Mateo 17:1-27
17 Naq ak xnumeʼk waqibʼ kutan, li Jesús kixkʼam laj Pedro saʼ jun li tzuul li najt xteram bʼarwiʼ xeʼwank xjunesebʼ. Joʼkan ajwiʼ, kixkʼam laj Santiago ut laj Juan, li riitzʼinebʼ ribʼ.
2 Ut kijalaak li xjunxaqalil chiruhebʼ: kilemtzʼunoʼk li xnaqʼru joʼ li saqʼe ut saq saq kiwulak li xtʼikr joʼ li saqenk.
3 Tojaʼ naq xaqamil laj Moisés ut laj Elías chiruhebʼ, yookebʼ chi seeraqʼik rikʼin li Jesús.
4 Ut laj Pedro kixye re li Jesús: «Qaawaʼ, us naq wanko arin! Wi taawaj, tinyiibʼ oxibʼ li kokʼ ochoch: jun choʼq aawe, jun choʼq re laj Moisés ut jun choʼq re laj Elías».
5 Toj yook ajwiʼ chi aatinak..., naq jun li choql nalemtzʼunk kichalk saʼ xbʼeenebʼ ut xeʼmuqunk chisaʼ. Ut maakʼaʼ saʼ xchʼoolebʼ naq saʼ li choql kiʼelk chaq jun xyaabʼ kuxej li kixye: «Aʼin li Walal, li qʼaxal raaro inbʼaan, aʼan naxsahobʼresi linchʼool. Cheerabʼihaq».
6 Naq xeʼrabʼi aʼin, ebʼ li xtzolom xeʼxkʼutzʼubʼ ribʼ chiru chʼochʼ. Kʼajoʼebʼ xxiw.
7 Tojaʼ naq li Jesús kinachʼok rikʼinebʼ, kixchʼeʼebʼ ut kixye rehebʼ: «Waklinqex, mexxuwak».
8 Naq xeʼxtaqsi li rilobʼaal maaʼani xeʼril ru, kaʼajwiʼ li Jesús.
9 Naq yookebʼ chaq chi kubʼeek saʼ li tzuul, li Jesús kixye rehebʼ chi chʼolchʼo ru: «Maaʼani ajʼe teeseeraqʼi li moy u aʼin toj naq li Ralal li Winq twaklesiiq chi yoʼyo saʼ xyanqebʼ li kamenaq».
10 Abʼanan ebʼ li xtzolom xeʼxpatzʼ re: «Chanru naq ebʼ laj tzʼiibʼ nekeʼxye naq laj Elías tkʼulunq xbʼeenwa?».
11 Aʼan kixye rehebʼ: «Yaal, laj Elías tento tkʼulunq xbʼeenwa ut tixtus wiʼ chik chixjunil saʼ xnaʼaj.
12 Abʼanan laaʼin ninye eere naq laj Elías ak xkʼulunk chik, aʼut inkʼaʼ xeʼxnaw ru. Xeʼxbʼaanu bʼan rikʼin li xeʼraj. Joʼkan ajwiʼ, teʼxrahobʼtesi li Ralal li Winq».
13 Toj aran xeʼxkʼe reetal ebʼ li xtzolom naq yook chi aatinak chirix laj Juan, aj Kubʼsihomhaʼ.
14 Naq xeʼwulak bʼarwiʼ wank li kʼiila tenamit, jun li winq kijilok chixkʼatq li Jesús, kixwiqʼibʼ ribʼ chiru ut kixye re:
15 «Qaawaʼ toqʼobʼa ru* li walal xbʼaan naq natʼaneʼk saʼ xxaqam ut nim xyajel. Naabʼal sut natʼaneʼk saʼ xaml ut naabʼal sut natʼaneʼk saʼ haʼ.
16 Ak xolinkʼut chiruhebʼ laatzolom, abʼan inkʼaʼ xeʼruuk xkʼirtasinkil».
17 Kichaqʼok li Jesús ut kixye: «Li tenamit li wank chiruhebʼ li kutan aʼin qʼaxal maaʼus xnaʼlebʼ ut inkʼaʼ naxpaabʼ li Yos! Joʼ najtil chik wanqin eerikʼin? Joʼ najtil chik texinkuy? Kʼamomaq chaq we arin».
