Mateo 21:1-46
-
Li Jesús naʼok Jerusalén (1-11)
-
Narisihebʼ saʼ rochoch li Yos li nekeʼkʼayink ut li nekeʼloqʼok (12-17)
-
Naxtzʼeqtaana jun toon li iig (18-22)
-
Nekeʼxpatzʼ re li Jesús chirix li xwankil (23-27)
-
Li eetalil chirix wiibʼ li alalbʼej (28-32)
-
Li eetalil chirixebʼ laj kʼanjel li nekeʼxkamsi li junchʼol (33-46)
-
Xeʼxtzʼeqtaana li xnimal ru pek li naxik saʼ xxuk ut nakʼemank taqeʼq (42)
-
21 Naq xeʼnachʼok Jerusalén ut xeʼwulak Betfagué saʼ li tzuul Olivo, li Jesús kixtaqla wiibʼ rehebʼ li xtzolom
2 ut kixye rehebʼ: «Ayuqex saʼ li kʼalebʼaal li nekeeril aran. Naq texwulaq, teetaw chi bʼakʼbʼo jun li bʼuur rochbʼeen jun li chʼina bʼuur. Teehit* ebʼ li bʼuur ut teekʼam chaq we.
3 Wi wank teʼxye eere, joʼkaʼin texsumenq: “Li Qaawaʼ naʼajok rehebʼ”. Ut saʼ junpaat tixkanabʼ naq teekʼam chaq».
4 Chixjunil aʼin kikʼulmank re naq ttzʼaqloq ru li kixye chaq li Yos saʼ xkʼabʼaʼ li propeet, naq kixye:
5 «Yeemaq re xkoʼ li xSion: “Kʼe reetal, weʼ chaq Laaʼawabʼej. Tuulan ut kʼojkʼo saʼ xbʼeen jun li bʼuur, joʼkan, saʼ xbʼeen jun li chʼina bʼuur, ral jun li xul li naʼiiqank”».
6 Joʼkan naq, ebʼ li tzolom xkohebʼ ut xeʼxbʼaanu joʼ xeʼtaqlaak wiʼ xbʼaan li Jesús.
7 Ebʼ li qas qiitzʼin xeʼxkʼam chaq re li Jesús li bʼuur ut li chʼina bʼuur ut xeʼxkʼe li xtʼikr saʼ xbʼeenebʼ li bʼuur, ut aʼan kikʼojlaak saʼ xbʼeen li chʼina bʼuur.
8 Li xkʼihalil ebʼ li qas qiitzʼin xeʼxhel li xtʼikr saʼ bʼe ut jalanebʼ chik xeʼxyokʼ li ruqʼ cheʼ ut xeʼxhel saʼ bʼe.
9 Joʼkan ajwiʼ, li kʼiila tenamit li yook chiru ut li yookebʼ chirix japjokebʼ re chi xyeebʼal: «Naqatzʼaama chaawu, at Yos, naq taakol li Ralal laj David! Osobʼtesinbʼil taxaq li nachalk saʼ xkʼabʼaʼ li Jehobʼa!* Naqatzʼaama chaawu naq taakol, laaʼat li wankat taqeʼq!».
10 Naq li Jesús kiʼok Jerusalén, chixjunil li tenamit kixpoqoqi ribʼ* ut ebʼ li qas qiitzʼin xeʼok xyeebʼal: «Ani li winq aʼin?».
11 Ebʼ li kʼiila tenamit xeʼok xyeebʼal: «Aʼan li Jesús li propeet aj Nazaret re Galilea!».
12 Kiʼok li Jesús saʼ rochoch li Yos ut kirisihebʼ aran chixjunilebʼ li yookebʼ chi kʼayink ut chi loqʼok. Kixbʼalqʼusi xmeexebʼ laj jalol tumin ut xtemebʼ laj kʼay mukuy.
13 Ut kixye rehebʼ: «Tzʼiibʼanbʼil “Li wochoch tkʼabʼaʼiiq rochochil li tijok”, abʼan laaʼex yookex xkʼebʼal choʼq rochochebʼ aj elqʼ».
14 Naq wank chaq saʼ rochoch li Yos, xeʼjilok ajwiʼ rikʼin ebʼ li mutzʼ ut ebʼ li yeq roq ut aʼan kixkʼirtasihebʼ.
15 Ebʼ li xbʼeenil aj tij ut ebʼ laj tzʼiibʼ xeʼchʼaʼajkoʼk naq xeʼril ebʼ li sachbʼachʼoolej li yook xbʼaanunkil ut naq ebʼ li kokʼal japjokebʼ re chi xyeebʼal saʼ rochoch li Yos «Naqatzʼaama chaawu, at Yos, naq taakol li Ralal laj David!».
