Marcos 9:1-50
-
Najalaak li xjunxaqalil li Jesús (1-13)
-
Naxkʼirtasi jun li saaj al li echaninbʼil xbʼaan maaʼus aj musiqʼej (14-29)
-
«Chixjunil naruhank chiru li naxpaabʼ li Yos» (23)
-
-
Li Jesús naxye wiʼ chik chi rubʼelaj li xkamik (30-32)
-
Ebʼ li xtzolom nekeʼxchoqi ribʼ chirix ani li nim (33-37)
-
«Li inkʼaʼ xikʼ nokooril, naʼokenk chiqix» (38-41)
-
Li naʼlebʼ li nakʼehok chi maakobʼk (42-48)
-
«Laaʼex joʼkaqex li atzʼam» (49, 50)
9 Joʼkan ajwiʼ kixye rehebʼ: «Relik chi yaal ninye eere naq wiibʼ oxibʼ rehebʼ li wankebʼ arin maajoqʼe teʼkamq wi toj maajiʼ nekeʼril chi kʼojobʼanbʼil* li Xʼawabʼejilal li Yos rikʼin xwankilal».
2 Naq ak xnumeʼk waqibʼ kutan, li Jesús kixkʼam laj Pedro, laj Santiago ut laj Juan saʼ jun li tzuul li najt xteram bʼarwiʼ xeʼwank xjunesebʼ. Ut li Jesús kijalaak li xtibʼel chiruhebʼ.
3 Li xtʼikr kiʼok chi lemtzʼunk ut saq saq kiwulak. Maakʼaʼ junaq aj puchʼunel saʼ ruuchichʼochʼ li truuq raj xsaqobʼresinkil chi joʼkan.
4 Ut xaqamil laj Moisés ut laj Elías chiruhebʼ, yookebʼ chi seeraqʼik rikʼin li Jesús.
5 Tojaʼ naq laj Pedro kixye re li Jesús: «At Kʼutunel,* us naq wanko arin! Qayiibʼaq oxibʼ li kokʼ ochoch: jun choʼq aawe, jun choʼq re laj Moisés ut jun choʼq re laj Elías».
6 Abʼan laj Pedro inkʼaʼ naxnaw chanru tnaʼlebʼaq xbʼaan naq kʼajoʼebʼ xxiw.
7 Tojaʼ naq kichalk jun li choql li kimuqunk rehebʼ, ut saʼ li choql kiʼelk chaq jun xyaabʼ kuxej li kixye: «Aʼin li Walal, li qʼaxal raaro inbʼaan. Cheerabʼihaq».
8 Naq xeʼilok saʼ xsutamebʼ, xeʼxkʼe reetal naq maaʼani chik wank rikʼinebʼ, kaʼaj chik li Jesús.
9 Naq yookebʼ chaq chi kubʼeek saʼ li tzuul, li Jesús chi chʼolchʼo ru kixye rehebʼ naq maaʼani ajʼe teʼxye li xeʼril toj naq li Ralal li Winq twaklesiiq chi yoʼyo saʼ xyanqebʼ li kamenaq.
10 Ebʼ li xtzolom xeʼxpaabʼ li kixye rehebʼ, abʼan xeʼok xpatzʼinkil chiribʼilebʼ ribʼ kʼaru xyaalal naq twaklesiiq chi yoʼyo saʼ xyanqebʼ li kamenaq.
11 Ut xeʼok xpatzʼinkil re li Jesús: «Chanru naq ebʼ laj tzʼiibʼ nekeʼxye naq laj Elías tkʼulunq xbʼeenwa?».
12 Aʼan kixye rehebʼ: «Yaal, laj Elías tento tkʼulunq xbʼeenwa ut tixtus wiʼ chik chixjunil saʼ xnaʼaj.* Abʼanan, kʼaʼut naq tzʼiibʼanbʼil naq li Ralal li Winq tixkʼul naabʼal li rahilal ut ttzʼeqtaanaaq?
13 Abʼanan laaʼin ninye eere naq laj Elías ak xkʼulunk chik, ut xeʼxbʼaanu re li xeʼraj, joʼ chanru tzʼiibʼanbʼil chaq naq tkʼulmanq chirix».
14 Naq xeʼwulak bʼarwiʼ wankebʼ li junchʼol chi tzolom, xeʼril naq sutsukebʼ xbʼaan li kʼiila tenamit ut yookebʼ chi choqiik xbʼaan wiibʼ oxibʼ laj tzʼiibʼ.
