Mateo 27:1-66
-
Naqʼaxtesiik li Jesús saʼ ruqʼ laj Pilaat (1, 2)
-
Laj Judas naxyatzʼ ribʼ (3-10)
-
Li Jesús wank chiru laj Pilaat (11-26)
-
Nekeʼxseʼe li Jesús chiru chixjunilebʼ (27-31)
-
Nekeʼxklawxi chiru cheʼ saʼ li naʼaj Gólgota (32-44)
-
Nakamk li Jesús (45-56)
-
Namuqeʼk li Jesús (57-61)
-
Nekeʼxkʼaakʼale li muqlebʼaal kamenaq (62-66)
27 Naq kisaqewk, chixjunilebʼ li xbʼeenil aj tij ut ebʼ li cheekel winq re li tenamit xeʼxchʼutubʼ ribʼ re xkʼubʼankil chanru teʼxkamsi li Jesús.
2 Ut naq ak xeʼxbʼakʼ, xeʼxkʼam ut xeʼxqʼaxtesi saʼ ruqʼ laj Pilaat, li ruuchil awabʼej.
3 Joʼkan bʼiʼ, naq laj Judas, li kiqʼaxtesink re, kiril naq kitenebʼaak kamk saʼ xbʼeen li Jesús, kixkʼe reetal naq moko us ta li kixbʼaanu. Ut xkoho chi xqʼaxtesinkil li 30 tumin re plaat rehebʼ li xbʼeenil aj tij ut rehebʼ li cheekel winq,
4 ut kixye rehebʼ: «Xinmaakobʼk, xinqʼaxtesi jun li winq li maakʼaʼ xmaak». Abʼan aʼanebʼ xeʼxye: «Laaʼo maakʼaʼ naqaj re. Aawilom chik laaʼat».
5 Joʼkan naq laj Judas kixkut chaq li tumin re plaat saʼ rochoch li Yos. Tojaʼ naq, xkoho ut kixyatzʼ ribʼ.
6 Abʼan ebʼ li xbʼeenil aj tij xeʼxxok li tumin re plaat ut xeʼxye: «Moko us ta xkʼebʼal li tumin aʼin saʼ li kʼulebʼaal li wank saʼ rochoch li Yos xbʼaan naq aʼan xtzʼaq* jun li winq li tkamsiiq».
7 Naq ak xeʼxkʼe ribʼ saʼ aatin, xeʼxloqʼ rikʼin li tumin aʼin li xchʼochʼ laj pakʼonel re naq aran teʼmuqeʼq li jalanebʼ xtenamit.
8 Joʼkan naq li chʼochʼ aʼin toj nakʼabʼaʼiik anaqwan Xchʼochʼel Kikʼ.
9 Tojaʼ naq kitzʼaqlok ru li kixye chaq li Yos saʼ xkʼabʼaʼ li propeet Jeremías: «Ut xeʼxchap li 30 tumin re plaat, li xtzʼaq jun li winq, li xeʼxxaqabʼ li ralal xkʼajol laj Israel
10 ut rikʼin li tumin aʼin xeʼxloqʼ li xchʼochʼ laj pakʼonel, joʼ kixye chaq we li Jehobʼa* naq tento tinbʼaanu».
11 Laj Pilaat kixpatzʼ re li Jesús naq wank chiru: «Ma laaʼat li awabʼej rehebʼ laj judiiy?». Kichaqʼok li Jesús ut kixye: «Heeheʼ, laaʼat yookat xyeebʼal».
12 Abʼan naq kiqʼabʼaak xbʼaanebʼ li xbʼeenil aj tij ut ebʼ li cheekel winq tik maakʼaʼ kixye.
13 Tojaʼ naq laj Pilaat kixpatzʼ re: «Ma inkʼaʼ nakaawabʼi chixjunil li nekeʼxye chaawix?».
14 Abʼan li Jesús inkʼaʼ kisumenk, maajun tʼorol raatin kixye. Ut xbʼaan aʼin kisach xchʼool laj Pilaat.
15 Joʼkan bʼiʼ, rajlal naq nawank li ninqʼe, laj Pilaat narisi saʼ tzʼalam junaq laj preex aʼ li nekeʼraj ebʼ li qas qiitzʼin.
16 Chiruhebʼ li kutan aʼan wank chaq jun laj preex li nawbʼil ru chiʼus li nakʼabʼaʼiik Barrabás.
17 Joʼkan naq laj Pilaat kixpatzʼ rehebʼ li qas qiitzʼin li chʼutchʼukebʼ aran: «Ani teeraj naq tinkanabʼ chi xik: ma laj Barrabás malaj li Jesús, li nayeemank re Kriist?».
