Mateo 26:1-75
-
Ebʼ laj tij nekeʼxkʼubʼ chanru xkamsinkil li Jesús (1-5)
-
Jun li ixq naxkʼe sununkil aseeyt saʼ xjolom li Jesús (6-13)
-
Jun aj chik li Paswa ut laj Judas naqʼaxtesink re (14-25)
-
Naxaqabʼaak li Xtzekemq li Qaawaʼ (26-30)
-
Li Jesús naxye chi rubʼelaj naq laj Pedro tixye naq inkʼaʼ naxnaw ru (31-35)
-
Natijok saʼ li naʼaj Getsemaní (36-46)
-
Nekeʼxchap ut nekeʼxkʼam (47-56)
-
Li nekeʼtzʼaqonk saʼ li Nimla Raqlebʼaal Aatin nekeʼraqok aatin saʼ xbʼeen (57-68)
-
Laj Pedro naxye naq inkʼaʼ naxnaw ru (69-75)
26 Abʼanan, naq ak kixye chixjunil aʼin, li Jesús kixye rehebʼ li xtzolom:
2 «Joʼ ak nekeenaw, saʼ wiibʼ kutan twanq li Paswa ut li Ralal li Winq tqʼaxtesiiq re naq ttʼuyubʼaaq chiru cheʼ».
3 Tojaʼ naq ebʼ li xbʼeenil aj tij ut ebʼ li cheekel winq re li tenamit xeʼxchʼutubʼ ribʼ saʼ xnebʼaal li rochoch li xyuwaʼil aj tij, aj Caifás xkʼabʼaʼ,
4 ut saʼ komonil xeʼok xkʼubʼankil chanru teʼxbʼalaqʼi re naq teʼruuq xchapbʼal ut xkamsinkil li Jesús.
5 Abʼan nekeʼxye chiribʼilebʼ ribʼ: «Inkʼaʼ tqachap saʼ li ninqʼe, maare anchal tixpoqoqi ribʼ* li tenamit».
6 Naq li Jesús wank chaq Betania saʼ rochoch laj Simón li saqlep rix,
7 jun li ixq kijilok chixkʼatq ut rikʼin wank jun li meet* li nujenaq chi sununkil aseeyt li qʼaxal terto. Ut naq li Jesús yook chi waʼak, li ixq kixkʼe sununkil aseeyt saʼ xjolom li Jesús.
8 Naq ebʼ li xtzolom xeʼril aʼin, xeʼchʼaʼajkoʼk ut xeʼxye: «Kʼaʼut yook chi hoymank li sununkil aseeyt?
9 Xeʼruuk raj xkʼayinkil chi terto xtzʼaq ut li xtuminal xeʼxkʼe raj rehebʼ li nebʼaʼ».
10 Naq li Jesús kixkʼe reetal aʼin, kixye rehebʼ: «Kʼaʼut nekeeraj xchʼiʼchʼiʼinkil li ixq aʼin? Us xbʼaanu we.
11 Xbʼaan naq ebʼ li nebʼaʼ junelik wankebʼ eerikʼin, abʼan laaʼin moko junelik ta wanqin eerikʼin.
12 Naq li ixq kixkʼe li sununkil aseeyt chiru lintibʼel yook inkawresinkil choʼq re linmuqbʼal.
13 Relik chi yaal ninye eere naq yalaq bʼar re li ruuchichʼochʼ bʼarwiʼ tkʼemanq chi naweʼk li chaabʼil esil, tkʼemanq ajwiʼ chi naweʼk li kixbʼaanu li ixq aʼin, ut chi joʼkan tjultikamanq».
14 Tojaʼ naq jun rehebʼ li Kabʼlaju chi tzolom, aj Judas Iscariote xkʼabʼaʼ, xkoho rilbʼalebʼ li xbʼeenil aj tij
15 ut kixpatzʼ rehebʼ: «Kʼaru teekʼe we wi tinqʼaxtesi eere li Jesús?». Xeʼxyeechiʼi re 30 tumin re plaat.
