Marcos 8:1-38
-
Li Jesús naxchʼolani kaahibʼ mil chi winq (1-9)
-
Xeʼxye re, naq tixbʼaanu jun li sachbʼachʼoolej (10-13)
-
Xchʼamal xqʼemebʼ laj pariseey ut xchʼamal xqʼem laj Herodes (14-21)
-
Naxkʼirtasi jun li mutzʼ aran Betsaida (22-26)
-
Laj Pedro naxye naq li Jesús aʼan li Kriist (27-30)
-
Li Jesús naxye chi rubʼelaj li xkamik (31-33)
-
Li tento tixbʼaanu junaq li qas qiitzʼin re naq tixtaqe li Jesús (34-38)
8 Chiruhebʼ li kutan aʼan kichʼutlaak wiʼ chik li kʼiila tenamit. Saʼ xkʼabʼaʼ naq maakʼaʼ teʼxwaʼ, li Jesús kixtaqla xbʼoqbʼalebʼ li xtzolom ut kixye rehebʼ:
2 «Nawil xtoqʼobʼaal ru li tenamit aʼin xbʼaan naq ak xeʼxket oxibʼ kutan wikʼin ut maajun tzʼuqul xwahebʼ.
3 Inkʼaʼ nawaj xchaqʼrabʼinkilebʼ chi inkʼaʼ teʼwaʼaq, maare anchal teʼtʼaneʼq saʼ bʼe. Wankebʼ qʼaxal najt nekeʼchalk».
4 Abʼan, ebʼ li xtzolom xeʼxye re: «Najt wank li naʼaj aʼin chire li tenamit, joʼkan naq bʼar trisi chaq junaq li qas qiitzʼin li kaxlanwa re naq tkʼojlaaq xchʼool li kʼiila tenamit?».
5 Tojaʼ naq li Jesús kixye rehebʼ: «Jarubʼ li kaxlanwa wank eerikʼin?». Ebʼ aʼan xeʼxye re: «Wuqubʼ».
6 Ut aʼan kixtaqlahebʼ li tenamit chi chunlaak chiru chʼochʼ. Chirix chik aʼan kixchap li wuqubʼ chi kaxlanwa, kixbʼanyoxi re li Yos, kixjachi ut kixkʼe rehebʼ li xtzolom re naq teʼxjekʼi. Ut ebʼ li xtzolom xeʼok xjekʼinkil re li tenamit.
7 Wank ajwiʼ rikʼinebʼ wiibʼ oxibʼ li kokʼ kar, ut naq ak xraqeʼk chi tijok, kixye ajwiʼ rehebʼ naq teʼxjekʼi.
8 Joʼkan naq xeʼwaʼak toj reetal xeʼkʼojlaak xchʼool. Ut xeʼxxok wuqubʼ chakach xperaasil li kaxlanwa li kiʼelaʼank.* Ebʼ li nimla chakach aʼin nujenaqebʼ xsaʼ.
9 Wank tana kaahibʼ mil chi winq. Chirix chik aʼan li Jesús kixchaqʼrabʼihebʼ.
10 Saʼ junpaat kitaqeʼk saʼ li jukubʼ* rochbʼeenebʼ li xtzolom ut kiʼok saʼ li teep re Dalmanuta.
11 Ut xeʼchalk ebʼ laj pariseey ut xeʼok xchoqinkil ut xminbʼal ru re naq tixbʼaanu jun li sachbʼachʼoolej saʼ xkʼabʼaʼ li Yos. Chi joʼkan xeʼraj xyalbʼal rix.
12 Kʼajoʼ tzʼaqal kirahoʼk xchʼool li Jesús, ut kixye: «Kʼaʼut li tenamit li wank chiruhebʼ li kutan aʼin junelik naxpatzʼ jun li sachbʼachʼoolej? Relik chi yaal ninye eere naq inkʼaʼ tkʼemanq re junaq li sachbʼachʼoolej».
13 Chirix chik aʼan kixkanabʼebʼ, kitaqeʼk wiʼ chik saʼ li jukubʼ* ut xkoho junpakʼal li palaw.
14 Joʼkan bʼiʼ, ebʼ li xtzolom xeʼsach saʼ xchʼool xkʼambʼal li kaxlanwa. Jun ajwiʼ li kaxlanwa wank rikʼinebʼ saʼ li jukubʼ.*
15 Ut aʼan kixye rehebʼ chi chʼolchʼo ru: «Teehomaq chiʼus saʼ leeru ut weent teebʼaanu re naq inkʼaʼ teebʼon eeribʼ rikʼin xchʼamal xqʼemebʼ laj pariseey ut xchʼamal xqʼem laj Herodes».
16 Joʼkan naq xeʼok xpatzʼinkil chiribʼilebʼ ribʼ xbʼaan naq maakʼaʼebʼ xkaxlanwa.
17 Saʼ xkʼabʼaʼ naq kixkʼe reetal, li Jesús kixye rehebʼ: «Kʼaʼut nekeechoqi eeribʼ chirix li kaxlanwa? Ma toj maajiʼ nekeetaw ru? Ma inkʼaʼ nekeetaw ru? Ma inkʼaʼ nekeetaw ru xbʼaan naq toj tzʼaptzʼo leechʼool?
18 “Usta wank saʼ leeru, ma inkʼaʼ nekexʼilok?; usta wank leexik, ma inkʼaʼ nekexʼabʼink?”. Ma inkʼaʼ chik jultik eere
19 naq xinjachi li oobʼ chi kaxlanwa choʼq re li oobʼ mil chi winq? Jarubʼ chakach li kaxlanwa li kiʼelaʼank* xeexok?». «Kabʼlaju», chankebʼ re.
