Mateo 13:1-58
-
EBʼ LI EETALIL CHIRIX LI XʼAWABʼEJILAL LI YOS (1-52)
-
Laj awinel (1-9)
-
Kʼaʼut li Jesús naroksi ebʼ li eetalil re xtzolbʼalebʼ (10-17)
-
Naxchʼolobʼ li eetalil chirix laj awinel (18-23)
-
Li triiw ut li yibʼ aj pim (24-30)
-
Jun tʼorol li mostaas ut li chʼam aj qʼem (31-33)
-
Naq kiroksi ebʼ li eetalil kitzʼaqlok ru jun li propesiiy (34, 35)
-
Naxchʼolobʼ li eetalil chirix li triiw ut li yibʼ aj pim (36-43)
-
Li bʼihomal li muqmu chaq; li chʼinaʼusil pek li qʼaxal loqʼ (44-46)
-
Li yooy (47-50)
-
Narisi saʼ xyanq li bʼihomal li akʼ ut li qʼeel (51, 52)
-
-
Li Jesús inkʼaʼ naʼoxloqʼiik saʼ xtenamit (53-58)
13 Saʼ li kutan aʼan, li Jesús kiʼelk saʼ li ochoch ut xkʼojlaak chire li palaw.
2 Ut kʼajoʼ ebʼ li tenamit xeʼwulak, joʼkan naq li Jesús kitaqeʼk saʼ jun li jukubʼ,* kikʼojlaak, ut chixjunilebʼ li tenamit xaqxokebʼ chire haʼ.
3 Tojaʼ naq kiʼok xkʼutbʼal chiruhebʼ naabʼal li naʼlebʼ rikʼin eetalil.* Kixye rehebʼ: «Abʼihomaq, jun laj awinel xkoho chi awk.
4 Ut naq yook chi awk, wankebʼ li iyaj xeʼtʼaneʼk chire bʼe, xeʼchalk li xul li nekeʼrupupik ut xeʼxwaʼ.
5 Wankebʼ li iyaj xeʼnaq saʼ pek ru bʼarwiʼ jay ru li chʼochʼ ut xeʼmoq saʼ junpaat xbʼaan naq moko cham ta li chʼochʼ.
6 Abʼan, naq kiʼelk chaq li saqʼe, kixkʼat li awimq ut saʼ xkʼabʼaʼ naq moko cham ta li xxeʼ, kichaqik.
7 Ut wankebʼ li iyaj xeʼnaq saʼ xyanq li yibʼ aj pim, ut naq li yibʼ aj pim xeʼkʼiik, xeʼxnatʼ li awimq.
8 Wankebʼ ajwiʼ li iyaj xeʼnaq saʼ li chʼochʼ li jwal chaabʼil ut xeʼok chi uuchink: wankebʼ xeʼxkʼe 100 sut chik xkʼihalil chiru li kiʼawmank chaq; wankebʼ chik xeʼxkʼe 60 ut jalanebʼ chik 30.
9 Li wank xxik chixkʼehaq xchʼool chi abʼink».
10 Tojaʼ naq ebʼ li xtzolom xeʼnachʼok rikʼin ut xeʼxpatzʼ re: «Kʼaʼut naq nakaawaatinahebʼ rikʼin eetalil?».*
11 Li Jesús kixsumehebʼ ut kixye: «Laaʼex nekextenqʼaak chi xtawbʼal ru li muqmukil naʼlebʼ chirix li Xʼawabʼejilal li choxa, abʼan ebʼ aʼan inkʼaʼ.
12 Xbʼaan naq li naxtaw ru xyaalal, li Yos tixbʼaanu naq naabʼal chik tixtaw ru; abʼan li inkʼaʼ naxtaw ru xyaalal, li Yos tixmaqʼ ajwiʼ chiru li kachʼin li naxtaw ru.
13 Joʼkan naq nawaatinahebʼ rikʼin eetalil.* Xbʼaan naq usta nekeʼilok, relik chi yaal naq maakʼaʼ nekeʼril, usta nekeʼabʼink relik chi yaal naq maakʼaʼ nekeʼrabʼi ut maakʼaʼ nekeʼxtaw ru.
14 Rikʼinebʼ aʼan natzʼaqlok ru li kixtzʼiibʼa chaq li propeet Isaías: “Texʼabʼinq abʼan maajunwa teetaw ru; texʼiloq abʼan maakʼaʼ teeril.
15 Xbʼaan naq li xchʼool li tenamit aʼin kikawuuk joʼ li pek. Xeʼxtzʼap ebʼ li xxik* ut xeʼxtzʼap ebʼ li ru re naq maajunwa teʼiloq rikʼinebʼ xnaqʼru chi moko teʼabʼinq rikʼinebʼ xxik, chi moko teʼxtaw ru, chi moko teʼsutqʼiiq rikʼin li Yos chi moko tinkʼirtasihebʼ”.
