Mateo 18:1-35
18 Saʼ li hoonal aʼan ebʼ li xtzolom xeʼnachʼok rikʼin li Jesús ut xeʼxpatzʼ re: «Ani li qʼaxal nim saʼ li Xʼawabʼejilal li choxa?».
2 Joʼkan naq li Jesús kixbʼoq jun li chʼinaʼal ut kixkʼe saʼ xyiihebʼ
3 ut kixye rehebʼ: «Relik chi yaal ninye eere, wi inkʼaʼ nekeejal eenaʼlebʼ ut inkʼaʼ joʼkaqex li kokʼal, maajunwa texʼoq saʼ li Xʼawabʼejilal li choxa.
4 Joʼkan naq, li tixkubʼsi ribʼ joʼ li chʼinaʼal aʼin, aʼan li nim saʼ li Xʼawabʼejilal li choxa,
5 ut li nakʼuluk re jun li chʼinaʼal joʼ aʼin saʼ inkʼabʼaʼ, nikinxkʼul ajwiʼ laaʼin.
6 Abʼan wi junaq li qas qiitzʼin tixkʼe chi maakobʼk jun rehebʼ li kachʼin aʼin li nikinxpaabʼ, qʼaxal us raj choʼq re, naq tkʼemanq chi xkux li xpekul li keʼlebʼ li nekeʼxsurisi ebʼ li bʼuur ut tkuteʼq saʼ xchamal li palaw.
7 »Ra tchalq saʼ xbʼeenebʼ li qas qiitzʼin li nekeʼxbʼaanu naq ebʼ li junchʼol teʼmaakobʼq! Relik chi yaal naq wanqebʼ li qas qiitzʼin li teʼxbʼaanu aʼin, abʼan ra tchalq saʼ xbʼeenebʼ!
8 Joʼkan naq, wi laawuqʼ malaj laawoq tatxkʼe chi maakobʼk, yokʼ ut kut chi najt. Qʼaxal us choʼq aawe xtawbʼal li yuʼam rikʼin jun laawuqʼ malaj jun laawoq, chiru naq tat-osoʼq chi junajwa rikʼin xaml* rikʼin xkabʼichal laawuqʼ malaj xkabʼichal laawoq.
9 Joʼkan ajwiʼ, wi laawu tatxkʼe chi maakobʼk, bʼoqʼ ut kut chi najt. Qʼaxal us choʼq aawe xtawbʼal li yuʼam rikʼin jun laawu chiru naq tat-osoʼq chi junajwa* rikʼin xkabʼichal laawu.
10 Weent teebʼaanu, meetzʼeqtaana jun rehebʼ li kachʼin aʼin xbʼaan naq ninye eere naq ebʼ li xʼánjel saʼ choxa junelik wankebʼ chiru Linyuwaʼ li wank saʼ choxa.
11 *
12 »Kʼaru nekeeye? Wi jun li winq wank 100 xkarneer ut jun rehebʼ nasach, ma inkʼaʼ nekeeye naq tixkanabʼ li 99 chiru tzuul ut t-oq xsikʼbʼal li xsach?
13 Ut naq tixtaw, relik chi yaal ninye eere naq qʼaxal tsahoʼq xchʼool chirix aʼin chiru li 99 li inkʼaʼ xeʼsach.
14 Joʼkan ajwiʼ naxkʼul Linyuwaʼ* li wank saʼ choxa: aʼan inkʼaʼ naraj naq jun rehebʼ li kachʼin tsachq.
15 »Joʼkan bʼiʼ, wi laawas aawiitzʼin* namaakobʼk chaawu, aatinan rikʼin naq wanq xjunes ut taakʼe chixnaw li xmaak. Wi nakatrabʼi, tatruuq xtenqʼankil chi xbʼaanunkil li us.
16 Abʼan wi inkʼaʼ nakatrabʼi, kʼam chaawix jun malaj wiibʼ li qas qiitzʼin re naq rikʼin raatin* wiibʼ malaj oxibʼ li testiiw tchʼolaaq ru chixjunil.
17 Wi inkʼaʼ narabʼihebʼ, kʼe chixnaw li chʼuut.* Ut wi inkʼaʼ ajwiʼ narabʼi li chʼuut, tento taawil joʼ jun li winq li maawaʼ aj judiiy ut joʼ li winq li naxchʼutubʼ li toj choʼq re li awabʼej.
18 »Relik chi yaal ninye eere naq chixjunil li teebʼakʼ saʼ ruuchichʼochʼ ak bʼakʼbʼo chaq saʼ choxa, ut chixjunil li teehit* saʼ ruuchichʼochʼ, ak hitho* chaq saʼ choxa.
19 Ninye ajwiʼ, wi wiibʼ eere arin saʼ ruuchichʼochʼ nekeekʼe eeribʼ saʼ aatin re xtzʼaamankil saʼ leetij li wank xwankil, tkʼemanq eere saʼ xkʼabʼaʼ Linyuwaʼ li wank saʼ choxa.
