Mateo 12:1-50
-
Li Jesús aʼan «li Qaawaʼ re li sábado» (1-8)
-
Naxkʼirtasi li ruqʼ jun li winq li inkʼaʼ naʼekʼank li ruqʼ (9-14)
-
Laj kʼanjel chiru li Yos li raaro xbʼaan (15-21)
-
Narisi ebʼ li maaʼus aj musiqʼej saʼ xkʼabʼaʼ li santil musiqʼej (22-30)
-
Li maak li inkʼaʼ nakuyeʼk (31, 32)
-
Li cheʼ nanaweʼk ru xbʼaan li naruuchi (33-37)
-
Li sachbʼachʼoolej chirix laj Jonás (38-42)
-
Naq jun li maaʼus aj musiqʼej nasutqʼiik rikʼin junaq li qas qiitzʼin (43-45)
-
Li xnaʼ ut ebʼ li riitzʼin li Jesús (46-50)
12 Saʼebʼ li kutan aʼan saʼ jun li sábado,* li Jesús kinumeʼk saʼ xyanq li awimq. Ut saʼ xkʼabʼaʼ naq ebʼ li xtzolom teʼtzʼokaaq, xeʼok xchʼoqbʼal wiibʼ oxibʼ ru li awimq ut xeʼxwaʼ.
2 Naq ebʼ laj pariseey xeʼril aʼin, xeʼxye re li Jesús: «Kʼe reetal! Ebʼ laatzolom yookebʼ xbʼaanunkil saʼ sábado* li moko kʼulubʼanbʼil ta xbʼaan li chaqʼrabʼ».
3 Li Jesús kixye rehebʼ: «Ma inkʼaʼ eerilom saʼ li Raatin li Yos li kixbʼaanu laj David naq aʼan ut ebʼ li xmoos yookebʼ chaq xtzʼokajik?
4 Ma inkʼaʼ tabʼiʼ kiʼok laj David saʼ rochoch li Yos, ut aʼan ut ebʼ li xmoos xeʼxwaʼ li kaxlanwa li yeechiʼinbʼil chiru li Yos?* Ut maaʼani kʼebʼil xleseens chi xwaʼbʼal li kaxlanwa, kaʼajwiʼ ebʼ laj tij.
5 Joʼkan ajwiʼ, ma inkʼaʼ eerilom saʼ Xchaqʼrabʼ laj Moisés naq saʼebʼ li kutan sábado* naq ebʼ laj tij li nekeʼkʼanjelak saʼ rochoch li Yos inkʼaʼ nekeʼroxloqʼi li kutan aʼin ut moko xbʼaan ta aʼin ilbʼilebʼ naq wankebʼ xmaak?
6 Abʼan ninye eere naq arin wank li qʼaxal nim xwankil chiru li rochoch li Yos.
7 Wi xeetaw raj ru xyaalalil li aatin: “Inkʼaʼ nawaj naq texmayejaq xul, nawaj bʼan naq teetoqʼobʼa ruhebʼ* li junchʼol” inkʼaʼ raj xeeye naq teʼxtoj xmaak li maakʼaʼebʼ xmaak.
8 Xbʼaan naq li Ralal li Winq aʼan li Qaawaʼ re li sábado».*
9 Naq xʼelk aran, xkoho saʼ li naʼaj bʼarwiʼ nekeʼloqʼonink ebʼ laj judiiy,
10 ut aran wank jun li winq li inkʼaʼ naʼekʼank li ruqʼ. Ut re naq teʼruuq xqʼabʼankil li Jesús, xeʼxpatzʼ re: «Ma naxkʼulubʼa li chaqʼrabʼ naq tkʼirtasiiq junaq li qas qiitzʼin saʼ sábado?».*
11 Li Jesús kixye rehebʼ: «Wi junaq leekarneer natʼaneʼk saʼ jul saʼ li kutan sábado,* ma inkʼaʼ raj teechap ut teerisi aran?