16 »Abʼanan, laaʼex sa saʼ leechʼool xbʼaan naq nekexʼilok ut nekexʼabʼink.
17 Relik chi yaal ninye eere naq naabʼalebʼ li propeet ut aj kʼanjel chiru li Yos xeʼraj rilbʼal li yookex rilbʼal, abʼan inkʼaʼ xeʼril, ut xeʼraj rabʼinkil li yookex rabʼinkil, abʼan inkʼaʼ xeʼrabʼi.
18 »Joʼkan naq, anaqwan kʼehomaq eechʼool chi rabʼinkil li naraj xyeebʼal li eetalil chirix laj awinel.
19 Naq junaq li qas qiitzʼin narabʼi li esil chirix li Xʼawabʼejilal li Yos abʼan inkʼaʼ naxtaw ru, nachalk li Maaʼus ut naxmichʼ li iyaj li kiʼawmank saʼ xchʼool. Aʼin li iyaj li kiʼawmank chire bʼe.
20 Li iyaj li kiʼawmank saʼ li naʼaj pek ru aʼan li narabʼi li esil aʼin ut saʼ junpaat naxkʼulubʼa chi sa saʼ xchʼool.
21 Abʼan moko cham ta naxeʼink saʼ xchʼool ut jun kʼamok ajwiʼ naxpaabʼ li Yos. Naq nachalk ebʼ li chʼaʼajkilal malaj li rahobʼtesiik saʼ xkʼabʼaʼ li esil, saʼ junpaat naxkanabʼ paabʼank.
22 Li iyaj li kiʼawmank saʼ xyanq li yibʼ aj pim aʼan li narabʼi li esil, abʼan naxkanabʼ naq li chʼaʼajkilal li naxkʼul wulaj wulaj saʼ li ruuchichʼochʼ* aʼin ut li bʼihomal li nabʼalaqʼik, tnatʼoq re. Joʼkan naq li esil inkʼaʼ naʼuuchink.
23 Ut li iyaj li kiʼawmank saʼ li chaabʼil chʼochʼ aʼanebʼ li nekeʼrabʼi li esil ut nekeʼxtaw ru xyaalal. Ebʼ aʼin nekeʼuuchink. Wankebʼ nekeʼruuchi numenaq 100, 60, ut wankebʼ chik 30».
24 Tojaʼ naq, kixkʼe rehebʼ jun chik li eetalil:* «Li Xʼawabʼejilal li choxa chanchan jun li winq li kiraw chaabʼil iyaj saʼ li xchʼochʼ.
25 Naq chixjunilebʼ yookebʼ chi wark, kikʼulunk li xikʼ naʼilok re, kiraw li yibʼ aj pim saʼ xyanq li triiw ut xkoho.
26 Naq kiʼelk chaq li xtoonal ut li ratzʼum, kiʼelk chaq ajwiʼ li yibʼ aj pim.
27 Joʼkan naq, xeʼwulak ebʼ laj kʼanjel rikʼin laj echal kabʼl, ut xeʼxye re: “Waʼ, ma inkʼaʼ tabʼiʼ chaabʼil iyaj xaawaw saʼ laachʼochʼ? Joʼkan naq, kʼaʼut wank yibʼ aj pim chisaʼ?”.
28 Kichaqʼok aʼan ut kixye rehebʼ: “Jun li winq li xikʼ naʼilok we kibʼaanunk re aʼin”. Ut ebʼ li moos xeʼxye re: “Ma taawaj naq tooxik chi xmichʼbʼal li yibʼ aj pim?”.
29 Aʼan kixye rehebʼ: “Inkʼaʼ, maare saʼ xmichʼbʼal li yibʼ aj pim teemichʼ ajwiʼ li triiw.
30 Kanabʼomaq naq teʼkʼiiq saʼ kabʼichal toj reetal naq tqʼanoʼq ru li awimq ut naq twulaq xqʼehil re xsikʼbʼal li ru, tinye rehebʼ laj sikʼol awimq naq teʼxmichʼ xbʼeenwa li yibʼ aj pim ut teʼxkʼe chi joobʼ* re kʼateʼk, tojaʼ naq teʼxsikʼ li triiw ut teʼxxok saʼ linkʼulebʼaal”».
31 Kixkʼe ajwiʼ rehebʼ jun chik li eetalil:* «Li Xʼawabʼejilal li choxa chanchan jun tʼorol li mostaas li kiraw saʼ xchʼochʼ jun li winq.