16 Chalen chaq aran, laj Judas kiʼok xsikʼbʼal chanru tixqʼaxtesi li Jesús.
17 Saʼ li xbʼeen kutan re li Ninqʼe chirix li Kaxlanwa li Maakʼaʼ Xchʼamal,* ebʼ li xtzolom li Jesús xeʼjilok chixkʼatq ut xeʼxye re: «Bʼar nakaawaj naq tqakawresi li Paswa?».
18 Aʼan kixye rehebʼ: «Ayuqex saʼ tenamit, ut teesikʼ jun li winq li ninnaw ru ut teeye re: “Laj Kʼutunel naxye: «Yook chi nachʼok xhoonalil linkamik. Saʼ laawochoch tinninqʼehi li Paswa rochbʼeenebʼ lintzolom»”».
19 Ebʼ li xtzolom xeʼxbʼaanu li kixye li Jesús ut xeʼxkawresi chixjunil choʼq re li Paswa.
20 Naq kiqʼoqyinoʼk, chunchu li Jesús saʼ meex rochbʼeen li kabʼlaju chi tzolom.
21 Ut naq yookebʼ chi waʼak, kixye rehebʼ: «Relik chi yaal ninye eere naq jun eere tqʼaxtesinq we saʼ ruqʼebʼ li xikʼ nekeʼilok we».
22 Naq xeʼrabʼi aʼin, ebʼ li xtzolom kʼajoʼ naq xeʼrahoʼk saʼ xchʼool ut xeʼok chi xyeebʼal: «Qaawaʼ, peʼyaal naq moko laaʼin ta?».
23 Kixsumehebʼ ut kixye: «Li naxchʼik li ruqʼ wochbʼeen saʼ li nimla sekʼ, aʼan li tqʼaxtesinq we.
24 Yaal naq li Ralal li Winq txik joʼ chanru kitzʼiibʼamank chaq chirix. Abʼan, ra tchalq saʼ xbʼeen li tqʼaxtesinq re li Ralal li Winq! Us raj choʼq re li winq aʼin naq inkʼaʼ raj kiyoʼlaak».
25 Laj Judas, li ok re xqʼaxtesinkil, kixye re: «At Kʼutunel,* ma laaʼin?». Li Jesús kixye re: «Laaʼat nakaanaw li xsumenkil».
26 Toj yookebʼ ajwiʼ chi waʼak naq li Jesús kixchap jun li kaxlanwa ut naq ak xtijok, kixjach, kixkʼe rehebʼ ut kixye rehebʼ: «Kʼulumaq, waʼomaq. Aʼin reetalil lintibʼel».
27 Chirix chik aʼan kixchap jun li ukʼlebʼ sekʼ li wank bʼiin chisaʼ, kibʼanyoxink chiru li Yos, kixkʼe rehebʼ li xtzolom ut kixye: «Ukʼumaq cheejunilex,
28 xbʼaan naq aʼin reetalil linkikʼel, “li xkikʼel li sumwank”, li thoymanq saʼ xkʼabʼaʼ naabʼalebʼ li qas qiitzʼin re naq teʼkuyeʼq teʼsacheʼq xmaak.
29 Abʼan ninye eere naq maajunwa chik twukʼ li bʼiin aʼin toj reetal naq twulaq li kutan naq twukʼ li akʼ bʼiin eerochbʼeen saʼ li Xʼawabʼejilal Linyuwaʼ».
30 Chirix chik aʼan, naq ak xeʼxbʼicha li bʼich re xloqʼoninkil li Yos, xkohebʼ saʼ li tzuul Olivo.
31 Tojaʼ naq li Jesús kixye rehebʼ: «Saʼ xkʼabʼaʼ li tinkʼul cheejunilex tineekanabʼ* saʼ li qʼoqyink aʼin xbʼaan naq tzʼiibʼanbʼil: “Tinkamsi laj ilol karneer, ut ebʼ li karneer teʼchaʼchaʼiiq”.
32 Abʼan, naq ak xinwaklesiik chi yoʼyo, tinxik cheeru saʼ xbʼehil Galilea».
33 Tojaʼ naq laj Pedro kixye re: «Saʼ xkʼabʼaʼ li taakʼul, chixjunilebʼ tateʼxkanabʼ* abʼan laaʼin maajunwa tatinkanabʼ!».
