Mateo 2:1-23
2 Naq yook chaq chi awabʼejink laj Herodes,* kiyoʼlaak li Jesús saʼ li tenamit Belén saʼ xteepal Judea, tojaʼ naq xeʼwulak Belén wiibʼ oxibʼ li winq li nekeʼqʼehink rikʼin chahim
2 ut xeʼok xpatzʼbʼal: «Bʼar wank li awabʼej rehebʼ laj judiiy li tojaʼ xyoʼlaak? Toj wanko ajwiʼ saʼ li naʼaj bʼarwiʼ naʼelk li saqʼe naq xqil li xchahim, joʼkan naq xoochalk xwiqʼibʼankil qibʼ chiru».
3 Naq li awabʼej Herodes kirabʼi aʼin, kiʼok xkʼaʼuxl ut keʼok ajwiʼ xkʼaʼuxl li wankebʼ Jerusalén.
4 Li awabʼej Herodes kixchʼutubʼ chixjunilebʼ li xbʼeenil laj tij ut ebʼ laj tzʼiibʼ re li tenamit ut kixpatzʼ rehebʼ bʼar tento tyoʼlaaq li Kriist.*
5 Ebʼ aʼan xeʼxye re: «Saʼ Belén re Judea xbʼaan naq aʼin kitzʼiibʼamank chaq saʼ xkʼabʼaʼ li propeet:
6 “Aʼut laaʼat Belén, xnaʼajebʼ laj Judá, chixjunilebʼ li junchʼol chik chi awabʼej re Judá inkʼaʼ raj teʼxye naq maakʼaʼ aawankil xbʼaan naq aawikʼin t-elq chaq jun li awabʼej li tril lintenamit Israel”».
7 Tojaʼ naq laj Herodes kixtaqla xbʼoqbʼalebʼ chi muqmu ebʼ li winq li nekeʼqʼehink rikʼin chahim ut kixpatzʼ rehebʼ joqʼe tzʼaqal xeʼril li chahim.
8 Moqon chik kixtaqlahebʼ Belén ut kixye rehebʼ: «Ayuqex, sikʼomaq chaq li chʼinaʼal saʼ chixjunil li naʼajej. Naq teetaw, toleeye we, re naq laaʼin ajwiʼ tinxik xwiqʼibʼankil wibʼ chiru».
9 Naq xeʼrabʼi aʼin, xeʼxchap xbʼe. Ut li chahim yook chiruhebʼ ut kixaqli bʼarwiʼ wank li chʼinaʼal. Aʼin li chahim li xeʼril naq wankebʼ chaq bʼarwiʼ naʼelk li saqʼe.
10 Naq xeʼril li chahim, kʼajoʼ xeʼsahoʼk xchʼool.
11 Xeʼok saʼ li ochoch, xeʼxtaw li chʼinaʼal rikʼin li xMaría li xnaʼ, tojaʼ naq xeʼxwiqʼibʼ ribʼ chiru. Joʼkan ajwiʼ, xeʼxte li xkaaxebʼ ut xeʼxsi xʼoor, xʼolíbano ut xmiir.
12 Ut saʼ xkʼabʼaʼ naq li Yos kixye rehebʼ saʼebʼ li xmatkʼ naq inkʼaʼ teʼsutqʼiiq rikʼin laj Herodes, jalan chik li bʼe xeʼxchap naq xkohebʼ saʼ li xtenamit.
13 Naq ak xkohebʼ li winq aʼin, li xʼánjel li Jehobʼa* kixkʼut ribʼ chiru laj José saʼ jun li matkʼ ut kixye re: «Ayu Ejiipt, kʼam li chʼinaʼal rochbʼeen li xnaʼ ut kanaqat aran toj naq tinye aawe xbʼaan naq laj Herodes tixsikʼ li chʼinaʼal re xkamsinkil».
14 Joʼkan naq chiru li qʼoqyink aʼan, laj José kixkʼam li chʼinaʼal rochbʼeen li xnaʼ aran Ejiipt,
15 ut aran kikanaak toj reetal kikamk laj Herodes. Chi joʼkaʼin kitzʼaqlok ru li kixye chaq li Jehobʼa* saʼ xkʼabʼaʼ li xpropeet: «Xinbʼoq li walal re naq t-elq chaq Ejiipt».
16 Naq laj Herodes kixkʼe reetal naq kibʼalaqʼiik xbʼaanebʼ li winq li nekeʼqʼehink rikʼin chahim, kʼajoʼ naq kichalk xjosqʼil. Ut naq ak xtzʼil rix joqʼe tzʼaqal xeʼril li chahim ebʼ laj qʼe, kixtaqla xkamsinkil chixjunilebʼ li chʼinaʼal li wankebʼ Belén joʼ ajwiʼ li wankebʼ saʼ xweent li naʼaj aʼin. Chixjunilebʼ li maajiʼ nekeʼxket wiibʼ chihabʼ ut li ak xeʼxket wiibʼ chihabʼ.
17 Chi joʼkaʼin kitzʼaqlok ru li kixye chaq li Yos saʼ xkʼabʼaʼ li propeet Jeremías:
18 «Saʼ Ramá kiʼabʼimank xyaabʼ xkux jun li qas qiitzʼin li yook chi yaabʼak ut chi tzʼuyink. Aʼan li xRaquel, yook chi yaabʼak chirixebʼ li xkokʼal xbʼaan naq maaʼanihebʼ chik rikʼin ut inkʼaʼ naraj naq tkʼojobʼaaq xchʼool».
19 Naq kikamk laj Herodes, li xʼánjel li Jehobʼa* kixkʼut ribʼ saʼ jun li matkʼ chiru laj José, li wank chaq Ejiipt,
20 ut kixye re: «Sutqʼin saʼ li tenamit Israel, kʼam li chʼinaʼal rochbʼeen li xnaʼ xbʼaan naq kamenaqebʼ chik li xeʼajok re xkamsinkil li chʼinaʼal».
21 Joʼkan naq kisutqʼi saʼ li naʼaj Israel, kixkʼam li chʼinaʼal ut li xnaʼ.
22 Abʼan, naq laj José kixnaw naq laj Arquelao yook chi awabʼejink aran Judea choʼq reqaj laj Herodes aʼ li xyuwaʼ, kixuwak. Ut saʼ xkʼabʼaʼ naq li Yos kixye re saʼ jun li matkʼ naq inkʼaʼ txik aran, xkoho saʼ xteepal Galilea.
23 Ut kikanaak saʼ jun li tenamit Nazaret xkʼabʼaʼ. Chi joʼkaʼin kitzʼaqlok ru li kixye chaq li Yos saʼ xkʼabʼaʼebʼ li xpropeet: «Aj Nazaret* tixkʼabʼaʼi».
Xtzʼaqobʼ ebʼ li naʼlebʼ
^ Taawil xchʼolobʼankil li aatin, Herodes.
^ Malaj «li Mesiiy», «li Yulbʼil Ru xbʼaan li Yos».
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Maare chalenaq saʼ li aatinobʼaal hebreo li naraj naxye “natuxmek”.