20 Xbʼaan naq bʼarwiʼ chʼutchʼuqebʼ wiibʼ malaj oxibʼ saʼ inkʼabʼaʼ, aran wankin saʼ xyanqebʼ».
21 Tojaʼ naq laj Pedro kijilok chixkʼatq li Jesús ut kixye re: «Qaawaʼ, wi li was wiitzʼin* namaakobʼk chiwu, jarubʼ sut tento tinkuy xmaak? Ma toj wuqubʼ sut?».
22 Kichaqʼok li Jesús ut kixye re: «Inkʼaʼ, inkʼaʼ ninye aawe 7 sut, ninye bʼan aawe 77 sut.
23 »Joʼkan naq li Xʼawabʼejilal li choxa chanchan jun li awabʼej li kixye rehebʼ li xmoos naq teʼxtoj li xkʼas.
24 Naq kiʼok xchʼutubʼankil li xtumin, xeʼxkʼam chaq re jun li moos li lajeebʼ mil bʼools chi tumin* xkʼas.
25 Saʼ xkʼabʼaʼ naq maajun tzʼuqul xtumin li moos aʼin, li awabʼej kixtaqla xkʼayinkil li moos, li rixaqil ut ebʼ li ralal xkʼajol joʼ ajwiʼ chixjunil li kʼaru re, re naq ttojmanq li xkʼas.
26 Tojaʼ naq li moos kixkut ribʼ chi roq, kixwiqʼibʼ ribʼ chiru ut kixye re: “Oybʼenihin bʼayaq ut tintoj aawe chixjunil linkʼas”.
27 Kʼajoʼ kitochʼeʼk xchʼool li awabʼej naq kirabʼi aʼin, joʼkan naq kixkanabʼ chi xik ut kixye re, naq maakʼaʼ chik xkʼas.
28 Naq kiʼelk li moos aʼin, ut kixtaw jun rehebʼ li rechmoosil li jun siʼeent denario* xkʼas, kixchap ut kiʼok xyatzʼbʼal. Ut kixye re: “Toj chixjunil laakʼas”.
29 Ut li rechmoosil kixkut ribʼ chi roq, ut kixye re: “Oybʼenihin bʼayaq ut tintoj aawe linkʼas!”.
30 Abʼan inkʼaʼ kiraj rabʼinkil li rechmoosil. Xkoho ut kixtaqla xkʼebʼal saʼ tzʼalam toj reetal tixtoj li xkʼas.
31 Naq ebʼ li rechmoosil xeʼxnaw li kikʼulmank, kʼajoʼ xeʼrahoʼk xchʼool ut xkohebʼ xseeraqʼinkil chixjunil re li awabʼej.
32 Tojaʼ naq li awabʼej kixbʼoq li moos aʼin ut kixye re: “Maaʼus tzʼaqal aanaʼlebʼ! Laaʼin xinkuy chixjunil laakʼas naq xattzʼaamank chiwu.
33 Ma inkʼaʼ raj xaawuxtaana ru* laawechmoosil joʼ naq laaʼin xwuxtaana aawu?”.*
34 Kʼajoʼ kijosqʼoʼk li awabʼej joʼkan naq kixqʼaxtesi saʼ ruqʼebʼ laj ilol preex toj reetal naq tixtoj chixjunil li xkʼas!
35 Joʼkan ajwiʼ tixbʼaanu eere Linyuwaʼ li wank saʼ choxa wi moko anchal ta eechʼool nekeekuy xmaak leeras eeriitzʼin».*
Xtzʼaqobʼ ebʼ li naʼlebʼ
^ Saʼ griego «li xaml li inkʼaʼ nachup».
^ Saʼ griego «saʼ Gehena». Taawil xchʼolobʼankil li aatin, Gehena.
^ Li raqal aʼin natawmank saʼ wiibʼ oxibʼ li Santil Hu. Abʼan moko natawmank ta saʼ chixjunil ebʼ li najteril hu li tzʼaqal re ru li wank saʼ griego.
^ Maare «Leeyuwaʼ».
^ Arin yook chi aatinak chirix li rechpaabʼanelil.
^ Saʼ griego «xtzʼuumal re».
^ Aʼin naraj xyeebʼal, li nekeʼkʼamok bʼe saʼ li chʼuut.
^ Malaj «li teekʼix».
^ Malaj «ak kʼixkʼo».
^ Arin yook chi aatinak chirix li rechpaabʼanelil.
^ Saʼ griego «talento». Lajeebʼ mil talento re plaat aʼan 60 miyon re denario. Li denario aʼan jun li tumin re plaat li nekeʼroksi ebʼ laj Roma.
^ Jun li denario aʼan xtojbʼal jun li winq li nakʼanjelak chiru jun kutan. Li denario aʼan jun li tumin re plaat li nekeʼroksi ebʼ laj Roma.
^ Malaj «xaatoqʼobʼa ru».
^ Malaj «xintoqʼobʼa aawu».
^ Arin yook chi aatinak chirix li rechpaabʼanelil.