18 Tojaʼ naq li Jesús kixqʼus chi kaw li maaʼus aj musiqʼej ut li maaʼus aj musiqʼej kixkanabʼ rechaninkil li saaj al, ut saʼ li hoonal ajwiʼ aʼan kikʼiraak.
19 Chirix chik aʼan, ebʼ li xtzolom xeʼjilok chixkʼatq li Jesús naq wank xjunes ut xeʼxpatzʼ re: «Kʼaʼut naq laaʼo inkʼaʼ xooruuk risinkil li maaʼus aj musiqʼej?».
20 Aʼan kixye rehebʼ: «Xbʼaan naq kachʼin ru leepaabʼal chirix li Yos. Relik chi yaal ninye eere naq, wi leepaabʼal chirix li Yos chanchan raj xnimal jun tʼorol li mostaas, texruuq xyeebʼal re li tzuul aʼin: “Ayu leʼ”, ut txik; maakʼaʼ chʼaʼajkaq cheeru».
21 *
22 Naq chʼutchʼukebʼ chaq saʼ xteepal Galilea, li Jesús kixye rehebʼ li xtzolom: «Li Ralal li Winq tqʼaxtesiiq saʼ ruqʼebʼ li winq
23 ut teʼxkamsi, ut saʼ rox kutan twaklesiiq chi yoʼyo». Ut saʼ xkʼabʼaʼ aʼin, kʼajoʼ xeʼrahoʼk xchʼool.
24 Naq xeʼwulak Capernaúm, xeʼnachʼok rikʼin laj Pedro ebʼ li winq li nekeʼxchʼutubʼ li toj* choʼq re li rochoch li Yos ut xeʼxpatzʼ re: «Ma inkʼaʼ naxkʼe li toj choʼq re li rochoch li Yos laj kʼutul aawe?».
25 Laj Pedro kixsumehebʼ ut kixye: «Heeheʼ, naxkʼe». Chirix chik aʼan laj Pedro kiʼok saʼ ochoch ut toj maajiʼ ajwiʼ naxye li kiyeeheʼk re, naq li Jesús kixpatzʼ re: «Ut laaʼat Simón, kʼaru raj taaye? Re anihebʼ napatzʼmank li jalan jalanq chi toj li nachʼutubʼamank choʼq rehebʼ li awabʼej? Rehebʼ li ralal xkʼajol, malaj re jalanebʼ chik?».
26 Laj Pedro kixsume ut kixye: «Re jalanebʼ chik». Ut li Jesús kixye re: «Aʼin naraj xyeebʼal naq ebʼ li ralal xkʼajol li awabʼej inkʼaʼ nekeʼxkʼe li toj li nachʼutubʼamank choʼq re li awabʼej.
27 Abʼan, re naq inkʼaʼ teʼpoʼq, ayu saʼ palaw ut kut li chaplebʼ kar.* Naq taawisi li xbʼeen kar, taate saʼ re ut aran taataw jun li tumin re plaat.* Taachap ut taakʼe rehebʼ saʼ inkʼabʼaʼ ut saʼ aakʼabʼaʼ».
Xtzʼaqobʼ ebʼ li naʼlebʼ
^ Malaj «uxtaana ru».
^ Li raqal aʼin natawmank saʼ wiibʼ oxibʼ li Santil Hu. Abʼan moko natawmank ta saʼ chixjunil ebʼ li najteril hu li tzʼaqal re ru li wank saʼ griego.
^ Saʼ griego «wiibʼ dracma». Aʼan xtojbʼal jun li winq li nakʼanjelak maare chiru wiibʼ kutan.
^ Malaj «li ansuʼeel».
^ Saʼ griego «jun estater». Aʼan kaahibʼ li dracma. Aʼan tana xtojbʼal jun li winq li nakʼanjelak maare chiru kaahibʼ kutan.
