Lucas 6:1-49
-
Li Jesús aʼan «li Qaawaʼ re li sábado» (1-5)
-
Naxkʼirtasi li ruqʼ jun li winq li inkʼaʼ naʼekʼank li ruqʼ (6-11)
-
Li kabʼlaju chi apóstol (12-16)
-
Li Jesús nakʼutuk ut naxkʼirtasi ebʼ li qas qiitzʼin (17-19)
-
Ebʼ li sahil chʼoolejil ut ebʼ li rahilal (20-26)
-
Xraabʼalebʼ li xikʼ nekeʼilok (27-36)
-
Teekanabʼ raqok aatin saʼ xbʼeenebʼ li junchʼol (37-42)
-
Li cheʼ nanaweʼk ru xbʼaan li naruuchi (43-45)
-
Li ochoch li yiibʼanbʼil chiʼus ut li ochoch li maakʼaʼ rubʼelankil (46-49)
6 Joʼkan utan, saʼ jun li sábado,* li Jesús yook chi numeʼk saʼ xyanq li awimq, ut ebʼ li xtzolom xeʼok xchʼoqbʼal wiibʼ oxibʼ ru li awimq, nekeʼxmuchʼi saʼ ruqʼ ut nekeʼxwaʼ.
2 Joʼkan naq, wankebʼ laj pariseey xeʼxye rehebʼ: «Kʼaʼut yookex xbʼaanunkil saʼ sábado* li moko kʼulubʼanbʼil ta saʼ li chaqʼrabʼ?».
3 Abʼan li Jesús kixye rehebʼ: «Ma inkʼaʼ eerilom saʼ li Raatin li Yos li kixbʼaanu laj David naq aʼan ut ebʼ li xmoos yookebʼ chaq xtzʼokajik?
4 Ma inkʼaʼ tabʼiʼ kiʼok laj David saʼ rochoch li Yos, kixkʼul li kaxlanwa li yeechiʼinbʼil chiru li Yos,* kixwaʼ ut kixwotz rikʼinebʼ li xmoos? Maaʼani kʼebʼil xleseens chi xwaʼbʼal li kaxlanwa, kaʼajwiʼ ebʼ laj tij».
5 Tojaʼ naq kixye rehebʼ: «Li Ralal li Winq aʼan li Qaawaʼ re li sábado».*
6 Saʼ jun chik li sábado,* kiʼok li Jesús saʼ jun li naʼaj re loqʼonink ut kiʼok chi kʼutuk. Ut aran wank jun li winq li inkʼaʼ naʼekʼank li xnim ruqʼ.
7 Ebʼ laj tzʼiibʼ ut ebʼ laj pariseey inkʼaʼ nekeʼxkanabʼ xkaʼyankil li Jesús re rilbʼal ma tixkʼirtasi li winq saʼ sábado* ut chi joʼkan teʼxtaw chirix kʼaru teʼxqʼabʼa wiʼ.
8 Saʼ xkʼabʼaʼ naq li Jesús naxnaw li yookebʼ xkʼoxlankil, kixye re li winq li inkʼaʼ naʼekʼank li ruqʼ: «Waklin ut xaqlin arin saʼ xyi». Kiwakliik li winq ut kikanaak aran chi xaqxo.
9 Tojaʼ naq li Jesús kixye rehebʼ: «Tinbʼaanu eere jun li patzʼom. Kʼaru us xbʼaanunkil saʼ sábado?* Ma xbʼaanunkil li us, malaj li inkʼaʼ us? Ma xkolbʼal xyuʼam junaq li qas qiitzʼin, malaj xkamsinkil?».