12 Qʼaxal loqʼ wiʼ chik junaq li winq chiru junaq li karneer. Joʼkan naq li chaqʼrabʼ naxkʼulubʼa naq tbʼaanumanq li us saʼ sábado».*
13 Tojaʼ naq kixye re li winq: «Yeʼ laawuqʼ». Naq kixyeʼ, kikʼiraak li ruqʼ ut kikanaak joʼ li jun chik ruqʼ.
14 Abʼan ebʼ laj pariseey xeʼelk aran ut xeʼok xkʼubʼankil chanru teʼxkamsi li Jesús.
15 Saʼ xkʼabʼaʼ naq li Jesús kixnaw aʼin, kiʼelk aran. Naabʼalebʼ li qas qiitzʼin xeʼtaqenk re ut aʼan kixkʼirtasihebʼ.
16 Abʼan kixye rehebʼ chi chʼolchʼo ru naq maaʼani ajʼe teʼxye ani aʼan.
17 Chi joʼkan kitzʼaqlok ru li kixye chaq li Yos saʼ xkʼabʼaʼ li propeet Isaías:
18 «Kʼehomaq reetal, aʼin laj kʼanjel chiwu li xinsikʼ ru ut raaro inbʼaan, aʼan naxsahobʼresi linchʼool. Saʼ xbʼeen tinkʼe linsantil musiqʼej ut aʼan tixchʼolobʼ chiruhebʼ li tenamit chanru xbʼaanunkil li us.
19 Inkʼaʼ twechʼinq chi moko tixjap re. Ut maaʼani t-abʼinq re xyaabʼ xkux saʼebʼ li xnimal ru bʼe.
20 Inkʼaʼ tixtoq li tañil* li ak toqol chik chi moko tixchup xsaqenkil li noqʼ li raachisa naloch, toj reetal naq aʼan tixtuqubʼ ru chixjunil li moko us ta.
21 Chʼolchʼo tzʼaqal naq ebʼ li tenamit teʼxkʼojobʼ xchʼool chirix li xkʼabʼaʼ».
22 Tojaʼ naq xeʼxkʼam chaq re li Jesús jun li winq mutzʼ, mem ut echaninbʼil xbʼaan jun li maaʼus aj musiqʼej. Ut li Jesús, kixkʼirtasi. Joʼkan naq, li winq kiruuk chi aatinak ut chi ilok.
23 Sachsokebʼ xchʼool xeʼkanaak ebʼ li tenamit ut xeʼok xyeebʼal: «Ma maawaʼ tabʼiʼ aʼin Ralal laj David?».
24 Naq xeʼrabʼi aʼin ebʼ laj pariseey, xeʼxye: «Li winq aʼin narisi ebʼ li maaʼus aj musiqʼej saʼ xkʼabʼaʼ laj Tza* li najolomink rehebʼ li maaʼus aj musiqʼej».
25 Saʼ xkʼabʼaʼ naq li Jesús naxnaw li yookebʼ xkʼoxlankil, kixye rehebʼ: «Jun li awabʼejilal tjukʼeʼq wi li nekeʼtzʼaqonk chirix nekeʼxpleeti ribʼ chiribʼilebʼ ribʼ, ut jun li tenamit malaj jun li junkabʼal* tjukʼeʼq wi li wankebʼ chisaʼ nekeʼxpleeti ribʼ chiribʼilebʼ ribʼ.
26 Joʼkan bʼiʼ, wi laj Tza narisi laj Tza, naraj xyeebʼal naq naxpleeti ribʼ xjunes. Wi joʼkan raj, li xʼawabʼejilal tjukʼeʼq.
27 Joʼkan ajwiʼ, wi laaʼin nawisi ebʼ li maaʼus aj musiqʼej saʼ xkʼabʼaʼ laj Tza,* saʼ xkʼabʼaʼ ani nekeʼisink maaʼus aj musiqʼej li nekeʼtaqenk eere? Joʼkan naq li nekeʼtaqenk eere teʼraqoq aatin saʼ eebʼeen.
28 Abʼan, wi laaʼin nawisi ebʼ li maaʼus aj musiqʼej saʼ xkʼabʼaʼ li xsantil musiqʼej li Yos, aʼin naraj xyeebʼal naq li Xʼawabʼejilal li Yos ak wank arin ut laaʼex inkʼaʼ xeekʼe reetal.