34 Li Jesús kixye re: «Relik chi yaal ninye aawe naq saʼ li qʼoqyink aʼin, toj maajiʼ ajwiʼ nayaabʼak li tzoʼ kaxlan ak xaaye oxibʼ sut naq inkʼaʼ nakaanaw wu».
35 Kichaqʼok laj Pedro ut kixye: «Usta tinkamq aawochbʼeen maajunwa tinye naq inkʼaʼ ninnaw aawu». Ut joʼkan ajwiʼ xeʼxye chixjunilebʼ li xtzolom.
36 Chirix chik aʼan, li Jesús xkoho rochbʼeenebʼ li xtzolom saʼ jun li naʼaj li naxkʼabʼaʼi Getsemaní ut kixye rehebʼ: «Kanaqex arin chi chunchu ut laaʼin tinxik leʼ chi tijok».
37 Tojaʼ naq kixkʼam chirix laj Pedro ut li wiibʼ chi ralal laj Zebedeo ut kiʼok chi rahoʼk xchʼool ut qʼaxal yook xkʼaʼuxl.
38 Li Jesús kixye rehebʼ: «Qʼaxal yook inkʼaʼuxl, nawekʼa naq kamk we. Kanaqex arin ut yoʼlenqex wikʼin».
39 Chirix chik aʼan, kinajtoʼk bʼayaq rikʼinebʼ, kixwiqʼibʼ ribʼ chiru chʼochʼ ut kitijok chi joʼkaʼin: «At Inyuwaʼ, wi naruhank, isi chiwu li ukʼlebʼ sekʼ aʼin; abʼan mibʼaanumank li nawaj laaʼin, chibʼaanumanq bʼan li nakaawaj laaʼat».
40 Tojaʼ naq kisutqʼiik bʼarwiʼ wankebʼ li xtzolom ut kixtawebʼ chi wark. Ut kixpatzʼ re laj Pedro: «Ma inkʼaʼ xexruuk chi yoʼlek jun hooraq wochbʼeen?
41 Meekanabʼ yoʼlek ut meekanabʼ tijok re naq inkʼaʼ textʼaneʼq saʼ li aaleek. Laaʼin ninnaw naq li winq naraj xbʼaanunkil li us, abʼan li xtibʼel* maare maakʼaʼ xmetzʼew re xbʼaanunkil».
42 Chirix chik aʼan xkoho chi tijok xkabʼ sutil ut kixye: «At Inyuwaʼ, wi inkʼaʼ naruhank risinkil chiwu li ukʼlebʼ sekʼ re naq inkʼaʼ twukʼ, chibʼaanumanq li nakaawaj».
43 Kisutqʼiik wiʼ chik ut kixtawebʼ chi wark xbʼaan naq inkʼaʼ chik nekeʼxkuy xwara.
44 Joʼkan naq kixkanabʼebʼ wiʼ chik ut xkoho chi tijok rox sut, ut kixye ebʼ li aatin li kixye chaq rubʼelaj.
45 Tojaʼ naq kisutqʼiik bʼarwiʼ wankebʼ li xtzolom ut kixye rehebʼ: «Aʼin maawaʼ xhoonalil re naq texwarq ut re naq texhilanq! Kʼehomaq reetal! Ak xnachʼok chaq xhoonalil naq li Ralal li Winq tqʼaxtesiiq saʼ ruqʼebʼ laj maak.
46 Waklinqex ut yoʼqebʼ. Kʼehomaq reetal, weʼ chaq li tqʼaxtesinq we».
47 Saʼ li hoonal ajwiʼ aʼan naq toj yook chi aatinak li Jesús, kiwulak laj Judas, jun rehebʼ li Kabʼlaju. Ut rochbʼeen laj Judas kichalk li kʼiila tenamit li wank xchʼiichʼ ut xcheʼ. Ebʼ aʼin taqlanbʼilebʼ xbʼaanebʼ li xbʼeenil aj tij ut ebʼ li cheekel winq re li tenamit.