10 Naq ak kirilebʼ li wankebʼ chi xsutam, kixye re li winq: «Yeʼ laawuqʼ». Naq kixbʼaanu, kikʼiraak li ruqʼ.
11 Saʼ xkʼabʼaʼ naq kʼajoʼebʼ xjosqʼil, xeʼok xyeebʼal chiribʼilebʼ ribʼ kʼaru teʼruuq xbʼaanunkil re li Jesús.
12 Saʼ jun rehebʼ li kutan aʼan, li Jesús xkoho saʼ li tzuul chi tijok, aran kixnumsi li qʼoqyink chi tijok.
13 Naq kisaqewk, kixbʼoqebʼ li xtzolom ut kixsikʼ kabʼlaju saʼ xyanqebʼ li kixkʼabʼaʼihebʼ choʼq apóstol:
14 laj Simón (li kixkʼabʼaʼi ajwiʼ joʼ aj Pedro) ut li jun chik laj Andrés, ebʼ li winq aʼin riitzʼinebʼ ribʼ. Laj Santiago, laj Juan, laj Felipe ut laj Bartolomé;
15 laj Mateo, laj Tomás, laj Santiago ralal laj Alfeo, laj Simón, li naxbʼaanu chixjunil chi anchal xchʼool,
16 laj Judas* ralal laj Santiago ut laj Judas Iscariote (li kixqʼaxtesi li Jesús moqon).
17 Chirix chik aʼan kikubʼeek rochbʼeenebʼ ut kixaqli saʼ jun li naʼaj li helho ru. Saʼ li naʼaj aʼan wankebʼ naabʼal rehebʼ li xtzolom joʼ ajwiʼ li kʼiila tenamit re chixjunil Judea, Jerusalén ut li wankebʼ chire li palaw re Tiro ut Sidón. Chixjunilebʼ aʼin xeʼchalk chi abʼink ut chi kʼirtasiik.
18 Xeʼkʼiraak ajwiʼ li rahobʼtesinbʼilebʼ xbʼaanebʼ li maaʼus aj musiqʼej.
19 Ut ebʼ li kʼiila tenamit nekeʼxyal xchʼeʼbʼal xbʼaan naq rikʼin naʼelk chaq li wankilal li nakʼirtasink re chixjunilebʼ.
20 Tojaʼ naq kixtaqsi li rilobʼaal, kirilebʼ li nekeʼtaqenk re ut kixye:
«Sa saʼ leechʼool laaʼex li nebʼaʼ xbʼaan naq eere li Xʼawabʼejilal li choxa.
21 »Sa saʼ leechʼool laaʼex li nekextzʼoka anaqwan xbʼaan naq tkʼojlaaq leechʼool.
»Sa saʼ leechʼool laaʼex li nekexyaabʼak anaqwan xbʼaan naq moqon teetaw li sahil chʼoolejil.
22 »Sa saʼ leechʼool wi saʼ xkʼabʼaʼ li Ralal li Winq xikʼ texʼileʼq, texʼisiiq saʼ xyanqebʼ li junchʼol, texhobʼeʼq ut ttzʼajniiq leekʼabʼaʼ.
23 Naq tkʼulmanq aʼin sahaq saʼ leechʼool ut texpiskʼoq xbʼaan xsahil leechʼool xbʼaan naq nim leerosobʼtesinkil saʼ choxa xbʼaan naq joʼkan ajwiʼ xeʼbʼaanuuk rehebʼ li propeet xbʼaanebʼ li rech-alal li xeʼwank chaq junxil.
24 »Abʼan ra tchalq saʼ eebʼeen laaʼex li bʼihom xbʼaan naq ak xeekʼul chik xkʼojobʼankil eechʼool.
25 »Ra tchalq saʼ eebʼeen laaʼex li nakʼojlaak leechʼool anaqwan xbʼaan naq teekuy eesaʼ.
»Ra tchalq saʼ eebʼeen, laaʼex li nekexseʼek anaqwan xbʼaan naq tyotʼeʼq leechʼool ut texyaabʼaq!
26 »Ra tchalq saʼ eebʼeen naq chixjunilebʼ us teʼaatinaq cheerix xbʼaan naq joʼkan ajwiʼ xeʼbʼaanuuk rehebʼ li bʼalaqʼil propeet xbʼaanebʼ li rech-alal li xeʼwank chaq junxil.
