin li qʼeel tʼikr.
37 Joʼkan ajwiʼ, maaʼani naxkʼe li akʼ bʼiin saʼ qʼeel tzʼuum. Wi tbʼaanumanq raj, li akʼ bʼiin tixpukʼ li tzʼuum ut thoyeʼq li bʼiin, ut li tzʼuum maakʼaʼ chik teʼoq wiʼ.
38 Joʼkan naq li akʼ bʼiin tento xkʼebʼal saʼ akʼil tzʼuum.
39 Naq junaq li qas qiitzʼin ak xyal li najteril bʼiin, inkʼaʼ chik traj li akʼ bʼiin, ut tixye: “Chaabʼil li najteril bʼiin”».
Xtzʼaqobʼ ebʼ li naʼlebʼ
^ Aʼin naraj xyeebʼal, li palaw re Galilea.
^ Malaj «li kayuuk».
^ Malaj «ebʼ li xyooy».
^ Malaj «li kayuuk».
^ Malaj «li kayuuk».
^ Malaj «laakayuuk».
^ Malaj «leeyooy».
^ Malaj «li yooy».
^ Malaj «ebʼ li yooy».
^ Malaj «kayuuk».
^ Malaj «chi kayuuk».
^ Malaj «li kayuuk».
^ Taawil xchʼolobʼankil li aatin, Jehobʼa.
^ Li xkʼihalil ebʼ li ochoch kiyiibʼamank chi tachʼto xbʼeen re xbʼaanunkil jalan jalanq li kʼanjel.
^ Malaj «li chunchukebʼ saʼ meex».
^ Malaj «nekeʼxkanabʼ waʼak chiru jarubʼaq kutan».
^ Malaj «teʼxkanabʼ waʼak chiru jarubʼaq kutan».
^ Malaj «teʼxkanabʼ waʼak chiru jarubʼaq kutan».
^ Malaj «li jaljokil ru aatin».