29 Joʼkan ajwiʼ, wi junaq li qas qiitzʼin naraj ok saʼ rochoch jun li winq li kaw xmetzʼew ut naraj relqʼankil li kʼaru re, peʼyaal naq xbʼeenwa tixbʼakʼ li winq li kaw xmetzʼew? Kaʼajwiʼ chi joʼkan truuq relqʼankil li kʼaru re.
30 Li moko wank ta wikʼin, xikʼ nikinril ut li inkʼaʼ nakʼanjelak wochbʼeen re naq ebʼ li qas qiitzʼin teʼjiloq wikʼin, yook xnajtobʼresinkilebʼ chiwu.
31 »Laaʼin ninye eere naq ebʼ li winq teʼkuyeʼq xmaak aʼ yaal ma teʼxye li inkʼaʼ us,* abʼan wi junaq li qas qiitzʼin tixye li inkʼaʼ us chirix li santil musiqʼej,* inkʼaʼ tkuymanq xmaak.
32 Jun eetalil, li tixye li inkʼaʼ us chirix li Ralal li Winq tkuyeʼq xmaak; abʼan li tixye li inkʼaʼ us chirix li santil musiqʼej inkʼaʼ tkuyeʼq xmaak, maajoqʼe bʼiʼanan, chi moko saʼ li ruuchichʼochʼ aʼin chi moko saʼ li akʼ ruuchichʼochʼ* li tchalq moqon.
33 »Wi laaʼex jun chaabʼil cheʼ, chaabʼil texʼuuchinq; wi laaʼex qʼumet cheʼ, moko usta texʼuuchinq. Xbʼaan naq li cheʼ nanaweʼk ru xbʼaan li naruuchi.
34 Ex ral kʼantiʼ li wank eemay, chanru texruuq chi aatinak chirix li chaabʼil naʼlebʼ wi maaʼus leechʼool? Xbʼaan naq li naʼelk saʼ re junaq li qas qiitzʼin aʼan li wank saʼ xchʼool.
35 Li chaabʼil winq naʼaatinak chirix li chaabʼil naʼlebʼ xbʼaan naq chaabʼil li wank saʼ xchʼool; aʼut li winq li maaʼus xnaʼlebʼ naʼaatinak chirix li inkʼaʼ us xbʼaan naq maaʼusilal li wank saʼ xchʼool.
36 Chixjunil li aatin li teʼxye ebʼ li qas qiitzʼin chi maakʼaʼ rajbʼal traqmanq aatin saʼ xbʼeenebʼ chirix aʼin saʼ Xkutankil li Raqok Aatin.
37 Xbʼaan naq saʼ xkʼabʼaʼ laawaatin tyeemanq naq tiik laachʼool ut xbʼaan laawaatin tyeemanq naq wank aamaak».
38 Tojaʼ naq wiibʼ oxibʼ laj tzʼiibʼ ut ebʼ laj pariseey xeʼxye re: «At Kʼutunel naqaj naq taakʼe qe jun li sachbʼachʼoolej».
39 Ut li Jesús kixye rehebʼ: «Li tenamit li wank chiruhebʼ li kutan aʼin li kixtzʼeqtaana li Yos ut maaʼus xnaʼlebʼ, junelik naxpatzʼ jun li sachbʼachʼoolej, abʼan inkʼaʼ tkʼemanq re, kaʼajwiʼ li sachbʼachʼoolej chirix laj Jonás li propeet.
40 Xbʼaan naq joʼ chanru naq laj Jonás kiwank oxibʼ kutan ut oxibʼ qʼoqyink saʼ xsaʼ li nimla kar, li Ralal li Winq twanq oxibʼ kutan ut oxibʼ qʼoqyink saʼ li muqlebʼaal kamenaq.
41 Saʼ Xkutankil li Raqok Aatin, ebʼ laj Nínive teʼwakliiq chi yoʼyo rochbʼeen li tenamit li wank chiruhebʼ li kutan aʼin ut teʼxye naq tixtoj xmaak. Xbʼaan naq ebʼ aʼan xeʼxyotʼ xchʼool ut xeʼxjal xnaʼlebʼ naq xeʼrabʼi li esil li kixkʼe chixnawebʼ laj Jonás. Abʼan, kʼehomaq reetal, arin wank li qʼaxal nim chiru laj Jonás.
