Mateo 1:1-25
1 Li hu aʼin naxye resil li xyuʼam li Jesukriist,* ralal laj David, ralal laj Abrahán.
2 Laj Abrahán aʼan chaq xyuwaʼ laj Isaac;laj Isaac aʼan chaq xyuwaʼ laj Jacob;laj Jacob aʼan chaq xyuwaʼ laj Judá ut ebʼ li junchʼol chik chi ralal;
3 laj Judá aʼan chaq xyuwaʼ laj Pérez ut laj Zérah, li xnaʼebʼ aʼan li xTamar;laj Pérez aʼan chaq xyuwaʼ laj Hezrón;laj Hezrón aʼan chaq xyuwaʼ laj Ram;
4 laj Ram aʼan chaq xyuwaʼ laj Aminadab;laj Aminadab aʼan chaq xyuwaʼ laj Nahsón;laj Nahsón aʼan chaq xyuwaʼ laj Salmón;
5 laj Salmón aʼan chaq xyuwaʼ laj Boaz, li xnaʼ aʼan li xRahab;laj Boaz aʼan chaq xyuwaʼ laj Obed, li xnaʼ aʼan li xRut;laj Obed aʼan chaq xyuwaʼ laj Jesé;
6 laj Jesé aʼan chaq xyuwaʼ li awabʼej David.Laj David aʼan chaq xyuwaʼ laj Salomón, li xnaʼ aʼan li rixaqil laj Urías;
7 laj Salomón aʼan chaq xyuwaʼ laj Rehoboam;laj Rehoboam aʼan chaq xyuwaʼ laj Abías;laj Abías aʼan chaq xyuwaʼ laj Asá;
8 laj Asá aʼan chaq xyuwaʼ laj Jehosafat;laj Jehosafat aʼan chaq xyuwaʼ laj Jehoram;laj Jehoram aʼan chaq xyuwaʼ laj Uzías;
9 laj Uzías aʼan chaq xyuwaʼ laj Jotán;laj Jotán aʼan chaq xyuwaʼ laj Acaz;laj Acaz aʼan chaq xyuwaʼ laj Ezequías;
10 laj Ezequías aʼan chaq xyuwaʼ laj Manasés;laj Manasés aʼan chaq xyuwaʼ laj Amón;laj Amón aʼan chaq xyuwaʼ laj Josías;
11 laj Josías aʼan chaq xyuwaʼ laj Jeconías ut ebʼ li junchʼol chik chi ralal naq xeʼkʼameʼk laj judiiy aran Babilonia.
12 Aran Babilonia laj Jeconías kiwank jun li ralal aʼ laj Sealtiel;laj Sealtiel aʼan chaq xyuwaʼ laj Zorobabel;
13 laj Zorobabel aʼan chaq xyuwaʼ laj Abiud;laj Abiud aʼan chaq xyuwaʼ laj Eliaquim;laj Eliaquim aʼan chaq xyuwaʼ laj Azor;
14 laj Azor aʼan chaq xyuwaʼ laj Sadoc;laj Sadoc aʼan chaq xyuwaʼ laj Aquim;laj Aquim aʼan chaq xyuwaʼ laj Eliud;
15 laj Eliud aʼan chaq xyuwaʼ laj Eleazar;laj Eleazar aʼan chaq xyuwaʼ laj Mattán;laj Mattán aʼan chaq xyuwaʼ laj Jacob;
16 laj Jacob aʼan chaq xyuwaʼ laj José, li xbʼeelom li xMaría, ut li xMaría aʼan chaq xnaʼ li Jesús, li nakʼabʼaʼiik Kriist.
17 Aʼin xkomonil li junkabʼal li kiwank: kaalaju xkomonil li junkabʼal, chalen saʼ xqʼehil laj Abrahán toj saʼ xqʼehil laj David; kaalaju xkomonil li junkabʼal, chalen saʼ xqʼehil laj David toj naq xeʼkʼameʼk ebʼ laj judiiy aran Babilonia; ut kaalaju xkomonil li junkabʼal, chalen naq xeʼkʼameʼk Babilonia toj saʼ xqʼehil li Kriist.
