Marcos 4:1-41
-
EBʼ LI EETALIL CHIRIX LI XʼAWABʼEJILAL LI YOS (1-34)
-
Laj awinel (1-9)
-
Kʼaʼut li Jesús naroksi ebʼ li eetalil re xtzolbʼalebʼ (10-12)
-
Naxchʼolobʼ li eetalil chirix laj awinel (13-20)
-
Inkʼaʼ natzʼapmank jun li kandil rikʼin jun li chakach (21-23)
-
«Li bʼislebʼ li teeroksi aʼan ajwiʼ li t-oksimanq eerikʼin» (24, 25)
-
Laj awinel li nawark (26-29)
-
Jun tʼorol li mostaas (30-32)
-
Naroksi ebʼ li eetalil (33, 34)
-
-
Li Jesús naxtuqubʼ ru li kawil iqʼ (35-41)
4 Li Jesús kiʼok wiʼ chik chi kʼutuk chire li palaw. Saʼ xkʼabʼaʼ naq kisuteʼk xbʼaan li kʼiila tenamit, kitaqeʼk saʼ jun li jukubʼ,* kixchunubʼ ribʼ chisaʼ ut kinajtoʼk bʼayaq. Abʼan chixjunilebʼ li qas qiitzʼin xeʼkanaak chire li palaw.
2 Ut kiroksi ebʼ li eetalil* re xkʼutbʼal chiruhebʼ naabʼal li naʼlebʼ. Ut naq yook xtzolbʼalebʼ naxye rehebʼ:
3 «Abʼihomaq, jun laj awinel xkoho chi awk.
4 Ut naq yook chi awk, wankebʼ li iyaj xeʼtʼaneʼk chire bʼe, xeʼchalk li xul li nekeʼrupupik ut xeʼxwaʼ.
5 Wankebʼ li iyaj xeʼnaq saʼ pek ru bʼarwiʼ jay ru li chʼochʼ ut xeʼmoq saʼ junpaat xbʼaan naq moko cham ta li chʼochʼ.
6 Abʼan, naq kiʼelk chaq li saqʼe kixkʼat li awimq ut saʼ xkʼabʼaʼ naq moko cham ta li xxeʼ, kichaqik.
7 Wankebʼ li iyaj xeʼnaq saʼ xyanq li yibʼ aj pim, ut naq li yibʼ aj pim xeʼkʼiik, xeʼxnatʼ li awimq, joʼkan naq inkʼaʼ xeʼuuchink.
8 Abʼan wankebʼ li iyaj li xeʼnaq saʼ li chʼochʼ li jwal chaabʼil, xeʼmoq ut xeʼkʼiik ut xeʼok chi uuchink; wankebʼ xeʼxkʼe 30 sut chik xkʼihalil chiru li kiʼawmank chaq; wankebʼ chik xeʼxkʼe 60 ut jalanebʼ chik 100».
9 Tojaʼ naq kixye ajwiʼ: «Li wank xxik re abʼink, chixkʼehaq xchʼool chi abʼink».
10 Joʼkan bʼiʼ, naq ak xkohebʼ li qas qiitzʼin, li wankebʼ saʼ xsutam rochbʼeenebʼ li Kabʼlaju xeʼok xpatzʼbʼal re chirix ebʼ li eetalil.*
11 Li Jesús kixsumehebʼ ut kixye: «Li Yos nekextenqʼa chi xtawbʼal ru li muqmukil naʼlebʼ chirix li Xʼawabʼejilal. Abʼan ebʼ li junchʼol nekeʼchʼolobʼaak chiru rikʼin eetalil*
12 re naq chi joʼkan, usta nekeʼilok maakʼaʼ nekeʼril, usta nekeʼabʼink maakʼaʼ nekeʼxtaw ru. Joʼkan naq ebʼ aʼan maajunwa teʼsutqʼiiq rikʼin li Yos chi moko teʼkuyeʼq xmaak».
13 Kixye ajwiʼ rehebʼ: «Wi laaʼex inkʼaʼ nekeetaw ru li eetalil* aʼin, chanru teetaw ru li junchʼol chi eetalil?*
14 »Laj awinel naraw li esil chirix li Xʼawabʼejilal li Yos.
