Mateo 15:1-39
-
Li Jesús naxkʼe chi naweʼk chi kutankil li najteril naʼlebʼ rehebʼ li xeʼtoon (1-9)
-
Li chalenaq saʼ xchʼool junaq li qas qiitzʼin aʼan li natzʼajnink re (10-20)
-
Jun li ixq aj Fenicia, li qʼaxal nim li xpaabʼal (21-28)
-
Li Jesús naxkʼirtasi naabʼalebʼ li yaj (29-31)
-
Naxchʼolani kaahibʼ mil chi winq (32-39)
15 Tojaʼ naq xeʼjilok rikʼin li Jesús wiibʼ oxibʼ laj pariseey ut ebʼ laj tzʼiibʼ li yookebʼ chaq chi chalk Jerusalén ut xeʼxye re:
2 «Kʼaʼut ebʼ laatzolom nekeʼxqʼet li najteril naʼlebʼ rehebʼ li xeʼtoon? Ebʼ aʼan inkʼaʼ nekeʼxchʼaj li ruqʼ* naq okebʼ re chi waʼak».
3 Aʼan kixsumehebʼ ut kixye: «Ut laaʼex, kʼaʼut nekeeqʼet li xtaqlahom li Yos saʼ xkʼabʼaʼ leenajteril naʼlebʼ?
4 Jun eetalil, li Yos kixye: “Taawoxloqʼi laanaʼ laayuwaʼ”, ut “Li naxye yibʼ aj aatin chirix li xnaʼ malaj li xyuwaʼ, tkamsiiq”.
5 Abʼan laaʼex nekeeye: “Li tixye re li xnaʼ xyuwaʼ «Chixjunil li wank wikʼin li tinruuq raj roksinkil re aatenqʼankil aʼan jun li maatan li ak yeechiʼinbʼil choʼq re li Yos»,
6 li qas qiitzʼin aʼin moko tenebʼanbʼil ta chik saʼ xbʼeen roxloqʼinkil li xnaʼ xyuwaʼ”. Rikʼin leenajteril naʼlebʼ nekeesach xwankil li raatin li Yos.
7 Ex aj kaʼpakʼal u, yaal tzʼaqal kixye chaq li propeet Isaías cheerix:
8 “Li tenamit aʼin naxye rikʼin raatin naq naroxloqʼi wu, abʼan li xchʼool najt wank wikʼin.
9 Maakʼaʼ ajʼe naq yooqebʼ inloqʼoninkil xbʼaan naq xtaqlahom winq nekeʼxkʼe chi naweʼk”».
10 Tojaʼ naq kixtzʼaama chiru li tenamit naq teʼjiloq chaq ut kixye rehebʼ: «Abʼihomaq ut cheetawaq ru li yookin chi xyeebʼal:
11 li natzʼajnink re jun li qas qiitzʼin maawaʼ li naʼok saʼ re, li naʼelk bʼan saʼ re, aʼin li natzʼajnink re».
12 Tojaʼ naq ebʼ li xtzolom xeʼjilok chixkʼatq ut xeʼxye: «Ma xaakʼe reetal naq ebʼ laj pariseey inkʼaʼ saʼ xeʼrekʼa ribʼ* rikʼin li xaaye?».
13 Li Jesús kixsumehebʼ: «Li cheʼ li inkʼaʼ awbʼil xbʼaan Linyuwaʼ li wank saʼ choxa tbʼoqʼmanq chalen saʼ xxeʼil.
14 Joʼkan naq, kanabʼomaqebʼ, mutzʼebʼ ut nekeʼxkʼut xbʼe ebʼ li junchʼol. Ut wi jun li mutzʼ naxkʼut xbʼe li rechmutzʼil, saʼ kabʼichal teʼtʼaneʼq saʼ jul».
15 Tojaʼ naq laj Pedro kixye re: «Chʼolobʼ chiqu li eetalil».*
16 Li Jesús kixye: «Abʼan, ma toj maajiʼ ajwiʼ nekeetaw ru laaʼex?
17 Ma inkʼaʼ nekeekʼe reetal naq chixjunil li naxwaʼ junaq li qas qiitzʼin nanumeʼk saʼ xsaʼ ut naraqeʼk saʼ li tzʼeqlebʼaal?
18 Abʼan li aatin li naʼelk saʼ re junaq li qas qiitzʼin chalenaq saʼ xchʼool ut aʼin naru natzʼajnink re.
19 Jun eetalil, saʼ li chʼoolej naʼelk chaq li yibʼ aj kʼaʼuxl: kamsink, muxuk sumlaak,* muxuk ibʼ,* elqʼak, yoobʼank aatin ut hobʼok.*
20 Aʼin li natzʼajnink re junaq li qas qiitzʼin, abʼan wi nawaʼak ut inkʼaʼ naxchʼaj li ruqʼ* moko aʼin ta natzʼajnink re».
21 Li Jesús kiʼelk aran ut xkoho saʼ xteepal Tiro ut Sidón.
22 Tojaʼ naq kiwulak jun li ixq aj Fenicia* re li teep aʼin, kixjap re xyeebʼal: «At Qaawaʼ, Ralal laj David, toqʼobʼa wu!* Linkoʼ echaninbʼil xbʼaan jun li maaʼus aj musiqʼej ut kʼajoʼ narahobʼtesiik».
