Marcos 11:1-33
11 Joʼkan bʼiʼ, naq xeʼnachʼok Jerusalén ut wankebʼ chaq saʼ li tzuul Olivo, bʼarwiʼ wank Betfagué ut Betania, li Jesús kixtaqla wiibʼ rehebʼ li xtzolom
2 ut kixye rehebʼ: «Ayuqex saʼ li kʼalebʼaal li nekeeril aran. Naq texʼoq, teetaw chi bʼakʼbʼo jun li chʼina bʼuur li toj maajiʼ nekeʼchunlaak saʼ xbʼeen. Hitomaq* ut kʼamomaq chaq.
3 Ut wi junaq li qas qiitzʼin tixpatzʼ eere “Kʼaru yookex xbʼaanunkil?”, laaʼex teesume “Li Qaawaʼ naʼajok re, abʼan akeʼ ajwiʼ tixqʼaxtesi”».
4 Joʼkan naq xkohebʼ ut xeʼxtaw chi bʼakʼbʼo li chʼina bʼuur chiru rokebʼaal jun li ochoch li wank chire bʼe, ut xeʼxhit.*
5 Abʼan li wankebʼ aran xeʼxpatzʼ rehebʼ: «Kʼaʼut yookex xhitbʼal* li chʼina bʼuur?».
6 Ebʼ li tzolom xeʼchaqʼok joʼ kixye li Jesús ut xeʼkanabʼaak chi xik.
7 Tojaʼ naq ebʼ li qas qiitzʼin xeʼxkʼam chaq re li Jesús li chʼina bʼuur ut xeʼxkʼe li xtʼikr saʼ xbʼeen li chʼina bʼuur ut li Jesús kichunlaak saʼ xbʼeen.
8 Naabʼalebʼ li qas qiitzʼin yookebʼ chaq xhelbʼal chiru bʼe li xtʼikrebʼ li lanlokebʼ wiʼ ut jalanebʼ chik yookebʼ chaq xyokʼbʼal ruqʼ li cheʼ li wank chire bʼe.
9 Li yookebʼ chi xik chiru li Jesús joʼ ajwiʼ li yookebʼ chirix, japjokebʼ re chi xyeebʼal: «Naqatzʼaama chaawu naq taakol! Osobʼtesinbʼil taxaq li nachalk saʼ xkʼabʼaʼ li Jehobʼa!*
10 Osobʼtesinbʼil li Awabʼejilal li nachalk aʼ li Xʼawabʼejilal laj David li qayuwaʼ! Naqatzʼaama chaawu naq taakol, laaʼat li wankat taqeʼq!».
11 Naq ak xʼok Jerusalén, li Jesús xkoho saʼ rochoch li Yos ut kiril chixjunil li wank saʼ xsutam. Abʼan saʼ xkʼabʼaʼ naq xʼewuuk chik, xkoho Betania rochbʼeen li Kabʼlaju.
12 Wulajaq chik, naq xeʼelk Betania, kichalk xtzʼokajik.
13 Chi najt kiril jun toon chi iig li wank xxaq, ut xkoho rilbʼal ma tixtaw junaq li ru. Abʼan, naq kijilok chixkʼatq, maakʼaʼ kixtaw xbʼaan naq toj maajiʼ xqʼehil naq t-uuchinq.
14 Joʼkan naq kixye re: «Maajunwa chik tat-uuchinq». Ut ebʼ li xtzolom xeʼrabʼi li kixye.
15 Naq ak xeʼwulak Jerusalén, li Jesús kiʼok saʼ rochoch li Yos ut kiʼok risinkil li yookebʼ chi kʼayink ut chi loqʼok. Kixbʼalqʼusi xmeexebʼ laj jalol tumin ut xtemebʼ laj kʼay mukuy.
16 Joʼkan ajwiʼ, inkʼaʼ naxkanabʼ naq ebʼ li qas qiitzʼin teʼxnumsi li kʼaʼaq re ru saʼ xyi li rochoch li Yos re xtoqbʼal xbʼehebʼ.
17 Chirix chik aʼan kiʼok xtzolbʼalebʼ li qas qiitzʼin ut xyeebʼal rehebʼ: «Ma inkʼaʼ tabʼiʼ tzʼiibʼanbʼil “Li wochoch tkʼabʼaʼiiq rochochil li tijok choʼq re chixjunil li tenamit”? Abʼan laaʼex xeekʼe choʼq rochochebʼ laj elqʼ».