42 Ut saʼ Xkutankil li Raqok Aatin, li ixq li naʼawabʼejink aran Saba twakliiq chi yoʼyo rochbʼeen li tenamit li wank chiruhebʼ li kutan aʼin ut tixye naq li tenamit tixtoj xmaak. Xbʼaan naq aʼan kichalk toj saʼ xnajtil li ruuchichʼochʼ re rabʼinkil li xnaʼlebʼ laj Salomón. Abʼan, kʼehomaq reetal, arin wank li qʼaxal nim chiru laj Salomón.
43 »Naq jun li maaʼus aj musiqʼej* naʼelk rikʼin junaq li qas qiitzʼin nanumeʼk saʼebʼ li chaqichʼochʼ re xsikʼbʼal bʼar thilanq, abʼan inkʼaʼ naxtaw.
44 Tojaʼ naq naxye: “Tinsutqʼiiq wiʼ chik saʼ wochoch li xinʼelk wiʼ chaq”. Ut naq nawulak, naxtaw chi yamyo, chi mesunbʼil ut uutzʼuʼujinbʼil ru.
45 Tojaʼ naq naxik ut naxkʼam chirix wuqubʼ chik li maaʼus aj musiqʼej li numtajenaq wiʼ chik xmaaʼusilalebʼ chiru aʼan ut naq ak xeʼok rikʼin li winq aʼin, nekeʼkanaak aran. Ut li xwanjik li qas qiitzʼin aʼin numtajenaq wiʼ chik xyibʼal ru chiru naq xwank chaq. Aʼin tixkʼul li tenamit li maaʼus xnaʼlebʼ li wank chiruhebʼ li kutan aʼin».
46 Naq li Jesús yook chi aatinak rikʼinebʼ li qas qiitzʼin, li xnaʼ ut ebʼ li riitzʼin wankebʼ chirix kabʼl ut nekeʼraj aatinak rikʼin.
47 Tojaʼ naq jun rehebʼ li qas qiitzʼin kixye re: «Kʼe reetal laanaʼ ut ebʼ laawiitzʼin wankebʼ chirix kabʼl, ut nekeʼraj aawaatinankil».
48 Li Jesús kixsume li qas qiitzʼin aʼin ut kixye: «Ani linnaʼ ut anihebʼ li wiitzʼin?».
49 Ut kixkʼut rikʼin ruqʼ ebʼ li xtzolom, ut kixye: «Aʼinebʼ linnaʼ ut ebʼ li wiitzʼin!
50 Xbʼaan naq li naxbʼaanu li naraj Linyuwaʼ li wank saʼ choxa aʼan li wiitzʼin, li wanabʼ ut linnaʼ».
Xtzʼaqobʼ ebʼ li naʼlebʼ
^ Taawil xchʼolobʼankil li aatin, sábado.
^ Taawil xchʼolobʼankil li aatin, sábado.
^ Taawil xchʼolobʼankil li aatin, kaxlanwa li yeechiʼinbʼil chiru li Yos.
^ Taawil xchʼolobʼankil li aatin, sábado.
^ Malaj «teeruxtaana ruhebʼ».
^ Taawil xchʼolobʼankil li aatin, sábado.
^ Taawil xchʼolobʼankil li aatin, sábado.
^ Taawil xchʼolobʼankil li aatin, sábado.
^ Taawil xchʼolobʼankil li aatin, sábado.
^ Malaj «li kaxlanʼaj».
^ Saʼ griego «Belcebú». Chi joʼkaʼin ajwiʼ nakʼabʼaʼiik laj Tza, li najolomink rehebʼ li maaʼus aj musiqʼej.
^ Saʼ griego «ochoch».
^ Saʼ griego «Belcebú». Chi joʼkaʼin ajwiʼ nakʼabʼaʼiik laj Tza, li najolomink rehebʼ li maaʼus aj musiqʼej.
^ Malaj «teʼhobʼoq». Taawil xchʼolobʼankil li aatin, hobʼok.
^ Malaj «tixhobʼ li santil musiqʼej». Taawil xchʼolobʼankil li aatin, hobʼok.
^ Taawil xchʼolobʼankil li aatin, ruuchichʼochʼ.
^ Li aatin saʼ griego, pnéuma. Taawil xchʼolobʼankil li aatin, musiqʼ.