15 Ut naq ebʼ li qas qiitzʼin xeʼril ru li Jesús, sachsokebʼ xeʼkanaak ut xkohebʼ saʼ aanil chi xkʼebʼal xsahil xchʼool.
16 Ut li Jesús kixpatzʼ rehebʼ: «Chirix kʼaru yookex xchoqinkilebʼ?».
17 Jun rehebʼ li qas qiitzʼin li wank saʼ xyanq li kʼiila tenamit kixye re: «At Kʼutunel, xinkʼam chaq aawe li walal xbʼaan naq li maaʼus aj musiqʼej li naʼechanink re kixkanabʼ chi mem.
18 Rajlal naq naxrahobʼtesi li saaj al, naxkut saʼ chʼochʼ, naʼelk woqx saʼ re, naxkʼuxuxi li ruch re ut nakanaak chi maakʼaʼ xmetzʼew. Xinye rehebʼ laatzolom naq teʼrisi li maaʼus aj musiqʼej rikʼin abʼan inkʼaʼ xeʼruuk».
19 Kichaqʼok li Jesús ut kixye rehebʼ: «Li tenamit li wank chiruhebʼ li kutan aʼin inkʼaʼ naxpaabʼ li Yos! Joʼ najtil chik wanqin eerikʼin? Joʼ najtil chik texinkuy? Kʼamomaq chaq we».
20 Joʼkan naq xeʼxkʼam chaq re li Jesús li saaj al. Ut naq li maaʼus aj musiqʼej kiril ru li Jesús, kixchiqʼle chi kaw li saaj al. Naq ak wank chik chiru chʼochʼ li saaj al, kixtolkʼosi ribʼ ut kiʼok chi elk woqx saʼ re.
21 Tojaʼ naq li Jesús kixpatzʼ re li yuwaʼbʼej: «Joqʼe kiʼok xkʼulbʼal aʼin?». Aʼan kixye re: «Chalen chaq saʼ xkachʼinal.
22 Li maaʼus aj musiqʼej naabʼal sut kixkut saʼ xaml malaj saʼ haʼ re xkamsinkil. Abʼan, wi wank tatruuq xbʼaanunkil, toqʼobʼa qu* ut tenqʼaho».
23 Li Jesús kixye re: «Kʼaʼut nakaaye, “wi tatruuq”...? Chixjunil naruhank chiru li naxpaabʼ li Yos».
24 Saʼ junpaat kixye li xyuwaʼ li saaj al: «Laaʼin ninpaabʼ li Yos! Abʼan, tenqʼahin re naq wanq xtzʼaqobʼ linpaabʼal!».
25 Naq li Jesús kixkʼe reetal naq li kʼiila tenamit kichalk saʼ aanil chi xtawbʼalebʼ, kixqʼus li maaʼus aj musiqʼej. Ut kixye re: «Mem ut tzʼapxik aj musiqʼej, ninye aawe naq elen rikʼin ut mat-ok chik!».
26 Li maaʼus aj musiqʼej xbʼeenwa kixjap re ut naabʼal sut kixchiqʼle chi kaw li saaj al, tojaʼ naq kiʼelk rikʼin. Chanchan kamenaq kikanaak li saaj al. Joʼkan naq kachʼin chik ma chixjunilebʼ xeʼxye: «Xkamk chik!».
27 Abʼan li Jesús kixchap chi ruqʼ ut kixwaklesi, ut li al kixaqli.
28 Naq li Jesús ut ebʼ li xtzolom xeʼok saʼ jun li ochoch, aʼanebʼ xeʼxpatzʼ re, naq wank xjunes: «Kʼaʼut laaʼo inkʼaʼ xooruuk risinkil li maaʼus aj musiqʼej?».
29 Li Jesús kixye rehebʼ: «Ebʼ li maaʼus aj musiqʼej joʼ aʼin kaʼajwiʼ rikʼin tijok naruhank risinkil».
30 Tojaʼ naq xeʼelk aran ut xeʼnumeʼk saʼ xbʼehil Galilea, abʼan li Jesús inkʼaʼ kiraj naq ebʼ li qas qiitzʼin teʼnawoq re
31 xbʼaan naq yook xkawresinkilebʼ li xtzolom. Kixye rehebʼ: «Li Ralal li Winq tqʼaxtesiiq saʼ ruqʼebʼ li winq ut tkamsiiq. Abʼan, usta tkamsiiq, saʼ rox kutan twaklesiiq chi yoʼyo».
32 Ebʼ li xtzolom inkʼaʼ xeʼxtaw ru li kixye ut nekeʼxuwak chi xpatzʼbʼal re.
33 Ut xeʼok Capernaúm. Naq ak wankebʼ saʼ ochoch kixpatzʼ rehebʼ: «Chirix kʼaru nekeechoqi chaq eeribʼ saʼ bʼe?».
34 Inkʼaʼ xeʼchaqʼok xbʼaan naq saʼ bʼe yookebʼ chaq xchoqinkil ribʼebʼ chirix ani li nim.
35 Joʼkan naq kichunlaak li Jesús, kixbʼoq li Kabʼlaju ut kixye rehebʼ: «Li naraj wank chiʼubʼej tento tixkʼe ribʼ chiʼixbʼej ut aʼanaq laj kʼanjel chiruhebʼ chixjunil».