18 Naq ebʼ li xbʼeenil aj tij ut ebʼ laj tzʼiibʼ xeʼxnaw aʼin, xeʼok xsikʼbʼal chanru teʼxkamsi. Ut nekeʼxxuwa ru xbʼaan naq li kʼiila tenamit sachsokebʼ xchʼool nekeʼkanaak xbʼaan li xkʼutum.
19 Naq kiʼok chi ewuuk, li Jesús ut ebʼ li xtzolom xeʼelk saʼ li tenamit.
20 Wulajaq chik eqʼla, naq xeʼnumeʼk chixkʼatq li iig xeʼril naq xchaqik chi junajwa.
21 Laj Pedro kijultikoʼk re li xkʼulmank chaq ut kixye re: «Kʼutunel,* kʼe reetal xchaqik xtoonal li iig li xaatzʼeqtaana».
22 Naq kirabʼi aʼin, li Jesús kixye rehebʼ: «Cheepaabʼaq naq li Yos naru xbʼaanunkil chixjunil.
23 Relik chi yaal ninye eere naq, wi junaq li qas qiitzʼin tixye re li tzuul aʼin: “Waklin ut kut aawibʼ saʼ palaw”, ut moko wiibʼ ta ru xchʼool naq tixye, naxpaabʼ bʼan naq joʼkan tkʼulmanq, tixtaw li yook xyeebʼal.
24 Joʼkan naq ninye eere: chixjunil li teepatzʼ saʼ leetij, paabʼomaq naq teekʼul, ut wi nekeepaabʼ aʼin, teetaw.
25 Naq xaqxoqex chi tijok, teekuyebʼ xmaak li junchʼol maakʼaʼ naxye kʼaru xeʼxbʼaanu eere re naq leechoxahil Yuwaʼ tixkuy tixsach ajwiʼ eemaak».
26 *
27 Tojaʼ naq xeʼwulak wiʼ chik Jerusalén ut naq yook chi bʼeek saʼ rochoch li Yos, xeʼchalk ebʼ li xbʼeenil aj tij, ebʼ laj tzʼiibʼ ut ebʼ li cheekel winq,
28 ut xeʼxpatzʼ re: «Kʼaru aawankil naq nakaabʼaanu aʼin? Ani xkʼehok re aawankil?».
29 Li Jesús kixye rehebʼ: «Tinbʼaanu eere jun li patzʼom. Wi tineesume, tinye eere kʼaru inwankil naq ninbʼaanu aʼin.
30 Li kubʼihaʼ li kixbʼaanu chaq laj Juan, ma chalenaq saʼ choxa, malaj rikʼinebʼ li winq? Yeehomaq we».
31 Joʼkan naq xeʼok xkʼoxlankil ut xeʼxye chiribʼilebʼ ribʼ: «Wi tqaye naq chalenaq saʼ choxa, aʼan tixye qe: “Wi joʼkan, kʼaʼut inkʼaʼ xeepaabʼ re?”.
32 Abʼan, maaʼani qe kiruuk xyeebʼal naq chalenaq rikʼinebʼ li winq». Nekeʼxxuwa ru li kʼiila tenamit xbʼaan naq nekeʼril laj Juan joʼ propeet.
33 Joʼkan naq xeʼxye re li Jesús: «Inkʼaʼ naqanaw». Ut li Jesús kixye rehebʼ: «Joʼkan ajwiʼ laaʼin inkʼaʼ tinye eere kʼaru inwankil naq ninbʼaanu aʼin».
Xtzʼaqobʼ ebʼ li naʼlebʼ
^ Malaj «Kʼixomaq».
^ Malaj «xeʼxkʼix».
^ Malaj «xkʼixbʼal».
^ Taawil xchʼolobʼankil li aatin, Jehobʼa.
^ Saʼ griego «Rabí».
^ Li raqal aʼin natawmank saʼ wiibʼ oxibʼ li Santil Hu. Abʼan moko natawmank ta saʼ chixjunil ebʼ li najteril hu li tzʼaqal re ru li wank saʼ griego.