32 Chʼolchʼo naq li iyaj aʼin qʼaxal kachʼin chiru chixjunil ebʼ li iyaj, abʼan naq nakʼiik, qʼaxal nim wiʼ chik nawulak chiru chixjunilebʼ li cheʼ li wank saʼ xnaʼaj li uutzʼuʼuj, ut nimla cheʼ nawulak wiʼ, ut chi joʼkan, ebʼ li xul li nekeʼrupupik chiru choxa nekeʼxkol ribʼ saʼebʼ li ruqʼ».
33 Ut kixye rehebʼ jun chik li eetalil:* «Li Xʼawabʼejilal li choxa chanchan li chʼam aj qʼem li kixyukʼi jun li ixq saʼ xyanq oxibʼ nimla bʼiis* chi ariin. Chi joʼkaʼin, kitzʼubʼoʼk chixjunil li qʼem».
34 Li Jesús kiroksi ebʼ li eetalil* re xyeebʼal chixjunil aʼin rehebʼ li qas qiitzʼin. Junelik kiraatinahebʼ rikʼin eetalil.*
35 Chi joʼkaʼin kitzʼaqlok ru li kixye chaq li Yos saʼ xkʼabʼaʼ li propeet, naq kixye: «Tinʼaatinaq rikʼin eetalil* ut tinkʼe chi naweʼk ebʼ li naʼlebʼ li muqmu chalen chaq saʼ xtiklajik».*
36 Chirix chik aʼan, naq ak xchaqʼrabʼihebʼ li qas qiitzʼin, kiʼok saʼ li ochoch. Ebʼ li xtzolom xeʼjilok chixkʼatq ut xeʼxye re: «Chʼolobʼ chiqu li eetalil* chirix li yibʼ aj pim li kiʼelk saʼ li triiw».
37 Kixsumehebʼ ut kixye: «Li kiʼawok re li chaabʼil iyaj aʼan li Ralal li Winq.
38 Li chʼochʼ aʼan li ruuchichʼochʼ. Li chaabʼil iyaj aʼan li ralal xkʼajol li Xʼawabʼejilal li Yos. Li yibʼ aj pim aʼan li ralal xkʼajol li Maaʼus
39 ut li xikʼ naʼilok li kiʼawok re li yibʼ aj pim aʼan laj Tza.* Li sikʼok awimq aʼan ebʼ li kutan li naxkʼutbʼesi naq nachʼ wank xraqik li ruuchichʼochʼ* ut ebʼ laj sikʼol awimq aʼanebʼ li ánjel.
40 Joʼkan bʼiʼ, joʼ chanru namichʼmank li yibʼ aj pim ut nakʼatmank saʼ xaml, joʼkan tkʼulmanq chiruhebʼ li kutan naq yooq chaq chi nachʼok xraqik li ruuchichʼochʼ.*
41 Ut saʼ li Xʼawabʼejilal, ebʼ li ánjel li taqlanbʼilebʼ xbʼaan li Ralal li Winq teʼrisi ebʼ li qas qiitzʼin li nekeʼxkʼe chi maakobʼk* ebʼ li junchʼol ut ebʼ li nekeʼxbʼaanu li maaʼusilal
42 ut teʼkuteʼq saʼ nimla xaml. Aran teʼyaabʼaq ut teʼxkʼuxuxi li ruch re.*
43 Chiruhebʼ li kutan aʼan, li tiikebʼ xchʼool kʼajoʼ teʼlemtzʼunq joʼ li saqʼe saʼ li Xʼawabʼejilal li Xyuwaʼebʼ. Li wank xxik chixkʼehaq xchʼool chi abʼink.
44 »Li Xʼawabʼejilal li choxa chanchan jun li bʼihomal li muqmu saʼ chʼochʼ li kixtaw jun li winq. Li winq kixmuq wiʼ chik ut xbʼaan xsahil xchʼool, xkoho ut kixkʼayi chixjunil li kʼaru re ut kixloqʼ li chʼochʼ aʼin.
45 »Li Xʼawabʼejilal li choxa chanchan ajwiʼ jun laj yakonel li yook xsikʼbʼal li chʼinaʼusil pek.
46 Naq kixtaw jun li chʼinaʼusil pek li qʼaxal loqʼ, xkoho ut saʼ junpaat kixkʼayi chixjunil li kʼaru re ut kixloqʼ.
47 »Li Xʼawabʼejilal li choxa chanchan ajwiʼ jun li ataraay* li kikutmank saʼ palaw ut kʼiila paay li kar kirisi chaq.
48 Naq kinujak li ataraay,* xeʼxkeleli chire haʼ tojaʼ naq xeʼchunlaak ut li chaabʼil kar xeʼxkʼe saʼ chakach; abʼan li inkʼaʼ us, xeʼxtzʼeq.