20 «Ut naq xinjachi li wuqubʼ chi kaxlanwa choʼq re li kaahibʼ mil chi winq, jarubʼ ninqi chakach chi kaxlanwa li kiʼelaʼank* xeexok?». «Wuqubʼ», chankebʼ re.
21 Tojaʼ naq kixpatzʼ rehebʼ: «Ut maajiʼ nekeetaw ru?».
22 Ut xeʼwulak Betsaida bʼarwiʼ ebʼ li qas qiitzʼin xeʼxkʼam chaq re li Jesús jun li mutzʼ ut kixtzʼaama re, naq tkʼirtasiiq.
23 Kixchap chi ruqʼ li mutzʼ, kirisi saʼ kʼalebʼaal ut naq ak kixchuubʼa saʼ li ru, kixkʼe li ruqʼ saʼ xbʼeen, tojaʼ naq kixpatzʼ re: «Ma nakat-ilok bʼayaq?».
24 Li winq kiʼilok saʼ xsutam ut kixye: «Nawilebʼ li qas qiitzʼin, abʼan chanchanebʼ li cheʼ li yookebʼ chi bʼeek».
25 Tojaʼ naq li Jesús kixkʼe wiʼ chik li ruqʼ saʼ ru li winq, ut li winq saqen chik kiʼilok: kiruuk chik rilbʼal chixjunil chi tzʼaqal re ru.
26 Chirix chik aʼan kixtaqla saʼ rochoch ut kixye re: «Mat-ok saʼ kʼalebʼaal».
27 Moqon chik li Jesús xkoho rochbʼeenebʼ li xtzolom saʼebʼ li kʼalebʼaal li wank Cesarea re Filipo, ut naq yookebʼ chiru bʼe, kixpatzʼ rehebʼ: «Anihin naq nekeʼxye ebʼ li qas qiitzʼin?».
28 Ebʼ aʼan xeʼxye re: «Laj Juan, aj Kubʼsihomhaʼ. Abʼan wankebʼ nekeʼxye naq laaʼat laj Elías. Ut jalanebʼ chik nekeʼxye naq laaʼat jun rehebʼ li propeet».
29 Ut li Jesús kixpatzʼ rehebʼ: «Ut laaʼex, anihin naq nekeeye?». Kichaqʼok laj Pedro ut kixye re: «Laaʼat li Kriist».
30 Tojaʼ naq li Jesús chi chʼolchʼo ru kixye rehebʼ naq maaʼani ajʼe teʼxye.
31 Ut kiʼok xkʼutbʼal chiruhebʼ naq li Ralal li Winq tento tixkʼul naabʼal li rahilal ut inkʼaʼ tkʼulubʼaaq xbʼaanebʼ li cheekel winq, ebʼ li xbʼeenil aj tij, ebʼ laj tzʼiibʼ ut tento ajwiʼ tkamsiiq ut saʼ rox kutan twaklesiiq chi yoʼyo.
32 Kixye chaq aʼin chi tzʼaqal re ru. Abʼan laj Pedro kirisi xjunes ut kiʼok xqʼusbʼal.
33 Li Jesús kixbʼalqʼusi ribʼ, kirilebʼ li xtzolom tojaʼ naq kixqʼus laj Pedro ut kixye re: «Elen chinkʼatq at aj Tza! Xbʼaan naq moko yookat ta chi kʼoxlak joʼ nakʼoxlak li Yos, yookat bʼan chi kʼoxlak joʼ nakʼoxlak li winq».
34 Tojaʼ naq kixbʼoq li kʼiila tenamit ut ebʼ li xtzolom ut kixye rehebʼ: «Li naraj wank choʼq intzolom, inkʼaʼ chik twanq joʼ naraj aʼan, tento tixkʼulubʼa li rahobʼtesiik* ut mixkanabʼ intaqenkil.
35 Xbʼaan naq li naraj xkolbʼal xyuʼam tixsach, abʼan li tixsach xyuʼam saʼ inkʼabʼaʼ ut saʼ xkʼabʼaʼ li chaabʼil esil, tixkol xyuʼam.
36 Kʼaru rusilal tixtaw junaq winq wi xbʼaan xtawbʼal li kʼaʼaq re ru li wank saʼ ruuchichʼochʼ tixsach li xyuʼam?
37 Xbʼaan naq, kʼaru truuq xkʼebʼal junaq winq choʼq reqaj li xyuʼam?
38 Li tenamit li wank chiruhebʼ li kutan aʼin aj maak ut ak xtzʼeqtaana li Yos. Wi jun li qas qiitzʼin naxutaanak inbʼaan ut xbʼaan li waatin chiru li tenamit aʼin, li Ralal li Winq txutaanaq ajwiʼ xbʼaan li qas qiitzʼin aʼin naq aʼan tchalq rikʼin li xloqʼal li Xyuwaʼ rochbʼeenebʼ li xʼánjel li sikʼbʼilebʼ ru.
Xtzʼaqobʼ ebʼ li naʼlebʼ
^ Malaj «li kisobʼrin».
^ Malaj «li kayuuk».
^ Malaj «li kayuuk».
^ Malaj «li kayuuk».
^ Malaj «li kisobʼrin».
^ Malaj «li kisobʼrin».
^ Malaj «tixpaqo li cheʼ re rahobʼtesiik». Taawil xchʼolobʼankil li aatin, cheʼ re rahobʼtesiik.
