Mateo 14:1-36
14 Saʼebʼ li kutan aʼan, laj Herodes,* li naʼawabʼejink saʼ xteepal Galilea, kirabʼi li yookebʼ chaq chi xyeebʼal chirix li Jesús
2 ut kixye rehebʼ li xmoos: «Aʼan laj Juan, aj Kubʼsihomhaʼ. Kiwaklesiik chi yoʼyo saʼ xyanqebʼ li kamenaq ut saʼ xkʼabʼaʼ aʼin naru xbʼaanunkil ebʼ li sachbʼachʼoolej».
3 Laj Herodes kixtaqla xchapbʼal laj Juan, kixbʼakʼ chi kareen ut kixkʼe saʼ tzʼalam saʼ xmaak li xHerodías, li rixaqil laj Filipo li ras laj Herodes.
4 Xbʼaan naq laj Juan yook chaq chi xyeebʼal re laj Herodes: «Li chaqʼrabʼ inkʼaʼ naxkʼulubʼa naq twanq choʼq aawixaqil li ixq aʼin».
5 Laj Herodes kiraj xkamsinkil, abʼan naxxuwa ru li tenamit xbʼaan naq nekeʼril laj Juan joʼ jun propeet.
6 Abʼan, naq yook chaq chi nimaak li xchihabʼ laj Herodes, li xkoʼ li xHerodías kixajok saʼ li ninqʼe, ut laj Herodes kʼajoʼ kiwulak chiru
7 joʼkan naq kixye saʼ xkʼabʼaʼ li Yos naq tixkʼe re li ixqaʼal maakʼaʼ naxye kʼaru tixpatzʼ.
8 Saʼ xkʼabʼaʼ naq li ixqaʼal kitakchiʼiik xbʼaan li xnaʼ, kixye: «Nawaj naq taakʼe we saʼ jun li plaat li xjolom laj Juan, aj Kubʼsihomhaʼ».
9 Kʼajoʼ naq kirahoʼk xchʼool li awabʼej; abʼan saʼ xkʼabʼaʼ naq kixkʼe li raatin chiruhebʼ li rulaʼ,* kixtaqla xyeebʼal naq tkʼemanq re.
10 Ut kixtaqla xchʼotbʼal li xjolom laj Juan saʼ tzʼalam.
11 Tojaʼ naq xeʼxkʼam chaq saʼ jun li plaat li xjolom laj Juan ut xeʼxkʼe re li ixqaʼal ut aʼan kixkʼam re li xnaʼ.
12 Chirix chik aʼin, xeʼkʼulunk ebʼ li xtzolom laj Juan ut xeʼxkʼam li xjunxaqalil laj Juan ut xeʼxmuq. Ut moqon chik xkohebʼ xseeraqʼinkil re li Jesús li xkʼulmank.
13 Naq li Jesús kirabʼi aʼin kiʼelk saʼ li naʼaj aʼan, kiʼok saʼ jun li jukubʼ* ut xkoho saʼ jun li naʼaj najt rikʼin li tenamit re wank xjunes. Naq ebʼ li qas qiitzʼin xeʼrabʼi aʼin xeʼxkanabʼ li xtenamit ut xkohebʼ chi roq re xtawbʼal chaq.
14 Naq kiwulak chire li palaw, kiril li kʼiila tenamit,* ut kʼajoʼ kixtoqʼobʼa ruhebʼ ut kixkʼirtasi ebʼ li yaj li wank saʼ xyanqebʼ.
15 Abʼan, naq kiʼewuuk, ebʼ li xtzolom li Jesús xeʼjilok rikʼin ut xeʼxye re: «Najt wanko rikʼin li tenamit ut ewuuk chik. Chaqʼrabʼihebʼ li qas qiitzʼin re naq teʼxloqʼ chaq xwa saʼebʼ li kʼalebʼaal li nachʼ wankebʼ arin».
16 Abʼan li Jesús kixye rehebʼ: «Moko aajel ta ru naq teʼxik. Kʼehomaqebʼ chi waʼak».
17 Ebʼ aʼan xeʼchaqʼok ut xeʼxye re: «Oobʼ ajwiʼ li kaxlanwa ut wiibʼ li kar wank qikʼin».
18 «Kʼamomaq chaq», chan rehebʼ.
19 Tojaʼ naq kixtaqla xyeebʼal re li tenamit naq teʼchunlaaq saʼ pachʼayaʼ. Chirix chik aʼan, kixchap li oobʼ chi kaxlanwa ut li wiibʼ chi kar, kixtaqsi li rilobʼaal saʼ choxa, ut kitijok. Ut naq ak kixjach li kaxlanwa, kixkʼe rehebʼ li xtzolom ut ebʼ li xtzolom xeʼxkʼe rehebʼ li qas qiitzʼin.
