Mateo 20:1-34
-
Chixjunilebʼ li moos li xeʼkʼanjelak saʼ li chʼochʼ bʼarwiʼ awbʼil li uubʼ juntaqʼeet xtojbʼal nekeʼxpatzʼ (1-16)
-
Li Jesús naxye wiʼ chik chi rubʼelaj li xkamik (17-19)
-
Jun li naʼbʼej naxpatzʼ li naʼaj li wank xwankil saʼ li Xʼawabʼejilal li Yos (20-28)
-
Li Jesús naxkʼe xyuʼam re xkolbʼal naabʼal li qas qiitzʼin (28)
-
-
Naxkʼirtasi wiibʼ li mutzʼ (29-34)
20 »Xbʼaan naq li Xʼawabʼejilal li choxa chanchan jun laj echal chʼochʼ li kiʼelk eqʼla chi xsikʼbʼal ebʼ li xmoos re naq teʼkʼanjelaq saʼ li xchʼochʼ bʼarwiʼ awbʼil li uubʼ.
2 Naq ak kixkʼe ribʼ saʼ aatin rikʼinebʼ laj kʼanjel naq jun denario* teʼxkʼul chiru jun kutan, kixtaqlahebʼ chi kʼanjelak saʼ li xchʼochʼ.
3 Naq kachʼin chik ma bʼeleebʼ hoonal re eqʼla kiʼelk wiʼ chik ut saʼ kʼayil kiril chi xaqxo wiibʼ oxibʼ li winq li maakʼaʼebʼ xkʼanjel.
4 Joʼkan naq kixye rehebʼ: “Ayuqex ajwiʼ laaʼex chi kʼanjelak saʼ linchʼochʼ ut texintoj joʼ chanru eekʼulubʼ”.
5 Ut ebʼ li winq xkohebʼ chi kʼanjelak. Laj echal chʼochʼ kiʼelk wiʼ chik chi xsikʼbʼalebʼ laj kʼanjel naq kachʼin chik ma tuqtu waʼlebʼ ut joʼkan ajwiʼ kixbʼaanu naq kachʼin chik ma oxibʼ hoor re ewu.
6 Tojaʼ naq, kiʼelk wiʼ chik naq kachʼin chik ma oobʼ hoonal re ewu ut kixtaw wiibʼ oxibʼ chik li winq chi xaqxo ut kixpatzʼ rehebʼ: “Kʼaʼut xeenumsi li kutan arin chi maakʼaʼ eekʼanjel?”.
7 Ebʼ aʼan xeʼxye re: “Xbʼaan naq maaʼani xkʼehok re qakʼanjel”. Laj echal chʼochʼ kixye rehebʼ: “Ayuqex ajwiʼ laaʼex chi kʼanjelak saʼ linchʼochʼ bʼarwiʼ awbʼil li uubʼ”.
8 »Naq kiʼewuuk, laj echal chʼochʼ kixye re laj ilol kʼanjel: “Bʼoqebʼ laj kʼanjel ut taatojebʼ. Xbʼeenwa taatojebʼ li xeʼkʼulunk chiʼixbʼej, chirix chik aʼan taatojebʼ li xeʼkʼulunk xbʼeenwa”.
9 Naq xeʼwulak ebʼ laj kʼanjel li xeʼok oobʼ hoonal re ewu, li junjunq kixkʼul jun denario.*
10 Joʼkan bʼiʼ, naq xeʼwulak ebʼ laj kʼanjel li xeʼok xbʼeenwa xeʼxkʼoxla naq naabʼal chik teʼxkʼul; abʼan jun denario* ajwiʼ xeʼxkʼul.
11 Naq xeʼxkʼul li xtojbʼal, xeʼok xwechʼbʼal rix laj echal chʼochʼ
12 ut xeʼxye re: “Ebʼ li winq aʼin li xeʼok chi kʼanjelak chiʼixbʼej, jun hoonal ajwiʼ xeʼkʼanjelak ut yookat xtojbʼalebʼ joʼ xooʼaatoj laaʼo li kaw xookʼanjelak chiru jun kutan ut xqakuy li saqʼe”.
13 Laj echal chʼochʼ kixye re jun rehebʼ aʼan: “Wamiiw, maakʼaʼ yookin aawe. Xqakʼe qibʼ saʼ aatin naq jun denario* tinkʼe aawe, peʼyaal?
14 Kʼam laatojbʼal ut ayu. Li joʼnimal xinkʼe aawe, aʼan ajwiʼ tinkʼe re li xkʼulunk chiʼixbʼej.
15 Ma inkʼaʼ tabʼiʼ naru tinbʼaanu li nawaj rikʼin li kʼaru we? Malaj yookat inkaqalinkil xbʼaan naq chaabʼilin rikʼinebʼ?”.
16 Joʼkan naq li xeʼok chiʼixbʼej teʼkanaaq chiʼubʼej ut li xeʼok chiʼubʼej teʼkanaaq chiʼixbʼej».
17 Naq yookebʼ chi taqeʼk Jerusalén, li Jesús kirisi xjunes li kabʼlaju ut kixye rehebʼ naq yookebʼ chiru bʼe:
18 «Kʼehomaq reetal, yooko chi taqeʼk Jerusalén ut aran li Ralal li Winq tqʼaxtesiiq saʼ ruqʼebʼ li xbʼeenil laj tij ut saʼ ruqʼebʼ laj tzʼiibʼ. Teʼxtenebʼ kamk saʼ xbʼeen
19 ut teʼxqʼaxtesi saʼ ruqʼebʼ li maawaʼebʼ aj judiiy li teʼseʼenq re, teʼxkʼe chi tzʼuum* ut teʼxtʼuyubʼ chiru cheʼ; ut saʼ rox kutan twaklesiiq chi yoʼyo».