48 Joʼkan bʼiʼ, li tqʼaxtesinq re kixkʼe rehebʼ li eetalil aʼin: «Aʼ li tintzʼubʼ ru, aʼan li teechap».
49 Joʼkan naq tiik xkoho rikʼin li Jesús ut kixye re: «Ma sa laachʼool, at Kʼutunel?»* ut kixtzʼubʼ ru.
50 Abʼan li Jesús kixye re: «At wamiiw, kʼaru ajʼe naq xatchalk». Tojaʼ naq xeʼnachʼok rikʼin li Jesús, xeʼxchap ut xeʼxkʼam.
51 Maakʼaʼ saʼ xchʼoolebʼ naq jun rehebʼ li winq li wank rochbʼeen li Jesús kixkʼe chi chʼiichʼ li xmoos li xyuwaʼil aj tij ut kixchʼot li xxik.
52 Tojaʼ naq li Jesús kixye re: «Xok laachʼiichʼ xbʼaan naq chixjunilebʼ li teʼxchap xchʼiichʼ, chi chʼiichʼ ajwiʼ teʼosoʼq.
53 Malaj nakaakʼoxla naq inkʼaʼ tinruuq xtzʼaamankil re Linyuwaʼ naq tixtaqla chaq anaqwan ajwiʼ naabʼal mil* chi ánjel?
54 Wi joʼkan raj tixbʼaanu, chanru ttzʼaqloq ru li Raatin li Yos li naxye naq joʼkan tento tkʼulmanq?».
55 Saʼ li hoonal aʼan li Jesús kixye re li kʼiila tenamit: «Ma xexchalk chinchapbʼal rikʼin chʼiichʼ ut cheʼ chanchan tawiʼ laaʼin aj elqʼ? Wulaj wulaj xinchunubʼ wibʼ chi kʼutuk saʼ li rochoch li Yos ut laaʼex inkʼaʼ xineechap.
56 Abʼan chixjunil aʼin kikʼulmank re naq ttzʼaqloq ru li xeʼxtzʼiibʼa chaq ebʼ li propeet». Tojaʼ naq chixjunilebʼ li xtzolom xeʼxkanabʼ xjunes ut xeʼelelik.
57 Li xeʼchapok re li Jesús xeʼxkʼam saʼ rochoch laj Caifás, li xyuwaʼil aj tij li wank rochbʼeenebʼ laj tzʼiibʼ ut ebʼ li cheekel winq.
58 Laj Pedro chi najt yook chaq xtaqenkil li Jesús toj reetal kiwulak saʼ xnebʼaal li rochoch li xyuwaʼil laj tij, ut naq ak wank chik aran, kichunlaak saʼ xyanqebʼ li moos re rilbʼal chanru tkanaaq chixjunil.
59 Ebʼ li xbʼeenil aj tij ut chixjunilebʼ li nekeʼtzʼaqonk saʼ li Nimla Raqlebʼaal Aatin* rehebʼ laj judiiy yookebʼ xsikʼbʼal ani tyoobʼanq tikʼtiʼ chirix li Jesús re naq tkamsiiq.
60 Abʼan maaʼani xeʼxtaw usta naabʼalebʼ xeʼwulak chi yoobʼank aatin. Tojaʼ naq xeʼwulak wiibʼ
61 ut xeʼxye: «Li winq aʼin kixye: “Laaʼin tinruuq xjukʼbʼal li rochoch li Yos ut chiru oxibʼ kutan tinwaklesi wiʼ chik”».
62 Tojaʼ naq li xyuwaʼil aj tij kixaqli ut kixpatzʼ re: «Ma inkʼaʼ tatchaqʼoq? Ma inkʼaʼ nakaawabʼi li nekeʼxye chaawix?».
63 Abʼan li Jesús inkʼaʼ kichaqʼok. Joʼkan naq li xyuwaʼil aj tij kixye re: «Ninye aawe naq taaye qe saʼ xkʼabʼaʼ li yoʼyokil Yos, ma laaʼat li Kriist, li Ralal li Yos?».
64 Kixye li Jesús re: «Heeheʼ, laaʼat xatyeehok re. Abʼan laaʼin ninye eere: chalen anaqwan teeril li Ralal li Winq kʼojkʼo saʼ xnim ruqʼ li Nimajwal Yos ut yooq chaq chi chalk saʼ xbʼeen li choql saʼ choxa».