16 Joʼkan naq xeʼxye re li Jesús: «Ma nakaawabʼi li yookebʼ xyeebʼal?». Aʼan kixye rehebʼ: «Heeheʼ, nawabʼi. Ma maajunwa eerilom aʼin saʼ li Raatin li Yos: “Xaabʼaanu naq ebʼ li kokʼal ut ebʼ li toj nekeʼtuʼuk teʼxkʼe aaloqʼal rikʼin xtzʼuumal rehebʼ”?».
17 Ut kixkanabʼebʼ aran, kiʼelk saʼ li tenamit ut xkoho Betania bʼarwiʼ kixnumsi li qʼoqyink.
18 Naq kisutqʼiik eqʼla saʼ li tenamit, kichalk xtzʼokajik.
19 Tojaʼ naq kiril jun toon chi iig li wank chire bʼe, kijilok chixkʼatq, abʼan maakʼaʼ li ru kixtaw, junes xxaq bʼan kixtaw. Ut kixye re: «Maajunwa chik tat-uuchinq». Saʼ junpaat kichaqik xcheʼil li iig.
20 Naq ebʼ li xtzolom xeʼril aʼin, sachsokebʼ xchʼool xeʼkanaak ut xeʼxye: «Chanru naq saʼ junpaat kichaqik xcheʼil li iig?».
21 Kichaqʼok li Jesús ut kixye rehebʼ: «Relik chi yaal ninye eere naq, wi nekeepaabʼ ut moko wiibʼ ta ru leechʼool, moko kaʼaj tawiʼ teebʼaanu li xinbʼaanu re xcheʼil li iig, teeye bʼan re li tzuul aʼin “Waklin ut kut aawibʼ saʼ palaw” ut joʼkan tkʼulmanq.
22 Ut chixjunil li teepatzʼ saʼ leetij, paabʼomaq naq teekʼul, ut teekʼul».
23 Naq li Jesús yook chi kʼutuk saʼ rochoch li Yos, xeʼjilok rikʼin ebʼ li xbʼeenil aj tij ut ebʼ li cheekel winq re li tenamit ut xeʼxye re: «Kʼaru aawankil naq nakaabʼaanu aʼin? Ani xkʼehok re aawankil?».
24 Li Jesús kixye rehebʼ: «Laaʼin ajwiʼ tinbʼaanu eere jun li patzʼom. Wi tineesume, tinye eere kʼaru inwankil naq ninbʼaanu aʼin.
25 Li kubʼihaʼ li kixbʼaanu chaq laj Juan, bʼar chalenaq? Ma saʼ choxa, malaj rikʼinebʼ li winq?». Aʼanebʼ xeʼok xkʼoxlankil ut xeʼxye chiribʼilebʼ ribʼ: «Wi tqaye naq chalenaq saʼ choxa, aʼan tixye qe: “Wi joʼkan, kʼaʼut inkʼaʼ xeepaabʼ re?”.
26 Abʼan, maaʼani qe kiruuk xyeebʼal naq chalenaq rikʼinebʼ li winq. Naqaxuwa ru li kʼiila tenamit xbʼaan naq nekeʼril laj Juan joʼ propeet».
27 Joʼkan naq xeʼxye re li Jesús: «Inkʼaʼ naqanaw». Ut aʼan kixye ajwiʼ rehebʼ: «Joʼkan ajwiʼ laaʼin inkʼaʼ tinye eere kʼaru inwankil naq ninbʼaanu aʼin.
28 »Kʼaru nekeekʼoxla chirix aʼin? Jun li winq li wank wiibʼ ralal, kijilok chixkʼatq li xbʼeen ut kixye re: “Waʼ, anaqwan tatxik chi kʼanjelak saʼ li chʼochʼ bʼarwiʼ awbʼil li uubʼ”.
29 Li ralal kichaqʼok ut kixye re: “Inkʼaʼ nawaj xik”. Abʼan moqon chik kixjal xkʼaʼuxl ut xkoho.
30 Chirix chik aʼan li yuwaʼbʼej kijilok rikʼin li jun chik ut kixtaqla ajwiʼ chi kʼanjelak. Ut li alalbʼej aʼin kixye re: “Us, tinxik”. Abʼan, inkʼaʼ xkoho.
31 Bʼar wank rehebʼ li wiibʼ chi alalbʼej kixbʼaanu li kixye li yuwaʼbʼej?». Aʼanebʼ xeʼxsume: «Li xbʼeen». Li Jesús kixye rehebʼ: «Relik chi yaal ninye eere naq ebʼ li nekeʼxchʼutubʼ li toj choʼq re li awabʼej ut ebʼ li ixq li nekeʼxkʼayi ribʼ teʼoq xbʼeenwa cheeru laaʼex saʼ li Xʼawabʼejilal li Yos.
