Lucas 8:1-56
-
Ebʼ li ixq li nekeʼochbʼeenink re li Jesús (1-3)
-
Li eetalil chirix laj awinel (4-8)
-
Kʼaʼut li Jesús naroksi ebʼ li eetalil re xtzolbʼalebʼ (9, 10)
-
Naxchʼolobʼ li eetalil chirix laj awinel (11-15)
-
Maaʼani naxtzʼap jun li kandil (16-18)
-
Li xnaʼ ut ebʼ li riitzʼin li Jesús (19-21)
-
Li Jesús naxtuqubʼ ru li kawil iqʼ (22-25)
-
Naxtaqla chi ok wiibʼ oxibʼ li maaʼus aj musiqʼej rikʼin wiibʼ oxibʼ li aaq (26-39)
-
Li xrabʼin laj Jairo; jun li ixq kixchʼeʼ li xtʼikr li Jesús (40-56)
8 Moqon chik li Jesús xkoho saʼ jalan jalanq chi tenamit ut saʼ jalan jalanq chi kʼalebʼaal yook chaq xkʼebʼal chi naweʼk li chaabʼil esil chirix li Xʼawabʼejilal li Yos. Ut rochbʼeen li Jesús yookebʼ chaq li Kabʼlaju,
2 joʼ ajwiʼ ebʼ li ixq li xeʼisiik chaq maaʼus aj musiqʼej rikʼinebʼ ut xeʼbʼaneʼk li xyajel: wank chaq li xMaría (li nakʼabʼaʼiik Magdalena) li kiʼisiik rikʼin wuqubʼ li maaʼus aj musiqʼej,
3 li xJuana aʼ li rixaqil laj Cuza li naʼilok re li rochoch laj Herodes, li xSusana ut naabʼal chik li ixq li nekeʼroksi li xjunkabʼlal re xchʼolaninkilebʼ.
4 Joʼkan utan, li kʼiila tenamit kixjunaji ribʼ rikʼinebʼ li qas qiitzʼin li yookebʼ chaq xtaqenkil li Jesús saʼ jalan jalanq chi tenamit ut aʼan naraatinahebʼ rikʼin eetalil:*
5 «Jun laj awinel xkoho rawbʼal li riyaj. Ut naq yook chi awk, wankebʼ li iyaj xeʼtʼaneʼk chire bʼe ut xeʼyeqʼimank ut ebʼ li xul li nekeʼrupupik chiru choxa, xeʼxwaʼ.
6 Wankebʼ li iyaj xeʼnaq saʼ li naʼaj pek ru ut xeʼchaqik xbʼaan naq maakʼaʼ xhaʼel.
7 Wankebʼ li iyaj xeʼnaq saʼ xyanq li yibʼ aj pim, ut naq li yibʼ aj pim xeʼkʼiik rochbʼeen, xeʼxnatʼ li awimq.
8 Abʼan wankebʼ li iyaj xeʼnaq saʼ chaabʼil chʼochʼ ut naq xeʼmoq xeʼok xkʼebʼal li ru, jun siʼeent sut chik xkʼihalil chiru li kiʼawmank chaq». Naq ak kixye aʼin, kixye saʼ kawil kuxej: «Li wank xxik re abʼink, chixkʼehaq xchʼool chi abʼink».
9 Abʼan ebʼ li xtzolom xeʼxpatzʼ re kʼaru xyaalal li eetalil aʼin.
10 Aʼan kixye rehebʼ: «Li Yos nekextenqʼa chi xtawbʼal ru li muqmukil naʼlebʼ chirix li Xʼawabʼejilal. Abʼan ebʼ li junchʼol chixjunil nekeʼkʼuteʼk chiru rikʼin eetalil re naq chi joʼkan, usta nekeʼilok maakʼaʼ nekeʼril, usta nekeʼabʼink maakʼaʼ nekeʼrabʼi ut maakʼaʼ nekeʼxtaw ru.
11 Joʼkan bʼiʼ, aʼin xyaalalil li eetalil. Li iyaj aʼan li raatin li Yos.
12 Ebʼ li iyaj li xeʼtʼaneʼk chire bʼe, aʼanebʼ li nekeʼrabʼi li raatin li Yos abʼan saʼ junpaat nachalk laj Tza* ut naxmaqʼ chiruhebʼ li aatin li kiʼawmank saʼ xchʼoolebʼ re naq inkʼaʼ teʼxpaabʼ li Yos ut re naq inkʼaʼ teʼkoleʼq.