65 Tojaʼ naq li xyuwaʼil aj tij kixqʼich li xtʼikr ut kixye: «Inkʼaʼ kiroxloqʼi li Yos!* Maakʼaʼ chik ajʼe naq teʼchalq jalan chik ebʼ li testiiw. Ak xeerabʼi naq inkʼaʼ kiroxloqʼi li Yos.*
66 Kʼaru nekeekʼoxla chirix aʼin?». Ebʼ aʼan xeʼxye re: «Xkʼulubʼ naq tkamsiiq».
67 Tojaʼ naq xeʼxchuubʼa saʼ xnaqʼ ru ut xeʼxkʼe chi ruqʼ. Wankebʼ xeʼxtzʼaj chi ruqʼ saʼ xnaqʼ ru
68 ut xeʼok xyeebʼal re: «At Kriist, wi laaʼat propeet, ye qe ani xsakʼok aawe».
69 Laj Pedro chunchu chirix kabʼl saʼ li nebʼaal naq jun li moos ixq kijilok chixkʼatq ut kixye re: «Laaʼat ajwiʼ yookat chaq chirix li Jesús, laj Galilea!».
70 Aʼut aʼan inkʼaʼ kixkʼulubʼa chiru chixjunilebʼ, ut kixye: «Inkʼaʼ nintaw ru li nakaaye».
71 Chirix chik aʼan, naq yook chi elk saʼ li okebʼaal, jun chik li saaj ixq kiʼilok re ut kixye rehebʼ li wankebʼ aran: «Aʼin rochbʼeen chaq li Jesús, laj Nazaret».
72 Ut laj Pedro inkʼaʼ kixkʼulubʼa wiʼ chik. Ut kixpatzʼ xkʼabʼaʼ li Yos ut kixye: «Inkʼaʼ ninnaw ru li winq aʼin!».
73 Moqon chik, li wankebʼ aran xeʼjilok chixkʼatq laj Pedro ut xeʼxye re: «Relik chi yaal naq laaʼat ajwiʼ jun rehebʼ aʼan; joʼkan ajwiʼ laawaatinobʼaal naqʼabʼank aawe».
74 Tojaʼ naq, laj Pedro kiʼok xyeebʼal naq ra tixkʼul wi inkʼaʼ naxye li yaal ut kiʼok xpatzʼbʼal xkʼabʼaʼ li Yos, tojaʼ naq kixye: «Laaʼin inkʼaʼ ninnaw ru li winq aʼin». Ut saʼ junpaat kiyaabʼak li tzoʼ kaxlan.
75 Laj Pedro kijultikoʼk re li kiyeeheʼk re xbʼaan li Jesús: «Toj maajiʼ ajwiʼ nayaabʼak li tzoʼ kaxlan ak xaaye oxibʼ sut naq inkʼaʼ nakaanaw wu». Ut kiʼelk chirix kabʼl, najiqʼjot chi yaabʼak xbʼaan xrahil xchʼool.
Xtzʼaqobʼ ebʼ li naʼlebʼ
^ Malaj «tixmululi ribʼ».
^ Saʼ griego «meet re alabastro». Aʼin jun li chʼina meet li yiibʼanbʼil rikʼin pek li natawmank chixkʼatq Alabastrón, Ejiipt.
^ Taawil xchʼolobʼankil li aatin, Ninqʼe chirix li Kaxlanwa li Maakʼaʼ Xchʼamal.
^ Saʼ griego «Rabí».
^ Malaj «textichkʼoq».
^ Malaj «teʼtichkʼoq».
^ Arin yook chi aatinak chirix li xwanjik li winq aj maak li moko tzʼaqal ta re ru li xyuʼam.
^ Saʼ griego «Rabí».
^ Saʼ griego «kabʼlaju legión». Taawil xchʼolobʼankil li aatin, legión.
^ Malaj «saʼ li Sanedrín».
^ Malaj «Kixhobʼ li Yos». Taawil xchʼolobʼankil li aatin, hobʼok.
^ Malaj «kixhobʼ li Yos». Taawil xchʼolobʼankil li aatin, hobʼok.
