Mateo 11:1-30
11 Naq li Jesús kiraqeʼk xchaqʼrabʼinkil li xkabʼlaju chi tzolom, kiʼelk aran ut xkoho chi kʼutuk ut xkʼebʼal chi naweʼk li chaabʼil esil saʼebʼ li tenamit li wank chi xsutamebʼ.
2 Laj Juan, aj Kubʼsihomhaʼ, wank chaq saʼ tzʼalam. Naq kirabʼi li kʼanjel li yook xbʼaanunkil li Kriist, kixtaqlahebʼ li xtzolom
3 chi xpatzʼbʼal re: «Ma laaʼat li tento tkʼulunq, malaj tento tqoybʼeni jalan chik?».
4 Kichaqʼok li Jesús ut kixye rehebʼ: «Ayuqex ut seeraqʼimaq re laj Juan li yookex rilbʼal ut rabʼinkil:
5 anaqwan ebʼ li mutzʼ nekeʼilok, ebʼ li yeq roq nekeʼbʼeek, ebʼ li saqlep nekeʼkʼirtasiik, ebʼ li tzʼap xik nekeʼabʼink, ebʼ li kamenaq nekeʼwaklesiik chi yoʼyo ut nakʼemank chi naweʼk li chaabʼil esil rehebʼ li nebʼaʼ.
6 Sa saʼ xchʼool li inkʼaʼ nawiibʼank ru xchʼool chiwix».*
7 Naq xkohebʼ li winq, li Jesús kiʼok chi aatinak rikʼin li kʼiila tenamit chirix laj Juan ut kixye rehebʼ: «Kʼaru xkohex rilbʼal saʼ li chaqichʼochʼ? Ma li tañil* li ekʼasinbʼil xbʼaan li kawil iqʼ?
8 Kʼaru xkohex rilbʼal chi joʼkanan? Ma jun li winq li tiqto rikʼin chaabʼil tʼikr? Xbʼaan naq li tiqtokebʼ rikʼin chaabʼil tʼikr wankebʼ saʼ rochoch awabʼej!
9 Abʼan, kʼaru xkohex rilbʼal? Ma jun li propeet? Joʼkan, ut naxqʼax wiʼ chik ru jun li propeet.
10 Chirix li winq aʼin tzʼiibʼanbʼil chaq: “Kʼe reetal, tintaqla lintaql chaawu re naq aʼan tixkawresi laabʼe”.
11 Relik chi yaal ninye eere naq saʼ xyanqebʼ li winq maakʼaʼ junaq li qas qiitzʼin li qʼaxal nim chiru laj Juan, aj Kubʼsihomhaʼ. Abʼanan, li kachʼin saʼ li Xʼawabʼejilal li choxa qʼaxal nim chiru aʼan.
12 Chalen chaq naq laj Juan, aj Kubʼsihomhaʼ, kiʼok xkʼebʼal resil li Yos, ebʼ li qas qiitzʼin yookebʼ xkʼebʼal xqʼe re ok saʼ li Xʼawabʼejilal li choxa. Ut li nekeʼxkʼe xqʼe chirix, nekeʼxtaw.*
13 Xbʼaan naq li Chaqʼrabʼ ut ebʼ li propeet xeʼxkanabʼ xyeebʼal li tkʼulmanq naq kiwulak laj Juan.
14 Teeraj xkʼulubʼankil malaj inkʼaʼ, aʼan “laj Elías li tento tkʼulunq”.
15 Li wank xxik chixkʼehaq xchʼool chi abʼink.
16 »Rikʼin ani tinjuntaqʼeeta li tenamit li wank chiruhebʼ li kutan aʼin? Chanchanebʼ li kokʼal li chunchukebʼ saʼ kʼayil, nekeʼxjap re chi xyeebʼal rehebʼ li rechbʼatzʼunelil:
17 “Xqayaabʼasi li xolbʼ choʼq eere abʼan inkʼaʼ xexxajok; xqabʼicha li rahil bʼich abʼan inkʼaʼ xeeten re leemaqabʼ xbʼaan xrahil eechʼool”.
18 Xbʼaan naq kiwulak laj Juan li inkʼaʼ nawaʼak chi moko narukʼ li bʼiin ut ebʼ li qas qiitzʼin nekeʼxye: “Wank maaʼus aj musiqʼej rikʼin”.
19 Ut xwulak li Ralal li Winq li nawaʼak ut naʼukʼaʼk, ut ebʼ li qas qiitzʼin nekeʼxye: “Kʼehomaq reetal, li winq aʼin nanumwaʼak ut narukʼ li bʼiin ut wank choʼq ramiiwebʼ laj maak ut li nekeʼxchʼutubʼ li toj choʼq re li awabʼej”. Abʼanan, rikʼin xchaabʼilal ru li xbʼaanuhom tixkʼutbʼesi naq wank xnaʼlebʼ».