49 Aʼin tkʼulmanq chiruhebʼ li kutan naq yooq chaq chi nachʼok xraqik li ruuchichʼochʼ.* Teʼchalq ebʼ li ánjel ut teʼrisi ebʼ li qas qiitzʼin li maaʼusebʼ xnaʼlebʼ saʼ xyanqebʼ li chaabʼilebʼ xnaʼlebʼ
50 ut teʼkuteʼq saʼ nimla xaml. Aran teʼyaabʼaq ut teʼxkʼuxuxi li ruch re.*
51 »Ma xeetaw ru xyaalal chixjunil aʼin?». Ut aʼanebʼ xeʼchaqʼoʼk ut xeʼxye re: «Xqataw ru».
52 Tojaʼ naq li Jesús kixye rehebʼ li xtzolom: «Wi joʼkan, nawomaq aʼin: jun laj kʼutunel li tzolbʼil chirix li Xʼawabʼejilal li choxa chanchan jun li winq aʼ laj echal ochoch, li narisi saʼ xyanq li xbʼihomal li akʼ ut li qʼeel».
53 Naq li Jesús kiraqeʼk xyeebʼal ebʼ li eetalil* aʼin, kiʼelk aran.
54 Naq kiwulak saʼ li xtenamit, kiʼok xtzolbʼalebʼ li qas qiitzʼin saʼ li naʼaj bʼarwiʼ nekeʼloqʼonink, ut sachso xchʼool xeʼkanaak xbʼaan li xkʼutum. Xeʼok xyeebʼal: «Bʼar tawiʼ kixtaw xnimal xnaʼlebʼ li winq aʼin ut li wankilal re xbʼaanunkil ebʼ li sachbʼachʼoolej aʼin?
55 Ma maawaʼ tabʼiʼ aʼin li ralal laj peechʼ? Ut li xnaʼ, ma maawaʼ li xMaría? Ut ebʼ li riitzʼin, ma maawaʼ tabʼiʼ laj Santiago, laj José, laj Simón ut laj Judas?
56 Ut ebʼ li ranabʼ, ma inkʼaʼ tabʼiʼ wankebʼ saʼ qayanq? Joʼkan naq, bʼar kixtaw chixjunil li naʼlebʼ aʼin ut li wankilal?».
57 Ut aʼin kiramok chiruhebʼ xpaabʼankil. Abʼan li Jesús kixye rehebʼ: «Li propeet naʼoxloqʼiik yalaq bʼar, abʼan moko joʼkan ta saʼ xtenamit ut saʼ rochoch».
58 Ut saʼ xkʼabʼaʼ naq inkʼaʼ nekeʼxpaabʼ li Yos, moko naabʼal ta li sachbʼachʼoolej kixbʼaanu aran.
Xtzʼaqobʼ ebʼ li naʼlebʼ
^ Malaj «li kayuuk».
^ Malaj «jaljokil ru aatin».
^ Malaj «jaljokil ru aatin».
^ Malaj «jaljokil ru aatin».
^ Malaj «Ebʼ li xxik nekeʼabʼink abʼan inkʼaʼ nekeʼpaabʼank».
^ Taawil xchʼolobʼankil li aatin, ruuchichʼochʼ.
^ Malaj «li jaljokil ru aatin».
^ Malaj «chi chʼuut», «chi cheet».
^ Malaj «li jaljokil ru aatin».
^ Malaj «li jaljokil ru aatin».
^ Saʼ griego «xbʼiis li sea». Jun sea 7.33 liitr.
^ Malaj «jaljokil ru aatin».
^ Malaj «ebʼ li jaljokil ru aatin».
^ Malaj «jaljokil ru aatin».
^ Maare «xtiklajik li ruuchichʼochʼ». Aʼin naraj xyeebʼal, li ralal xkʼajol laj Adán ut xʼEva.
^ Malaj «li jaljokil ru aatin».
^ Saʼ griego «li Diʼaabʼ». Taawil xchʼolobʼankil li aatin, Diʼaabʼ.
^ Taawil xchʼolobʼankil li aatin, ruuchichʼochʼ.
^ Taawil xchʼolobʼankil li aatin, ruuchichʼochʼ.
^ Malaj «chi tichkʼok».
^ Aʼin reetalil naq yookebʼ xjosqʼil ut inkʼaʼ nekeʼxtaw ru kʼaru teʼxbʼaanu.
^ Malaj «li yooy».
^ Malaj «li yooy».
^ Taawil xchʼolobʼankil li aatin, ruuchichʼochʼ.
^ Aʼin reetalil naq yookebʼ xjosqʼil ut inkʼaʼ nekeʼxtaw ru kʼaru teʼxbʼaanu.
^ Malaj «ebʼ li jaljokil ru aatin».