13 Ebʼ li iyaj li xeʼtʼaneʼk saʼ li naʼaj pek ru, aʼanebʼ li nekeʼrabʼi li raatin li Yos ut nekeʼxkʼulubʼa chi sahebʼ saʼ xchʼool abʼan chanchanebʼ li cheʼ li moko cham ta li xxeʼ. Nekeʼxpaabʼ li Yos jun kʼamokaq, abʼan naq nawulak xqʼehil li aaleek, nekeʼxnajtobʼresi ribʼ.
14 Ebʼ li iyaj li xeʼtʼaneʼk saʼ xyanq li yibʼ aj pim, aʼanebʼ li nekeʼrabʼi li raatin li Yos abʼan saʼ xkʼabʼaʼ naq nekeʼxkanabʼ naq ebʼ li chʼaʼajkilal, li bʼihomal ut li xsahil li ruuchichʼochʼ tnatʼoq rehebʼ, li ru inkʼaʼ naqʼanoʼk.
15 Ebʼ li iyaj li xeʼtʼaneʼk saʼ chaabʼil chʼochʼ aʼanebʼ li nekeʼxkʼulubʼa li raatin li Yos chi anchalebʼ xchʼool, nekeʼxchap chi kaw li aatin ut naq yookebʼ xkuybʼal ebʼ li aaleek, nekeʼuuchink.
16 Maaʼani naxloch li xkandil* re xkʼebʼal rubʼel chʼochʼ sekʼ malaj rubʼel chʼaat naxkʼe bʼan saʼ jun li naʼaj najt xteram re naq kutanaq xsaʼ li ochoch naq teʼoq.
17 Xbʼaan naq maakʼaʼ wank chi tzʼaptzʼo chi inkʼaʼ t-elq chi kutankil ut maakʼaʼ muqmu chiʼus chi inkʼaʼ tnawmanq saʼ junaq kutan.
18 Joʼkan naq kʼehomaq reetal chiʼus chanru yookex chi abʼink xbʼaan naq li naxtaw ru xyaalal, li Yos tixbʼaanu naq naabʼal chik tixtaw ru; abʼan li inkʼaʼ naxtaw ru xyaalal, li Yos tixmaqʼ ajwiʼ chiru li kachʼin li naxtaw ru».
19 Tojaʼ naq li xnaʼ ut ebʼ li riitzʼin xeʼchalk chi rilbʼal abʼan inkʼaʼ xeʼruuk chi jilok chixkʼatq xbʼaan naq kʼajoʼebʼ li qas qiitzʼin.
20 Joʼkan naq xeʼxye chaq re: «Laanaʼ ut ebʼ laawiitzʼin xaqxokebʼ chirix kabʼl ut nekeʼraj aawilbʼal».
21 Aʼan kixye rehebʼ: «Linnaʼ ut ebʼ li wiitzʼin aʼanebʼ aʼin li nekeʼrabʼi li raatin li Yos ut nekeʼxyuʼami».
22 Saʼ jun kutan, li Jesús ut ebʼ li xtzolom xeʼtaqeʼk saʼ jun li jukubʼ* ut kixye rehebʼ: «Yoʼqebʼ, numeʼqo junpakʼal li palaw». Ut xkohebʼ.
23 Abʼan, naq yookebʼ chik xik saʼ jukubʼ,* kiwark li Jesús. Tojaʼ naq kichalk jun li kawil iqʼ saʼ xbʼeenebʼ ut li jukubʼ* kiʼok chi nujak chi haʼ. Ut kachʼin chik ma nasubʼeʼk li jukubʼ* rubʼel haʼ.
24 Joʼkan naq xkohebʼ rajsinkil li Jesús ut xeʼxye re: «Kʼutunel! Kʼutunel! Osoʼk qe!». Kiwakliik li Jesús ut kixqʼus li kawil iqʼ ut li xkawil roq li haʼ, ut chixjunil kixaqli ut kituqlaak ru.
25 Tojaʼ naq kixpatzʼ rehebʼ: «Kʼaʼut inkʼaʼ nekeepaabʼ naq li Yos naru eetenqʼankil?». Sachsokebʼ xchʼool xeʼkanaak ut qʼaxal yookebʼ xxiw ut xeʼok xyeebʼal chiribʼilebʼ ribʼ: «Ani tzʼaqal li winq aʼin? Xbʼaan naq li kawil iqʼ ut li haʼ nekeʼabʼink ajwiʼ chiru naq naxqʼusebʼ».