20 Tojaʼ naq kiʼok xqʼusbʼal ebʼ li tenamit bʼarwiʼ kixbʼaanu li xkʼihalil li sachbʼachʼoolej xbʼaan naq inkʼaʼ xeʼxjal xnaʼlebʼ ut inkʼaʼ xeʼxyotʼ xchʼool:
21 «Ra tchalq saʼ aabʼeen, at Corazín! Ra tchalq saʼ aabʼeen, at Betsaida! Laaʼex xeeril ebʼ li sachbʼachʼoolej saʼ leetenamit, abʼan wi li tenamit Tiro ut Sidón xeʼril raj aʼin, junxil raj chik xeʼxyotʼ xchʼool ut xeʼxjal xnaʼlebʼ. Ut xeʼxtiqibʼ raj ribʼ rikʼin qʼesnal tʼikr ut xeʼchunlaak raj saʼ cha.
22 Ninye eere naq saʼ Xkutankil li Raqok Aatin qʼaxal ra wiʼ chik teekʼul laaʼex chiru li kixkʼul chaq Tiro ut Sidón.
23 Ut laaʼat, Capernaúm, ma nakaakʼoxla naq li Yos tatxtaqsi saʼ xbʼeen chixjunil? Maajoqʼe bʼiʼanan, tatxkubʼsi bʼan saʼ li Muqlebʼaal Kamenaq.* Xbʼaan naq, wi li sachbʼachʼoolej li kibʼaanumank aawikʼin, kibʼaanumank raj Sodoom, toj wank raj li tenamit aʼin.
24 Ninye aawe naq saʼ Xkutankil li Raqok Aatin qʼaxal ra wiʼ chik taakʼul laaʼat chiru li kixkʼul chaq Sodoom».
25 Saʼebʼ li kutan aʼan, li Jesús kixye: «At Inyuwaʼ, laaʼat li Qaawaʼ re li choxa ut re li ruuchichʼochʼ, ninkʼe aaloqʼal chiruhebʼ li junchʼol xbʼaan naq xaamuq ebʼ li naʼlebʼ aʼin chiruhebʼ li wankebʼ xnaʼlebʼ ut chiruhebʼ li seebʼebʼ xchʼool ut xaakʼe chixnaw chiruhebʼ li kubʼenaqebʼ xwankil, li chanchanebʼ kokʼal.
26 At Inyuwaʼ xaabʼaanu aʼin xbʼaan naq xaawil naq us».
27 Kixye ajwiʼ: «Linyuwaʼ kixkʼe saʼ wuqʼ chixjunil. Maaʼani naxnaw ru chiʼus li Alalbʼej, kaʼajwiʼ li Yuwaʼbʼej. Ut maaʼani naxnaw ru chiʼus li Yuwaʼbʼej, kaʼajwiʼ li Alalbʼej, ut li Alalbʼej naxnaw chiru ani tixkʼe chi naweʼk chirix li Yuwaʼbʼej.
28 Chalqex wikʼin, cheejunilex, li nekexkʼanjelak chi kaw ut aal eeriiq, ut laaʼin texinkʼe chi hilank.
29 Chalqex ut kʼanjelaqex wikʼin,* ut tzolomaq eere wikʼin xbʼaan naq tuulanin ut qʼun linchʼool. Laaʼin texinkʼe chi hilank.
30 Xbʼaan naq moko kaw ta kʼanjelak wikʼin* ut moko aal ta li wiiq».
Xtzʼaqobʼ ebʼ li naʼlebʼ
^ Malaj «inkʼaʼ natichkʼok saʼ inkʼabʼaʼ».
^ Malaj «li kaxlanʼaj».
^ Saʼ griego «nekeʼrechani».
^ Malaj «saʼ li Hades». Taawil xchʼolobʼankil li aatin, Hades.
^ Saʼ griego «teekʼulubʼa linbʼitcheʼ». Li cheʼ aʼin nakʼemank saʼ xbʼeenebʼ li xtel ebʼ li qas qiitzʼin ut saʼ xbʼeenebʼ li xul re naq teʼruuq xkʼambʼal li riiq.
^ Saʼ griego «linbʼitcheʼ». Li cheʼ aʼin nakeʼmank saʼ xbʼeenebʼ li xtel ebʼ li qas qiitzʼin ut saʼ xbʼeenebʼ li xul re naq teʼruuq xkʼambʼal li riiq.
