Mateo 19:1-30
19 Naq li Jesús kiraqeʼk xyeebʼal aʼin, kiʼelk saʼ xteepal Galilea ut kiwulak saʼ xnubʼaal Judea, junpakʼal li nimaʼ Jordán.
2 Li kʼiila tenamit kixtaqe li Jesús ut aran kixkʼirtasihebʼ li yaj.
3 Tojaʼ naq xeʼjilok chixkʼatq wiibʼ oxibʼ aj pariseey xeʼraj xyalbʼal rix ut xeʼxpatzʼ re: «Ma naxkʼulubʼa li chaqʼrabʼ naq junaq winq tixkanabʼ* li rixaqil saʼ xkʼabʼaʼ yalaq kʼaru chi naʼlebʼ?».
4 Kixsumehebʼ ut kixye: «Ma inkʼaʼ xeeril saʼ li Raatin li Yos naq li kiyobʼtesink rehebʼ saʼ xtiklajik, winq ut ixq naq kixyobʼtesihebʼ,
5 ut kixye: “Saʼ xkʼabʼaʼ aʼin, li winq tixkanabʼ li xnaʼ ut li xyuwaʼ twanq saʼ junajil rikʼin li rixaqil ut saʼ kabʼichal junajaqebʼ chik chi tibʼelej?”.
6 Joʼkan naq moko wiibʼebʼ ta chik, junebʼ bʼan chik. Joʼkan bʼiʼ, li naxlaqʼabʼ li Yos maaʼani tjachoq re».
7 Ebʼ aʼan xeʼxpatzʼ re: «Abʼan, kʼaʼut laj Moisés kixye naq li winq tixtzʼiibʼa re li rixaqil xhuhil li jachok ibʼ re naq tixkanabʼ* li rixaqil?».
8 Li Jesús kixsumehebʼ chi joʼkaʼin: «Laj Moisés kixkanabʼ naq teeraq leesumlajik xbʼaan naq leechʼool kixqʼet ribʼ. Abʼan moko joʼkan ta chaq saʼ xtiklajik.
9 Laaʼin ninye eere naq li winq li naxkanabʼ* li rixaqil, ut nasumlaak rikʼin jalan chik, naxmux li xsumlajik.* Li winq naru naxkanabʼ* li rixaqil wi li rixaqil kixmux ribʼ».*
10 Ebʼ li xtzolom xeʼxye re: «Wi joʼkan xwanjik li winq rikʼin li rixaqil, qʼaxal us naq inkʼaʼ tsumlaaq».
11 Aʼan kixye rehebʼ: «Moko chixjunilebʼ ta li qas qiitzʼin nekeʼruuk xbʼaanunkil aʼin, kaʼajwiʼ ebʼ li nekeʼxkʼulubʼa li maatan.*
12 Wankebʼ inkʼaʼ nekeʼruuk chi sumlaak xbʼaan naq inkʼaʼ us li xtzʼejwalebʼ naq xeʼyoʼlaak. Jalanebʼ chik inkʼaʼ nekeʼruuk chi sumlaak xbʼaan naq setbʼilebʼ xtzʼejwal. Ut wankebʼ ajwiʼ inkʼaʼ nekeʼsumlaak saʼ xkʼabʼaʼ li Xʼawabʼejilal li choxa. Li truuq xbʼaanunkil aʼin, chixbʼaanuhaq».
13 Tojaʼ naq xeʼxkʼam chaq re li Jesús wiibʼ oxibʼ li kokʼal re naq tixkʼe li ruqʼ saʼ xbʼeenebʼ* ut ttijoq chirixebʼ. Abʼan ebʼ li xtzolom xeʼok xchʼilankil li xnaʼ xyuwaʼ ebʼ li kokʼal.
14 Abʼanan, li Jesús kixye rehebʼ: «Meechʼiʼchʼiʼi ebʼ li kokʼal. Meeram chiruhebʼ naq teʼjiloq chaq wikʼin xbʼaan naq li chanchanebʼ li kokʼal, rehebʼ aʼan li Xʼawabʼejilal li choxa».
15 Chirix chik aʼan kixkʼe li ruqʼ saʼ xbʼeenebʼ ut kiʼelk aran.
16 Tojaʼ naq kinachʼok rikʼin li Jesús jun li saaj winq ut kixpatzʼ re: «At Kʼutunel, kʼaru li chaabʼil naʼlebʼ tento tinbʼaanu re naq tintaw li junelik yuʼam?».
17 Aʼan kixye re: «Kʼaʼut we nakaapatzʼ chirix li chaabʼil? Kaʼajwiʼ li Yos chaabʼil. Joʼkan ajwiʼ, wi nakaawaj xtawbʼal li yuʼam, taapaabʼ li xtaqlahom li Yos».