27 »Abʼan laaʼex, li nekexʼabʼink we, ninye eere naq meekanabʼ xraabʼal li xikʼ nekeʼilok eere, junelik sa teeril li inkʼaʼ sa nekexril,
28 meekanabʼ xtzʼaamankil li us chirixebʼ li nekeʼxpatzʼ li inkʼaʼ us saʼ eebʼeen ut meekanabʼ tijok chirixebʼ li nekeʼhobʼok eere.
29 Wi junaq li qas qiitzʼin tixtzʼaj chi ruqʼ xkʼatk aawe,* bʼalqʼusi laajolom re naq tixtzʼaj ajwiʼ chi ruqʼ li junpakʼal. Ut wi junaq li qas qiitzʼin naxmaqʼ li tʼikr li lanlokat wiʼ kʼe ajwiʼ re laajut-aqʼ.
30 Li naxpatzʼ xtenqʼankil aawe, tenqʼa. Ut li naxmaqʼ li kʼaru aawe, maapatzʼ chik re, naq tixqʼaxtesi aawe.
31 »Bʼaanumaq ajwiʼ rehebʼ li junchʼol li teeraj naq tbʼaanumanq eere.
32 »Wi nekeera kaʼajwiʼ li nekeʼrahok eere, kʼaru rusilal teetaw? Xbʼaan naq ebʼ laj maak nekeʼxra ajwiʼ li nekeʼrahok rehebʼ.
33 Wi sa nekeeril li sa nekeʼilok eere, kʼaru rusilal teetaw? Joʼkan ajwiʼ nekeʼxbʼaanu ebʼ laj maak.
34 Ut wi nekeekʼe xtoʼ* junaq li qas qiitzʼin li nekeekʼoxla naq tixqʼaxtesi wiʼ chik eere, kʼaru rusilal teetaw? Ebʼ laj maak nekeʼxkʼe ajwiʼ xtoʼ li rechmaakil re naq teʼxkʼul wiʼ chik reqaj.
35 Abʼan, laaʼex meekanabʼ xraabʼal li xikʼ nekeʼilok eere, meekanabʼ xbʼaanunkil li us. Ut naq rajlal textoʼoninq, meeroybʼeni naq tqʼaxtesimanq wiʼ chik eere. Wi joʼkan nekeebʼaanu, nimaq leeqʼajkamunkil ut laʼaqex ralal xkʼajol li Nimajwal Yos xbʼaan naq aʼan chaabʼil rikʼinebʼ li inkʼaʼ nekeʼbʼanyoxink ut maaʼusebʼ xnaʼlebʼ.
36 Meekanabʼ uxtaanank u* joʼ naq Leeyuwaʼ naʼuxtaanank u.*
37 »Kanabʼomaq raqok aatin saʼ xbʼeenebʼ li junchʼol ut chi joʼkan li Yos inkʼaʼ traqoq aatin saʼ eebʼeen. Kanabʼomaq xyeebʼal naq ebʼ li junchʼol teʼxtoj xmaak re naq inkʼaʼ tyeemanq naq laaʼex tento teetoj eemaak. Meekanabʼ kuyuk maak re naq tkuymanq eemaak.
38 Meekanabʼ kʼehok ut tkʼemanq eere. Kʼajoʼaq xkʼihal teʼxkʼe chiru leeraqʼ, tnatʼmanq chiʼus, tchiqʼmanq ut kʼajoʼaq xbʼuyulal. Xbʼaan naq li bʼislebʼ li teeroksi rikʼinebʼ li junchʼol aʼan li t-oksimanq eerikʼin».
39 Tojaʼ naq kixkʼe li eetalil* aʼin: «Peʼyaal naq jun li mutzʼ inkʼaʼ naru naxkʼut xbʼe jun chik li mutzʼ? Peʼyaal naq saʼ kabʼichal teʼtʼaneʼq saʼ jul?