18 Abʼan laj Pilaat naxkʼe reetal naq xeʼxqʼaxtesi xbʼaan xkaqalebʼ xchʼool.
19 Joʼkan ajwiʼ, naq laj Pilaat chunchu chaq saʼ xnaʼaj laj raqol aatin, li rixaqil kixtaqla xyeebʼal re aʼin: «Maataqsi aawuqʼ saʼ xbʼeen li winq aʼin li maakʼaʼ xmaak. Xbʼaan naq xinmatkʼe ut xinxuwak xbʼaan».
20 Abʼan ebʼ li xbʼeenil aj tij joʼwiʼ ebʼ li cheekel winq xeʼxtakchiʼi li tenamit re naq teʼxye naq teʼrisi laj Barrabás ut teʼxkamsi li Jesús.
21 Laj Pilaat kixpatzʼ wiʼ chik rehebʼ: «Bʼar wank rehebʼ li wiibʼ chi winq aʼin nekeeraj naq tinkanabʼ chi xik?». Li tenamit kixye: «Laj Barrabás».
22 Laj Pilaat kixpatzʼ rehebʼ: «Kʼaru tinbʼaanu re li Jesús, li nekeeye re Kriist?». Chixjunilebʼ xeʼxye: «Tʼuyubʼamaq chiru cheʼ!».
23 Laj Pilaat kixye rehebʼ: «Abʼan, kʼaʼut? Kʼaru xmaakoni?». Aʼut qʼaxal kaw wiʼ chik xeʼok xjapbʼal rehebʼ: «Tʼuyubʼamaq chiru cheʼ!».
24 Naq kixkʼe reetal naq maakʼaʼ chik naru xbʼaanunkil, xeʼok bʼan xpoqoqinkil ribʼebʼ,* laj Pilaat kixchʼaj li ruqʼ chiruhebʼ li qas qiitzʼin ut kixye: «Moko laaʼin ta wank we wi tkamq li winq aʼin. Anaqwan laaʼex chik yaal eere saʼ xbʼeen».
25 Naq li tenamit kirabʼi aʼin kixye: «Saʼ qabʼeen ut saʼ xbʼeenebʼ li qakokʼal tkanaaq li xkamik!».*
26 Joʼkan naq kixkanabʼ chi xik laj Barrabás, abʼan kixbʼaanu naq li Jesús tkʼeheʼq chi tzʼuum* ut kixqʼaxtesi re naq ttʼuyubʼaaq chiru cheʼ.
27 Tojaʼ naq ebʼ laj puubʼ li wankebʼ rubʼel xwankil laj Pilaat xeʼxkʼam li Jesús chisaʼ li rochoch laj Pilaat li ruuchil awabʼej, tojaʼ naq xeʼchʼutubʼaak ebʼ laj puubʼ chi xsutam li Jesús.
28 Naq xeʼrisi li xtʼikr, xeʼxkʼe chirix jun li kaqi tʼikr li nalemtzʼunk ru
29 ut xeʼxtzʼul jun li koroon re kʼix ut xeʼxkʼe saʼ xjolom. Ut xeʼxkʼe jun li cheʼ saʼ li xnim ruqʼ. Chirix chik aʼin, xeʼxwiqʼibʼ ribʼ chiru, xeʼok xseʼenkil ut xeʼxye re: «At awabʼej rehebʼ laj judiiy naqakʼe xsahil aachʼool!».
30 Tojaʼ naq xeʼxchuubʼa, xeʼxmaqʼ chiru li cheʼ ut rikʼin aʼan xeʼok xsakʼbʼal saʼ xjolom.
31 Chirix chik aʼan, naq xeʼraqeʼk xseʼenkil, xeʼrisi li kaqi tʼikr chirix ut xeʼxkʼe wiʼ chik li xtʼikr. Tojaʼ naq xeʼxkʼam re xtʼuyubʼankil chiru cheʼ.
32 Naq xeʼelk aran, xeʼxkʼul jun li winq aj Cirene, aj Simón xkʼabʼaʼ, ut xeʼxmin ru chi xpaqonkil li cheʼ.*
33 Naq xeʼwulak saʼ jun li naʼaj li naxkʼabʼaʼi Gólgota, li naraj xyeebʼal Xnaʼaj Xjolom li Kamenaq,
34 xeʼxkʼe re li Jesús li bʼiin li yukʼinbʼil rikʼin kʼahil qʼeen. Abʼan, naq kixyal, inkʼaʼ kixkʼulubʼa rukʼbʼal.