18 Tojaʼ naq li saaj winq kixye re: «Bʼar wank ebʼ li taql aʼin?». Kichaqʼok li Jesús ut kixye re: «Matkamsink, matmuxuk sumlaak,* mat-elqʼak, matyoobʼank tikʼtiʼ,
19 taawoxloqʼi laanaʼ laayuwaʼ ut taara laawas aawiitzʼin joʼ naq nakaara aawibʼ».
20 Li saaj winq kixye: «Laaʼin ninyuʼami chaq chixjunil aʼin. Kʼaru chik tento tinbʼaanu?».
21 Kichaqʼok li Jesús ut kixye re: «Wi nakaawaj xbʼaanunkil chixjunil chi tzʼaqal re ru, ayu ut kʼayi chaq li kʼaru aawe. Ut li tumin taakʼe rehebʼ li nebʼaʼ, chi joʼkan taataw aabʼihomal saʼ choxa. Tojaʼ naq tatchalq ut tinaataqe».
22 Naq li saaj winq kirabʼi aʼin, xkoho chi ra saʼ xchʼool xbʼaan naq naabʼal li kʼaru re.
23 Tojaʼ naq li Jesús kixye rehebʼ li xtzolom: «Relik chi yaal ninye eere, wi junaq li bʼihom naraj ok saʼ li Xʼawabʼejilal li choxa qʼaxal tchʼaʼajkoʼq chiru.
24 Ninye wiʼ chik eere naq moko chʼaʼajkaq ta chiru junaq li kameey* ok saʼ ru junaq li kuux chiru naq junaq li bʼihom t-oq saʼ li Xʼawabʼejilal li Yos».
25 Naq ebʼ li xtzolom xeʼrabʼi aʼin, kʼajoʼ naq xeʼsach xchʼool ut xeʼxye: «Wi joʼkan, ani tkoleʼq?».
26 Li Jesús kikanaak rilbʼalebʼ ut kixye: «Chiruhebʼ li winq inkʼaʼ naruhank xbʼaanunkil aʼin, abʼan chiru li Yos naruhank chixjunil».
27 Tojaʼ naq laj Pedro kixye re: «Kʼe reetal, laaʼo xqakanabʼ chixjunil re aataqenkil. Abʼan, kʼaru tkʼemanq qe?».
28 Li Jesús kixye rehebʼ: «Relik chi yaal ninye eere naq twulaq xqʼehil naq t-akʼobʼresiiq chixjunil. Ut li Ralal li Winq tchunlaaq saʼ li xloqʼlaj kʼojaribʼaal. Ut laaʼex, li xextaqenk we, texchunlaaq saʼ li kabʼlaju chi kʼojaribʼaal ut texraqoq aatin saʼ xbʼeen li kabʼlaju chi teep re Israel.
29 Li naxkanabʼ rochoch, ras ut riitzʼin, ranabʼ, xnaʼ, xyuwaʼ, ralal xkʼajol malaj xchʼochʼ xbʼaan linkʼabʼaʼ, tixkʼul jun siʼeent sut chik saʼ xbʼeen chiru li kixkanabʼ chaq ut trechani li junelik yuʼam.
30 »Abʼan naabʼal rehebʼ li wankebʼ chiʼubʼej teʼkanaaq chiʼixbʼej, ut naabʼal rehebʼ li wankebʼ chiʼixbʼej teʼkanaaq chiʼubʼej.
Xtzʼaqobʼ ebʼ li naʼlebʼ
^ Li aatin saʼ griego naraj xyeebʼal xjachbʼal li sumlajik chiru chaqʼrabʼ.
^ Li aatin saʼ griego naraj xyeebʼal xjachbʼal li sumlajik chiru chaqʼrabʼ.
^ Li aatin saʼ griego naraj xyeebʼal xjachbʼal li sumlajik chiru chaqʼrabʼ.
^ Malaj «namuxuk kaxaar».
^ Li aatin saʼ griego naraj xyeebʼal xjachbʼal li sumlajik chiru chaqʼrabʼ.
^ Malaj «kixkʼat roq li xbʼeelom». Li aatin saʼ griego, pornéia. Taawil xchʼolobʼankil li aatin, muxuk ibʼ.
^ Aʼin naraj xyeebʼal, chirix li wankebʼ xjunes.
^ Aʼin naraj xyeebʼal, re naq teʼosobʼtesiiq.
^ Malaj «matmuxuk kaxaar».
^ Aʼin jun li nimla xul li wank xbʼuqʼulal rix.