36 Tojaʼ naq kixchap jun li chʼinaʼal, kixkʼe saʼ xyiihebʼ, kixqʼalu ut kixye rehebʼ:
37 «Li naxkʼul jun rehebʼ li kokʼal aʼin saʼ inkʼabʼaʼ, nikinxkʼul ajwiʼ laaʼin; ut li nakʼuluk we moko kaʼaj tawiʼ nikinxkʼul laaʼin, naxkʼul ajwiʼ li kitaqlank chaq we».
38 Laj Juan kixye re: «At Kʼutunel, xqil naq jun li qas qiitzʼin yook roksinkil laakʼabʼaʼ re risinkil ebʼ li maaʼus aj musiqʼej; abʼan xqayal xrambʼal chiru xbʼaan naq moko yook ta chaq chiqix».
39 Abʼan li Jesús kixye: «Meeram chiru xbʼaan naq maaʼani naru xbʼaanunkil jun li sachbʼachʼoolej saʼ inkʼabʼaʼ wi yook chi aatinak chirix injolom.
40 Xbʼaan naq li inkʼaʼ xikʼ nokooril, naʼokenk chiqix.
41 Ut relik chi yaal ninye eere, li tixkʼe jun sekʼaq eehaʼ xbʼaan naq laaʼex xtzolom li Kriist, maajoqʼe teʼkanaaq chi inkʼaʼ ta teʼxkʼul xqʼajkamunkil.
42 Abʼan wi junaq li qas qiitzʼin tixkʼe chi maakobʼk jun rehebʼ li kachʼin aʼin li nikinxpaabʼ, qʼaxal us raj choʼq re, naq tkʼemanq chi xkux li xpekul li keʼlebʼ li nekeʼxsurisi ebʼ li bʼuur ut tkuteʼq saʼ palaw.
43 »Wi saʼ jun kutan laawuqʼ tatxkʼe chi maakobʼk, yokʼ. Qʼaxal us choʼq aawe xtawbʼal li yuʼam rikʼin jun laawuqʼ chiru naq rikʼin xkabʼichal laawuqʼ tat-osoʼq chi junajwa* rikʼin li xaml li inkʼaʼ nachup.
44 *
45 Ut wi laawoq tatxkʼe chi maakobʼk, yokʼ. Qʼaxal us choʼq aawe xtawbʼal li yuʼam rikʼin jun laawoq chiru naq rikʼin xkabʼichal laawoq tat-osoʼq chi junajwa.*
46 *
47 Ut wi laawu tatxkʼe chi maakobʼk, kut chi najt. Qʼaxal us choʼq aawe naq tat-oq saʼ li Xʼawabʼejilal li Yos rikʼin jun laawu chiru naq tat-osoʼq chi junajwa* rikʼin xkabʼichal laawu
48 bʼarwiʼ li motzoʼ inkʼaʼ nakamk ut li xaml inkʼaʼ nachup.
49 »Xbʼaan naq chixjunilebʼ teʼatzʼamiiq rikʼin xaml.
50 Qʼaxal chaabʼil li atzʼam. Abʼan, wi li atzʼam nasach xmetzʼew, rikʼin kʼaru tkʼemanq wiʼ chik xsahil? Laaʼex joʼkaqex li atzʼam ut meekanabʼ wank saʼ tuqtuukilal cheeribʼil eeribʼ».
Xtzʼaqobʼ ebʼ li naʼlebʼ
^ Malaj «chi chalk».
^ Saʼ griego «Rabí».
^ Malaj «tixʼakʼobʼresi chixjunil».
^ Malaj «uxtaana qu».
^ Saʼ griego «Gehena». Taawil xchʼolobʼankil li aatin, Gehena.
^ Li raqal aʼin natawmank saʼ wiibʼ oxibʼ li Santil Hu. Abʼan moko natawmank ta saʼ chixjunil ebʼ li najteril hu li tzʼaqal re ru li wank saʼ griego.
^ Saʼ griego «Gehena». Taawil xchʼolobʼankil li aatin, Gehena.
^ Li raqal aʼin natawmank saʼ wiibʼ oxibʼ li Santil Hu. Abʼan moko natawmank ta saʼ chixjunil ebʼ li najteril hu li tzʼaqal re ru li wank saʼ griego.
^ Saʼ griego «Gehena». Taawil xchʼolobʼankil li aatin, Gehena.