26 Ut xeʼwulak chire xteepalebʼ laj Gerasa, li wank junpakʼal Galilea.
27 Naq li Jesús kiʼelk saʼ li jukubʼ,* kikʼuleʼk xbʼaan jun li winq re li tenamit li echaninbʼil xbʼaan li maaʼus aj musiqʼej. Ut junxil chik inkʼaʼ naxkʼe xtʼikr chirix, ut moko saʼ ochoch ta chik nawank, saʼ muqlebʼaal bʼan.
28 Naq kiril ru li Jesús, kixjap re ut kixkut ribʼ chi roq ut kixye chi kaw xyaabʼ xkux: «Kʼaru wilom aawikʼin, Jesús, Ralal li Nimajwal Yos? Nintzʼaama chaawu, minaarahobʼtesi».
29 (Xbʼaan naq li Jesús naxye chaq re li maaʼus aj musiqʼej naq t-elq rikʼin li winq. Li maaʼus aj musiqʼej aʼin naabʼal sut narechani li winq ut kokʼaj xsaʼ nekeʼxbʼak chi kareen li roq ut li ruqʼ ut nekeʼxkʼaakʼale, abʼan junelik naxtʼup li kareen. Ut li maaʼus aj musiqʼej naxbʼaanu naq txik saʼebʼ li naʼaj li najt rikʼin li tenamit).
30 Li Jesús kixpatzʼ re: «Ani aakʼabʼaʼ?». Aʼan kixye re: «Legión».*
31 Ut xeʼok xtzʼaamankil re, naq inkʼaʼ teʼtaqlaaq saʼ chamal jul.*
32 Joʼkan bʼiʼ aran wankebʼ jun chʼuut li aaq* li yookebʼ chi waʼak chiru tzuul. Joʼkan naq xeʼxtzʼaama chiru naq tixkanabʼebʼ chi ok rikʼinebʼ li aaq* ut aʼan kixkanabʼebʼ chi ok.
33 Tojaʼ naq, ebʼ li maaʼus aj musiqʼej xeʼelk rikʼin li winq ut xeʼok rikʼinebʼ li aaq* ut li chʼuut chi aaq* kixkut ribʼ saʼ xteram li uul, jun tʼanikebʼ saʼ palaw ut xeʼkamk.
34 Naq ebʼ laj ilol aaq* xeʼril li kikʼulmank, xeʼelelik ut xeʼxkʼe chaq resil saʼ tenamit ut saʼ kʼalebʼaal.
35 Tojaʼ naq, ebʼ li qas qiitzʼin xkohebʼ rilbʼal li kikʼulmank. Naq xeʼwulak bʼarwiʼ wank li Jesús, xeʼxtaw li winq li kiʼelk rikʼin ebʼ li maaʼus aj musiqʼej. Xeʼxtaw chi chunchu chi roq li Jesús, tiqto ut tuqtu chik xkʼaʼuxl, ut kʼajoʼ xeʼxuwak xbʼaan.
36 Ebʼ li xeʼilok re li kikʼulmank, xeʼxseeraqʼi chanru kiʼusaak li winq li echaninbʼil xbʼaanebʼ li maaʼus aj musiqʼej.
37 Ut naabʼalebʼ li qas qiitzʼin li wankebʼ chi xsutam li teep Gerasa, xeʼxtzʼaama re li Jesús naq tixkanabʼ li teep. Tojaʼ naq li Jesús kitaqeʼk saʼ li jukubʼ,* ut naq ak xik re,
38 li winq li kiʼelk ebʼ li maaʼus aj musiqʼej rikʼin kiʼok xtzʼaamankil re li Jesús naq naraj xik chirix, abʼan aʼan kixchaqʼrabʼi ut kixye re:
39 «Sutqʼin saʼ laawochoch ut seeraqʼi re chixjunilebʼ li kixbʼaanu chaawix li Yos». Joʼkan naq xkoho ut kiʼok xkʼebʼal resil saʼ chixjunil li tenamit li kixbʼaanu li Jesús chirix.
40 Naq kisutqʼiik li Jesús, kikʼuleʼk chiʼus xbʼaan li kʼiila tenamit xbʼaan naq yookebʼ roybʼeninkil.
41 Tojaʼ naq kichalk jun li winq aj Jairo xkʼabʼaʼ li najolomink re li naʼaj bʼarwiʼ nekeʼloqʼonink ebʼ laj judiiy. Kixkut ribʼ chi roq li Jesús ut kiʼok xtzʼaamankil re, naq txik saʼ rochoch,
42 xbʼaan naq li xrabʼin li jun chiru yook chi kamk ut wank tana kabʼlaju chihabʼ re.
Naq li Jesús yook chiru bʼe, yook chi pitzʼiik xbʼaan li kʼiila tenamit.