32 Xbʼaan naq laj Juan kikʼulunk ut kixkʼut cheeru li chaabʼil bʼe, abʼan inkʼaʼ xeepaabʼ re. Aʼut ebʼ li nekeʼxchʼutubʼ li toj choʼq re li awabʼej ut ebʼ li ixq li nekeʼxkʼayi ribʼ, xeʼxpaabʼ re. Ut laaʼex, usta xeeril aʼin inkʼaʼ xeejal eekʼaʼuxl chi moko xeepaabʼ re.
33 »Abʼihomaq jun chik li eetalil.* Jun li winq aj echal chʼochʼ, kiraw li uubʼ ut kixkorali. Kixbʼek ajwiʼ aran jun li yatzʼlebʼaal uubʼ, tojaʼ naq kixyiibʼ jun li ochoch li najt xteram. Chirix chik aʼan kixkʼe chi toʼ li chʼochʼ aʼin re wiibʼ oxibʼ laj kʼanjel ut xkoho chi najt.
34 Naq xwulak xqʼehil re xsikʼbʼal ru li uubʼ, laj echal chʼochʼ kixtaqlahebʼ li xmoos rikʼinebʼ laj kʼanjel re xkʼulbʼal ru li uubʼ li ttzʼaq.
35 Abʼan ebʼ laj kʼanjel xeʼxchap ebʼ li moos, jun xeʼxteni, jun xeʼxkamsi ut li jun chik xeʼxkʼe chi pek.
36 Laj echal chʼochʼ kixtaqla wiʼ chik ebʼ li moos, naabʼal chik chiru li kixtaqla xbʼeenwa. Abʼan joʼkan ajwiʼ xeʼxbʼaanu rehebʼ.
37 Chirix chik aʼin, kixtaqla li ralal xbʼaan naq kixye saʼ xchʼool: “Li walal teʼroxloqʼi”.
38 Abʼan, naq xeʼril li ralal, ebʼ laj kʼanjel xeʼxye chiribʼilebʼ ribʼ: “Aʼin laj echal re li ereens. Yoʼqebʼ, qakamsihaq, ut chi joʼkan tookanaaq rikʼin li xʼereens!”.
39 Joʼkan bʼiʼ, xeʼxchap, xeʼrisi saʼ li naʼaj aʼin ut xeʼxkamsi.
40 Abʼanan, naq tkʼulunq laj echal chʼochʼ, kʼaru tixbʼaanu rehebʼ laj kʼanjel?».
41 Li yookebʼ chi abʼink xeʼxye re: «Saʼ xkʼabʼaʼ naq maaʼusebʼ xnaʼlebʼ, tixkamsihebʼ ut tixkʼe chi toʼ li xchʼochʼ re jalanebʼ chik ut ebʼ laj kʼanjel aʼin teʼxkʼe re li ru li uubʼ naq twulaq xqʼehil li sikʼok».
42 Li Jesús kixye rehebʼ: «Li Raatin li Yos naxye: “Li pek li xeʼxtzʼeqtaana ebʼ laj kabʼlanel, aʼan li kikanaak choʼq xnimal ru pek li naxik saʼ xxuk ut nakʼemank taqeʼq. Li pek aʼin chalenaq rikʼin li Jehobʼa* ut choʼq qe kʼajoʼ xchʼinaʼusil”. Ma inkʼaʼ bʼiʼ eerilom saʼ li Raatin li Yos?
43 Joʼkan naq ninye eere naq li Xʼawabʼejilal li Yos tmaqʼeʼq cheeru ut tkʼeheʼq re jalanebʼ chik li qas qiitzʼin li teʼnaʼlebʼaq* joʼ naraj li Yos.
44 Joʼkan ajwiʼ, wi junaq li qas qiitzʼin natʼaneʼk saʼ xbʼeen li pek aʼin, teninbʼil tkanaaq. Ut wi li pek aʼin ttʼaneʼq saʼ xbʼeen junaq li qas qiitzʼin, kokʼpukʼ tkanaaq».
45 Naq ebʼ li xbʼeenil aj tij ut ebʼ laj pariseey xeʼrabʼi ebʼ li eetalil* li yook xyeebʼal li Jesús, xeʼxkʼe reetal naq chirixebʼ yook chi aatinak.
46 Joʼkan naq xeʼraj xchapbʼal, abʼan nekeʼxxuwa ru li kʼiila tenamit xbʼaan naq li tenamit naril li Jesús joʼ propeet.
Xtzʼaqobʼ ebʼ li naʼlebʼ
^ Malaj «Teekʼix».
^ Taawil xchʼolobʼankil li aatin, Jehobʼa.
^ Malaj «kixmululi ribʼ».
^ Malaj «li jaljokil ru aatin».
^ Taawil xchʼolobʼankil li aatin, Jehobʼa.
^ Saʼ griego «li teʼuuchinq».
^ Malaj «ebʼ li jaljokil ru aatin».