15 Joʼkan bʼiʼ, wankebʼ li iyaj li xeʼtʼaneʼk chire bʼe bʼarwiʼ kiʼawmank li esil. Ebʼ aʼin aʼanebʼ li nekeʼrabʼi li esil abʼan saʼ junpaat nachalk laj Tza ut naxmaqʼ chiruhebʼ li esil li kiʼawmank saʼ xchʼoolebʼ.
16 Wankebʼ ajwiʼ li iyaj li kiʼawmank saʼ li naʼaj pek ru. Aʼanebʼ li nekeʼrabʼi li esil ut nekeʼxkʼulubʼa chi sahebʼ saʼ xchʼool.
17 Abʼan moko cham ta naxeʼink saʼ xchʼoolebʼ ut jun kʼamok ajwiʼ nekeʼxpaabʼ li Yos. Naq nachalk ebʼ li chʼaʼajkilal malaj li rahobʼtesiik saʼ xkʼabʼaʼ li esil saʼ junpaat nekeʼxkanabʼ paabʼank.
18 Joʼkan ajwiʼ, wankebʼ li iyaj li kiʼawmank saʼ xyanq li yibʼ aj pim. Ebʼ aʼin li nekeʼrabʼi li esil
19 abʼan nekeʼxkanabʼ naq li chʼaʼajkilal li nekeʼxkʼul wulaj wulaj saʼ li ruuchichʼochʼ* aʼin ut li bʼihomal li nabʼalaqʼik ut chixjunil li narahimank ru, tixchʼik ribʼ ut tixnatʼ li esil. Joʼkan naq li esil inkʼaʼ naʼuuchink.
20 Chirix chik aʼan, wankebʼ li iyaj li kiʼawmank saʼ chaabʼil chʼochʼ. Ebʼ aʼin aʼanebʼ li nekeʼrabʼi li esil, nekeʼxkʼulubʼa chi anchalebʼ xchʼool ut nekeʼuuchink: wankebʼ nekeʼruuchi numenaq 30, 60, ut wankebʼ chik 100».
21 Ut kixye ajwiʼ rehebʼ: «Peʼyaal naq inkʼaʼ naʼisimank jun li kandil* re xtzʼapbʼal rikʼin jun li chakach malaj re xkʼebʼal rubʼel chʼaat? Ma inkʼaʼ tabʼiʼ naʼisimank re xkʼebʼal saʼ jun li naʼaj najt xteram?
22 Xbʼaan naq maakʼaʼ wank chi tzʼaptzʼo chi inkʼaʼ t-elq chi kutankil ut maakʼaʼ muqmu chiʼus chi inkʼaʼ tkʼemanq chi naweʼk.
23 Li wank xxik re abʼink, chixkʼehaq xchʼool chi abʼink».
24 Chirix chik aʼan kixye rehebʼ: «Kʼehomaq eechʼool chirix li yookex rabʼinkil. Li bʼislebʼ li teeroksi aʼan ajwiʼ li t-oksimanq eerikʼin, ut toj tkʼemanq xtzʼaqobʼ eere.
25 Xbʼaan naq li naxtaw ru xyaalal, li Yos tixbʼaanu naq naabʼal chik tixtaw ru; abʼan li inkʼaʼ naxtaw ru xyaalal, li Yos tixmaqʼ ajwiʼ chiru li kachʼin li naxtaw ru».
26 Kixye ajwiʼ: «Li Xʼawabʼejilal li Yos chanchan jun li winq li naxkʼe ebʼ li iyaj saʼ chʼochʼ.
27 Naq li winq nawark chi qʼoqyink ut nawakliik chi kutan, nekeʼmoq li iyaj ut nekeʼkʼiik li awimq. Li winq inkʼaʼ naxnaw chanru nakʼulmank aʼin.
28 Li chʼochʼ naxkʼanjela ribʼ xjunes ut naʼuuchink: xbʼeenwa naʼelk xtoonal, chirix chik aʼan li ratzʼum, ut moqon chik naqʼanoʼk li ru saʼ li ratzʼum.