20 Tojaʼ naq li xnaʼ ebʼ li ralal laj Zebedeo kijilok chixkʼatq li Jesús rochbʼeenebʼ li xyum, ut kixwiqʼibʼ ribʼ chiru re xpatzʼbʼal jun usilal re.
21 Li Jesús kixpatzʼ re: «Kʼaru nakaawaj?». Li ixq kixye: «Naq wanqat saʼ Laaʼawabʼejilal, kanabʼ naq ebʼ linyum teʼchunlaaq chaakʼatq, jun saʼ laatzʼe ut jun saʼ laanim».
22 Li Jesús kixye: «Laaʼex inkʼaʼ nekeenaw li yookex xpatzʼbʼal. Ma texruuq tabʼiʼ rukʼbʼal li ok we rukʼbʼal laaʼin?». «Tooruuq», chankebʼ.
23 Li Jesús kixye rehebʼ: «Yaal, laaʼex teerukʼ li ok we rukʼbʼal, abʼan moko laaʼin ta ninyeehok re ani tchunlaaq saʼ linnim ut saʼ lintzʼe. Ebʼ li naʼajej aʼin kawresinbʼil choʼq rehebʼ li ak sikʼbʼilebʼ ru xbʼaan Linyuwaʼ».
24 Naq xeʼrabʼi aʼin li lajeebʼ chik, xeʼchʼaʼajkoʼk rikʼinebʼ li wiibʼ li riitzʼinebʼ ribʼ.
25 Abʼan, li Jesús kixchʼutubʼebʼ ut kixye rehebʼ: «Nekeenaw naq ebʼ li nekeʼjolomink rehebʼ li tenamit nekeʼnumtaak saʼ xbʼeenebʼ li qas qiitzʼin ut ebʼ li xninqal ru winq wankebʼ ajwiʼ xwankil saʼ xbʼeenebʼ li qas qiitzʼin.
26 Moko joʼkanaq ta saʼ eeyanq. Li naraj naq nimaq saʼ eeyanq tento twanq choʼq xmoosebʼ li junchʼol
27 ut li naraj wank chiʼubʼej saʼ eeyanq, tento twanq choʼq xmoosebʼ li junchʼol.
28 Aʼin kixbʼaanu li Ralal li Winq. Aʼan inkʼaʼ kichalk re naq ebʼ li junchʼol teʼwanq choʼq xmoos, kichalk bʼan choʼq xmoos ebʼ li junchʼol ut xkʼebʼal li xyuʼam re xkolbʼal naabʼal li qas qiitzʼin».*
29 Naq xeʼelk chaq Jericó, kʼajoʼ xkʼihalil li qas qiitzʼin kitaqenk re.
30 Ut aran wiibʼ li mutzʼ chunchukebʼ chire bʼe. Naq xeʼrabʼi naq li Jesús yook chi numeʼk, xeʼxjap re chi xyeebʼal: «Qaawaʼ, ralal laj David, toqʼobʼa qu!».*
31 Tojaʼ naq xeʼqʼuseʼk xbʼaanebʼ li qas qiitzʼin ut xeʼyeeheʼk re, naq teʼxkanabʼ xjapbʼal rehebʼ; abʼan kaw chik xeʼok xyeebʼal: «Qaawaʼ, ralal laj David! Toqʼobʼa qu!».*
32 Joʼkan naq kixaqli li Jesús, kixbʼoqebʼ ut kixye rehebʼ: «Kʼaru nekeeraj naq tinbʼaanu eere?».
33 Xeʼchaqʼok ebʼ aʼan: «Qaawaʼ, naqaj naq tteehonq saʼ li qu».
34 Ut li Jesús kʼajoʼ naq kixtoqʼobʼahebʼ ru ut kixchʼeʼebʼ saʼ li ru. Saʼ junpaat xeʼok chi ilok, ut xeʼok xtaqenkil.
Xtzʼaqobʼ ebʼ li naʼlebʼ
^ Jun li denario aʼan xtojbʼal jun li winq li nakʼanjelak chiru jun kutan. Li denario aʼan jun li tumin re plaat li nekeʼroksi ebʼ laj Roma.
^ Jun li denario aʼan xtojbʼal jun li winq li nakʼanjelak chiru jun kutan. Li denario aʼan jun li tumin re plaat li nekeʼroksi ebʼ laj Roma.
^ Jun li denario aʼan xtojbʼal jun li winq li nakʼanjelak chiru jun kutan. Li denario aʼan jun li tumin re plaat li nekeʼroksi ebʼ laj Roma.
^ Jun li denario aʼan xtojbʼal jun li winq li nakʼanjelak chiru jun kutan. Li denario aʼan jun li tumin re plaat li nekeʼroksi ebʼ laj Roma.
^ Taawil xchʼolobʼankil li aatin, kʼehok chi tzʼuum.
^ Malaj «re xloqʼbʼal wiʼ chik xyuʼam naabʼal li qas qiitzʼin».
^ Malaj «uxtaana qu».
^ Malaj «Uxtaana qu».