20 Chixjunilebʼ xeʼwaʼak toj reetal xeʼkʼojlaak xchʼool. Chirix chik aʼin, xeʼxxok kabʼlaju chakach xperaasil li kaxlanwa li kiʼelaʼank.* Ebʼ li chakach aʼin nujenaqebʼ xsaʼ.
21 Xeʼwaʼak tana oobʼ mil li winq ut saʼ li ajl aʼin inkʼaʼ kʼebʼilebʼ li ixq ut ebʼ li kokʼal.
22 Tikto kixye li Jesús rehebʼ li xtzolom naq teʼtaqeʼq saʼ li jukubʼ* ut teʼxik junpakʼal li palaw. Aʼut aʼan toj kikanaak xchaqʼrabʼinkilebʼ li qas qiitzʼin.
23 Naq ak xchaqʼrabʼihebʼ li qas qiitzʼin, xkoho xjunes chi tijok saʼ li tzuul. Naq kiʼok li qʼoqyink, toj wank chaq aran xjunes.
24 Saʼ li hoonal aʼan, li jukubʼ* ak najt wank chire li palaw ut li xkawil roq li palaw kaw naxsakʼ ribʼ chiru li jukubʼ* xbʼaan naq chiru yook chaq li kawil iqʼ.
25 Naq ak saqewk re,* li Jesús xʼok chi bʼeek saʼ xbʼeen li palaw re xtawbʼalebʼ chaq li xtzolom.
26 Naq ebʼ li xtzolom xeʼril chi bʼeek saʼ xbʼeen li palaw, xeʼxuwak ut xeʼok xyeebʼal: «Jun li moy u!». Ut xeʼok xjapbʼal re xbʼaanebʼ xxiw.
27 Saʼ junpaat li Jesús kixye rehebʼ: «Mexkʼoxlak, laaʼin, mexxuwak!».
28 Laj Pedro kixye re: «Qaawaʼ, wi laaʼat, ye we naq tento tinxik aatawbʼal saʼ xbʼeen li haʼ».
29 Aʼan kixye re: «Kim!». Tojaʼ naq laj Pedro kiʼelk saʼ li jukubʼ* ut kiʼok chi bʼeek saʼ xbʼeen li haʼ re xtawbʼal li Jesús.
30 Abʼan, naq kixkʼe xchʼool chirix li kawil iqʼ, kixuwak. Ut saʼ xkʼabʼaʼ naq kiʼok chi xik rubʼel haʼ, kixjap re ut kixye: «Qaawaʼ, kolin!».
31 Saʼ junpaat li Jesús kixyeʼ li ruqʼ, kixchap ut kixye re: «At winq kachʼin ru laapaabʼal, kʼaʼut xaakanabʼ naq twiibʼanq ru laachʼool?».
32 Naq wankebʼ chik saʼ li jukubʼ,* kituqlaak ru li kawil iqʼ.
33 Tojaʼ naq li wankebʼ saʼ li jukubʼ* xeʼxwiqʼibʼ ribʼ chiru ut xeʼxye re: «Relik chi yaal naq laaʼat Ralal li Yos».
34 Ut naq xeʼraqeʼk xtoqbʼal ru li palaw, xeʼwulak saʼ li naʼaj Genesaret.
35 Naq xeʼxkʼe reetal naq aʼan, xeʼxkʼe resil saʼ chixjunil li teep ut xeʼok xkʼambʼal chaq re li Jesús chixjunilebʼ li yaj.
36 Ut nekeʼxtzʼaama chiru naq tixkanabʼebʼ chi xchʼeʼbʼal chire li xtʼikr ut chixjunilebʼ li nekeʼchʼeʼok re, nekeʼkʼiraak.
Xtzʼaqobʼ ebʼ li naʼlebʼ
^ Aʼin naraj xyeebʼal, laj Herodes Antipas. Taawil xchʼolobʼankil li aatin, Herodes.
^ Malaj «li chunchukebʼ rikʼin saʼ meex».
^ Malaj «li kayuuk».
^ Malaj «li kʼiila qas qiitzʼin».
^ Malaj «li kisobʼrin».
^ Malaj «li kayuuk».
^ Malaj «li kayuuk».
^ Malaj «li kayuuk».
^ Aʼin naraj xyeebʼal, maare oxibʼ hoonal re eqʼla toj waqibʼ hoonal re eqʼla.
^ Malaj «li kayuuk».
^ Malaj «li kayuuk».
^ Malaj «li kayuuk».