23 Abʼan li Jesús moko kixsume ta bʼayaq li ixq. Joʼkan naq ebʼ li xtzolom xeʼjilok chixkʼatq ut xeʼok xtzʼaamankil re: «Ye re, naq xikaq re naq tixkanabʼ qataqenkil ut xjapbʼal re».
24 Li Jesús kixye: «Kaʼajwiʼ xintaqlaak chi xtenqʼankilebʼ li karneer re li tenamit* Israel li sachsokebʼ».
25 Abʼan kichalk li ixq, kixwiqʼibʼ ribʼ chiru ut kixye re: «Qaawaʼ, tenqʼahin!».
26 Kichaqʼok li Jesús ut kixye re: «Moko us ta xmaqʼbʼal xwahebʼ li alal kʼajolbʼej re xkutbʼal rehebʼ li kokʼ tzʼiʼ».
27 Tojaʼ naq li ixq kixye: «Yaal, Qaawaʼ, abʼan ebʼ li kokʼ tzʼiʼ nekeʼxwaʼ li xkʼaj xwahebʼ laj echal re li natʼaneʼk rubʼel xmeex».
28 Li Jesús kixye re: «At ixq, qʼaxal nim laapaabʼal chirix li Yos! Chiʼuxq li nakaawaj». Ut saʼ li hoonal ajwiʼ aʼan, kikʼiraak li xkoʼ.
29 Naq kiʼelk aran, li Jesús kiwulak saʼ jun li naʼaj li wank chixkʼatq li palaw re Galilea ut kitaqeʼk saʼ li tzuul. Naq chunchu chaq aran,
30 li kʼiila tenamit xeʼjilok rikʼin ut xeʼxkʼam chaq re ebʼ li yeq roq, ebʼ li mutzʼ, ebʼ li mem ut naabʼalebʼ chik li yaj. Xeʼxkʼe chi roq ut aʼan kixkʼirtasihebʼ.
31 Sachso xchʼool kikanaak li tenamit naq kiril naq ebʼ li mem nekeʼaatinak, ebʼ li yaj nekeʼkʼiraak, ebʼ li yeq roq nekeʼbʼeek chiʼus ut ebʼ li mutzʼ nekeʼilok, ut xeʼxkʼe xloqʼal li Yos re Israel.
32 Tojaʼ naq li Jesús kixbʼoqebʼ li xtzolom ut kixye rehebʼ: «Nawil xtoqʼobʼaal ru li tenamit aʼin xbʼaan naq ak xeʼxket oxibʼ kutan wikʼin ut maajun tzʼuqul xwahebʼ. Inkʼaʼ nawaj xchaqʼrabʼinkilebʼ chi inkʼaʼ teʼwaʼaq, maare anchal teʼtʼaneʼq saʼ bʼe».
33 Aʼut ebʼ li xtzolom xeʼxye re: «Najt wanko chire li tenamit... Bʼar tqisi chaq naabʼal li kaxlanwa re naq tkʼojlaaq xchʼool li kʼiila tenamit aʼin?».
34 Tojaʼ naq li Jesús kixye rehebʼ: «Jarubʼ li kaxlanwa wank eerikʼin?». Ebʼ aʼan xeʼxye re: «Wuqubʼ, ut wiibʼ oxibʼ li kokʼ kar».
35 Naq ak kixtaqlahebʼ li tenamit chi chunlaak chiru chʼochʼ,
36 kixchap li wuqubʼ chi kaxlanwa ut ebʼ li kar, kixbʼanyoxi re li Yos, kixjachi ut kixkʼe rehebʼ li xtzolom ut ebʼ li xtzolom xeʼxjekʼi re li tenamit.
37 Ut chixjunilebʼ xeʼwaʼak toj reetal xeʼkʼojlaak xchʼool. Ut xeʼxxok wuqubʼ chakach xperaasil li kaxlanwa li kiʼelaʼank.* Ebʼ li nimla chakach aʼin nujenaqebʼ xsaʼ.
38 Xeʼwaʼak kaahibʼ mil chi winq ut inkʼaʼ kʼebʼilebʼ saʼ ajl ebʼ li ixq ut ebʼ li kokʼal.
39 Chirix chik aʼin, naq ak kixchaqʼrabʼi li tenamit, kitaqeʼk saʼ li jukubʼ* ut xkoho saʼ li teep Magadán.
Xtzʼaqobʼ ebʼ li naʼlebʼ
^ Ebʼ laj pariseey ut wiibʼ oxibʼ laj judiiy kʼaynaqebʼ xchʼajbʼal li ruqʼ. Li naʼlebʼ aʼin chalenaq saʼebʼ li kʼutum li yoobʼanbʼil chaq xbʼaanebʼ.
^ Malaj «xeʼtichkʼok».
^ Malaj «li jaljokil ru aatin».
^ Malaj «muxuk kaxaar».
^ Li aatin saʼ griego, pornéia. Taawil xchʼolobʼankil li aatin, muxuk ibʼ.
^ Taawil xchʼolobʼankil li aatin, hobʼok.
^ Ebʼ laj pariseey ut wiibʼ oxibʼ laj judiiy kʼaynaqebʼ xchʼajbʼal li ruqʼ. Li naʼlebʼ aʼin chalenaq saʼebʼ li xkʼutum li yoobʼanbʼil chaq xbʼaanebʼ.
^ Malaj «aj Canaán».
^ Malaj «uxtaana wu».
^ Saʼ griego «ochoch».
^ Malaj «li kisobʼrin».
^ Malaj «li kayuuk».