35 Naq ak xeʼxklawxi chiru cheʼ, xeʼxbʼuuli rix* li xtʼikr
36 ut aran xeʼkanaak chi chunchu chi xkʼaakʼalenkil.
37 Joʼkan ajwiʼ, saʼ xbʼeen xjolom xeʼxkʼe chi tzʼiibʼanbʼil kʼaʼut kitenebʼaak kamk saʼ xbʼeen: «Aʼin li Jesús, li awabʼej rehebʼ laj judiiy».
38 Chixkʼatq li Jesús xeʼxtʼuyubʼ chiru cheʼ wiibʼ aj elqʼ; jun saʼ xnim ut jun saʼ xtzʼe.
39 Ut li nekeʼnumeʼk aran yookebʼ xhobʼal li Jesús ut yookebʼ rekʼasinkil xjolom
40 ut nekeʼxye re: «Laaʼat, li xaajukʼ raj li rochoch li Yos ut xaayiibʼ raj wiʼ chik chiru oxibʼ kutan, kol aawibʼ! Wi laaʼat ralal li Yos, kubʼen chaq chiru li cheʼ!».*
41 Ebʼ li xbʼeenil aj tij rochbʼeenebʼ laj tzʼiibʼ ut ebʼ li cheekel winq xeʼok ajwiʼ xseʼenkil li Jesús. Ut xeʼok xyeebʼal:
42 «Kixkolebʼ li junchʼol, abʼan aʼan inkʼaʼ naru xkolbʼal ribʼ! Wi aʼan li awabʼej re Israel, kubʼeq chaq anaqwan chiru li cheʼ* ut tqapaabʼ re.
43 Kixkʼojobʼ chaq xchʼool rikʼin li Yos, anaqwan wi li Yos naraj xkolbʼal chixtenqʼaq xbʼaan naq aʼan kixye “Ralalin li Yos”».
44 Ebʼ laj elqʼ li tʼuytʼukebʼ chixkʼatq yookebʼ ajwiʼ xhobʼal.
45 Naq kachʼin chik ma tuqtu waʼlebʼ, kiqʼoqyinoʼk saʼ chixjunil li teep ut kikutanoʼk naq kachʼin chik ma oxibʼ hoor re ewu.
46 Naq kachʼin chik ma oxibʼ hoor re ewu, li Jesús kixjap re chi kaw ut kixye: «Éli, Éli, láma sabakhtháni?», aʼin naraj xyeebʼal: «At Inyos, at Inyos, kʼaʼut xinaakanabʼ injunes?».
47 Naq xeʼrabʼi aʼin, wiibʼ oxibʼ li wankebʼ aran xeʼok xyeebʼal: «Li winq aʼin yook xbʼoqbʼal laj Elías».
48 Ut jun rehebʼ xkoho saʼ aanil chi xsikʼbʼal jun li espoonj,* kixtzʼa saʼ li bʼiin li ra re, kixkʼe chiru li cheʼ ut kixjilosi chixkʼatq re naq trukʼ.
49 Abʼan ebʼ li junchʼol xeʼxye: «Kanabʼ! Qilaq ma tchalq laj Elías chi xkolbʼal».
50 Li Jesús kixjap wiʼ chik re chi kaw, ut kikamk.*
51 Tojaʼ naq, li kortiin* li wank saʼ li santil naʼaj re li rochoch li Yos kiqʼicheʼk chalen taqeʼq toj taqʼa ut kiʼelk saʼ wiibʼ, ut kiʼekʼank li chʼochʼ ut xeʼjacheʼk li ninqi pek.
52 Xeʼteehonk ebʼ li muqlebʼaal kamenaq ut naabʼalebʼ laj kʼanjel chiru li Yos li kamenaqebʼ chik xeʼkanaak chi kutankil
53 ut naabʼalebʼ li qas qiitzʼin xeʼilok re. (Naq ak xwaklesiik chi yoʼyo, wiibʼ oxibʼ li qas qiitzʼin li yookebʼ chaq chi chalk saʼ li muqlebʼaal kamenaq xeʼok saʼ li tenamit Jerusalén).*
54 Naq li winq li nataqlank rehebʼ laj puubʼ* ut li wankebʼ rochbʼeen chi xkʼaakʼalenkil li Jesús xeʼril li nimla hiik ut li yook chi kʼulmank, kʼajoʼ xeʼxuwak ut xeʼxye: «Chʼolchʼo tzʼaqal naq li winq aʼin Ralal li Yos».