18 Aʼin kikʼulmank naq toj maajiʼ nayoʼlaak li Jesukriist. Li xMaría, li xnaʼ li Jesús, ak wank saʼ aatin rikʼin laj José re naq teʼsumlaaq. Abʼan naq toj maajiʼ nekeʼsumlaak, li xMaría kikanaak saʼ yuʼam saʼ xkʼabʼaʼ li santil musiqʼej.*
19 Laj José* chaabʼil winq ut inkʼaʼ kiraj naq li xMaría tkanaaq saʼ xutaan chiruhebʼ li junchʼol, joʼkan naq kixkʼoxla xkanabʼankil* saʼ muqmu.
20 Naq ak xkʼoxla chixjunil aʼin, li xʼánjel li Jehobʼa* kixkʼut ribʼ saʼ xmatkʼ ut kixye re: «José, ralal laj David, matxuwak chi xkʼambʼal li xMaría saʼ laawochoch re naq twanq choʼq aawixaqil xbʼaan naq xkanaak saʼ yuʼam saʼ xkʼabʼaʼ li santil musiqʼej.
21 Li xMaría twanq jun xyum ut Jesús* taakʼe choʼq xkʼabʼaʼ xbʼaan naq aʼan tixkuy ut tixsach xmaak* li xtenamit».
22 Chixjunil aʼin kikʼulmank re naq ttzʼaqloq ru li kixye li Jehobʼa* saʼ xkʼabʼaʼ li xpropeet:
23 «Kʼehomaq reetal, li ixqaʼal* li maajiʼ nawank rikʼin winq tkanaaq saʼ yuʼam ut twanq jun xyum ut Emmanuel tixkʼe choʼq xkʼabʼaʼ», chi jalbʼil ru naraj xyeebʼal, «li Yos wank qikʼin».
24 Ut naq laj José kiʼajk ru, kixbʼaanu li kʼaru kiyeeheʼk re xbʼaan li xʼánjel li Jehobʼa* ut kixkʼam li xMaría saʼ rochoch re naq twanq choʼq rixaqil.
25 Abʼan laj José inkʼaʼ kiwank rikʼin li rixaqil toj naq kiyoʼlaak li kʼuulaʼal. Ut laj José, Jesús kixkʼe choʼq xkʼabʼaʼ li kʼuulaʼal.
Xtzʼaqobʼ ebʼ li naʼlebʼ
^ Malaj «li Jesús li Mesiiy». Li uuchil kʼabʼaʼej Kriist ut Mesiiy naraj xyeebʼal “yulbʼil ru” malaj “sikʼbʼil ru”.
^ Malaj «li xmetzʼew li Yos».
^ Saʼ griego «Laj José li xbʼeelom». Chiruhebʼ laj judiiy, li winq ut li ixq li wankebʼ saʼ aatin re sumlaak, sumsukebʼ chik.
^ Malaj «xjachbʼal li xsumlajik». Chiruhebʼ laj judiiy, jun li sumal moko wank ta chik saʼ aatin re sumlaak wi naxjach li xsumlajik.
^ Saʼebʼ li raqal re xtasalil li Santil Hu aʼin natawmank 241 sut li xkʼabʼaʼ li Yos, Jehobʼa, ut aʼin li xbʼeen sut. Taawil xchʼolobʼankil li aatin, Jehobʼa.
^ Li kʼabʼaʼej aʼin naxchap ribʼ rikʼin li kʼabʼaʼej saʼ hebreo Jesúa malaj Josué li naraj xyeebʼal “Li Jehobʼa nakolok”.
^ Saʼ griego «kolok».
^ Taawil xchʼolobʼankil li aatin, Jehobʼa.
^ Malaj «li tuqʼixq».
^ Taawil xchʼolobʼankil li aatin, Jehobʼa.