29 Naq naqʼanoʼk ru li awimq, naxik li winq ut naxyokʼ chaq xbʼaan naq xwulak xqʼehil xsikʼbʼal li ru».
30 Ut kixye ajwiʼ: «Rikʼin kʼaru tooruuq xjuntaqʼeetankil li Xʼawabʼejilal li Yos, malaj rikʼin kʼaru li eetalil* tooruuq xchʼolobʼankil?
31 Chanchan jun tʼorol li mostaas, naq naʼawmank qʼaxal kachʼin chiru chixjunil ebʼ li iyaj re li ruuchichʼochʼ,
32 abʼan, naq ak xʼawmank, nakʼiik, ut qʼaxal nim wiʼ chik nawulak chiru chixjunilebʼ li cheʼ li wank saʼ xnaʼaj li uutzʼuʼuj. Ut saʼ xkʼabʼaʼ naq qʼaxal nim ebʼ li ruqʼ, ebʼ li xul li nekeʼrupupik chiru choxa nekeʼxkol ribʼ chiru».
33 Kiroksi naabʼal li eetalil* joʼ aʼin naq kixkʼe chaq chi naweʼk li chaabʼil esil,* abʼan kixkʼe saʼ ajl li teʼruuq xtawbʼal ru.
34 Joʼkan ajwiʼ, junelik kiraatinahebʼ rikʼin eetalil,* abʼan rehebʼ li xtzolom naxchʼolobʼ chixjunil naq wankebʼ xjunes.
35 Chiru li kutan aʼan naq kiqʼoqyinoʼk, kixye rehebʼ li xtzolom: «Numeʼqo junpakʼal li palaw».
36 Joʼkan bʼiʼ, ebʼ li xtzolom xeʼxchaqʼrabʼi ebʼ li qas qiitzʼin, tojaʼ naq xeʼxkʼam li Jesús saʼ li jukubʼ* joʼ chanru wank. Ut wiibʼ oxibʼ chik li jukubʼ* yookebʼ chi xik chixkʼatqebʼ.
37 Abʼanan, kiwakliik chaq jun li kawil iqʼ saʼ palaw. Ut li xkawil roq li haʼ naxsakʼ ribʼ chiru li jukubʼ* ut kachʼin chik ma nanujak chi haʼ.
38 Abʼan li Jesús yook chi wark chirix li jukubʼ* ut yokyo saʼ xbʼeen jun li sok. Joʼkan naq, xeʼrajsi ut xeʼxye re: «At Kʼutunel, osoʼk qe..., ma maakʼaʼ nakaawaj re?».
39 Tojaʼ naq kiwakliik, kixqʼus li kawil iqʼ ut kixye re li palaw: «Matchoqin! Mat-ekʼank chik!». Li kawil iqʼ kixaqli ut kituqlaaq ru.
40 Chirix chik aʼan, kixye rehebʼ: «Kʼaʼut qʼaxal yook eexiw? Ma toj maajiʼ nekeepaabʼ chiʼus li Yos?».
41 Saʼ xkʼabʼaʼ naq qʼaxal yookebʼ xxiw, xeʼok xyeebʼal chiribʼilebʼ ribʼ: «Ani tzʼaqal li winq aʼin? Xbʼaan naq li kawil iqʼ ut li palaw nekeʼabʼink ajwiʼ chiru».
Xtzʼaqobʼ ebʼ li naʼlebʼ
^ Malaj «li kayuuk».
^ Malaj «ebʼ li jaljokil ru aatin».
^ Malaj «ebʼ li jaljokil ru aatin».
^ Malaj «jaljokil ru aatin».
^ Malaj «li jaljokil ru aatin».
^ Malaj «chi jaljokil ru aatin».
^ Taawil xchʼolobʼankil li aatin, ruuchichʼochʼ.
^ Malaj «li lámpara».
^ Malaj «li jaljokil ru aatin».
^ Malaj «li jaljokil ru aatin».
^ Saʼ griego «li aatin».
^ Malaj «jaljokil ru aatin».
^ Malaj «li kayuuk».
^ Malaj «li kayuuk».
^ Malaj «li kayuuk».
^ Malaj «li kayuuk».