55 Naabʼalebʼ li ixq li xeʼtaqenk re li Jesús chalen chaq Galilea re xchʼolaninkil, yookebʼ chaq chi ilok chi najt.
56 Saʼ xyanqebʼ li ixq aʼin wank li xMaría Magdalena, li xMaría, xnaʼ laj Santiago, ut laj Josés ut li xnaʼ ebʼ li ralal laj Zebedeo.
57 Naq ak kiʼewuuk, kiwulak jun li winq bʼihom re Arimatea, aj José xkʼabʼaʼ, li wank chaq ajwiʼ choʼq xtzolom li Jesús.
58 Li winq aʼin kiʼaatinak rikʼin laj Pilaat ut kixpatzʼ naq tkʼeheʼq re li xtibʼel li Jesús. Tojaʼ naq laj Pilaat kixtaqlahebʼ laj puubʼ chi xqʼaxtesinkil re.
59 Ut laj José kixkubʼsi li xtibʼel li Jesús, kixbʼat rikʼin jun li chaabʼil tʼikr saq ru re liin
60 ut kixkʼe saʼ jun li akʼ muqlebʼaal li kixhop saʼ pek. Li muqlebʼaal aʼin re li winq. Chirix chik aʼan kixtolkʼosi jun li nimla pek chire li muqlebʼaal ut xkoho.
61 Abʼan li xMaría Magdalena ut li xMaría xeʼkanaak chi chunchu chiru li muqlebʼaal.
62 Aʼin kikʼulmank saʼ xkutankil li kawresink choʼq re li sábado. Wulajaq chik, ebʼ li xbʼeenil aj tij ut ebʼ laj pariseey xeʼxchʼutubʼ ribʼ rikʼin laj Pilaat
63 ut xeʼxye re: «Waʼ, naq toj yoʼyo chaq li bʼalaqʼ aj winq aʼin, jultik qe naq kixye: “Saʼ rox kutan tinwaklesiiq chi yoʼyo”.
64 Joʼkan naq, taqla xyeebʼal rehebʼ naq teʼxkʼaakʼale li muqlebʼaal toj naq twulaq li rox kutan, maare anchal ebʼ li xtzolom teʼchalq chi relqʼankil li kamenaq ut teʼxye re li tenamit: “Ak xwaklesiik chi yoʼyo saʼ xyanqebʼ li kamenaq!”. Li tikʼtiʼ aʼin numtajenaq wiʼ chik xyibʼal ru chiru li kixye chaq xbʼeenwa li Jesús».
65 Laj Pilaat kixye rehebʼ: «Naru nekeekʼam jun chʼuut aj puubʼ; ayuqex, ut kʼaakʼalehomaq chiʼus li muqlebʼaal».
66 Joʼkan naq, xkohebʼ ut re naq maaʼani t-oq saʼ li muqlebʼaal, xeʼxnatʼ chiʼus rikʼin pek ut ebʼ laj puubʼ xeʼkanabʼaak aran chi kʼaakʼalenk.
Xtzʼaqobʼ ebʼ li naʼlebʼ
^ Saʼ griego «xtzʼaq li kikʼel».
^ Taawil xchʼolobʼankil li aatin, Jehobʼa.
^ Malaj «xmululinkil ribʼebʼ».
^ Saʼ griego «Li xkikʼel tkanaaq saʼ qabʼeen ut saʼ xbʼeenebʼ li qakokʼal».
^ Taawil xchʼolobʼankil li aatin, kʼehok chi tzʼuum.
^ Malaj «li cheʼ re rahobʼtesiik». Taawil xchʼolobʼankil li aatin, cheʼ re rahobʼtesiik.
^ Taawil xchʼolobʼankil li aatin bʼuulink.
^ Malaj «li cheʼ re rahobʼtesiik». Taawil xchʼolobʼankil li aatin, cheʼ re rahobʼtesiik.
^ Malaj «li cheʼ re rahobʼtesiik». Taawil xchʼolobʼankil li aatin, cheʼ re rahobʼtesiik.
^ Li espoonj aʼin chanchan li mach palaw malaj li estropajo li naxtzʼubʼ li haʼ.
^ Saʼ griego «kixqʼaxtesi li xmusiqʼ». Taawil xchʼolobʼankil li aatin, musiqʼ.
^ Aʼin jun li pimil tʼikr li naxjach li Santil Naʼaj rikʼin li Qʼaxal Saant li wank saʼ rochoch li Yos.
^ Saʼ griego «li santil tenamit». Li naʼlebʼ li wank saʼ li kotko aʼan li kikʼulmank moqon.
^ Li winq aʼin xaqabʼanbʼil re xtaqlankil jun siʼeent aj puubʼ.