40 Li toj yook chi tzolok inkʼaʼ naxqʼax xwankil laj kʼutul re, abʼan li tzolbʼilaq chiʼus tixtaw xwankil laj kʼutul re.
41 Kʼaʼut nakaawil li kʼaj cheʼ li wank saʼ ru laawas aawiitzʼin* abʼan inkʼaʼ nakaakʼe reetal li tzʼambʼa li wank saʼ laawu?
42 Chanru nakatruuk xyeebʼal re laawas aawiitzʼin,* “Wisihaq li kʼaj cheʼ li wank saʼ laawu”, ut laaʼat inkʼaʼ nakaawil li tzʼambʼa li wank saʼ laawu? At aj kaʼpakʼal u! Xbʼeenwa isi li tzʼambʼa li wank saʼ laawu, tojaʼ naq tatruuq rilbʼal chiʼus chanru taawisi li kʼaj cheʼ li wank saʼ ru laawas aawiitzʼin.*
43 »Li chaabʼil cheʼ moko qʼajenaq ta li naruuchi, ut li qʼumet cheʼ moko chaabʼil ta li naruuchi.
44 Xbʼaan naq li junjunq chi cheʼ nanaweʼk ru xbʼaan li naruuchi. Jun eetalil, inkʼaʼ naxokmank ebʼ li iig saʼebʼ li kʼix chi moko nayokʼmank ebʼ li uubʼ saʼebʼ li cheʼ kachʼin xteram.
45 Li chaabʼil winq naʼaatinak chirix li chaabʼil naʼlebʼ xbʼaan naq chaabʼil li wank saʼ xchʼool. Abʼan li winq li maaʼus xnaʼlebʼ naʼaatinak chirix li inkʼaʼ us xbʼaan naq wank maaʼusilal saʼ xchʼool. Li naʼelk saʼ re, aʼan li wank saʼ xchʼool.
46 »Joʼkan naq, kʼaʼut nekeeye we “Qaawaʼ! Qaawaʼ!” abʼan inkʼaʼ nekeebʼaanu li ninye?
47 Tinkʼut cheeru rikʼin ani najuntaqʼeetamank li winq li nachalk wikʼin, narabʼi li waatin ut naxyuʼami.
48 Chanchan li winq li kixyiibʼ jun li ochoch. Cham kixbʼek li jul ut saʼ pek kixkʼe li rubʼelankil. Ut naq kichalk li bʼut, li nimaʼ kixpikʼa ribʼ chiru li ochoch, abʼan inkʼaʼ kixtʼan xbʼaan naq yiibʼanbʼil chiʼus.
49 Joʼkan ajwiʼ, li narabʼi li waatin ut inkʼaʼ naxyuʼami li ninye, chanchan li winq li kixyiibʼ jun li ochoch chi maakʼaʼ rubʼelankil. Li nimaʼ kixpikʼa ribʼ chi kaw chiru li ochoch ut saʼ junpaat kitʼaneʼk. Ut kokʼpukʼ kikanaak li ochoch.
Xtzʼaqobʼ ebʼ li naʼlebʼ
^ Taawil xchʼolobʼankil li aatin, sábado.
^ Taawil xchʼolobʼankil li aatin, sábado.
^ Taawil xchʼolobʼankil li aatin, kaxlanwa li yeechiʼinbʼil chiru li Yos.
^ Taawil xchʼolobʼankil li aatin, sábado.
^ Taawil xchʼolobʼankil li aatin, sábado.
^ Taawil xchʼolobʼankil li aatin, sábado.
^ Taawil xchʼolobʼankil li aatin, sábado.
^ Tadeo ajwiʼ nakʼabʼaʼiik.
^ Malaj «laako».
^ Aʼin naraj xyeebʼal, xkʼebʼal li toʼ chi inkʼaʼ tpatzʼmanq xral li tumin.
^ Malaj «toqʼobʼank u».
^ Malaj «natoqʼobʼank u».
^ Malaj «li jaljokil ru aatin».
^ Arin yook chi aatinak chirix li rechpaabʼanelil.
^ Arin yook chi aatinak chirix li rechpaabʼanelil.
^ Arin yook chi aatinak chirix li rechpaabʼanelil.