43 Joʼkan bʼiʼ, aran wank jun li ixq li nakubʼeek xkikʼel, li kabʼlaju chihabʼ rokik xkʼulbʼal aʼin ut li ixq inkʼaʼ kixtaw ani tkʼirtasinq re.
44 Li ixq aʼin kijilok chirix li Jesús, kixchʼeʼ chire li xtʼikr ut saʼ junpaat kitzʼap li xkikʼel.
45 Li Jesús kixye: «Ani xchʼeʼok we?». Naq chixjunilebʼ yookebʼ xyeebʼal naq moko aʼanebʼ ta, laj Pedro kixye re li Jesús: «At Kʼutunel, sutsukat xbʼaan li kʼiila tenamit ut yookebʼ aapitzʼbʼal».
46 Abʼan li Jesús kixye: «Wank ani xchʼeʼok we xbʼaan naq xwekʼa naq kiʼelk li wankil wikʼin».
47 Saʼ xkʼabʼaʼ naq li ixq kixkʼe reetal naq inkʼaʼ kiruuk xmuqbʼal li kixbʼaanu, nasiksotk naq kijilok chixkʼatq li Jesús ut kixkut ribʼ chi roq. Ut chiru chixjunilebʼ kixye kʼaʼut kixchʼeʼ li Jesús ut chanru kikʼiraak saʼ junpaat.
48 Abʼan li Jesús kixye re: «At inrabʼin, xatkʼiraak xbʼaan naq nakaapaabʼ naq li Yos tatxtenqʼa. Ayu ut matkʼoxlak chik».
49 Toj yook ajwiʼ chi aatinak li Jesús, naq kichalk jun li winq li wank saʼ rochoch laj Jairo ut kixye re: «Ak xkamk laarabʼin. Kʼaʼ chik ajʼe naq taachʼiʼchʼiʼi laj Kʼutunel».
50 Naq li Jesús kirabʼi aʼin, kixye re laj Jairo: «Matxuwak, paabʼ naq li Yos tatxtenqʼa ut laarabʼin twanq wiʼ chik xyuʼam».*
51 Naq kiʼok saʼ ochoch, kaʼajwiʼ xeʼok chirix laj Pedro, laj Juan, laj Santiago ut li xnaʼ ut li xyuwaʼ li chʼina ixqaʼal, maaʼani chik.
52 Chixjunilebʼ li qas qiitzʼin yookebʼ chi yaabʼak ut xtenbʼal chiruhebʼ li xmaqabʼ xbʼaan xrahilebʼ xchʼool. Joʼkan naq li Jesús kixye rehebʼ: «Mexyaabʼak chik, moko kamenaq ta, yal yook chi wark».
53 Naq xeʼrabʼi aʼin, xeʼxjap re chi xseʼenkil xbʼaan naq nekeʼxnaw naq kamenaq chik.
54 Abʼan li Jesús kixchap chi ruqʼ ut kixye re: «Chʼina ixqaʼal, waklin!».
55 Li chʼina ixqaʼal kiwaklesiik chi yoʼyo* ut saʼ junpaat kiwakliik. Tojaʼ naq li Jesús kixye naq teʼxkʼe chi waʼak.
56 Li xnaʼ ut li xyuwaʼ li chʼina ixqaʼal kʼajoʼebʼ xsahil xchʼool, abʼan li Jesús kixye rehebʼ naq maaʼani ajʼe teʼxseeraqʼi li xkʼulmank.
Xtzʼaqobʼ ebʼ li naʼlebʼ
^ Malaj «jaljokil ru aatin».
^ Saʼ griego «li Diʼaabʼ». Taawil xchʼolobʼankil li aatin, Diʼaabʼ.
^ Malaj «li xlámpara».
^ Malaj «li kayuuk».
^ Malaj «kayuuk».
^ Malaj «li kayuuk».
^ Malaj «li kayuuk».
^ Malaj «li kayuuk».
^ Xbʼaan naq naabʼalebʼ li maaʼus aj musiqʼej li keʼechanink re li winq. Taawil xchʼolobʼankil li aatin, legión.
^ Taawil xchʼolobʼankil li aatin, chamal jul.
^ Malaj «li kuy».
^ Malaj «rikʼinebʼ li kuy».
^ Malaj «rikʼinebʼ li kuy».
^ Malaj «chi kuy».
^ Malaj «kuy».
^ Malaj «li kayuuk».
^ Saʼ griego «tkoleʼq».
^ Saʼ griego «kisutqʼik li xmusiqʼ». Taawil xchʼolobʼankil li aatin, musiqʼ.
